Caroline Rasser, Schauspiilerin und Laiterin Theater "Fauteuil"
   
 

 

Si sin jo als Theaterlaiterin s ganz Joor duure seer engagiert... voor allem wärend dr Voorfaasnachtszyt mitem "Pfyfferli". Wenn feen d Voorberaitige fiir die näggscht Ussgoob vom "Pfyfferli" aa und wie vyyl Zyt nimmt das in Aaspruch, bis denn s Brogramm stoot ?

  Caroline Rasser:

Nooem "Pfyfferli" isch voorem "Pfyfferli". Die letscht Voorstellig vomene Joorgang goot zimmlig nootloos in d Voorberaitig firs näggschte iiber.

     
  Sobald d Dernière vom "Pfyfferli" verbyy isch, sitze sicher alli Schauspiiler zämme, schnuufe kurz duure und stosse zämme uff die erfolgryych, vergangeni "Pfyfferli"-Ussgoob aa... wie fyyrt me das zämme ? Eenter ruhig oder goot do au emol d Boscht ab, well vellicht die ganz Aaspannig wäg isch ?
  Caroline Rasser:

Mer fyyre jewyyls noo dr Frytigsvoorstellig vo dr letschte Spiilwuche. Voor dr Faasnacht spiile mer noonemool am Samschtig und Sunntig 2 Voorstellige pro Oobe. Am Sunntig noo dr letschte - also aigentlig numme weenig Stunde voorem Morgestraich - sin mer denn alli zimmlig "uff de Wegge". S liggt denn au e Marathon vo rund 60 Voorstellige hinter ys und vorhär ischs e seer intensiivi Broobezyt gsii. Aber an sällem Frytig kas denn scho emool voorkoo, ass d Boscht abgoot ;-)

     
 

Isch dr Wäg zer Schauspiilerin hitte anderscht als friener ?

  Caroline Rasser:

Y nimm die Ussbildig als ganzhaitliger woor. Singe, Danze, Spiile goot hitte dittliger Hand in Hand. D Konkurränz isch immer scho do gsii und zweenig Aarbet fir z vyyl Talänt au... Duurschtstregge gits fir die maischte Schauspiiler. S isch e wunderscheene Bruef, aber ka au gnaadeloos hart sii. Numme wär s Ungwisse usshalte ka, ka in däm Bruef iiber e lengeri Zyt bestoo.

     
  D Ereffnig vom "Fauteuil" im Joor 1957, muess unglaublig gsii sii...
  Caroline Rasser:

S muess e bsunderi Stimmig gsii si an sällem dänggwiirdige Novämberoobe im Joor 1957. D Basler und Baslerinne sin uss alle Richtige in d Altstadt koo. Alli hänn e Stuel mitbrocht: Wienerstiehl, bolschtereti Stiehl, voornämi Biidermaiersässel, aifachi Hogger und Scheemeli... D Aakindigung vo däre Theaterereffnig, wo me anstell vomene Yydrittsgäld e Stuehl verlangt woorde n isch, het d Rundi gmacht. My Babbe het gstraalt, denn syni Idee isch uffgange. D Theaterbestuehlig, fir das ihm s Gäld gfählt het, isch gsicheret gsii.

     
  Die ganz "Pfyfferli"-Saison raubt aim jo zimmlig vyl Kraft und Energie... blybt noo dr letscht Voorstellig iiberhaupt no Fraid uff die aigentlig Basler Faasnacht oder isch me denn e weeneli "faasnachtsmied" ?
  Caroline Rasser:

Nai, faasnachtsmied nit... aber vellicht e weeneli voorfaasnachtsmied. Die 3 Faasnachtsdaag ka me nit mit dr Aarbet uff dr Biini verglyche... im Geegedail... s isch scheen, wenn denn ändlig doo isch, was mer in Voorfraid iiber Moonet bespiilt und besunge hänn.

     
 

Was beditet Ihne d Faasnacht ?

  Caroline Rasser:

Y nimm d Faasnacht als wunderbaars-kreatiivs Ventiil fir so vyyl Mensche woor... egal uff welli Aart und Wys si e Dail devoo sin. Y mag dä Ussnaamezuestand, wenn die ganz Stadt vibriert.

     
  Wie hänn Si als glains Maitli d Faasnacht erläbt ?
  Caroline Rasser:

Y bi in Biel-Bänke uffgwaggse und d Faasnacht isch dorum - im Geegesatz zer Stadt - nit s ganz Joor duure presänt gsii. Mer sin oft mit unsere Groosseltere an Cortège gange... fir uns isch das e Bsuech in die groossi Stadt gsii... ganz anderscht als d "Buurefaasnacht" uffem Land. Y ha die Ussfliig ins faasnächtlige Basel immer seer gärn kaa. S "Pfyfferli" hänn mer scho als Kinder deerfe go aaluege. Y ha die Goschdym immer eso wunderscheen gfunde und has seer gnosse, wo mer als Kinder underem Joor duure im Goschdym-Laager hänn deerfe dryyschlipfe.

     
  Het sich d Faasnacht im Geegesatz zue friener veränderet ? Und wenn jo, in welli Richtig ?
  Caroline Rasser:

Daas ka n y als Landai schweer beurdaile... voor allem doorum, well y - wo n y in d Stadt zooge bi - faggtisch wärend vyle Joore wärend dr Faasnacht, in Ziiri bim Färnseh am Draie gsii bi. Y bi also e faasnächtlige Spootzinder.

     
 

Gits au emol e Momänt, wo Si iirgendwoo fir sich ganz elai e Priise Faasnachtsluft schnuppere ?

  Caroline Rasser:

Jo, y bi wärend de 3 Faasnachtsdaag im Duurysatz in unserem Theater. Mer hänn e baar Schnitzelbangg-Oobe und anderi Aaläss uffem Brogramm. Zer spoote Stund, wenn mer unseri Door schliesse, gniess y d Faasnachtsnächt in dr Innerstadt bimene Spaziergang... mänggmool au im Goschdym und mit Larve... das find y bsunders scheen.

     
  Sin Si mänggmool au als aggdiivi Faasnächtlere underwäggs ?
  Caroline Rasser:

Aggdiivi Faasnächtlere bi n y nie gsii... defiir e hyperaggdiivi Voorfaasnächtlere. Friener als Kind in Biel-Bänke isch Clique-Läbe aifach z wyt ewäg und dorum kai Thema gsii. Wo myni Dochter als Primaarschielere in e Clique gange n'isch, ha n y uff däm Wäg deerfe miterläbe, wie scheen und berychernd so ebbis fir Kinder sii ka... und nadierlig au fir Erwaggseni. Goschdym mänggmool joo, mänggmool nai... aber s kunnt scho voor, ass y d Anonymität im Goschdym und mit Larve seer gniess.

     
  Wenn foot bi Ihne d Faasnachtsstimmig oder s groosse Kribble n'aa ? Si sin jo mitem "Pfyfferli" ständig mit dr Faasnacht beschäftigt... gits iiberhaupt no e Kribble ?
  Caroline Rasser:

Wenn mer noo dr allerletscht Voorstellig am Sunntigzoobe am 22:30 s Theater verleen, denn kribblets scho... denn liggt wiirglig "aifach ebbis in dr Luft".

     
     
 

Wie erläbt me als Prominänti d Faasnacht ? Het me do au emool syni Rueh oder wird me ständig vo de Lyt
aagsproche ?

  Caroline Rasser:

Also s wär glooge, wenn y behaupte wurd, sälte vo Waggis gstopft woorde z sii! Aber s het au scho unzähligi Roose und Mimoose gää...

     
     
  Gits e witzigi Anekdoote, wo Si emol an dr Faasnacht erläbt hänn ?
  Caroline Rasser:

Aimool zer spoote Stund, het mi scho e seer staarg aaghaiterete Faasnächtler aagsproche und het gstuunt iiber myni Ähnligkait mit dr Caroline Rasser. Was dä mir aaschliessend no alles verzellt het, wär ihm wool hitte no pyynlig, wenn dä wisst, ass ych ihre nit numme ähnlig gsee sondern si au gsii bi. Fir mii isch das seer seer luschtig gsii.

     
  Gits au unagnäämi Situatioone an dr Faasnacht ?
  Caroline Rasser:

Ai Situatioon isch wiirglig unscheen gsii... y bi sällmol mit mynere 4-jeerige Dochter am Cortège underwäggs gsi, wo mi 3 vellig wildi Waggis, schoonigsloos uffe Waage uffezooge hänn. Myni Dochter isch zrugg am Stroosserand blybe und dasch numme dangg waansinnig hilfryyche und liebenswiirdige Passante guet ussgange.

     
  Was hänn Si emol als glains Maitli welle wärde ?
  Caroline Rasser:

Primaarlehrerin, Dolmetscherin und denn speeter Schauspiilerin.

     
  Was macht Si gligglig ?
  Caroline Rasser:

Familie, Liebi, Harmonie und Gselligkait im Grais vo myne Neechschte und Liebschte "Wyy, Maa & Gsang". Ych erläb au gliggligi Momänt in mym Bruef.

     
  E Gschmagg isch jo immer mitere Erinnerig verbunde… gits e Gschmagg, wo Si sofort an Ihri Kindhait erinneret ?
  Caroline Rasser:

Hoochsummer bi 38 Grad in New York City... y lieb dä Gruch und ka nit gnueg griege devoo. Beschrybe ka n y dä nit, aber s leest bi miir wunderscheeni Erinnerige an die Zyt vo mynere Ussbildig an dr Schauspiilschuel in NY uss... do wird y au seer nostalgisch und rais hitte no seer gärn im Hoochsummer nach New York. Grad denne, wenn die maischte die Stadt wägge däre Hitz und vellicht au wägge däm Gschmagg myyde.

Toppt wärde ka das denn numme noo miteme staarge Summergwitter iiber dr Stadt.

     
  Welles isch Ihr absoluts Highlight gsi im 2017 ?
  Caroline Rasser:

Das sin seer scheeni Raise und Feerie gsii... voor allem im Summer. Bsunders "cracy" isch vellicht myn Bsuech bi dr OSCAR Verleyig in LA im Hornig 2017 gsii.

     
  Mit wellere beriehmte Perseenligkait wurde Si gärn emol e scheene Oobe verbringe und aifach numme plaudere (ka au scho gstoorbe sii) ?
  Caroline Rasser:

Mit mym Groossbabbe Alfred Rasser. Soo vyyl gheer und waiss y vo ihm, aber myni perseenlige Erinnerige an ihn sin zemene Groossdail verblasst. Y bi jo eerscht 6 Joor alt gsii, wo n är gstoorbe n'isch.

     
  Was wärde Si an Männer nie verstoo kenne ?
  Caroline Rasser:

Worum si mii nit immer versteen, isch mer e Rätsel…

     
  3 Sache wo Si no unbedingt in Ihrem Lääbe mache / erläbe wänn...
  Caroline Rasser:

1.) Argentinie beraise...
2.) Wider halbwäggs oordentlig Klavier spiile...
3.) Und akkut: ussschloofe!

     
  Wär wurde Si gärn emol ins Dschungelcamp schigge ?
  Caroline Rasser:

Ach, do muess me niemer aaneschigge, solangs no Lyt git, wo sich freywillig fir daas häärgän.

     
     
  No e baar Schlaagweerter, bitte numme mit aim Satz beantwoorte...
  Buech oder eBook ?

Dehaime e Buech und uff Raise eBook...

  Basel... Haimat...
  Ziiri... Mag y seer! Isch lang my Aarbetsoort gsii... e baar Joor soaar mit WG-Zimmer. Hitte verbinde mi Frindschafte in dr Stadt und myni Dochter studiert in Ziiri, eso blyb y deert immer am Ball...
  "Pfyfferli"... Isch vyl Aarebt... aber e scheeni...
  Herbschtmäss... Wär eso scheen, aber fallt in myni intensiivschti Theatermoonet. E Bsuech mitem Gottemaitli gheert aber immer dezue... aber mit 6 Joor isch si mer vyyl z muetig... die Aarmi muess sich uff jeedere Baan my Gschrey aaloose...
  50 Shades of Grey ...

Normaalerwyys brobier y e Buech feertig z läse... aber do ha n y denn doch nimm yygsee fir waas...

Vyyle Dangg fiir Ihri Antwoorte