Regi Lardon, Schnyderin "Regis Nähatelier"
   
 

 

Dy groosses Hobby isch naie und bisch Schnyderin fir Faasnachtsgoschdym... wie ischs dezue koo ?

  Regi:

My Mamme isch glehrti Schnyderin und Handarbait het mer scho immer seer gfalle. Aigentlig ha n y dr Bruef vo dr Schnyderin welle lehre, aber s het laider kaini Lehrstelle me ka und denn ha n y das halt näbebyy gmacht.

Aber Du machsch s anschynend seer guet, sunscht hättsch nit esoone groossi Clique als Kund... dasch jo denn scho fascht mee als numme e Hobby oder ?
E normaali Schnyderin und e Faasnachtsschnyderin isch halt nit s glyyche...

Worum ?
Zem Byspiil s richtige Maass nää... me ka jo nit genau bi dr Schultere uffheere... s muess immer e weeneli greesser sii, well d Faasnacht entweeder waarm oder kalt sii ka. Die "normaale" Schnyydere hänn oft Mieh, so Goschdym z naie... si wärde denn z äng oder d Eermel sin z kuurz. Me muess scho luege, ass me die Goschdym immer e weeneli greesser macht.

     
  Du machsch sunscht kaini Schnyyderaarbet, wie zem Byspiil Abänderige oder so ?
  Regi:

Nai... usser nadierlig fir mii perseenlig.

Het Di au nie graizt ?
Nai... dasch mer denn ebbe z perfäggt... abgsee devoo ka me hitte dr Bryys vonere Schnyydere gaar nimm zaale.

Bi Faasnachtsgoschdym aber scho ?
Jain... ;-) Doch, doch, das goot scho...

     
 

Wie lang machsch das denn scho ?

  Regi:

Syt ebbe 30 Joor. Aagfange ha n y sällmool mitem Kinder-Ziigli vo dr Guggemuusig "Ohregribler" und speeter isch denn no s Spiil vo de "Ohregribler" dezuekoo... und duur d Wärbig vo de "Ohregribler" sins denn immer mee woorde.

Wie vyyl Goschdym naisch insgesamt ?
Y ha d Guggemuusig "Ohregribler", 2 Waggiswäge, etc... alles zämme sins ebbe 100 Goschdym... y ha zwoor scho mee ka, aber ha e weeneli reduziere miesse.

Isch aber no zimmlig vyyl fir e Hobby ;-)
Jo das stimmt :-)

Finds au... "Hobby" deent fir mii wie "Fiiroobeschnyydere"...
Also vom Oggdoober bis Horing / Meerz, bi n y jeede Daag am naie...

     
  ...dasch grad myni näggscht Froog... wenn foosch denn mit dr Blaanig aa ?
  Regi:

Noo de Heerbschtfeerie... denn sin au alli Sujets bekannt.

     
  Was isch Dyni Faszinatioon am naie ?
  Regi:

Immer wider s Neye... s git jeedes Joor ebbis Neys zem naie... und d Idee vo de Clique umzsetze, fasziniert mi seer.

Goschdym fiir Majoore machsch au oder ?
Jä...

Sin die Gselle schwiiriger zem naie ?
Nai... s isch aifach greesser als die normaale Goschdym. Dr underi Dail isch glych wie bi de andere... aber s Ooberdail isch denn nadierlig vyl gresser und uffwändiger zem naie.

     
 

Ischs Naie scho immer Dyn Draum gsii ?

  Regi:

Jä... my Mamme het scho Goschdym gnait, wo n y no e glains Maitli gsii bi.

     
  Wie isch das eso kuurz voor dr Faasnacht... gits au emol e Momänt wo dänggsch "Hoffentlig schaff y das no bis zer Faasnacht..." ?
  Regi:

Jeedes Joor ;-) aber s goot immer... me schafft denn aifach Daag und Nacht.

Aber s isch nonie voorkoo, ass e Goschdym am Sunntig voor dr Faasnacht nooni feertig gsii isch oder ?
Doch... hets emol gää... do het e Majoor sy Goschdym eerscht am Sunntig voor dr Faasnacht kenne bi mir abhoole... y bi no dr ganz Sunntignomidaag am naie gsii.

Wie sin denn Dyni Aarbetszyte ?
Y schaff vo 07:00 bis ebbe am 01:00 oder 02:00... kunnt immer e weeneli druff aa. Zwischeduure gits emol e Pause und denn goots wider wyter ;-)

     
 

Hets emol e witzigi Situation gää ?

  Regi:

Witzig nit... eenter e schlimmi. Y ha emol am Faasnachtsmäntigmoorge e n'Alti Dante ney miesse naie... also d Bluse vomene Dambuurmajoor. Bim ussmässe hänn mer dr BH vergässe bzw. nit mityygrächnet und denn isch nadierlig d Bluse z äng gsii. Am Sunntignomidag kunnt är denn zem aabrobiere, zieht dr BH aa und y ha genau gwisst "Scheisse, das basst nit". Y ha denn die Bluse ney gnait und am Mäntigmoorge am 10:30 isch si denn feertig gsii und am 14:00 isch är yygstande ;-) Aber das bassiert mer nie nie nie me.

     
  Wenn jetz die hittigi Zyt mit däre voor 30 Joor verglychsch... hets sich faasnachtstechnisch s Goschdym naie veränderet ?
  Regi:

S wird immer wie perfäggter... me muess e Straifeli doo haa, e Knepfli deert, e Rischeli doääne, etc... s isch nimm wie friener aifach e Hose, e Bluse und feertig... s muess immer wie scheener und aaspruchsvoller sii.

Wie vyyl Lyt sin Ihr denne bim naie ?
Y bi elaige... ab und zue kunnt e Kolleegin oder myni Schweegerin go hälfe, aber naie und zueschnyde mach y elai.

Rächnet sich denn dä enoorm Uffwand ? Ryych wird me nit deby oder ? ;-)
Nai das wird me nit... doo ka me wiirglig saage, ass es e Hobby isch. Die vyle Stunde, vom Stoffballe bis es feertig isch, ka niemer zaale... nie... das wär e Stundelohn vo 5.-- Frangge. Bis jeedes Dail zuegschnitte und veraarbaitet isch, rächnisch emol mit 8h... denn kunnts Gspreech no dezue, s aabrobiere, etc.... und das wurd aim kai Clique zaale.

     
  Und denn isch Faasnacht... alli Goschdym sin abgliiferet... und denn wirdsch sicher yyglaade und kasch Dy Wärg bestuune :-)
  Regi:

Jo, y wird denn zer Waagevernissage yyglaade und zem Apéro voor dr Faasnacht.

Und wenn si an dr Faasnacht an Dir verbyylaufe... erfillt Di das au e weeneli mit Stolz ?
Dasch fir mii aine vo de scheenschte Momänt... wenn si z laufe kemme, oder mitem Waage verbyyfaare und wingge, erfillt mi das mit Stolz. Y gsee au d Faasnacht mit andere n'Auge...

Dh. Du luegsch eenter d Goschdym vo de andere Formatioone n'aa, dängg y emol...
Genau... und wenn y ebbis scheens gsee, denn fotografier ys Goschdym. Y sammle Idee oder lueg mer aa, wies anderi Schnyydere gmacht hänn.

     
  Was beditet Dir d Faasnacht ?
  Regi:

Wie n y scho gsait ha, lueg y d Faasnacht mit andere n'Auge n'aa... finds immer wider seer scheen, s Neye z gsee... s isch seer faszinierend.

Du bisch jo au emol als aggdivi Faasnachtlere underwäggs gsi gäll ?
Y bi emol voor 35 Joor bi dr Guggemuusig "Schlangefänger" gsi...

Raize wurds Di nimme ?
Nai... gaar nit... y stand lieber am Stroosserand und lueg zue... ka stoo blybe wenn y wott und wyterlaufe wenns mer dernoo isch ;-) Y schaff au wärend dr Faasnacht im Käller vo dr Guggemuusig "Ohregribler"... aber eerscht Zoobe.

     
  Wenn d Faasnacht umme n'isch, keert sicher Rue bi Dir yy dängg y emol...
  Regi:

Gwissi Clique hänn jo e Stammgoschdym und wenns Neymitgliider git, denn kemme die nadierlig s Joor duure bi mir verbyy... aber s isch scho esoo, noo dr Faasnacht isch aifach emol Pause. Do bisch denn froh, wenn aifach alles emol verruume kasch und feertig isch.

     
     
  Wenn foot bi Dir d Faasnachtsstimmig aa ? Gits die no oder bisch eso in Dynere Faasnachtsaarbet verdieft, ass es gar kai Blatz het fir das ?
  Regi:

E Wuche vorhär, wenn d Voorfaasnachte uffem Land aafeen, denn kunnt langsam s kribble... oder wenn y im Radio s eerscht Mool drummle und pfyffe gheer, denn waiss y, ass es nimm lang goot bis Faasnacht isch.

Und denn gseesch dr Bärg voller Goschdym, wo no feertig wärde muess ;-)
Genau... und denn wirds mer amigs ganz anderscht ;-)

     
     
  Was macht Di gligglig ?
  Regi:

Myni Familie, wo mi seer understitzt und ooni die wurds au nit goo.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Regi:

Mitem Lorenzo Lamas uss dr Seerie "Renegade" ;-)

Okeeyyy... und wieso grad mit ihm ?
Wells e scheene Maa isch und mit sym Harley immer eso scheen em Strand entlang faart....

Und wurdsch gärn hinde druff hogge ;-)
Genau... und mit ihm am Strand ebbis Znacht ässe, im Sand heggle und plaudere...

     
  3 Sache wo no unbedingt in Dym Lääbe mache wottsch...
  Regi:

1.) Y wurd gärn emol noo Hawaii oder uff d Malediive raise...
2.) Y wurd gärn wideremol go Skifaare, goot aber schlächt voor dr Faasnacht...
3.) Sunscht bi n y aigentlig z friide ;-)

     
  Wär wurdsch gärn emol ins Dschungelcamp schigge ?
  Regi:

Dr Donald Trump

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Kino... oder sunscht Musicals...

  Basel... Mir gfallt Basel, y find au dr Rhy scheen und d Fähri... aber eggsdreem dra hängge due n y nit...
  Ziiri... Gfallt mer nit und wott y au nit aane...
  Herbschtmäss... So zum schlendern, etwas essen und ein bisschen schauen ist es schön...
  Stoff... Isch mit Aarbet verbunde ;-)
  Donald Trump... Dschungelcamp ;-)
  50 Shades of Grey ...

Scheene Film... d Biecher ha n y noonig gläse, kunnt aber no.

Und s Thema ?
Isch Gschmaggsach... y finds scheen, mir gfallts... dr Film ;-)

Vyyle Dangg fiir Dyni Antwoorte