Jo genau:

Um d Joorhundertwändi het me denn dr ganz Märtblatz aabegrisse und umgstaltet... das muess e riise Baustell gsii si. Duur daas sin den myni Groosseltere an Spaalebärg zooge, bis dä Märzblatz feertig gsii isch und sin den wider zrugg in das Huus gange, wo mer hitte no sin.

Denn isch dr Krieg koo...

Jä dasch e schwiirigi Zyt gsii, wells au kai Rohstoff me gää het... me het anstell vo Mandle, Aprikosekärne gnoo und dr Zugger het me mit Märgli bezooge, oder het sich geegesytig ussgholfe.

Y ha als glaine Bueb immer welle Fiirwehrmaa wärde... oder Mischtkiibel-Leerer... well me hinterem Laschtwaage uff das Absätzli het stoo und mitfaare kenne, daas ha n y immer sautoll gfunde zem gsee wenn si verbyygfaare sin.
Aber y has au seer scheen gfunde, wenn my Babbe in dr wysse Bluse ummegloffe n'isch und eso feyni Sache gmacht het in dr Baggstuube... daas het mi immer fasziniert. Noo dr Schuel ha n y mir denn iiberleggt, wo n y d Lehr mache kennt. Dehaime d Lehr mache, ha n y nit welle.

Wo hänn Sie amänd d Lehr gmacht ?
Myni Eltere hänn e gueti Beziehig zue de Springlis in Ziiri kaa und deert ha n y denn au myni Lehr gmacht... dasch nadierlig e Topadrässe gsii.

Hänn Si speeter mit Ihrem Babbe zämmegschafft ?
Y ha ne zytlang mitem Babbe zämmegschafft... Jä.

Und dasch gange ? Isch jo nit sälbschtverständlig, wenn 2 Generatioone zämmeschaffe...
Dasch gange... my Babbe het zwor e Greessi vo 195cm kaa und ych bi immer dr Bueb gsii... nadierlig hets amigs Mainigsverschiidehaite gää... wie das halt iiberall eso isch... aber är isch dr Patron gsii und het das guet gmacht... y ha seer vyl vonem glehrt.

Respäggt het me scho ka... myni Eltere hänn sällmol im oobere Stoggwärgg gwoont und my Babbe isch no mit 80 duur d Baggstuube gloffe... aber är het s Gschäft abgää und y has wytergmacht, mit all dääne
langjeerige Mitarbaiter, wo mi seer understitzt hänn.

Jä d Baggstuube isch doo im Huus... mer hänn ys lang iiberleggt, ob mer ussbaue solle oder nit... aber mer sin anere so guete Laag und bruuche kai Transpoort, wo n ys am Moorge 30 Vermicelles bringt... mer mache 6 und wenns mee brucht, produziere aifach noonemool e baar... bi uns isch immer alles ganz frisch und umwältfrindlig härgstellt... quasi "Real Handmade" ;-)

Wie vyyl Lyt schaffe denn bi Ihne ?
Mittlerwyle sin mer 32 Lyt im Betriib... zer Zyt vo myne Eldere, sins sogaar 45 gsi.. do hets no "Glettere", "Wäschere" und e "Kechin" gä.

Wenn isch denn s Kaffi (Tea-Room) dezue koo ?
Dr alti Dail - also d Zunftstuube - het scho immer dezuegheert... in de 30er Joore isch denn s Kaffi dezue koo... dä Dail isch aber dezuegmietet.

S 2017 isch e duurzooges Joor fir ys gsii und zwoor wägge däne groosse Drämmlibaustelle in dr Innerstadt. Zeerscht isch d Mittleri Brugg fir 6 Wuche gspeert gsii, denn isch unerwaartet dr Stainebärg dezuekoo und dasch nadierlig d Hauptschlaagoodere vo dr Stadt. Fir die ältere Lyt isch dr Wäg zue n ys aifach miesam und kompliziert gsii und das het ys seer z schaffe gmacht... aber dasch fir alli Gschäfter in dr Innerstadt e schwiirigi Zyt gsii.

Do ka me nadierlig nit me rette, dasch klaar...
Jä dasch eso gsii... aber defiir isch d Wienacht seer guet gsii fir uns.

Was die "S" eso bsunders macht, isch aigentlig ganz ebbis aifachs... die Schiesser "S" wärde jeede Daag frisch häärgstellt und innere andere Beggerey liggt das Stiggli iirgendwo imene Egge und droggnet voor sich aane. Das "S" ka me ai Daag bhalte, denn foot s Aiwyss afo ussdroggne und das goot relativ
schnäll. Wenns amänd vom Daag bi uns no e baar iibrig het, denn wärde die wyterveraarbaitet... zb. in Punschkuugele... eso kenne mer jeede Dag frischi Schoggi "S" härstelle... das sin pro Daag ebbe 100 Stigg.

Gits au emol e Schoggi "F" fir "Faasnacht" ? ;-)
Anstell vomene "F" gits unseri feyne Faschtewaie, wo au seer beliebt sin ;-)
Aber e "F" uss dr Schoggimasse härzstelle isch seer schwiirig aber meeglig... wägge dr Bruchgfoor.

Als Routinier fang y im Hornig mit de Voorberaitige aa und das längt mer denn au maischtens bis zer Faasnacht. Am Wucheänd voor dr Faasnacht schaffe mer denn praggdisch duure und produziere d Ziibele- und Käswaie im Schichtbetrieb, bis mer denn voorem Morgestraich am 03:00 dr Laade uffmache... jo... und denn goots loos :-)

Kenne Si an sällem Wucheänd iiberhaupt schloofe ?
Dr Moorgestraich isch halt immer esoone Sach... und do schloof y au nit guet. Ych und myni Frau mache das immer eso... am Sunntig voorem Moorgestraich dringge mer zämme e gueti Fläsche Wyy, geen denn zwische 18:00 und 19:00 ins Bett und steen am 01:00 wider uff. Aber schloofe ka n y drotz Wyy nit eso guet, well aim so vyyl Gedangge duure Kopf geen... ha n y au wirglig nit vergässe, etc.

Wie muess me sich das voorstelle ? Wie vyyl Ziibele- und Käswaie geen do iibere Laadedisch ?
Saage mer emol esoo... es sin hunderti, aber nit dausigi ;-). Also Faschtewie geen am Moorgestraich scho ebbe 300 Stigg iibere Laadedisch...

Doch, doch... das het me immer... s git immer emol e Lugge. Zem Byspiil wenn dr Cortège aafoot bis ebbe 15:30 isch relatiiv ruhig bi n ys und denn gang y maischtens e weeneli uuse und versuech d Stimmig yyzfange.

Und wie gseets am Donnschtigmoorge n'uss ? Sin Si froh, ass es umme n'isch ?
Jä, das ka me esoo saage... am Donnschtigmoorge kunnt denn d Guggemuusig "Pumperniggel" zem Zmoorge und dasch immer e luschtigs ussklinge.

Friener ha n y emol bi dr "Märtplatz Clique Basel" drummlet und bi scho ne Faasnächtler ;-)

Vermisse Si s drummle nit ?
Nai... nimme. Friener ha n y Zoobe no welle go gässle, aber dasch nimm meeglig wenn me schafft.

Bi miir fallt dr Staartschuss immer bim Vogel Gryff...

Jä scho... friener isch aim s Wätter egal gsii, do isch me no bim greeschte Sauwätter an d Faasnacht... aber hitte stirbt d Stadt uss, sobalds e weeneli rägnet... me goot grad Haime. Aber au d Baize sin friener voll gsii, was hitte au nimm eso isch.

Y grieg immer vom Blaggedde-Miller e Negatiiv vo dr Faasnachtsblaggedde und doodruss wird e Gipsform gmacht, mit Folie diefzooge und mit Schoggi ussgosse.

Myni Familie... wenn si gsund und buschber isch ;-)

Jä, doo muess y nit lang iiberlegge... dasch Fondue Bourguignonne. Friener hets das no gää... hitte gits jo numme no Fondue Chinoise. Fondue Bourguignonne hets bi uns immer an Wienachte gää und dasch immer e groossi Uffreegig gsii. D Mamme und dr Babbe isch sowieso scho nervees gsii und miir Kinder hänn ys aifach immer druff gfrait... dä Gschmagg vom haisse n'Eel isch mer immer blyybe.

D Wienachtszyt het ys waansinnig vyl brocht und s Joor grettet. Perseenlig ha n y seer vyl Highlights ka und s macht mer wiirglig seer vyl Fraid doo z wiirge. Syt neyem hänn mer au am Sunntig offe und dasch seer guet aakoo bi de Gescht.

Mit dr Cindy Crawford... sie isch halt immer no e wunderscheeni Frau... drotz ihrem Alter.

Y main, daas mit de Schueh und Handdäsche isch jo klaar... aber was y nie verstoo kaa isch, ass si immer zu zwait uffs WC mien.

Dasch wiirglig e Phänomeen...

1.) Wiideremool zämme mit Kolleege go seegle...
2.) Uff e Seegelteern mitem Viermaschter "Sea Cloud"...
3.) Mit myne Kinder uff d Maledive Feerie mache.

Dasch ganz aifach... dr Hans-Peter Wessels...

Kino... oder sunscht eenter Glaitheater wie zB. d Baseldytschi Biini...