Renato Salvi, Schauspiiler, Draibuechschryyber, Autoor und Regisseur
   
 

 

Du bisch jo zämme mit Dym Schauspiil-Paartner, em ALMI, Hauptdaarsteller in dr Voorfaasnachtsveraastaltig "Fasnachtskiechli". Fir alli wo s "Fasnachtskiechli" nit kenne... was isch das genau ?

  Renato:

S "Fasnachtskiechli" isch e klassischi Voorfaasnachtsveraastaltig... klassisch, wells e Nummerebrogramm isch und alles beinhaltet, was innere Voorfaasnachtsveraastaltig voorkunnt. Allerdings gits e groosse Underschiid... mer hänn zB. kai ganzi Guggemuusig uff dr Biini stoo, au kai ganzi Clique und au kaini ächte Schnitzelbänggler, sondern mer mache das alles sälber... mer imidiere quasi d Faasnacht uff dr Biini.

S "Fasnachtskiechli" gits jo mittlerwyyle syt 11 Joor und gheert zwyyfelsloos zue de beschte Voorfaasnachtsveraastaltige... was isch Eyer Erfolgsrezäpt ?
Dangge firs "Beschte"...
Am Aafang het ys niemer glaubt, ass es numme zue zwait uff dr Biini funggdioniere kaa, aber jetz wisse alli, ass es goot. Y glaub, e Dail vo unserem Erfolg isch sicher au, ass quasi alles uss dr glyyche Kuchi kunnt und well ebbe alles vo n ys isch, wiirgts au eso authentisch. Bi de andere Veraastaltige bresendiere d Schauspiiler uff dr Biini iire Täggscht wo si nit sälber gschrybe hänn... und miir spiile unsere aigene Täggscht wo mer sälber baschtlet hänn und au dehinter steen...au wenn emol ebbis gränzwärtig isch und mer Theeme bringe, wo die maischte andere Voorfaasnachtsveraastaltige verschwiige.
Eso sin mer laider au scho e baar Mool vo de Medie hundsgemain in d Pfanne ghaue woorde, aber iirgendwie isch ys das au glyych, denn genau wägge sottige Stiggli kemme unseri Gescht au zue n ys.

     
  Du spiilsch jo ganz vyl Instrumänt uff dr Biini... hesch Du Diir das alles sälber byybrocht ?
  Renato:

"Spiile" isch e weeneli iberdryybe... y nutz d Instrumänt ;-)
Firs "Fasnachtskiechli" luege mer immer, was mer an Instrumänt bruuche und denn haissts iebe, iebe, iebe und zwoor eso lang, bis es zem Uffdritt basst. Was y aber wiirglig spiile ka, isch Handoorgele und Tuba. Uf dr Gitarre ka n y immer numme die Griff, wo n y grad fir ebbis bruch... genauso bim Klavier. S Piccolo als Instrumänt gfallt mer nit so, aber s gheert halt zer Faasnacht.

     
 

Du bisch jo gleernte Theaater Schauspiiler... wie hesch Du dr Booge uff die luschtig, faasnächtligi Syte gschafft ?

  Renato:

Zeerscht ha n y e Lehr als Verkaifer gmacht und aaschliessend in Basel d Schauspiilschuel bsuecht. Theaater spiile isch ganz vyyl... do sin luschtigi Stiggli (Komeedie, Schwängg, Luschtspiil, Kabarett), wie au die ärnschte Stiggli debyy. Y will mi nit feschtlegge und behaupt aifach emool, ass y baides spiile ka. Komeedie sin nadierlig Stigg, wo die maischte Lyt aazieht und me au e weeneli Gäld verdiene ka.

S "Piccolissimo" het sällmol immer in dr Pause, e Pauseshow kaa und jeede Schauspiilschieler het d Sponsoore vom Oobe miesse humoristisch verpaggt in Szeene setze... dasch immer e 5-6 Minute-Nummere gsii. Iirgendwenn ha n ych dä Uffdraag griegt und ha mer denn esoone graimti Nummere a la Megge Buuser ussdänggt... dasch e Huusmaischter gsii, wo dr Daag eso bassiere loo het und do sin nadierlig d Sponsore au drinn voorkoo. Eso im Foyer spiile und ebbis zaige, wo nit mit Theaater z due het, het mer seer gfalle.

     
 

Bisch Du emol aggdiive Faasnächtler gsii ?

  Renato:

Jä, joorelang in Allschwil.

Als was ?
Zeerscht sin mer miteme zämmegschwaisste Velo als "Plattfuess Waggis" underwäggs gsii und speeter uffem Waggiswaage vo de "Riegelwürm".

Vermissisch mänggmool die Zyt ?
Me het halt die Lyt kennt wo am Stroosserand gstande sin und dasch nadierlig in Basel nimm eso gsii... aber vermisse due n y die Zyt nit.

     
 

Du bisch jo näbbscht Schauspiiler, no Autoor, Regisseur und schrybsch Draibiecher... wie bringt me das alles
under ai Huet ?

  Renato:

In dääre Branche muesch halt e huffe mache, ass Ändi Moonet ebbis iibrig blybt. S sin halt nit immer alles tolli Sache wo ne huffe Gäld bringe... aber mitem "Fasnachtskiechli" hänn mer ebbis gfunde, wo ainigermasse ebbis abwirft. S Schrybe isch uss dr Noot uuse entstande und ha das aigentlig nie mache welle... s isch seer uffwändig, me hoggt im stille Kämmerli am Computer und baschtlet anere Idee umme. Y mach e huffe Sache parallel... y schryb grad Liedertäggscht fir s Kindermusical "Der kleine Mats" und schryb glyychzytig e Theaaterstigg um, nääbebyy baschtle n y no amene Filmdraibuech und sott no e baar Lieder komponiere... und verhandle beraits scho wider iiber e huffe anderi Sache.

Ebbe, Du schrybsch jo no Draibiecher gäll ?
Y ha scho 2, 3 Biecher gschrybe, aber laider isch no kains verfilmt woorde. S haisst denn aifach "Mer bruuche e Draibuech zue dääre Gschicht"... denn schrybsch moonatelang, griegt e glaini Speeseentschädigung und denn wirds Buech doch nit verfilmt, well dr Film amänd aifach z diir isch und s draa schyderet.

E Draibuech schrybe isch jo nit so aifach ka n y mir voorstelle...
Y ha 1 1/2 Joor e Draibuechschuelig gmacht, well d Gsetz fir visuells schryybe anders sin, als fir e Biini.

     
  Dr Aaspruch vom Bublikum ans "Fasnachtskiechli" isch jo mittlerwyle seer hooch, muess jo immer jeedes Joor alles no besser wärde... gits au emol e Momänt, wo e Schrybblockaade hesch ?
  Renato:

Jo guet, das het me immer emol wider... aber was vellicht no speziell bi n ys isch, mer fantasiere beraits scho wärendem spiile und schryb mer sofort alles uff, was mer eso in Sinn kunnt... aigentlig s ganz Joor duure, egaal wie bleed ass es isch. Nooem "Fasnachtskiechli" dräffe mer ys denn zumene 3-däägige Bainstorming.

     
 

Die ganz Voorberaitig fir esoone Produggdioon nimmt jo ganz vyyl Zyt in Aaspruch... wenn foot me do mit dr
Blaanig aa ?

  Renato:

Noo dr Faasnacht.
Sobald mer vom Brainstorming zruggkemme, hänn mer beraits scho emool s Grundgrischt. Dernoo fang y mitem Schryybe n aa und denn laufts maischtens zimmlig flissig... und unseri Erfaarige uss de letschte 10 Joor hälfe n ys nadierlig doo au debyy. Dernoo losst me das alles emol e weeneli ligge und im Auguscht feen mer denn so richtig demit aa.

     
  Kasch Di noo esoo vyyl Faasnacht iiberhaupt no uff die aigentlig Faasnacht fraie ?
  Renato:

Y bi nit doo an dr Faasnacht 2018... oh Schande ;-)
Y bi in Ziiri und spiil im Bärnhard Theaater s Stigg "Pension Schöller"... das Stigg lauft ussgerächnet wärend dr Basler Faasnacht, aber eso ischs halt... me ka nit alles ha. Aber am Moorgestraich lauf y als Voordrääbler innere Grubbe

     
  Was beditet Dir d Faasnacht ?
  Renato:

Ganz vyyl... s isch e Notwändigkait... wenn me si nit numme konsumiert, sondern mitläbt. S isch e Ventiil, wome Dampf abloo ka und sich mitem Oort ussenandersetzt, wo me läbt. Me darf vellicht gwissi Theeme uff dr Ladäärne oder imene Zeedel e weeneli scheerfer formuliere und als Bänggler au emol e Bangg bringe, wo aim s Lache im Hals stegge blybt. Wenn mer d Faasnacht nit hätte, denn hätte mer numme no dr FCB ;-)

     
  Wie hesch Du als glaine Bueb d Faasnacht erläbt und wie bisch mit dämm Viirus infiziert woorde ?
  Renato:

Duur myn Lehrer, e ganz e stränge Typ und ehemoolige Duurner. Dr Duurnuntericht bi dämm isch gnaadeloos gsii... dä isch immer doo gstande mit syne hutänge, wysse Duurnhoose, Duurnschläppli und em Schwizer Krizli uff dr Bruscht. Bi dämm hets numme Ring und Reck gää, nie ebbis mitem Balle... aber voor dr Allschwiler Faasnacht het är immer ebbis mit dr Klass baschtlet. Mer hänn miesse glaini Ladäärnli moole und aimol sin mer als Zwäärgli mitgloffe... dasch so my eerscht Kontaggt mit dr Faasnacht gsii.

     
  Wenn foot bi Dir d Faasnachtsstimmig oder s Kribble n aa ?
  Renato:

Wenn die eerschte Prässekonferänze fir die eerschte Voorfaasnachtsveraastaltige sin... oder Blaggeddeussgoob, bzw. wenn s eerscht Mool bekanntgää wird, was s Sujet an dr Faasnacht isch. Speetischtens aber 5 Daag voor dr Premiere, wenn mer im Scala am uffbaue und yyrichte sin.

     
  Het sich d Faasnacht im Geegesatz zu friener veränderet ? Und wenn jo, in welli Richtig ?
  Renato:

Y ha mer zem Ziil gsetzt, alles emol z mache an dr Faasnacht und do gheert Schnitzelbänggle au dezue. Y ha aifach s Gfiil, ass es e weeneli Saichter wird... grad bi de Schnitzelbänggler... s muess immer politisch korräggt sii, joo nit schaarf und fräch und das find y seer schaad. Mynere Mainig noo bruuchts au kaini Blään bim Cortège... leend doch aifach alli faare wie sie wänn, das git denn e riise Buff... aber gits jo ainewäg iirgendwie. Und dr Zyschdignomidaag mit dr Kinderfaasnacht isch doch s bescht Byspiil defiir, ass es in jeedem Fall immer funggdioniert.

   
  Wie schwiirig ischs an dr Faasnacht dr Renato Salvi z sii ? Wird me doo ständig vo de Lyt aagsproche ?
  Renato:

Y finds no aagnääm... waisch wenn s "Fasnachtskiechli" umme n isch, denn hänn das ebbe 6000 Lyt gsee und die maischte sin jo au Faasnächtler und do drifft me nadierlig immer dr aint oder ander an dr Faasnacht.

Und e jeede spricht Di uffs "Fasnachtskiechli" aa oder ?
Y find das toll wenn ebber kunnt und miir perseenlig sy Yydrugg vom "Fasnachtskiechli" mitdailt. Y due mi nit fir ebbis rächtfeertige, wo mer uff dr Biini gspiilt hänn, aber s isch immer seer indressant zem loose, was d Lyt eso dängge... quasi e Kunde-Feedback ;-)

Wie isch das wenn me als Schauspiiler innere luschtige Theaterwält underwäggs isch ? Erwaarte d Lyt, ass immer luschtig bisch wenn me Di drifft ? Erwaarte sie, ass Du denn immer dr Max machsch ?
Die Erwaartige erfill y denn au... und das gheert dezue und mach y au seer gärn.

   
  Gits wärend dr Faasnacht au emol e Momänt, wo aifach naime aanestoosch, d Faasnachtsluft yyneziesch und dänggsch "Wow jetz isch Faasnacht" ?
  Renato:

Das sin die scheenschte Momänt... zem Byspiil am Spaalebärg stoo und em Dryybe zueluege. Y woon jo jetz am Minschterbärg und dasch ganz toll. Letscht Joor, Faasnachtszyschdig am 07:00 hänn si d Faasnacht abgstellt... aifach Rue... denn sin mer uffgstande und sin am 08:00 duur d Stadt gloffe... groossaartig...
me gspiirt, s isch Faasnacht, Räppli am Boode, Requisitewaage wo ummestoot... me gheert e Drummler, e Pfyffer... aber au e Laschtwaage wo Materiaal in Laade bringt. E unglaubig wunderscheeni Stimmig und das mache mer uff jeede Fall wider emool.

     
   
  Waggiswääge ? Bisch amigs e danggbaars Opfer fiir d Waggis ?
  Renato:

Wenn y am Stroosserand stand, denn verlang y nadierlig au ebbis vo dääne Waggis. Oft rief y denn uff e Waage uffe "Was isch ? Hesch grad Pause oder was ?" und denn griegsch nadierlig e Laadig ab, aber maischtens griegsch denn au ebbis, wo n y aber au grad wider an e Kind verschängge due.

     
  Was hesch Du emol als glaine Bueb welle wärde ?
  Renato:

Muusiker... y ha au d Uffnaamepriefig am Konservatoorium gmacht... uff dr Tuba... aber zem Kons gheert ebbe au, ass me Klavier spiile kaa und das het mi aifach aagschisse.

     
  Was macht Di gligglig ?
  Renato:

Gligg isch bi mir glych wie Zfriidehait und zfriide bi n y nit vyyl. Aber dasch vellicht au aaerzooge woorde... wenn me z friide n isch, kunnt me in e Glychmuet yyne und das darf me nit.
Und my Frau macht mer Fraid... das muess y jetz saage, sunscht het si kai Fraid ;-)

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Renato:

Jä, Gummi... y ha als Kind e Mandleoperatioon ka und y gsee das no ganz genau, wie n y deert im Bett ligg und dä Pfläger mit däre Gummimasgge fir d Narkoose uff mi zuekoo isch. Die Masgge het so gruusig gmiffelet und noo Leesigsmittel gstungge... und immer wenn y das schmegg - wo s zem Gligg hitte fascht nimm git - denn ligg y wider uff däre Baare und gsee, wie dä Typ mit däre Masgge uff mi zuekunnt.

     
  Welles isch Dy absoluts Highlight gsi im 2017 ?
  Renato:

Y ha syt 30 Joor s eerscht Mool e feschti Aastellig und zwoor bi dr Firma PAMY GmbH. PAMY sponseret u.a. au s "Fasnachtskiechli" und isch e Grubbe vo Lyt, wo Theaater- und Film Produggdioone macht. Deert bi n y als Projäggtlaiter "Theaater" yygstellt woorde.

Und was macht e Projäggtlaiter "Theaater" ?
Y hilf mit, in Ditschland Theaater Prduggdioone z oorganisiere. Y hätt nie dänggt, ass me mi mit 50 und noo iiber 30 Joor als säbstständige Theaatermacher no yystellt.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Renato:

Mitem Ruedi Walter oder em Klaus Maria Brandauer.

     
  Was wirdsch an Fraue nie verstoo kenne ?
  Renato:

Ohjee, dasch jetz die schwiirigscht und haikelscht Froog wo de bringe kasch.
Was y nie verstand, isch d Aart und Wyys vo dr Kommunikatioon... si hänn aifach e anderi Uffassig vo Kommunikatioon... y sags jetz aifach pauschaal.

Byspiil ?
Si wott gärn go zNachtässe... sie kunnt haime und anstell vo "Du geen mer hit zOobe go zNachtässe ?",
haissts "Was machsch Du hit zOobe ?"... denn sag y: "Y sott no 2, 3 Täggscht iiberaarbaite...", sie: "Ahaa... denn lueg y halt Färnseh". Denn am 22:30, wenn dr Krimi au scheisse gsii isch, haissts denn "Du waisch y find das aigentlig nit eso luschtig... Du hesch jetz dr ganz Oobe am Compi ummedeggelet... waisch y wär lieber go ässe hit zOobe". Und das sin denn immer eso Sache wo n y dängg "Denn sags doch aifach wenn haime kunsch, ass go Aesse wottsch"... y hät denn umgstellt und alles wär guet gsii.

     
  3 Sache wo no unbedingt in Dym Lääbe mache wottsch...
  Renato:

Numme 3 ? ;-)
1.) Also was y scho immer ha welle mache, aber deert nit aanegange bi well y z digg gsii bi... miteme Tourewaage uffere Rennstreggi 1 Stund lang kenne Gas gää.

2.) Im Lotto gwinne... nit wäggem Gäld, sondern wäggem Gfiil wie das isch, wenn me syni Zaale gseet und gwinnt

3.) E Wältrais mitem Woonmobil, aaber miteme richtige Woonmobil... y ha eggsdra no d D1 Priefig fiir Faarziig bis 7,5 Tonne gmacht.

     
  Wär wurdsch gärn emol ins Dschungelcamp schigge ?
  Renato:

Mike Shiva mit sym Hund Chocolat

     
     
  No e baar Schlaagweerter, bitte numme mit aim Satz beantwoorte...
  Kino oder Theaater ?

Theaater... wägge däne schiss Popcoornfrässer. Y hass dä Gschmagg und wenn s ganz Kino noo Popcoorn miffelet.

  Basel... Fähri... isch ebbis, wo n y mit Basel eggsdreem verbind.
  Ziiri... Unoort... y find Ziiri schlimm, guet d Altstadt isch iiberall scheen... y fiil mi aifach unwool in Ziiri. Aber hättsch jetz Bärn gfroggt, denn hät y au "Unoort" gsait.
  Herbschtmäss... Faarbe und luege... s Riiseraad miesst me s ganz Joor duure stoo loo. Stell Dir emol voor, e Riiseraad im Summer und me goot deert mit kuurze Hoose druff und luegt uff d Stadt aabe... aifach numme heerlig.
  Baasler Rhywiera oder Palmestrand ? Rhywiera... y find Meer nit toll, noo 2 Daag ha n ys gsee.
  "Fasnachtskiechli"... Hoffentlig no lang...
  Donald Trump... Hoffentlig nimm lang...
  50 Shades of Grey ... Nie gsee... isch das e n Erfaarigsbricht ussem Altershaim ???? ;-)

Vyyle Dangg fiir Dyni Antwoorte