Esther Brühwiler

	Esther Brühwiler, Diräggtoorin / Gaschtgäberin vom "Hotel Basel"

Du bisch Diräggtoorin / Gaschtgäberin vom "Hotel Basel"... zmitts in dr Stadt... am Puls vom Läbe... e Draumbruef fir
Di ?

	Esther:	S isch wiirglig myn Draumbruef... y bi praggdisch my Läbe lang in dr Hotellerie däätig gsii und wenn y noonemool ney aagfange kennt, denn wurd ys wider genau glyych mache. Y bi e Gaschtgäberin uss Lyydeschaft und daas vo ganzem Häärze. Y bruuch d Lyt um mi umme und s macht mer seer vyyl Fraid, wenn y myni Gescht verweene daarf.

In e baar Daag ischs Joor 2017 umme... wenn jetz zruggluegsch, ischs fir Di e guets Joor in dr Hotellerie gsii ?

	Esther:	Y dängg, s isch OK gsi fir ys... mer meerge nadierlig au, ass es vyl neye Hotels gää het in Basel... voor allem die groosse Kette, wo ganz anderi Bryyse aabiete kenne. Mer sin alli undereme enoorme Bryysdrugg und y dängg, hit muess me zfriide sii, wenn me dr Umsatz halte ka. Mer hänn vooreme Joor in dr Restauratioon unseri Brasserie umbaut und das het sich seer positiiv ussgwiirgt.

Hotel Diräggtoorin deent toll... wie wird me Hotel Diräggtoorin ?

Esther:

Dasch e lange Wäg gsii ;-)

Das glaub y...
Y bi Pächterin vom "Hotel Basel" und sälbstständig erwärbend. Noo dr Lehr bi n y wärend dr Saison seer vyl im Ussland underwäggs gsi, denn zrugg ins Bindnerland koo und schlussändlig noo Basel. Y ha den im "Hotel Basel" als Stellverträterin vom doomoolige Diräggter und Bsitzer, em Reto Steiger, gschafft. 15 Joor speeter het är mi denn als Pächterin firs Hotel welle... allerdings isch e Sälbschtständigkait nie my Ziil gsii. Aber... esoone Aagebot griegt me numme aimol im Läbe und dorum ha n y die Chance im 2009 woorgnoo... und bi froh, ass ys gwogt ha.

Wie lang bisch denn scho in Basel ?
Syt mittlerwyle 24 Joor... und näggscht Joor wirds denn myni 25. Faasnacht ;-)

Apropos 25. Faasnacht... isch die ganz Voorberaitig uff d Faasnachtszyt fir e Hotel anere sottige Top Laag, "Business as usual" oder wird alles akriibisch blaant und duurezooge ?

Esther:

Y ha n'emol voor vyle Joore aagfange, e Regiebuech z schrybe und do stoot alles wichtige fir die verschiidene Abdailige drinn.

Wenn feen Ihr mit de Voorberaitige aa ?
Mer staarte beraits nooem 3. Bummelsunntig mit unserer "Ruggbliggsitzig". Dernoo gits e Pause bis Auguscht und denn feen mer mit dr Blaanig vo de Schnitzelbängg aa, verschigge d Yylaadige und Bestätigunge fir d Zimmerreservatioone, etc. Au d Menublaanig foot denn in däre Zyt aa... y wott, ass bis speetischtens Dezämber alli Spyys- und Getränggekaarte druggt sin, well d Faasnacht daasmool au seer frieh aafoot.

Macht Sinn...
Alli Teamleader griege kuurz voor dr Faasnacht vo miir e glains Biechli... deert kenne si dryyschryybe, was nit so guet gsi isch und das wird denn an unserer "Ruggbliggsitzig" besproche... mer wänn ys jo firs näggschte Joor wider verbessere. S Regiebuech wird denn au jewyyls aabasst.

Und wie gseets mit dr Mitarbaiterblaanig uss ?

	Esther:	D Mitarbaiterblaanig foot näggscht Wuche n'aa (Aameergig: Eerschti Jännerwuche). Underem Joor schaffe 60 Mitarbaiter bi n ys, während dr Faasnacht sin s denn 110 Mitarbaiter... 90% vo de Lyt hälfe n ys scho joorelang wärend dr Faasnacht und sin Frinde oder eemooligi Aagstellti.

Wird s Hotel meerhaitlig vo Faasnächtler buecht ?

Esther:

Jä

Tourischte eenter nit ?
Mer hänn emol e Business Gascht kaa, wo das emol het welle ussbrobiere und gmaint het, ass das jo nit eso schlimm sii kennt. Är het aber denn miesse zuegää, ass es no vyyl schlimmer gsii isch als är dänggt het... vor allem wenn me am näggschte Dag wider schaffe muess ;-)

Bisch voor dr Faasnacht iiberhaupt no nervees ?

Esther:

Am Sunntig voor dr Faasnacht bi n y denn scho nervees... genau wie die Aggdiive au ;-). Friener ha n y amigs no duuregmacht, aber hitte gang y am 21:30 ins Bett und stand am 00:30 wider uff, ass y am 01:30 im Hotel bi. Voorem Moorgestraich iiberprief y denn alles, ass mer baraat sin wenns loos goot... dr Moorgestraich goot fiir ys numme 5 Minute und denn isch d Brasserie voller Lyt. Ych sälber schaff hinderem Buffet und bi denn scho nervees, aber das gheert jo dezue... au noo dr 24. Faasnacht ;-)

Griegsch iiberhaupt ebbis mit vom Moorgestraich ?
Die eerschte 5 Minute stand y dusse und gniess dr Moorgestraich... und hoff, ass alli Liechter vom Hotel ab sin... dasch eggsdreem wichtig und y kontrollier daas perseenlig ;-)

Wie isch denn Dyni Bresänzzyt wärend dr Faasnacht ?

	Esther:	Fir uns goot d Faasnacht e Wuche... am Samschtig voor dr Faasnacht, fang y in dr Restauratioon mitem umrischte aa und do gits scho die eerscht Nachtschicht... am Sunntig kunnt denn die 2. Nachtschicht. Dr längscht Daag foot am Mittwuchnomidag 16:00 aa und goot bis Donnschtignomidaag 14:00... dernoo gang y haime und brobier in e normaale Rythmus z koo... was nadierlig nit goot noo 22h schaffe am Stigg. Y sag immer, y ha e Jetlag ooni ass y Feerie ka ha ;-)

Gits au emol en Momänt, wo Du aifach naime stoosch und e weeneli Faasnachtsluft schnupperisch ?

	Esther:	Y bi au scho am Zyschdignomidaag fir 2h uffem Minschterblatz gsii und ha mer d Ladäärneusstellig aagluegt... oder bi e weeneli go gässle... aber daas ha n y eerscht aimool gmacht. Me macht jo praggdisch nit anders als schaffe, schloofe und denn wider go schaffe. Allerdings hänn mer bi uns dehaime Lyt, wo bi uns wärend dr Faasnacht mithälfe und am 14:00 gits e feyns Zmoorge, wo mer ys denn au 1 1/2h lang Zyt nämme und gniesse. Dernoo goots denn ins Hotel und bevoor y aafang mit schaffe, mach y dusse no e glaine Rundgang und gniess no e weeneli d Faasnacht.

Wie hesch Du als glains Maitli d Faasnacht erläbt ?

Esther:

Y bi in Ziiri uffgwaggse und do hets nit faasnächtligs gää... mer hänn aber in dr Innerschwiz e Feeriewoonig kaa und vo deert sin mer immer an d Luzärner Faasnacht gange. Do ych iiberall in dr Hotellerie underwägs gsi bi, ha n y kai Beziehig zur Faasnacht kaa... aigentlig eerscht, wo n y im "Hotel Basel" aagfange ha schaffe...
d Basler Faasnacht isch e tolls Phänomeen.

Dodezue kemme mer no ;-)

Hets wärend dr Faasnacht au emol e witzigi Situatioon gää ?

Esther:

S git immer witzigi Situatioone... aber vor dr Faasnacht, am Sunntignomidaag, kunnt immer e Clique bi n ys verbyy und klaidet dr glai Spärber im Restaurant "Sperber" yy... dä stoot bi n ys uffem Kacheloofe und dasch immer e ganz scheens Rituaal... dä Kärli griegt denn e glains Goschdym und e Lärvli :-).
Dasch so härzig... wiirglig.

Wenn isch denn bi Eych d Faasnacht definitiv verbyy ?

Esther:

Dasch bi uns immer speziell... am Donnschtigmoorge 04:00 ischs noonemool richtig voll... d Lyt gniesse s
Zmoorge oder ässe Läberli. Ab 05:00 - 05:30 wird d Brasserie gleert, aber im "Sperber" daarf me nadierlig no sitze blyybe... d Brasserie muess am Donnschtignomidaag wider fir d Effentligkait offe sii. Y find das immer seer faszinierend, wie schnäll das goot... am 07:00 isch die Brasserie abdekoriert, am 10:30 isch butzt und am Midag ässe d Lyt ganz normaal wider... und y bi denn jo noonig im Bett gsi und lueg immer, ass y nit duurs Restaurant lauf und mi d Gescht gseen ;-)

Aber denn heschs au emol gsee oder ?
Dasch eso... mer geen denn gmietlig go zmeergele und am 11:00 verabschiid y all Hotelgescht. Mänggmool gits au e Momänt, wo mer zämme mit de Hotelgescht e Cüpli dringge und Tartar ässe.

Was beditet fir Dii perseenlig d Faasnacht ?

Esther:

E Clique wott unbedingt, ass y emol bi iine am Morgestraich im Voordraab mitlauf... und y iiberlegg mer seer oft, ob y das emol mache soll wenn y nimm im "Hote Basel" schaff. Aber dä Entschaid muess y jetz noonig dräffe... und doch iiberlegg y mer, ob y 30 Minute als Voordrääblerin mitlaufe soll...

Vellicht wärs jo emool e n'Erfaarig wärt...

Het sich d Faasnacht im Geegesatz zu friehner veränderet ? Und wenn jo, in welli Richtig ?

	Esther:	Dr Alkohoolkonsuum vo de Junge het sich seer veränderet und mer bruche hitte Bodyguards, was mer friener nie kaa hänn. Die aggdiive Faasnächtler sin in Basel sälte e Brobleem... wenns Theater git, denn mit de Passiive. Aber d Basler Faasnacht isch eggsdreem aagnääm zem schaffe... wiirglig.

Was hesch Du emol als glains Maitli welle wärde ?

Esther:

Flight Attendant

Worum ischs nit druss woorde ?
Y waiss es nit... y bi uff d Bruefsberootig gange und si het gmaint, y sell emol in e Hotel go schaffe. Myni Dante het imene Hotel in Ziiri gschafft und bi iire ha n y emol 14 Daag lang kenne schnuppere. Y bi eso begaischteret gsii, ass y nimm in d Schuel ha welle go... dasch fir mi aifach klar gsi... bis hitte.

Was macht Di gligglig ?

	Esther:	Fir mii isch d Läbensfraid seer wichtig und y bi ne positiv dänggende Mensch. In eerschter Linie mecht y myni Gescht gligglig mache, well me das unmittelbaar zrugggriegt.

E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?

	Esther:	Als Kind - und hitte iibrigens au no - ha n y Peperooni nit gäärn kaa, has aber immer ässe miesse... und wenn y zem Zmidag uss dr Schuel koo und haim gloffe bi, ha n y amigs scho uffem halbe Haimwäg gschmeggt, ass es Peperoni zem Zmidag git ;-) Ahjoo und unseri Faasnachtsdekoratioon... wenn die uffghängt isch, denn schmeggt me die immer... si wird s ganz Joor glaageret und het e n'aigene, aagnäme Gschmagg ;-)

Welles isch Dy absoluts Highlight gsi im 2017 ?

	Esther:	Unseri Feerie in Namibia...

Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?

	Esther:	Mit dr Meryl Streep... y find si aifach e tolli Schauspiilerin und indressanti Frau.

So liebi Esther, jetz kunnt d Froog vo allne Frooge ;-) Was wirdsch an Männer nie verstoo kenne ?

Esther:

Ass vyyl Männer nit diskussioonsfähig sin, bzw. s Brobleem lieber doodschwiige, bis es sich vo sälber erleedigt het... und Du waisch, miir Fraue kenne das schlächt ;-)

Und wie n y das waiss ;-)

3 Sache wo no unbedingt in Dym Lääbe mache wottsch...

Esther:

1.)	Y wurd gärn emol fir e Saison, als Gaschtgäberin innere Bärghitte schaffe...
2.)	Y wurd gärn emol uff e 3-Daageswanderig goo...
3.)	Y wott unbedingt emol in Basel im Rhy schwimme ;-)

No e baar Schlaagweerter, bitte numme mit aim Satz beantwoorte...

	Kino oder Theater ?	Wenn, denn Theater... aber y ha seer weenig Zyt defiir...
	Basel...	Fir mii e wunderscheeni Kultuurstadt, wo me in de letschte Joore seer vyl defir gmacht het...
	Ziiri...	Find y au e wunderscheeni Stadt... au im Summer zem flaniere... het syn Charme...
	Baasler Rhywiera oder Palmestrand ?	Eerlig gsait, an dr Rhywiera bi n y sälte... y bi au nonie im Rhy go schwimme... z Rhyfälde scho aber nit z Basel...
	Heerbschtmäss...	Numme Petersblatz...
	Hotel Basel...	Am scheenschte Flägg... die bescht Laag...
	Donald Trump...	Het nit miesse sii...

Vyyle Dangg fiir Dyni Antwoorte