Nai isch nit blaant... mer hänn jo vor 5 Joor unser 75. jeerigs Jubiläum gfyyrt und sin also sogenannti
"Voorriterinne" gloffe... also quasi als Voorriterinne vo dr eerschte Fraueclique in Basel. Mer hänn e Frauemonschtermaarsch oorganisiert und sin zämme mit meerere Fraueclique ai Rieme gloffe.
Fir näggscht Joor isch me no am luege, aber y waiss nit genau, obs so ebbis noonemool git oder waas genau blaant isch.

Und underem Joor duure ?
Mer hänn e Wucheändussfluug blaant.

Wo goots aane ?
Also bim 75. jeerige sin mer noo Lissabon graist, aber jetz hänn mer emol in dr Schwiz welle blybe... mer geen ins Appezäll.

Du bisch jo Majoorin, e Amt wo niemer so gärn macht, wells mit huffe Aarbet und Konzentratioon wärend dr Faasnacht verbunde n isch... wieso hesch das Amt iibernoo ?

Y bi dezue koo, wells sunscht niemer gmacht het... ganz aifach. Friener hänn mer 2 Majoorinne kaa, wo sich immer all 2 Joor abgwäggslet hänn. Wo denn die baide uffgheert hänn, het me denn in dr Clique ummegfroggt, obs sich ebber voorstelle kennt, das Amt z iibernää... aber dr Aadrang isch nadierlig nit grad eso grooss gsii ;-)
Jo... denn ha n y das halt iibernoo und mer dänggt ass das scho iirgendwie goo wurd ;-)

Wie lang bisch denn scho als Majoorin underwäggs ?
Näggscht Joor ischs die 3. Faasnacht.

Du hesch aber voorhär pfyffe oder ?
Y ha pfyffe... aber nie bsunders erfolgrych ;-)

Jä... s isch e anderi Faasnacht... well me ussgstellt isch, aber das find y aigentlig au s Scheene draa.
Y grieg jetz als Majoorin d Reaggdioone vo de Zueschauer vyyl besser mit, als vohäär wo n y no im Zug gloffe bii.

Normalerwyys lauft jo dr Majoor innere Clique immer in dr Mitti vom Zug. Do Iir aber kaini Dambuure hänn, laufsch den jetz z foorderscht ?
Zeerscht kunnt dr Voordraab, denn kunnt d Ladäärne und denn kumm ych.

Wird Dyni Route mitem Voordraab abgsproche ?
Jä, y lueg das im Voorfäld immer zämme mit unserer Zugschefin aa. Aber nadierlig deerfe au d Pfyfferinne saage, wo si gärn aane wänn... do sin mer seer offe und vellicht au e weeneli anderscht, als bi de andere Clique, wo ebber entschaidet und alli hindedryylaufe mien... y dängg, das wurd bi uns nit guet aakoo.

Meerhaitlig scho ;-)

Dr Bligg isch immer uff dr Uhr, me daarf dr richtig Zytpunggt joo nit verbasse... s isch esoone scheeni Aagspannthait und e riise Voorfraid, ass es jetz ändlig loosgoot.

Und denn goots ändlig loos... wie isch das mitem perfäggte Zytpunggt, wo s Liecht abgoot und me "Voorwäärts Maaarsch" schreyt ?
Y has bis jetz immer mee oder weeniger dr richtig Zytpunggt droffe. Y ha immer e groossi Uhr im Bliggfäld, wo n y genau waiss wenns loos goot. E riise Fauxpas isch mer bis jetz noonig bassiert.

Wo steen Iir yy ?
Bi dr Baarfiesserkiirche.

Jo also wenn die Uhr nit gnau goot ;-)

Bi uns ischs e aggduells Thema gsii, isch aber abglähnt woorde. Wie bi de maischte Clique, hänn au miir e Noowuggsbrobleem und bedräffend däm Thema hänn mer letscht Summer e Sitzig kaa. Im Voorfäld isch e Schryybe mit diväärse Frooge an d Mitgliider verschiggt woorde... u.a. au mit dr Froog, ob me sich voorstelle kennt, d Clique fir männligi Aggdivmitgliider z effne. Aber me het sich das nit voorstelle kenne und isch ganz klaar abglähnt woorde... denn scho eenter e Fusioon mitere andere Fraueclique.
E gmischti Variante vo de "Abverheyte" wär fir ys e Idäntitäätsverluscht.

Was macht e Fraueclique anderscht ?
Zem Byspiil bim Sujet... y has Gfiil, ass me innere Fraueclique d Sujet anderscht usswääle und ussspiile duet. Wenn bi uns Männer deby wääre, kennt y mir seer guet voorstelle, ass die Sujets zu ryybereye fiere wurde.

Das glaub y...
Und mer dien jo unseri Goschdyym sälber naie... nit geege d Naikunscht vo de Männer ;-) aber das wär vellicht au e Brobleem, wo me saage wurd "Nai das wänn mer nit". Oft isch s naie vom Goschdyym mit dääne vyyle Details seer Zytuffwändig und y bi mer nit sicher, ob das zumene Konfliggt fiere wurd.

So richtigi Reegle gits aigentlig nit bi mir... aber seer wichtig isch mer myni "Zoofe"... ooni si kennt y nit sii. Sobald mer e Pause mache, kunnt si grad und hilft mir... und fir mii isch das e ganz wichtigi Reegle, ass y grad en Ersatz grieg, wenn si emol nit doo isch.

Und anderi Reegle gits nit ?
Nai... Faasnacht isch fir mii immer no e Hobby. Y glaub, y hät Schwiirigkaite wenn y das eso diszipliniert
duurezieh wurd... s muess au e gwisse Ruum fiir Offehait doo sii.

Jäjä, das goot wunderbaar... wenn y emol d Faasnacht nimme gniesse kennt, wär das e Brobleem fir mii.

Do miesst y seer vyyl iebe ;-)

Also hesch dr Blausch an dr Majoorin ?
Y ha seer dr Blausch draa... jä. Aber wenn ebber uss dr Clique daas emol ussbrobiere wott, denn bi n y absolut offe defiir. Y bi do nit so strikt und sag "Ych bi d Majoorin und das daarf niemmer iibernää".

Nai... ha bis jetz immer Gligg kaa :-)

Nonie e Straich gspiilt woorde ? Zem Byspill am Donnschtigmoorge ?
Nai no nie... sin alli seer aaständig. Guet y bi nadierlig au seer guet zwische Voordraab undem Zug yybettet.

Liebi Pfyfferinne, wenn Iir das jetz lääse dient... spiilet Eyerer Majoorin emol e Straich ;-)

Wäärend dr Faasnacht sin mer maischtens um die 25, aber s wäggslet nadierlig immer mol wider.

Dr Ablauf isch feschtgleggt... y sag d Stiggli eenter sälte n aa... y ha e Schoggijob und muess d Aggdivmitgliiderinne numme fiehre ;-)

Jä seer... vor allem bim Gässle.

Mer hänn innerhalb vo dr Clique e Gribbli und die dräffe sich den am Faasnachtszyschdig zem gmietlige "Gässle". Y bi im Voordraab und gniess das seer, so ooni Metallgstell und grosse Laarve underwäggs z sii.

Du bisch jo eenter e zierligi und klaineri Frau... wie goots Dir amigs am Donnschtigmoorge ? Y main, das ganze Gwicht vo dr groosse Laarve goot jo nit spuurloos an Dir verbyy...
Du s goot aigentlig no... y hane wiirglig guets Metallgstell, wo seer guet uff mi aabasst woorde n isch... vo dämhäär halte sich d Schmärze seer in Gränze. Y häts mer schlimmer voorgstellt ;-)

S eerschte groosse Kribble kunnt aigentlig bi dr Sujetsitzig und staigeret sich denn bis zer Faasnacht.

D Verbundehait zue Basel... zämme mit Frinde d Faasnacht fyyre und gniesse. Y kennt mer nit voorstelle, naime anderscht Faasnacht z mache.

Nai aigentlig nit... also nit in dääne 10 Joor wo n y Faasnacht mach... vellicht wenn y emol 50 Joor deby bii.

Dierärztin nadierlig ;-)

Worum bischs nit woorde ?
Well myni Mamme mir emol gsait het, ass me nit numme Dier haile, sondern si au vo iirem Lyyde erleese muess... und mit däm Gedangge ha n y mi denn doch nit kenne aafrinde. Aber au myni schuelisch Karriere het zaigt, ass y naduurwisseschaftlig nit esooooooo begabt gsi bi und uss däm Grund s Studium seer seer hart woorde wär ;-)

Zyt mit myne Frinde z verbringe... und mit mym Ross noem Fiiroobe go ussrite, dasch e wunderscheene Ussglyych und macht mi jeede Daag gligglig.

Bi mir isch s nit unbedingt e Gschmagg, sondern was y iss. Als Kind het mer mi Mamme immer e Kueche uff dr Geburtsdaag gmacht... dasch soone Mischig zwische Läb- und Schoggikueche gsii. Und grad voor kuurzem het ebber im Gschäft genau esoone Kueche mitbrocht und dä het mi grad zrugg in myni Kindhait versetzt. Y ha immer gmaint, ass das unser Familieghaimnis gsii wär ;-)

Y ha ne neye Job gfunde :-)

Mitem Roger Federer...

Luschtig... alli wänn mitem Roger Federer plaudere ;-)
Är isch halt esoone perfäggte Mensch... ok isch vellicht e weeneli falsch formuliert, aber y kennt jetz kai Schwechi vonem uffzelle. S wurd mi emol wunder nää, wie n är das immer schafft esoo souverän z sii.
S git kai ainzige Skandaal... gar nit... und au im Tennis... isch immer eggsdreem konzentriert und s wurd mi wiirglig wunder nää, wie n är das macht.

As si s ainte saage und ebbis anders dängge.

Dasch jo gaar nit woor, dasch bi de Fraue esoo ;-)
Dasch bi de Männer genau glyych... do kenn y seer vyyl, wo iirgend ebbis saage und ebbis ganz anders maine. Wenn me s in dr Fraueloogik woortweerdlig nimmt (was gsait woorde n isch), ischs definitiv nie esoo gmaint.

1.) Bi mir ischs eenter mit Raise verbunde und y wurd waansinnig gärn emol uff Tahiti in d Feerie...
2.) Y wott gärn emol e Buech schrybe, y kennt aber jetz im Momänt nit grad saage iiber welles Thema...
3) Und y wurd gärn emol imene Wettbewärb gwinne, y ha nonie gwunne... y gwinn nit emol in dr Tombola.

Alli wo bim Bachelor und dr Bachelorette mitmache.

Theater... y gang seer gärn ins Theater. Im Kino lueg y numme James Bond Film, well y deert no s Erläbnis drumumme tolle find.

Ha n y sälbschtverständlig gläse und mi duur die 3 Biecher duurekämpft. D Neugier in e fremds Schloofzimmer yynezluege, isch aber fascht gresser gsii.

Hesch dr Film gsee ?
Dr eerscht Dail ha n y emol im TV gsee... aber y bi eenter entdischt driiber gsii.