S goot nimmy so lang, denn isches sowyt,
denn fille sich d stroosse mit ganz huffe lyt,
und wenn de guet luegsch, denn findsch im gedrugge,
e glaini gruppierig im fachschargon  „gugge“.

Die gugge - under "kannibâle" bekannt,
veraint männligi muusiger vo dr stadt und vom land,
und nimmt me sich ai sekündeli zyt,
erkennt me do drunder die folgende lyt:

Dr tom isch dr scheff und dr voorderschti maa,
und ischer nid do, laufe d dechter voor‘draa.

Schlaagzig spiile dr nick und dr till,
(wobyy dr letscht mit strigg-käppli uffalle will)
gfolgt vom Zirni, wo s handwärgg verstoot,
und maschiinegweerartig uffs drummelfäll schloot.

Dehinter kunnt d paugge (sin aigentlig zwai),
doch well dr Striby im Kurs isch, pauggt dr fabi elai.

D Drumbeete hänn daas joor s regischter uffgstoggt,
hänn dr benny vom velo ans noodeblatt gloggt,
wo dr binggi ihm hilft und seit "alles kunnt guet",
(wenn är grad mol nid wider gwängele duet)
s perfeggdioniert und daas ooni geteese,
dr ito mit tips das drumbeetegebleese. "Dient piaano - defiir schnäller aaber nit z vyyl"
em schreck isch das glyych, dä macht eh waas är will,
bim "My Way" kemme sich mischi und mo e bitz neecher,
dr däni spiilt au - aifach 2 stuefe heecher.

Bi de posuune isch alles bim alde bliibe,
s bruucht kaini neye - s' sin jo scho siibe,
dr hofi isch immer z haa fiir e gspass,
drait d faasnacht im häärze und dr aadler im pass,
dr ärnschtli und joel dien - wenn si nit guuge,
anere cohiba oder sunscht ebbis suuge,
e draatsch mitem kuno isch immer e gnuss,
nur - d helfti verstoosch nid und dr räscht isch oft stuss,
ganz wie bim päsgge zer speetere stund,
do kunt nur no saich in "Francé" uss sym "mund".

Dr claude und dr silvio - die dien mer gfalle,
dien lieber duur d muusig statt schwätze ufffalle,

bi de bässli isch dr pauli als neye yygstande,
(dr letscht ney het dr rosi-tescht knapp nit bestande)
uffem heernli bruucht dr page sämmtlige blatz,
nit fiir d repertoire-lischte sondern grad dr ganz noodesatz,
dr brenna und oski die dien bim spiile,
ganz gärn zwischeduure zem page iibereschiile.

D Sousis deene wie immer geniaal,
sly linggs, horni rächts und dr kübli zendraal,
"genial" ha n y gsait nit well y will schlyyme,
sondern well sich "ganz ok" uf "zendraal" nid duet ryyme,

In dämm sinn e scheene, bis bald mitenand,
gniesset die faasnacht und sin lieb zunenand,
denn dängge au d zueschauer nuur guets und nit schlächts,
s griesst eych alli frindlig - e paugge..... (die rächts)

Fabian Brogle