Géraldine Gehrig, Pfyfferkeenigin 2016 & 2017 vo de "Aagfrässene"
   
 

 

Géraldine, y ha nie e n'Interview mitere Keenigin deerfe fiere... isch mer also e n'Eer ;-). Was het Dir perseenlig das Joor, bzw. 2 Joor als Pfyfferkeenigin brocht ?

  Géraldine:

Aigentlig het sich nit vyl veränderet... me het e weeneli mee Kontaggt zue de Faasnächtler kenne knipfe , aber vyl isch glych blyybe.

Also isch dr ganz Meedierummel um Dyni Persoon no iiberschaubar gsii ? Nit esoo, wie bimene Muusigstar ?
Naiiiii... das ka me iiberhaupt nit verglyche... dasch e Phaase gsii, wo nooem "Offizielle" bis ebbe nooem 3. Bummelsunntig gange n'isch... dernoo hets praggdisch kaine me indressiert.

Und was het Dir die Zyt brocht ?
Ebbe... me kennt vyl mee Lyt als vorhär und voor allem kenne d Lyt au Dii... und eso gits vyyl neyi Kontaggt wo au seer cool isch. Y bi aber immer no die glyych, wie voor 2 Joor ;-). Y bi sälbschtsicherer woorde, dh. y ka jetz bi so Wettspiil vyyl loggerer uff dr Biini stoo, well y waiss... was gwunne hesch, ka aim niemer mee ewäg nää.

     
  Wie gseets mitem Drugg uss, wo jetz uff Dir laschtet ?
  Géraldine:

D Lyt mache aim halt scho e Drugg und dängge "Ou dasch jetz die, wo scho 2x gwunne het...", aber y ka mi wiirglig sälber aabehoole... chille... und sage "Hey Du hesch das Ding scho 2x gwunne". Friener bi n y amigs mega nervees gsii und ha brielt hinter dr Biini... und hitte gang y uff die Biini, mach my Uffdritt und waiss dernoo nit emol me, was y pfyffe ha... isch wie ne Filmriss... und dasch eso, syt y s eerscht Mol s "Offizielle" gwunne ha.

     
  Du stoosch bim "Offizielle" hinter dr Biini und waartsch uff Dyn Uffdritt... dr Saal isch voller Lyt und d Jury isch berait... wie goots Dir 1 Minute bevoors loosgoot ?
  Géraldine:

Also ganz eehrlig... mer waarte ebbe 1 1/2 Minute voorem Uffdritt hinder dr Biini und denn muess y immer uffs WC... dasch ganz schlimm ;-). Y ka au nimm reede und wott nit me gheere... y mach do wiirglig zue...
sunscht bi n y nie ruhig, aber in däm Momänt scho ;-)

Und denn goosch uff d Biini...
Jo und denn machts aifach Zack... Filmriss... y gang uff d Biini, mach myni Auge zue und zieh das Ding duure... wenn me mi aaschliessend froggt wies gsii isch, sag y immer "Y waiss es nit"... s isch, als ob y schloofe wurd.

Also schloofe duesch jo offesichtlig nit, sunscht wärsch nit 2x Pfyfferkeenigin woorde ;-)
Gits e bstimmts Rituaal, bevoor uff d Biini goosch ?
S git esoone Rituaal bi uns in dr Familie... my Brueder und ych, butze n ys ebbe 20x d Händ am Goschdym ab... und s git eso schreggligi Videos, wo me das wiirglig guet gseet und d Lyt oft driiber lache ;-)
Und s git no ebbis... y ha immer pinky Sogge n'aa... immer die glyche :-)

Pinky Sogge ? Und wie alt sin die scho ?
Syt y s eerscht Mool s "Offizielle" gwunne ha... sythär gang y weder an e "Offiziells", no an e sunschtigs Wettspiil ooni myni pinky Sogge... ooni die goots nit.

     
 

Wie lauft denn das mit dr Bewärtig vo dr Jury ? Je schweerer dr Marsch, desto mee Pinggt gits ? Oder spiilt das gaar kai Rolle ?

  Géraldine:

Bi de Pfyffer ischs halt wiirglig esoo, ass es uff d Dynamikstuefe aakunnt... also wie vyl Dynamik bausch in dr Maarsch yy und was machsch druss.

Daarf me e Kompositioon verändere ?
Jä, aber nit z vyl... bim Eidgenessische darf me zem Byspiil numme Schwaarz/Wyss pfyffe, dh. numme s Ooriginaal wie s in de Noote stoot. Bim "Offizielle" darf me e weeneli verändere, aber au nit z vyl... Gligg gheert nadierlig au dezue... s muess halt alles zämmebasse.
     
  Und denn stoosch uff dr Biini und heersch Dyn Namme, wo als Siiger vom "Offizielle" verkindet wird... was isch das fir e Gfiil ?
  Géraldine:

S isch wiirglig brutaal... bim "Offizielle" wird jo zeerscht d Staartnummere und dernoo dr Namme verkindet.
Wenn denn Dyni Staartnummere als Gwinner gheersch, denn kunnt alles in Diir uffe und me explodiert fascht. Wo in dr Kategorie "Solo Duo", wo n y zämme mitem Maurice Weiss mitgmacht ha, unseri Staartnummere "172" als Siiger koo isch, ha n y myni Laarve uffe Boode gschosse und has kumm glaube kenne... also do gspiirsch Di nimme ;-)

Das glaub y...

     
  Wie Du jo scho gsait hesch, bisch nit numme Gwinnerin vom Ainzel, sondern hesch au in dr Kategorie "Solo Duo" abgruumt... und eerscht no bi de "Alte"... unglaublig...
  Géraldine:

Jo das stimmt, dasch wiirglig brutaal gsii... au well mer die letschti Nummere vom "Offizielle" gsii sin, mer sin eerscht am 23:30 draa koo und sin eerscht no die ainzige Junge, wo bi de "Alte" im Final gsii sin.

Und hänn abgruumt...
Jo... mer hänn jo nit z verliere kaa und hänn dorum frey ab dr Lääbere kenne spiile... und nooem Uffdritt hänn mer e riise Applaus griegt und dr ganz Saal het toobt. Mer sin ab dr Biini gange und hänn ys dänggt "Hoffentlig klappts jetz"... dasch esoone unglaubligs Gfiil gsi.

Und s het jo klappt ;-)

     
 

Wie grooss isch denn Dyn Iebigsuffwand ? Und sag jetz nit "Kaine" ;-)

  Géraldine:

(luegt in d Luft und schmunzlet)... s glaubt mer ebbe niemer eso richtig... s letscht Joor bi n y 3 Wuche voorem "Offizielle" eso im Bett gläge und ha mer dänggt "Also jetz sottsch scho langsam emol afo iebe...". Y ha denn 2 Wuche vorhär myni 3 Märsch eso richtig afo iebe und den nadierlig die letscht Wuche voorem Offizielle praggdisch jeede Daag. Allerdings ha n y mitem Maurice fir d Kategorie "Solo Duo" au nit mee giebt... Underem Joor nimm y oft s Piccolo fiire und pfyff e Marsch... also dr Aasatz isch glych immer vorhande.

     
  Du machsch jo daas Joor au am "Mimeesli" mit... wie laufts deert ?
  Géraldine:

Guet :-)... s macht wiirglig Spass.

Wie gseet denn Dyn Uffdritt uss ?
Mer sin d Pfyffergrubbe "Piccognito", wo zämme mit dr Suzanne Klee musiziert... s isch wirglig meega cool.
Denn e gmainsaame Uffdritt mit dr Dambuuregrubbe "stickStoff" und e wytere Uffdritt mitem Gsangsquartett "Forellen* und dasch au richtig toll. S macht jeede n'Oobe irgendwie anderscht Spass, well ständig ebbis luschtigs bassiert. Dr Uffdritt mit de "Forellen" isch quasi e Battle zwische n'ys... miir mit Faasnachtsmuusig und d "Forellen" mit ihrer Choormuusig... und amänd sin mer denn Ains und dasch wirglig no cool. D
Schlussnummere isch dem gmainsaam mit dr Suzanne Klee, dasch au ganz toll, wells aifach anderscht isch wie uff dr Strooss Faasnacht z mache.

     
  Denn kunnt d Faasnacht... und muesch wider die ganz normaale Märsch pfyffe... bisch nimm elai, sondern e Dail vomene Ganze... nämmlig bi de "Aagfrässene"... wo iibrigens au e seer gueti Clique n'isch...
  Géraldine:

Also s isch scho koomisch gsi... letscht Samschtig ha n y e Doppelvoorstellig im "Mimeesli" kaa und am Sunntigmoorge d Maarschiebig mit de "Aagfrässene" ;-)
D Clique isch grad e weeneli im Umbruch und myni "alti" Generatioon kunnt jetz langsam in Stamm... und dasch scho e weeneli koomisch, wenn me das vorhär gweent gsii isch.

Du bisch au no Pfyffer-Inschtruggdoorin bi de ganz Glaine gäll ?
Jo genau... und y mach alles, ass es de Glaine bi n ys gfallt. Y ha ihne vo Aafang aa gsait, ass y immer no d Clique-Kolleegin Géri bi, aber in däre Stund am Donnschtigzoobe, bi n y e weeneli anderscht. Dasch wiirglig esoooone tolli und häärzigi Meitligrubbe und macht so waansinnig Spass... y machs esooooo gärn am Donnschtigzoobe :-)
     
  Was beditet Diir d Faasnacht ?
  Géraldine:

Alles... woby waisch, urspringlig ha n y jo numme pfyffe welle, aber nie in mym Läbe anere Faasnacht
mitmache... dasch wiirglig woor.

Wieso ?
D Faasnacht het mer nie ebbis gsait... au wenn s Mammi ständig mit ys an d Faasnacht gange n'isch.
My Brueder het immer bis in alli Nacht welle blyybe, wärend ych scho am 16:00 wider Haim ha welle und gnueg vo dr Faasnacht kaa ha. Wo n y elder woorde bi, ha n y welle aafange pfyffe... aber ebbe nie Faasnacht mache.

Also pfyffe het Di vo Aafang aa indressiert... drummle nit ?
Bi uns dehaime gits scho gnueg Drummler ;-)... uff jeede Fall isch denn Oggdoober woorde und mer hänn bi de "Aagfrässene" miesse Mass nää firs Goschdym... und y waiss es hitte no, was fir e Diskussioon mer (s Mammi und yych) kaa hänn... vo dr Lyss bis in Cliquekäller. My Mamme het zue mer gsait "Wenn jetz Mass nimmsch, denn machsch Faasnacht"... y gang also deert aabe in Cliquekeller, ha Maass gnoo und Faasnacht gmacht :-)

Und hesch gfunde, ass es doch nit esoone Saich isch ;-)
Ab deert ha n y d Faasnacht seeeeer cool gfunde :-) Und jetz wo n y elder bi, frai mi wiirglig uff Zämmesii mit all myne Kolleege und gniesses aifach.

     
           
  Wenn foot bi Dir d Faasnachtsstimmig aa ?
  Géraldine:

Die isch jetz scho voll doo... au Dangg em Mimeesli...

Het me iiberhaupt no e Gribble noo so vyyl Voorfaasnacht ?
Hejoo... eggsdreeeeeeeem... s isch nonie eso schlimm gsii, wie daas Joor. Sobald s "Mimeesli" feertig isch, goots numme no 10 Daag bis zer Faasnacht und das wird aim immer bewusst. Hitte ha n y im Gschäft uff my Kaländer gluegt und dänggt "Scheisse... imene Mooent isch d Faasncht scho wider verbyy".
     
  3 Sache, wo bi de "Aagfrässene" toll findisch...
  Géraldine:

1.) D Obfrau :-) (Aameergig: D Obfrau bi de "Aagfrässene Jungi Garde" isch s Mammi vo dr Géraldine ;-))
2.) D Stimmig underenand und s Zämmesii... s Cliquelääbe isch wiirglig meega cool bi n ys...
3.) S isch eggsdreem familiär...
 4.) Und waisch, me ka bi uns mitmache, wenn me numme e Faasnachtspfyffer oder Dambuur sii wott, oder isch seer Willkomme, wenn mee mache wott... und das find y ganz toll bi uns.

     
  Was fasziniert Di am pfyffe ?
  Géraldine:

Y finds mega cool, was me miteme Piccolo eso alles mache ka... und das gseen vyl nit. Fir ganz vyll Lyt
isch e Piccolo e bleeds Instrumänt, wo numme hoochi, grälli Deen uusekemme und d Oore deby weh mache... aber wenn me sich e weeneli mee demit beschäftigt und im Internet noo andere Lieder suecht... wie zem Byspiil Lieder uss de Charts und die denn au no spiilt... denn meergt me, wie gail das aigentlig mitem Piccolo deent... und genau daas fasziniert mi seer.

     
  Also rekapituliere mer... Du bisch Pfyfferkeenigin, pfyffsch am Mimeesli und bi de "Aagfrässene"... wie griegt me das alles under ai Huet ?
  Géraldine:

Bevoor y bim "Mimeesli" zuegsait haa, ha n y mir nadierlig scho au iiberleggt, wie n y das mit dr Lehr zämme aanegrieg... und s goot halt aifach... und zem Gligg ha n y myni Eldere, wo mi immer ummekutschiere ;-)
     
  Was lehrsch grad im Momänt und was wottsch gärn emol wärde ?
  Géraldine: Y mach s KV und was d Zuekunft betrifft, waiss y noonig wo d Rais aanegoot... ah doch... y wott gärn emol bim FCB schaffe... zB. Meediesprächerin, daas wär scho meega gail ;-) oder aifach ebbis mit Meedie oder
Journalischtin.
     
  Was macht Di gligglig ?
  Géraldine: My Piccolo...
     
  Welles isch Dy absoluts Highlight gsi im 2017 ?
  Géraldine:

S git immer e Jugendcamp vom Dabmuure- und Pfyfferverband vo dr Schwiz und dasch wirglig super. Me isch 9 Daag zämme, drummlet und pfyfft mitenand, hoggt zämme bis dief in d Nacht uffem Brünig oobe und hets luschtig... und noo 5 Daag goots denn mitem Car quer duur d Schwiz und git e Konzärt.

Also s lauft struggduriert ab ?
Absolut... das sin alles jungi Lyt, wo sich vorhär nonie gsee hänn... iebt diszipliniert 5 Daag lang neyi Märsch und denn goot me zämme uff Tour duur d Schwiz... und dasch absolut faszinierend, was do an Qualität uusekunnt... me lehrt in 2 Daag e Marsch usswändig und bringt denn dä uff dr Biini... das het mi denn scho e weeneli gstresst.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Géraldine:

Also bim Fabian Schär wurd y jetz nit "Nai" saage... hoffentlig liist är das nie ;-)

     
  So liebi Géraldine, jetz kunnt d Froog vo allne Frooge ;-) Was wirdsch an Männer nie verstoo kenne ?
  Géraldine:

As si eitler sin als e Frau... das verstand y amigs nit... aber do dängg y hauptsächlig an my Brueder ;-)
     
  3 Sache wo no unbedingt in Dym Lääbe mache wottsch...
  Géraldine:
1.) Y wott unbedingt emol noo Berlin...
2.) Y wurd gärn emol e Matsch vo Real in Madrid go luege...
3.) Und myni Lehr erfolgrych abschliesse :-)
   

 
  Wär wurdsch gärn emol ins Dschungelcamp schigge ?
  Géraldine: My Brueder ;-)
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Kino... definitiiv Kino...

  Basel... Myni Haimatstadt und nadierlig dr FCB...
  Ziiri... Kommendaarloos...
  Faasnacht... Die 3 scheenschte Daag...
  Baasler Rhywiera oder Palmestrand ? Im Summer am Rhy sitze, isch toll...
  Heerbschtmäss... Y gang lieber go ässe... bi nit eso dr Mässtyp...
  Donald Trump... Het e gruusige Hoorschnitt ;-)

Vyyle Dangg fiir Dyni Antwoorte