Thomas Matzinger, Teamlaiter Stadtrainigung Basel Wescht
   
 

 

Dyni Mitarbaiter fääge wärend dr Faasnachtszyt, jeede Moorge am 04:00 unseri Faasnacht wäg... hesch Du aigentlig kai schlächts Gwisse ?

  Thomas:

Doch nadierlig hänn mer e schlächts Gwisse und sin sogaar wägge däm in psycholoogischer Behandlig ;-)

Aber jetz im Ärnscht... Nai, hänn mer absolut nit, im Geegedail... s isch e Aarbet, wo unseri Mitarbaiterinne und Mitarbaiter eggsdreem motiviert. S au emol e Abwäggslig vom Alldaag... so quasi s Highlight vom Joor... d Faasnacht isch wiirglig seer beliebt bi unsere Mitarbaiterinne und Mitarbaiter.

S isch e haarte Job wenn me bi Wind, Wätter und klirrender Kelti d Faasnacht wäggruume muess... und ainewäg ischs fir Dyyni Lyt e Highlight ?
Jo uff jeede Fall... nadierlig ischs e haarte Job und doch ischs e Abwäggslig vom Alldaag... und me stoot fir aimol im Mittelpunggt.

Im Mittelpunggt ?
Normaalerwys butze mer d Stadt au in dr Nacht und doo isch me anonyym... aber wärend dr Faasnacht stoot me im Rampeliecht und das empfinde unseri Lyt anderscht als sunscht.

Jo das stimmt, s ganz Joor iiber fallt das niemerem uff... d Stadt isch am Moorge immer suuber und dasch wie sälbstverständlig.

   
  Wenn me die verschiidene Faasnachtsdaag mitenand verglyycht, gits do e Underschiid ? Vom Butze här main y... isch dr Donnschtigmoorge schlimmer als zem Byspiil dr Zyschdig ?
  Thomas:

S git numme glaini Underschiid... mer sin am Zyschdig und Mittwuch e weeneli schnäller underwäggs als am Donnschtigmoorge... denn deert sin mer no e weeneli gnauer... zem Byspiil schwemme mer e n'Egge mit Wasser, wo mer am Zyschdig oder Mittwuch nit gschwemmt hänn... nadierlig numme wenns Wätter das zuelosst. Donnschtigmoorge isch dr wichtigscht Daag, well do alles ewäg sii muess.

Also was Iir do immer machet, isch e absoluti Maischterlaischtig... Huet ab... wie vyyl Lyt sin im Yysatz und welles Materiaal isch do nootwändig ?
S sin 280 Mitarbaiterinne und Mitarbaiter im Yysatz, wo mit 150 Bäse bewaffnet sin... dezue kemme no 22 Faarziig. Was aber no wichtiger isch, mer sin nit elai im Yysatz... mer wärde duur verschiidenschti Baugschäfter unterstitzt, wo n ys Manpower und Faarziig zer Verfiegig stelle... und nadierlig d BVB mit iire Lyt, wo hauptsächlig fiir d Glais zueständig sin... und nit z verässe, d Stadgärnterey, wo n ys au hilft... dasch alles in de letschte Joore seer äng zämmegwaggse.

Was sin das fiir Faarziig ?
Wischmaschiine, Radlaader, Laschtwäge, etc.

     
 

Iir entsoorget jo zimmlig vyl Materiaal... vo wellere Mängi reede mer doo ?

  Thomas:

Wenns drogge n isch, denn sins ca. 250 Tonne und wenns nass isch, denn kenne das gly emol 420 Tonne wäärde.

Waansinn... und das goot alles in d Verbrennig ?
S wanderet alles in d Verbrennig, usser s Glas und Metall... das wird vorhäär uusegnoo. Nooem Moorgestraich isch e separaati Tour underwäggs, wo numme s Glas yysaamlet.

     
  D Lyt / Faasnächtler sin jo mänggmool zimmlig gedanggeloos und leen aifach alles stoo und ligge... Requisite, Goschdyym und Laarve wärde aifach in e Egge gschosse. Was machet Iir mit de groosse Sache ? Oder generell mit däm wo ummestoot ?
  Thomas:

Wenns naime uff dr Syte stoot und me demit rächne kaa, ass es no vo ebberem abghoolt wird... denn leen mers nadierlig stoo... wenns aber im Wäg stoot, denn nämme mers mit und entsoorges au. Laider wärde seer vyl Requisite oder Laarve aifach stoo gloo und das find y seer schaad. Oft waiss me jo am Donnschtigmoorge nit, ob dr Bsitzer no zruggkunnt und s Materiaal no abhoolt... aber maischtens blybts ligge und dasch wiirglig schaad, wie mit däm Ziggs umgange wird.

     
  S isch e waansinns logistische Uffwand ka n y mir voorstelle... wird das generaalstaabsmässig blaant ? Und wenn foot me do mit de Voorberaitige aa ?
  Thomas:

S Grundgrischt isch aigentlig immer ähnlig... und isch wie bim Fuessball, nooem Matsch isch voorem Matsch. Noo dr Faasnacht findet gly emol e Sitzig statt und dasch denn au glychzytig dr Staartpunggt fir die näggscht
Faasnacht.

Was wird denn an däre Sitzig besproche ?
Mer bespräche, was an dr Faasnacht guet gange n isch und wo s Brobleem gää het. Mit debyy sin au Verträter vo de Baufiirme, dr Stadtgärtnerey und dr BVB. Uffgrund vo däm Gspreech, wird denn die ney Faasnacht blaant und dr Räscht isch aigentlig wie jeedes Joor.

     
 

Aber wie bringt me denn die 250 Tonne so schnäll ewäg ?

  Thomas:

Mer baue bim Mässeblatz e Räppliburg...

Was isch denn e Räppliburg ?
Alles wo mer uss dr Innestadt mitem Laschtwääge uusehoole, wird bim Mässeplatz deponiert. Das haisst bi n
ys "Räppliburg", well mer mit Betonelemänt - wo me sunscht zer Terrorbekämpfig bruucht - e n Aart Burg baue und deert keye mer denn alles yyne. Dernoo wirds mitem Radlaader iiber dr Daag duure noodisnoo abbaut und in d Verbrennig brocht.

Wärend dr Faasnacht ?
Wärend dr Faasnacht... do faart e Laschtwaage dr ganz Daag mitere Wäggselmulde immer hii und häär. S goot au drum, ass dr Laschtwaage mit glaini Portioone in d Verbrennig faart und nit alles auf aimool... eso ka dr Abfall effiziänter entsoorgt wärde.

     
  Voor Diir liggt e Handbuech vo dr Stadtrainigung uffem Disch... fir d Basler Faasnacht... was stoot do drinne ?
  Thomas:

Do sin die verschiidenschte Sache uffgfiert, wie d Zoone mit de entsprächende Mitarbaiterinne und Mitarbaiter mit iire Uffgoobe, d Näme vo de Laschtwaagefaarer, wo d Absperrige iiberall sin, etc. In däm Buech wird alles beschriibe, wo fir ys wichtig isch... ooni das Buech wurds nit eso brobleemloos funggdioniere...

     
  S Worst Case Szenaario wär, wenns am Sunntig voor dr Faasnacht wie verruggt schneye wurd... so wie im 2006.
Wie isch das sällmool gsii ?
  Thomas:

Y bi sällmool noonig deby gsii und waiss es numme vom Heeresaage... me het numme e 1/10 Sekunde iibere Absaag vo dr Faasnacht noodänggt... aber dasch nadierlig e absoluts "No Go" gsii. Me het die Schneemasse iirgendwie uss dr Stadt bringe miesse.

Y ka mi no guet draa erinnere, do het me jo Daag und Nacht gschafft...
Jo genau... dä Schnee het me jo nit aifach uff d Syte schiebe kenne, sondern het miesse glaade und uss dr Stadt brocht wärde.

     
  Findet me au Kuriooses underem Räpplibärg ?
  Thomas:

Ab und zue e halbdoode Faasnächtler ;-)

     
  Hets au emol e unagnäämi Situatioon gää ?
  Thomas:

Nai... aigentlig nit... usser Taxi- und Velofaarer, wo ständig d Absperrige um kuurve und das ka denn zue seer gfäärlige Situatioone fiere. Ainersyts wägge de vyyle Glasschärbe vo ummeligge und uff dr andere Syte wägge de Radlaader, wo ständig hii und häär faare... und dasch fir d Faarer seer unagnääm, wenn Taxis oder Velofaarer sich duuredrugge.

     
  Gits denn au e witzigi Situatioon ?
  Thomas:

Witzig nit, aber s isch immer wider scheen, ass die ganz groossi Meerhait vo de Faasnächtler seer oft e "Danggerscheen" usspräche... aigentlig jeede Moorge, wenn mer am 04:00 mit unserer Aarbet aafeen.

Find y au... und gheert au emol gsait... au vo uns e riisegroosses "Danggerscheen" fir die Aarbet, wo n Iir immer wider laischtet. S isch halt langsam e Sälbschtverständligkait, ass die Stadt am näggschte Moorge immer suuber isch.

     
  Donnschtigmoorge... was bassiert noo dr Aarbet ?
  Thomas:

Sobald d Aarbet erleedigt isch, gits fir alli Mitarbaiterinne und Mitarbaiter e groosses Zmoorge, s soo genannte "Ändrainigungs-Mähli" im Congräss Center. Mit debyy sin au Verträter vo dr Regierig und vom Faasnachtscomité, wo sich noonemool perseenlig fir dr Yysatz bedangge.

     
  Du sälber bisch au vo A-Z mit debyy... e groosse Stress ?
  Thomas:

Jo das stimmt, aber me ka sich wiirglig uff d Lyt verloo und s isch e tolli Aarbet. Fir uns alli ischs e Abwäggslig und am Aafang isch immer e Spannig doo... aber denn laufts guet und me gspiirt e Fraid, ass alles klappt het.

Und wenn s letschte Räppli wäg isch, Du bim Zmoorge sitzisch und dieff duureschnuufsch... kasch numme no saage "S isch gschafft"...
Y dängg, sin 2 Sache wo wichtig sin... ainersyts ass nadierlig s letschte Räppli wäg isch und uff dr andere Syte, wo no vyyl wichtiger isch, ass me am Schluss saage ka, ass nit bassiert isch. Sin doch seer vyl Lyt underwäggs und do ka halt immer emol ebbis bassiere.

Gits au Ussenandersetzige zwische Faasnächtler und Dyne Lyt wo butze ?
Sälte... aber das sin kaini Faasnächtler, sondern Chaote und die hesch halt immer emol. Au bi de Hotspots wie zB. em "Schiefe Eck" ischs nit immer aifach... deert hänn mer friener au scho emol under Bolizeyschutz miesse butze. Das sin halt die Egge, wo e weeneli kritisch sii kenne, aber im Allgemaine laufts guet.

     
  Was beditet Dir d Faasnacht ?
  Thomas:

Aigentlig seer vyyl... s isch e tolli ud seer kreatiivi Zyt. Fir mii immer seer spannend... nadierlig au vom Gschäft här, dasch klaar. Y bi e Laimetaaler und gang au seer gärn an d Därwiler Faasnacht ;-)
Y bi ne aggdiive Passivfaasnächtler.

     
  Drifft me Di an dr Faasnacht au emol immene Goschdyym aa ?
  Thomas:

Sicher... am 04:00 im orangsche Goschdym ;-)

     
  Wenn foot bi Dir d Faasnachtsstimmig aa ?
  Thomas:

Mer staarte beraits seer frieh mit unsere Sitzige, mache d Personaalblaanig, luege was z mache n isch, etc.... aber so langsam foots denn 1 Wuche voor dr Faasnacht aa. Mer entfärne in dr Innestadt alli Babyyrkeerb
und d Lyt gseen, ass mer do scho fiir d Faasnacht schaffe.

     
  Wie lang bisch jetz scho in däre Funggdioon underwäggs ?
  Thomas:

Syt 5 Joor.

Und was fasziniert Di an Dynere Dätigkait ?
Die tolli Teamaarbet wo mer do zämme hänn und s Wisse, ass dr Kantoon e tolle Aarbetgäber isch... seer soziaal und fair.

     
  Was macht Di gligglig ?
  Thomas:

Also wenn y in mym Kolleegegrais ummelueg was doo so abgoot, denn isch s ganz klaar d Gsundhait. Je elder
me wird, desto mee frait me sich iiber e gueti Gsundhait.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Thomas:

Nai, gits bi mir aigentlig nit... usser in Portugal wo n y bim Usswärtsspiil vom FCB geege Benfica gsii bi und innere guete Baiz gsässe bi. Do hets zem Dessert e Schoggimousse mit Oliveeel und Salz gää. Y ha mer das bstellt well y wisse ha welle, ob me das iiberhaupt ässe ka... und s isch sensationell guet gsii... aber het mi nadierlig jetz nit in myni Kindhait zruggversetzt ;-).

     
  Welles isch Dy absoluts Highlight gsi im 2017 ?
  Thomas:

Y bi ne groosse FCB Fan und do isch nadierlig s Haimspiil geege Benfica scho e Highlight gsii fir mii... y bi vellig baff gsii, was dä Wicky uss däre Mannschaft gmacht het.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Thomas:

Mitem Phil Collins... dä het mi mit synere Muusig seer präggt in mynere Jugendzyt und isch hitte no aine vo myne Lieblingsmuusiger. Was y allerdings au no spannend finde wurd, wär dr Christoph Blocher... aber do wurd y woorschyns nie zem Woort koo ;-).

     
  Was wirdsch an Fraue nie verstoo kenne ?
  Thomas:

Dasch e Froog wo fir mii eggsdreem ins Klischee yynegoot...

Das muess eso sii ;-)
Parkiere... worum e Frau nit parkiere ka... dasch fir mii s ainzige wo n y nit verstoo kaa.

Und d Keenigsklass... s ruggwärts parkiere ;-)
Jä genau :-)

     
  3 Sache wo no unbedingt in Dym Lääbe mache wottsch...
  Thomas:

1.) E Rais in d USA, deert bi n y nonie gsii...
2.)Ebbis wo n y laider nie mee mache kaa und y bis hitte berey... ane Konzärt vo dr Popgrubbe "Queen" z go.
Y has laider nie gschafft e Konzärt z bsueche, bevoor dr Freddie Mercury gstoorbe n isch und das macht mi fascht e weeneli hässig.

     
  Wär wurdsch gärn emol ins Dschungelcamp schigge ?
  Thomas:

Also y find die Sändig "Dschungelcamp" dr absoluti Dieffpunggt...

Dasch esoo und soll jo au e Stroof fir ebber sii ;-)
Denn wurd y dr Uli Forte ins Camp schigge... deert gheert dä aane ;-)

     
  No e baar Schlaagweerter, bitte numme mit aim Satz beantwoorte...
  Kino oder Theater ?

Theater... ganz bsunders s Schemeli Theater in Rynach, dasch e Theatergrubbe wo eso haisst...

  Basel... Myni Haimat und nadierlig myn FCB, wo wider Maischter wird.
  Ziiri... Wird nit Maischter wärde...
  Herbschtmäss... Isch e tolli Sach, aber me sott im Alter gwissi Baane myyde ;-)
  Baasler Rhywiera oder Palmestrand ? Nadierlig isch dr Palmestrand vyyl scheener, aber vo dr Basler Rhywiera het me mee devoo, well si neecher isch...
  Faasnachtsentsoorgig... E Job wo mer seer vyl Fraid macht...
  Donald Trump... Wär isch das ? Y kenn numme dr Donald Duck ;-)

Vyyle Dangg fiir Dyni Antwoorte