Oscar Lopez, Majoor vo de "KanniBâle" und Mit-Produzänt vom "nginious!" Gin
   
 

 

Zeerscht emol rächt härzligge Dangg, ass Du no eso spondaan yygsprunge bisch. Me kennt Di jo als Majoor vo dr Guggemuusig "KanniBâle" und het Di scho in de vergangene Fasiländer efters läse kenne. Y wurd aber jetz gärn e weeneli mee iiber Dyni Aarbet als Gin-Prodzänt wisse... feen mer aber vo voorne n'aa....

Du bisch jo glehrte Wyy-Sommelier oder ?

  Osci:

Nit ganz... y ha myni Wyy-Ussbildig bi dr "Académie du Vin" gmacht und do goots nit numme um die raini Aarbet vom Sommelier, wo s Verbindigsstigg zwische Kuchi, Gascht und Wyy isch... sondern me lehrt au d Aarbet vom Winzer und em Källermaischter kenne. Als Wyy-Akademiker hesch also e Aanig vo allem.

Was isch denn d Uffgoob vomene Wyy-Sommelier ?
Dr Wyy-Sommelier findet me voor allem in dr Gaschtronomie und isch fir syn Wyykäller verantwoortlig... dh. är muess sich iiberlegge, welli 'Aart Kuchi in sym Huus aabotte wird, är muess d Idee vom Kuchichef kenne und welli Arome n'är vermittle wott... und dämentsprächend wird dr Sommelier syn Wyykäller gstalte und zwoor esoo, ass die perfäggti Verbindig zwische Ässe und Wyy vorhande n'isch.

Wie lang goot denn die Ussbildig an dr "Académie du Vin" ?
Dr Kurs isch in verschiideni Modul uffdailt und goot vomene Grundkurs bis zem "Master of Wine"... dasch denn s heggschte vo de Gfiil und vo dääne gits numme e Handvoll in dr Schwiz.

     
  Du hesch jo drufaabe denn e tolle Job bi dr "Paul Ulrich AG" am Spalebärg gfunde und bisch Fachmaa fir Whiskey woorde. Jetz hesch dr Schritt in d Wält vom Gin gmacht... wieso ussgerächnet Gin ?
  Osci:

Also... schlussändlig het alles mit Alkohol z due ;-) Aber in Wiirgligkait het alles mit "Gnuss" z due... Wyy, Whiskey und Gin sin alles Gnussmittel und doo muess fir mii d Qualität stimme.

     
 

Du schaffsch jetz nimme bi dr "Paul Ulrich AG", sondern bisch bim Gin Härsteller "nginious!" yygstyyge... worum ?

  Osci:

Wo n y vom Oliver Ulrich aagfroggt worde bi und dr Wäggsel zem Gin gmacht ha, isch au doo fir mii d Qualität im Vordergrund gstande. Do y dr Oliver scho seer lang kenn und au waiss, ass syni Philosophie und d Qualität bi ihm seer hooch isch... ha n y das Aagebot vo ihm nadierlig seer gärn aagnoo.

Ok Du bisch jetz Sälbstständigerwärbende im Gin-Segmänt... bevoor mer aber jetz iiber "nginious!" reede, zeerscht no e anderi Froog...

In de letschte Joore het sich jo e unglaublige Hype uff Gin entwigglet... friener hets numme dr "Gordon's Gin"
gää, aber hitte sin eso vyyl verschiideni Gin Soorte uffem Märt, ass me fascht dr Iiberbligg verliert. Worum spinne eso vyyl Lyt uff Gin ? Was isch d Faszinatioon vo Gin ?
Mer meerge scho syt Joore, ass Gin e ganz groosses Thema isch. Gin isch e Geträngg, wo Jung und Alt wie au
Maa und Frau aaspricht... s isch Hip. Y kenn praggdisch niemer, wo Gin nit gärn het... s isch immer d Marge, wo me nit gärn het, aber nie dr Gin als Geträngg und dasch sicher aine vo de Hauptgrind, worum dr Gin eso beliebt isch. Wenn me emol anere Gin-Deguschtatioon gsi isch, denn gseet me die enoormi Vyylfalt wo s in däm Segmänt git. Als Produzänt vo Gin ka me ganz vyl richtig, aber au ganz vyl falsch mache.

     
  Fir alli, wos nit wisse... was isch im Gin alles dinne ?
  Osci:

Gin isch im Prinzip e Wacholder-Schnaps.

Wo jeede Produzänt zuesätzlig no syni spezielli Essänze dezue git...
Jo genau... die sogenannte "Botanicals"... dasch denn die individuelli Ghaimrezäptmischig, wo kai Produzänt verrootet. Bi uns ischs kai Ghaimnis, welli Botanicals mir in unserem Gin verwände... was aber e groosses Ghaimnis isch, isch d Rezeptuur ;-).

Was sin denn genau "Botanicals" ?
Wacholder, Bitterorange, Quitte, Koriander, Ingwer, Siessholz, Kamille und und und...
Mir bi "nginious!" verwände aber au Kreatioone wie Rhabaarber, Marroni oder Rauchsalz uss de schwizer Alpe.

     
  "nginious!" Gin isch e ächte Basler Gin... was genau isch den eso baaslerisch an däm Gin ? D Etikette ? ;-)
  Osci:

D Etikette nit ;-)... also was ys als Basler Gin definiert isch, ass mer die eerscht und ainzig Destillerie sin, wo in Basel-Stadt produziert und mer unser Produggt somit au als "Basler Gin" bezaichne kenne.

Und dasch bi de andere Produzänte nit eso, wo sich als "Basler Gin" bezaichne ?
Die andere Basler Gin's wo me kennt, sind nit wiirglig in Basel härgstellt woorde... d Idee kunnt zwoor vo Basler, aber dr Gin sälber wird nit in Basel produziert.

     
 

Wie vyyl Gin Soorte gits aigentlig ?

  Osci:

S git ebbe 4000 verschiideni Gin Soorte uffem Märt... s git aber numme ai "Smoked and Salted Gin"... s git numme ai "Vermouth Cask Gin" wo imene Wermuet-Fass gryfft isch... und s git definitiv numme ai Gin, wo e Badkappestoff als Verpackigsmaterial um syni Fläsche het und das macht "nginious!" scho seer innovativ.

     
  Eyre Gin haisst "nginious!"... wie sin Ihr uff dä Namme koo ?
  Osci:

"nginious!" isch e Wortspiil und kunnt vo "ingenious"... also "Geniaal"... und het dr Aaspruch an sich sälber, d Gränze immer wider noo hinte z verschiebe und Sache z mache, wo sunscht niemer gmacht het. Bi däne vyle Gin Soorte wo uffem Märt sin, ischs aifach immer s glyche... immer die glych Story... me nimmt ebbis, baschtlet iirgendebbis regionaals dryy und wirfts uffe Märt. Neyi Produggtidee sin seer weenig deby.

Wie lang gits "nginious!" scho ?
Syt Juli 2014.

     
  Wie vyl verschiideni Gin Soorte gits in Eyrem Sortimänt ?
  Osci:

Mittlerwyle sin mer bi 5 Gin plus e "Bottled Negroni".

"Bottled Negroni" ?
Jo, Negroni... aine vo de ganz groosse, klassische Cocktails wo s git und dä hänn mer fixfeertig inere Fläsche.

     
  Ihr sin jo e ganz jungi Firma... wie sin Ihr bis jetz mitem Verlauf z friide ?
  Osci:

Syt 2014 ischs e rächti Bärg- und Talfaart gsii... aber mittlerwyle gots rächt uffwärts... wie sait me eso
scheen ? "Aller Anfang ist schwer" ;-)
Ussem Nüt uuse e Gin Marke ussem Boode z stampfe, koschtet nadierlig enoorm vyl Energie... aber mer sin jetz wiirglig uffeme seer guete Wäg. Mittlerwyyle exportiere mer in 15 Länder und s Wisse, ass unsere Gin iirgendwo inere Bar z Madrid drungge wird, isch nadierlig scho toll..

     
  Ihr hänn jo beraits scho Medallie fir Eyre Gin gsammlet stimmts ?
  Osci:

Mer hänn scho mehreri Medallie mit unserem Gin ghoolt... mer sin sogar in San Francisco an dr
"World Spirits Competition" premiert woorde.

     
  Die Fläsche gseen au wirglig toll uss find y... und das blaue isch e Badkappe ?
  Osci:

Jo dasch unsere "Summer Gin".


     
     
  Verrootsch ys e aifachs Gin Rezäpt, wo e jeede zueberaite ka ?
  Osci:

S isch e aifachs Rezäpt und zwoor Gin-Tonic... aaaaaber... s kunnt uffs Tonic-Water aa, wo me verwändet. An de Deguschtatioone wird y immer gfroggt, welles Tonic-Water me verwände soll... s git jo nit numme s Schweppes-Tonic, sondern e Vyylzaal an Tonic-Water. Wenn me jetz unsere Badkappe-Gin nimmt, isch unseri Empfählig "Mediterranean Tonic-Water" vo "Fever-Tree"... dezue e Basilikum Blatt und e Schnitz wysse Pfirsich... et voilà :-)

     
     
  Stimmt das, ass Ihr e Gin usschliesslig firs Hotel "Drey Keenig" kreiert und produziert hänn ?
  Osci:

Dasch eso... "nginious!" isch quasi dr Hofliferant vom Hotel "Trois Rois"... also was dr Gin betrifft. Zämme mitem Hotel, hänn mer e neye Gin kreiert, wo numme fir das Hotel brennt wird und dä gits deert numme an dr Hotelbar zem gniesse.

     
  Gits bi Eych au Deguschtatioone ? Ka me Eyri Destillerie go aaluege ?
  Osci:

Mer fiere immer emol wider "Master Classes" duure... also fir Gastronomiebetriib wo n ys aafrooge und unseri Destillerie kennelehre wänn... das ka denn scho emol 3h goo.

Wie gseet esoone "Master Class" uss ?
Mer zaige unseri Destillerie, unsere Gin wo mer hänn und verzelle vyyl iber s Thema "Gin".

Aber me ka au als Privaatpersoon verbyykoo ? Also mitere Gruppe main y ?
Jo sicher... aifach luege uff http://www.nginious.ch und aamälde.

     
  So... verleen mer emol dr Gin und schwängge emol e weeneli zue Dir perseenlig... Du bisch jo unsere Majoor höhöhö... bisch baraat fir d Faasnacht ?
  Osci:

Hejoo... y bi seer baraat :-). Mer hänn gescht unseri letscht Broob kaa (Aameergig: 5.2.2018) und y bi miteme riise Smile haim gange und ha mer dänggt, ass mer alli wiirglig motiviert und baraat sin. Die neye Stiggli sitze... mee oder weeniger ;-) und am näggschte Wucheänd sin mer in Laufeburg und Morcote.

     
  Noonemool ganz kurz... wie erläbsch Du als Majoor vo de "KanniBâle" d Faasnacht ?
  Osci:

Jäää... wie erläbt me d Faasnacht als Majoor vomene wilde Huffe ??? S isch halt scho esoo und hät das sälber nit dänggt, als Majoor muess me wiirglig 3 Daag lang hochkonzentriert sii. Y ka mi an dr Faasnacht goo loo, aber muess mi halt au immer wider brämse, ass y d Termin yyhalte due. Mer sin jo nit offiziell bim Comité aagmolde, aber mer raie n ys ainewäg am Mäntig und Mittwuch in Cortège yy und do muess me halt au luege, ass me d Reegle yyhaltet, wo s au an dr Faasnacht git.

Mer laufe aifach hindedryy und dängge "Dä deert voorne wirds scho richte"...
Jo eso ungefähr laufts... und y hätt nie dänggt, was es do oorganisatoorisch alles dezue bruucht, zem e gueti Faasnacht z gstalte. 3 Daag sin seer lang und me wott jo, ass d Jungs e tolli Faasnacht hänn und dämentsprächend muess me au e guets Brogramm zämmestelle.

     
 

Welles sin Dyni 3 goldige Reegle als Majoor ?

  Osci:
1.) D Reegle Nummere 1 isch, ass mers guet hänn underenand... mer sin 30 Naase, 30 verschiideni Lyt und vo dämhär brobiert me halt au d Faasnacht eso z gstalte, ass fir jeede ebbis deby isch.
2.) Au wenn mer nit bim Comité aagschlosse sin, het d Faasnacht ihri Reegle... und die brobier y eso guet wie meeglig yyzhalte.
3.) Au wenn mer das nit glaubsch... aber eso weenig wie meeglig Alkohool dringge, solang mer uff dr Route sin.
     
  Was beditet Dir d Faasnacht ?
  Osci:

Y fihl mi seer mit Basel verbunde und fir e Basler sin das halt au die 3 scheenschte Daag. Bi de "KanniBâle" broobe mer jo praggdisch s ganz Joor duure fir die 3 scheenschte Daag und investiere seer vyl Aarbet und Schweiss... und s Ergäbnis wänn mer nadierlig au de Lyt zaige und ys entsprächend presentiere.

     
  Wenn foot bi Dir s Faasnachtskribble n'aa ?
  Osci:

Aigentlig scho nooem Neyjoor... sobald die eerschte Voorfaasnachtsaaläss aafeen und me s Goschdym ussem Schrangg hoolt. Au wärend dr Broobe loos y gnauer zue, wies deent und ob alles sitzt... denn meerg y au, ass d Faasnacht gly kunnt und s Kribble isch au scho doo.

     
  Was hesch emol als glaine Bueb welle wärde ?
  Osci:

My Draumbruef isch immer Lokifierer gsii. Y ha n'emool e Schnupperlehr als Bahnbetriibsdisponänt gmacht und ha emol ganz voorne im Fiererstand deerfe sitze und mitfaare... und dasch fir mii e n'Erläbnis gsii, wo bis hitte no in mir presänt isch. Speeter ha n y denn e Lehr als Koch aagfange und dasch denn au myn Bruef woorde.

     
  Was macht Di gligglig ?
  Osci:

Myni 3 Kinder, myni Familie und myni Frinde...

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Osci:

Y kumm jo uurspringlig uss Mittelamerika... gnauer uss El Salvador... und bi uns ischs immer esoo gsii, ass mer
jeede Sunntig, und do main y wiirglig jeede Sunntig, ans Meer gfaare sin. Und immer wenn y iirgendwo in myne Feerie am Meer bi, erinneret mi das an sälli Zyt mit mynere Familie zrugg... dr Gschmagg und s Grisch vom Meer, wie au s visuelle.

     
  Welles isch Dy absoluts Highlight gsi im 2017 ?
  Osci:

Zämme mit myne Kinder, sin mer uffe Städtetrip noo Frankfurt und hänn deert e baar tolli Daag mitenand verbrocht und die Stadt usskundschaftet. S isch e super Sach gsii und y gniess das immer, wenn mer alli zämme so unbeschweert d Zyt mitenand verbringe... dasch jo bi junge Erwaggsene nimm eso sälbstverständlig, ass die no zämme mitem "Alte" fuurt geen ;-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Osci:

Dasch no witzig... y ha wider aagfange, die alte Film vom Charlie Chaplin z luege und dängg mer immer wider, was fir e geniaale Typ das gsii isch. Mit ihm wurd y gärn emol e luschtige n'Oobe verbringe welle...

     
  Was wirdsch an Fraue nie verstoo kenne ?
  Osci:

ALLLEEESSS ;-) Also... ass es doo protokolliert isch... y bi Single und das erklärt doch alles oder ? ;-)

OK, aber s git doch bestimmt no ebbis speziells oder ?
Also was y wirglig nit verstoo kaa isch, wie Fraue ussere Mugge, e Mammut generiere kenne...

Guet, do hesch rächt ;-))

     
  3 Sache wo no unbedingt in Dym Lääbe mache wottsch...
  Osci:
1.) Y wurd gärn emool noo Nepal raise...
2.)

Und wenn y scho in Nepal wär, denn mecht y z Fuess uffe groosse Bärg uffe laufe und e Kloschter bsueche... 1 Wuche numme meditiere... ooni Alkohool und Fraue ;-)))

3.) Ich mecht unbedingt emol noo Schottland und ganz vyl Whiskey-Destillerie bsueche. In Springbank isch myni Lieblingsdestillerie, deert ka me e "Master Class" bsueche und das wurd y gärn emol mache.
     
  Wär wurdsch gärn emol ins Dschungelcamp schigge ?
  Osci:

Dii ;-)

Seggel Du elände ;-)

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Theater...

  Basel... Myni Haimat...
  Ziiri... Nit myni Haimat ;-)
  Herbschtmäss... Bi n y friener seer gärn gange, ha aber s Gfiil, ass sich d Herbschtmäss veränderet het und gang dorum nimm eso gärn deert aane....
  Gin... E neye Bestanddail vo mym Läbe...
  Donald Trump... Näggschti Froog...
  50 Shades of Grey ...

Sait mer nit... nie gläse und nie gsee.

   

 

  So, jetz die allerletschti Froog... Du bisch jo s Diirli "2" und dorum s letschte Interview vom Fasiländer 2018... morn kunnt denn no e glains Abschlussvideo. Wottsch de Läser no ebbis saage ?
  Osci:

Jo gärn... y winsch alle Läser in mym Namme und nadierlig au im Namme vo dr Guggemuusig "KanniBâle" e rächt scheeeeeni Faasnacht... und wott nadierlig no druff hyywiise, ass am Faasnachtszyschdigzoobe ab 22:00 bi dr Draischyybe im Groossbasel, d "Birsig Synfonie" stattfindet. Mer spiile als 3. Gugge uff dr Biini... kemmet alli verbyy, s loont sich wiirglig.

     

Vyyle Dangg fiir Dyni Antwoorte