Fabienne Strässle, Majoorin vo dr Faasnachtsclique "Die Abverheyte"
   
 

 

"Die Abverheyte" sin jo vor 80 Joor die eerscht Fraueclique in Basel gsii... wie lang bisch Du denn scho debyy und wie bisch Du dezue koo ?

  Fabienne:

Wie Du scho beraits gsait hesch, fyyrt unseri Clique näggscht Joor iire 80. Geburtsdaag. Ych sälber bi syt 2007 debyy und ha scho immer welle mitere Frindin zämme Faasnacht mache, aber s isch schwiirig gsii e Clique z finde, wo me au als Erwaggsene aafoo kaa. Mer hänn denn uffem Web vo dr Uni Basel s Inserat vo de "Abverheyte" gsee und hänn ys grad gmolde... so sin mer dezue koo.

Hän Iir die glyche Struggduure wie ne Stammclique ? Also mit Junge-, Stamm und Alti Garde ?
Nai, mer hänn kai Jungi- und Alti Gaarde, s git numme dr Stamm und doo sin alli deby... isch so quasi generatioonsiibergrifend.

     
  Was fasziniert Di bi de "Abverheyte" ?
  Fabienne:

Das es ebbe generatioonsiibergrifend isch... y bi eenter aini vo de jingere und do het me halt scho au Gspreech, wo me sunscht im privaate Umfäld nit eso het und das find y seer toll. Am Aafang ha n y mi e weeneli schweer demit doo... halt wägge de verschiidene Klischees wo me het, wenn vyli Fraue uffeme Huffe sin... aber schlussändlig ischs au ebbis seer scheens, well me anderi Sache bespräche duet, als wenn Männer in dr Grubbe debyy sin.

Welles sin denn die typischi Klischees ?
Joo das halt mitem Hienerhuffe und ass alli glychzytig mitenand reede, etc.

Also nit schlimmer als innere Männerclique ;-)
Genau...

     
 

Kasch Du Dir emol voorstelle, innere gmischte Clique mitzmache ?

  Fabienne:

S gfallt mer under Fraue, aber y kennt mer au guet voorstelle, in e gmischti Clique z goo.

     
  Iir sin jo e raini Pfyfferclique... wieso gits kaini wyyblige Dambuure bi eych ?
  Fabienne:

Well das Projäggt gstoorbe n isch. Im 2007 hänn mers mit wyblige Dambuure brobiert... aber das bruucht nadierlig Zyt, bis die Lyt drummle kenne. E baar hänn denn aber wider uffgheert, e baar hänn wider aagfange und genau wägge däm is aigentlig nie zumene glyychmäässige Niveau koo.

Aber Iir hänn emol e Faasnacht mit wybligge Dambuure gmacht oder ?
Mer hänn Faasnachte mit wyyblige Dambuure gmacht... jä... mer hänn sogar s Repertoire reduziert, sin e Rieme mit Dambuure und denn wider ai Rieme numme mit Pfyffer gloffe. Das hänn mer au iiber meereri Faasnachte eso gmacht, aber daas Joor hänn mer an dr GV beschlosse, das Projäggt yyzstelle.

Aber s git doch e huffe gueti wyybligi Dambuure, worum nämmet iir denn nit grad "feertigi" ?
Die miesst me halt vo de andere Cliquene abwäärbe und dasch nadierlig scho nit grad dr Sinn... mer hänn zwor scho immer emol Dambuure vo andere Cliquene kaa, aber dasch denn immer soone hii und häär gsi.

     
  Syt 80 Joor gits Eych scho... wow... dasch e ganz scheens Alter. Isch ebbis speziells fiir d Faasnacht 2018 blaant ?
  Fabienne:

Nai isch nit blaant... mer hänn jo vor 5 Joor unser 75. jeerigs Jubiläum gfyyrt und sin also sogenannti
"Voorriterinne" gloffe... also quasi als Voorriterinne vo dr eerschte Fraueclique in Basel. Mer hänn e Frauemonschtermaarsch oorganisiert und sin zämme mit meerere Fraueclique ai Rieme gloffe.
Fir näggscht Joor isch me no am luege, aber y waiss nit genau, obs so ebbis noonemool git oder waas genau blaant isch.

Und underem Joor duure ?
Mer hänn e Wucheändussfluug blaant.

Wo goots aane ?
Also bim 75. jeerige sin mer noo Lissabon graist, aber jetz hänn mer emol in dr Schwiz welle blybe... mer geen ins Appezäll.

     
 

Du bisch jo Majoorin, e Amt wo niemer so gärn macht, wells mit huffe Aarbet und Konzentratioon wärend dr Faasnacht verbunde n isch... wieso hesch das Amt iibernoo ?

  Fabienne:

Y bi dezue koo, wells sunscht niemer gmacht het... ganz aifach. Friener hänn mer 2 Majoorinne kaa, wo sich immer all 2 Joor abgwäggslet hänn. Wo denn die baide uffgheert hänn, het me denn in dr Clique ummegfroggt, obs sich ebber voorstelle kennt, das Amt z iibernää... aber dr Aadrang isch nadierlig nit grad eso grooss gsii ;-)
Jo... denn ha n y das halt iibernoo und mer dänggt ass das scho iirgendwie goo wurd ;-)

Wie lang bisch denn scho als Majoorin underwäggs ?
Näggscht Joor ischs die 3. Faasnacht.

Du hesch aber voorhär pfyffe oder ?
Y ha pfyffe... aber nie bsunders erfolgrych ;-)

     
  Wie Du scho gsait hesch, bisch als Voordrääblere und Pfyfferin underwägs gsi... wie erläbsch Du jetz als Majoorin d Faasnacht ? Bestimmt anderscht oder ?
  Fabienne:

Jä... s isch e anderi Faasnacht... well me ussgstellt isch, aber das find y aigentlig au s Scheene draa.
Y grieg jetz als Majoorin d Reaggdioone vo de Zueschauer vyyl besser mit, als vohäär wo n y no im Zug gloffe bii.

Normalerwyys lauft jo dr Majoor innere Clique immer in dr Mitti vom Zug. Do Iir aber kaini Dambuure hänn, laufsch den jetz z foorderscht ?
Zeerscht kunnt dr Voordraab, denn kunnt d Ladäärne und denn kumm ych.

Wird Dyni Route mitem Voordraab abgsproche ?
Jä, y lueg das im Voorfäld immer zämme mit unserer Zugschefin aa. Aber nadierlig deerfe au d Pfyfferinne saage, wo si gärn aane wänn... do sin mer seer offe und vellicht au e weeneli anderscht, als bi de andere Clique, wo ebber entschaidet und alli hindedryylaufe mien... y dängg, das wurd bi uns nit guet aakoo.

     
  Wie leen sich Dyni Fraue fiere ? Loose si uff Di ?
  Fabienne:

Meerhaitlig scho ;-)

     
  Die letscht Minute voorem Moorgestraich... was goot do in Dir voor ?
  Fabienne:

Dr Bligg isch immer uff dr Uhr, me daarf dr richtig Zytpunggt joo nit verbasse... s isch esoone scheeni Aagspannthait und e riise Voorfraid, ass es jetz ändlig loosgoot.

Und denn goots ändlig loos... wie isch das mitem perfäggte Zytpunggt, wo s Liecht abgoot und me "Voorwäärts Maaarsch" schreyt ?
Y has bis jetz immer mee oder weeniger dr richtig Zytpunggt droffe. Y ha immer e groossi Uhr im Bliggfäld, wo n y genau waiss wenns loos goot. E riise Fauxpas isch mer bis jetz noonig bassiert.

Wo steen Iir yy ?
Bi dr Baarfiesserkiirche.

Jo also wenn die Uhr nit gnau goot ;-)

     
  Sin Männer als Aggdivmitgliider scho emol e Thema gsii bi Eych ?
  Fabienne:

Bi uns ischs e aggduells Thema gsii, isch aber abglähnt woorde. Wie bi de maischte Clique, hänn au miir e Noowuggsbrobleem und bedräffend däm Thema hänn mer letscht Summer e Sitzig kaa. Im Voorfäld isch e Schryybe mit diväärse Frooge an d Mitgliider verschiggt woorde... u.a. au mit dr Froog, ob me sich voorstelle kennt, d Clique fir männligi Aggdivmitgliider z effne. Aber me het sich das nit voorstelle kenne und isch ganz klaar abglähnt woorde... denn scho eenter e Fusioon mitere andere Fraueclique.
E gmischti Variante vo de "Abverheyte" wär fir ys e Idäntitäätsverluscht.

Was macht e Fraueclique anderscht ?
Zem Byspiil bim Sujet... y has Gfiil, ass me innere Fraueclique d Sujet anderscht usswääle und ussspiile duet. Wenn bi uns Männer deby wääre, kennt y mir seer guet voorstelle, ass die Sujets zu ryybereye fiere wurde.

Das glaub y...
Und mer dien jo unseri Goschdyym sälber naie... nit geege d Naikunscht vo de Männer ;-) aber das wär vellicht au e Brobleem, wo me saage wurd "Nai das wänn mer nit". Oft isch s naie vom Goschdyym mit dääne vyyle Details seer Zytuffwändig und y bi mer nit sicher, ob das zumene Konfliggt fiere wurd.

     
  Welles sin die 3 goldige Reegle vonere Majoorin ?
  Fabienne:

So richtigi Reegle gits aigentlig nit bi mir... aber seer wichtig isch mer myni "Zoofe"... ooni si kennt y nit sii. Sobald mer e Pause mache, kunnt si grad und hilft mir... und fir mii isch das e ganz wichtigi Reegle, ass y grad en Ersatz grieg, wenn si emol nit doo isch.

Und anderi Reegle gits nit ?
Nai... Faasnacht isch fir mii immer no e Hobby. Y glaub, y hät Schwiirigkaite wenn y das eso diszipliniert
duurezieh wurd... s muess au e gwisse Ruum fiir Offehait doo sii.


     
     
  Bisch du wärendem laufe immer voll konzentriert oder kasch Du d Faasnacht au e weeneli gniesse und d Lyt
beobachte ?
  Fabienne:

Jäjä, das goot wunderbaar... wenn y emol d Faasnacht nimme gniesse kennt, wär das e Brobleem fir mii.

     
     
  Kenntsch Du Dir voorstelle, wider emool als Pfyffere underwäggs z sii ?
  Fabienne:

Do miesst y seer vyyl iebe ;-)

Also hesch dr Blausch an dr Majoorin ?
Y ha seer dr Blausch draa... jä. Aber wenn ebber uss dr Clique daas emol ussbrobiere wott, denn bi n y absolut offe defiir. Y bi do nit so strikt und sag "Ych bi d Majoorin und das daarf niemmer iibernää".

     
  Gits e witzigi Aneggdoote wo n emool als Majoorin erläbt hesch ? Isch Dir emool ebbis bassiert ?
  Fabienne:

Nai... ha bis jetz immer Gligg kaa :-)

Nonie e Straich gspiilt woorde ? Zem Byspill am Donnschtigmoorge ?
Nai no nie... sin alli seer aaständig. Guet y bi nadierlig au seer guet zwische Voordraab undem Zug yybettet.

Liebi Pfyfferinne, wenn Iir das jetz lääse dient... spiilet Eyerer Majoorin emol e Straich ;-)

     
  Wie vyyl Aggdivmitgliiderinne sin Iir ?
  Fabienne:

Wäärend dr Faasnacht sin mer maischtens um die 25, aber s wäggslet nadierlig immer mol wider.

     
  S Repertoire uff dr Route isch feschtgleggt oder saisch jeedes Stiggli aa ?
  Fabienne:

Dr Ablauf isch feschtgleggt... y sag d Stiggli eenter sälte n aa... y ha e Schoggijob und muess d Aggdivmitgliiderinne numme fiehre ;-)

     
  Und wenn denn alli looslegge und dr Maarsch pfyffe... wie isch das fir Dii, wenns eso vo hinde fiire bloost ?
Isch sicher e tolls Gfiil oder ?
  Fabienne:

seer... vor allem bim Gässle.

     
  Am Faasnachtszyschdig hesch jo denn frey... wie bisch denn underwäggs ?
  Fabienne:

Mer hänn innerhalb vo dr Clique e Gribbli und die dräffe sich den am Faasnachtszyschdig zem gmietlige "Gässle". Y bi im Voordraab und gniess das seer, so ooni Metallgstell und grosse Laarve underwäggs z sii.

Du bisch jo eenter e zierligi und klaineri Frau... wie goots Dir amigs am Donnschtigmoorge ? Y main, das ganze Gwicht vo dr groosse Laarve goot jo nit spuurloos an Dir verbyy...
Du s goot aigentlig no... y hane wiirglig guets Metallgstell, wo seer guet uff mi aabasst woorde n isch... vo dämhäär halte sich d Schmärze seer in Gränze. Y häts mer schlimmer voorgstellt ;-)

     
  Wenn foot bi Dir d Faasnachtsstimmig aa ?
  Fabienne:

S eerschte groosse Kribble kunnt aigentlig bi dr Sujetsitzig und staigeret sich denn bis zer Faasnacht.

     
  Was beditet Dir d Faasnacht ?
  Fabienne:

D Verbundehait zue Basel... zämme mit Frinde d Faasnacht fyyre und gniesse. Y kennt mer nit voorstelle, naime anderscht Faasnacht z mache.

     
  Het sich d Faasnacht im Geegesatz zue friener veränderet ? Und wenn jo, in welli Richtig ?
  Fabienne:

Nai aigentlig nit... also nit in dääne 10 Joor wo n y Faasnacht mach... vellicht wenn y emol 50 Joor deby bii.

     
  Was hesch Du emol als glains Maitli welle wärde ?
  Fabienne:

Dierärztin nadierlig ;-)

Worum bischs nit woorde ?
Well myni Mamme mir emol gsait het, ass me nit numme Dier haile, sondern si au vo iirem Lyyde erleese muess... und mit däm Gedangge ha n y mi denn doch nit kenne aafrinde. Aber au myni schuelisch Karriere het zaigt, ass y naduurwisseschaftlig nit esooooooo begabt gsi bi und uss däm Grund s Studium seer seer hart woorde wär ;-)

     
  Was macht Di gligglig ?
  Fabienne:

Zyt mit myne Frinde z verbringe... und mit mym Ross noem Fiiroobe go ussrite, dasch e wunderscheene Ussglyych und macht mi jeede Daag gligglig.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Fabienne:

Bi mir isch s nit unbedingt e Gschmagg, sondern was y iss. Als Kind het mer mi Mamme immer e Kueche uff dr Geburtsdaag gmacht... dasch soone Mischig zwische Läb- und Schoggikueche gsii. Und grad voor kuurzem het ebber im Gschäft genau esoone Kueche mitbrocht und dä het mi grad zrugg in myni Kindhait versetzt. Y ha immer gmaint, ass das unser Familieghaimnis gsii wär ;-)

     
  Welles isch Dy absoluts Highlight gsi im 2017 ?
  Fabienne:

Y ha ne neye Job gfunde :-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Fabienne:

Mitem Roger Federer...

Luschtig... alli wänn mitem Roger Federer plaudere ;-)
Är isch halt esoone perfäggte Mensch... ok isch vellicht e weeneli falsch formuliert, aber y kennt jetz kai Schwechi vonem uffzelle. S wurd mi emol wunder nää, wie n är das immer schafft esoo souverän z sii.
S git kai ainzige Skandaal... gar nit... und au im Tennis... isch immer eggsdreem konzentriert und s wurd mi wiirglig wunder nää, wie n är das macht.

     
  Was wirdsch an Männer nie verstoo kenne ?
  Fabienne:

As si s ainte saage und ebbis anders dängge.

Dasch jo gaar nit woor, dasch bi de Fraue esoo ;-)
Dasch bi de Männer genau glyych... do kenn y seer vyyl, wo iirgend ebbis saage und ebbis ganz anders maine. Wenn me s in dr Fraueloogik woortweerdlig nimmt (was gsait woorde n isch), ischs definitiv nie esoo gmaint.

     
  3 Sache wo no unbedingt in Dym Lääbe mache wottsch...
  Fabienne:

1.) Bi mir ischs eenter mit Raise verbunde und y wurd waansinnig gärn emol uff Tahiti in d Feerie...
2.) Y wott gärn emol e Buech schrybe, y kennt aber jetz im Momänt nit grad saage iiber welles Thema...
3) Und y wurd gärn emol imene Wettbewärb gwinne, y ha nonie gwunne... y gwinn nit emol in dr Tombola.

     
  Wär wurdsch gärn emol ins Dschungelcamp schigge ?
  Fabienne:

Alli wo bim Bachelor und dr Bachelorette mitmache.

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Theater... y gang seer gärn ins Theater. Im Kino lueg y numme James Bond Film, well y deert no s Erläbnis drumumme tolle find.

  Basel... Mi Dehaime. Mer hänn immer emol im Usslang gwoont und sin immer wider zrugg uff Basel koo.
  Ziiri... Y bi in Ziiri uff d Wält koo... Ziiri het fir mii immer so ebbis heggdischs und das fallt mer immer wider uff.
  Herbschtmäss... Find y ebbis seer scheens und isch nadierlig mit e huffe Kindhaitserinnerige verbunde. Bi froh, ass es si git und 2 Wuche lang goot ;-)
  Baasler Rhywiera oder Palmestrand ? Im Summer d Baasler Rhywiera und im Winter ziehts mi ab und zue an Palmestrand, zem no e weeneli Weermi z tangge. Aber im Summer isch Basel grad eso scheen und me ka s Lääbe au doo gniesse.
  Donald Trump... Bi n y froh, as es hoffentlig numme no 3 Joor lang goot, bis är wider abgwäält wird.
  50 Shades of Grey ...

Ha n y sälbschtverständlig gläse und mi duur die 3 Biecher duurekämpft. D Neugier in e fremds Schloofzimmer yynezluege, isch aber fascht gresser gsii.

Hesch dr Film gsee ?
Dr eerscht Dail ha n y emol im TV gsee... aber y bi eenter entdischt driiber gsii.

Vyyle Dangg fiir Dyni Antwoorte