Dr Basler Ueli vom Spiil vo de 3 Eeregsellschafte im Glaibasel
   
 

  Voore Wuche bisch no als "Ueli" am Vogel Gryff im Glaibasel ummegflitzt... wie isch Dir gange ?
  Ueli:

Super... s isch aimol mee e groossaartige Daag gsi do im Glaibaasel und schwelg immer no in myne Erinnerige. Wenn me mit dämm scheene Bruuchtum uffgwaggse n'isch, denn ischs ebbis wunderbaars.

Drotz em schlächte Wätter ? Du bisch jo no aaschliessend grangg woorde ha n y gheert...
Genau... aber sobald me s Goschdyym aahet und d Kapuze doobe n'isch, denn bisch eso in de Emotioone dinne, ass nit me vom schlächte Wätter mitgriegsch.

     
 

Wie lang bisch jetz scho als "Ueli" underwäggs ?

  Ueli:

Y bi jetz im 4. Joor als "Ueli" underwäggs und wirds sicher noonemool e Joor mache... dernoo wärde mer gsee, wies wytergoot. Unsere Spiilscheff isch fir die ganz Charge verantwoortlig und wird denn entschaide...

Wie wird me "Ueli" ?
Amene scheene Daag kunnt dr Spiilscheff zue Diir und sait "Du bisch Ueli..." oder "Du danzisch e Dier..." s isch kai Wunschkonzärt ;-)

Okey... dh. me ka kaini Winsch aabringe ? Zem Byspiil, ass me emol dr "Wild Maa" sii wott ?
Nai... me ka kaini Winsch aabringe... dr Spiilscheff macht e Blaanig iiber 10 Joor und entschaidet eso, ass dr Rhythmus yyghalte wird. S het au doodemit z due, well jeedes vo dääne Goschdym numme aimool voorhande n'isch... dh. dr Spiilscheff muess luege, wäär in welles Goschdym yynebasst. Au d Goschdym vo de 4 Ueli sin verschiide grooss... und dasch iibrigens au dr Grund, worum y dr Schwaarz / Wyss Ueli ha... y bi dr ainzig gsii, wo in das Goschdym yynebasst het ;-)

E Goschdym aabasst oder abgänderet wird nit ?
Nai...

Das haisst, wenn Dyni Zyt als "Ueli" umme n'isch, wirds Goschdym abzooge und em näggschte iibergää ?
Genau... s goot nadierlig zeerscht in d Rainigung und aaschliessend zer Schnyyderin, ass sie - falls neetig - ussbessere kaa... dernoo goots den zem näggschte, wo dr "Ueli" sii wird.

     
  D Zyt, wie lang me dr "Ueli" sii daarf... wird das vom Spiilscheff bestimmt oder isch das voorgää ?
  Ueli:

Bi de Dier ischs voorgää... aber au nit offiziell... d Reegle innerhalb vom Spiil sait, ass me ne Dier 6 Joor danzt.
Bim Ueli ischs nit feschtgleggt... dr Spiilscheff ka no 3 Joor saage "Fir Dii goots jetz e Stuefe wyter..." oder me blybt 8 Joor "Ueli"... das kunnt immer druff aa, was är no mit aim voorhet.

     
  S git 4 verschiidefaarbigi "Ueli"... fir alli, wos nit wisse... welli Faarb stoot fir welli Eeregsellschaft ?
  Ueli:

S isch esoo... s git die folgende 3 Gsellschafts-Ueli:
Eeregsellschaft "Zem Räbhuus" --> Grien / Wyss Ueli
Eeregsellschaft "Zem Häre" ------> Root / Wyss Ueli
Eeregsellschaft "Zem Gryffe" -----> Blau / Wyss Ueli

Und fir d Stadt Basel --> Schwaarz / Wyss Ueli

Dr Schwaarz / Wyss Ueli gits aber noonig eso lang oder ?
Voor vyle Joore het me emol beschlosse, ass es e 4. Ueli bruucht... so doodemit isch dr Schwaarz / Wyss Ueli fir
d Stadt Basel ins Läbe gruefe woorde und doodemit kunnt au vyl mee Gäld fir die Bediirftige im Glaibaasel zämme.

     
 

Was isch fir Dii d Faszinatioon vom Ueli ?

  Ueli:

Fir mii ischs die groossaartigscht Charge im ganze Spiil... am Moorge isch d Route e weeneli voorgää, aber dernoo ka me sich relatiiv frey beweege.

     
  Wie gseet dr Daagesablauf vomene Ueli am Vogel Gryff uss ?
  Ueli:

Mer dräffe n ys am 08:00 im Kaffi Spitz, wo au s Archiiv vo de 3 Eeregsellschafte n'isch und sin denn wie die andere imene Hotelzimmer... dh. d Ueli hänn ains, d Dier hänn ains und deert ziehn sich denn alli um und mache sich baraat. Dernoo geen d Ueli immer als eerschts aabe in Merian Saal zem Läberli ässe... denn gits e n'Aasprooch vom Spiilscheff, begriesst d Eeregescht und verzellt e weeneli iiber dr Bruuchtum. Denn gits innerhalb vo däre Reed e Signalwoort, mer genau wisse, jetz mien mer ys baraat mache... denn goots Lärvli aabe, d Kapuze n'uff und denn haissts "Ueli ab uff d Gass", denn seggle mer zem Saal uuse und sin den dr ganz Daag
underwäggs :-)

Und dä Daag isch seeeeeer lang...
Bis zem Schlussdanz am 23:00. Mer hänn allerdings 2 Pause, wo e weeneli lenger sin als sunscht... zem Byspiil voor de Saaldänz und aimol voorem Ooberundgang mit dr Faasnachtsgsellschaft "Olympia"... dernoo hänn mer 45min Zyt und kenne ebbis frischs aaleege.

Wie haltisch Di fit ? Dasch jo e waansinns lange Daag und bisch die ganz Zyt am ummerenne... und denn kunnt jo no das schweere Kässeli dezue...
Dasch eso... aber das meergsch nit. Ab Novämber gang y reegelmässig go jogge und halt mi eso fit. Me isch dr ganz Daag in syne Emotioone gfange, ass dr Schmärz eerscht 2 Daag speeter spiirbaar isch ;-)

     
  Und wie gseets mitem Ueli-Lärvli uss ?
  Ueli:

Dasch bi uns e ganz spezielli Draditioon... und zwoor macht jeede "Ueli" sy Lärvli sälber. S bsundere an däne Lärvli isch ebbe, ass si uss Lyynestoff und gwaggst sin... derno wärde si denn no gmoolt.

Das haisst, ass jeedes Joor e neys Lärvli machsch ?
Jo genau... und denn gits noonemool e scheeni und alti Draditioon... nooem Schlussdanz, schänggt jeede "Ueli" sy Lärvli emene guete Frind oder Familiemitgliid... so quasi als "Danggerscheen" syni Frindschaft. Die Lärvli sin nadierlig immer seer begeert und s isch immer ebbis bsunders, wenn dr entsprächendi Gascht mit däre Geeschte iiberrascht wird.

     
  Wie scho gsait, rennsch Du die ganz Zyt in dr Geegend umme und sammlisch Gäld... hesch ainewäg emool Zyt, zem e weeneli d Stimmig z gniesse ? Oder bisch immer voll konzentriert ?
  Ueli:

Doch, doch... s git gwissi Dänz am Daag, wo n y ganz nooch erläbe und gniesse mecht... und mer au seer wichtig sin. Aber au die lychtende Kinderauge z gsee, macht sehr vyl Fraid... und nadierlig liggt au emol e "Small Talk" dinne ;-). Als "Ueli" kasch das wirglig gniesse...

Friener hets emol e "Ueli" gää, wo sogaar e Dachrinne uffeklätteret isch, zem s Gäld z hoole... gits das hitte
immer no ?
Nai... aber friner hets wiirglig no ganz verruggti "Ueli" gää, wo iiberall uffeklätteret sin zem s Gäld z hoole... sogaar uffe Baukraane ;-). Aber das goot hitte nimme.

Aber d Lyt wärfe immer no s Gäld im woorschte Sinn "zem Fänschter uuse" oder ? ;-)
Jä das gits immer no... aber s Minz am Boode z finde, isch fir ys e weeneli miesaam... mer gseen jo nit eso waansinnig vyl in däm Lärvli... s Sichtfäld isch zimmlig yygschränggt.

     
  Das Kässeli wird jo zimmlig schweer mit dr Zyt...
  Ueli:

Jä dasch eso... und daas Joor het me ganz klaar gmeergt, ass dr Vogel Gryff amene Samschtig isch und d Lyt frieh uff de Bai gsii sin. Bi sovyyl Gäld wird denn s Handglängg relativ schnäll emol mied ;-)... aber je lenger dr Daag goot, desto mee muess me s Kässeli leere und das hänggt aa mit dr Zyt.

Wie schweer isch denn e volls Kässeli ?
Zwische 4 - 6 Kg, jee nodämm was dinne n'isch.

     
  Und was kunnt do an Gäld zämme ?
  Ueli:

Je noo Wuchedaag und Wätter kunnt do scho ebbe zwische 25'000 und 30'000 Frangge zämme. Do findet me Minze, Noote und nadierlig sunschtigs Gschmais, wie Hooseknepf etc. ;-).
S gheert au zer Draditioon, ass sich alli "Ueli" am näggschte Daag zem zelle dräffe... mit debyy isch au e Finanzer vo de 3 Eeregsellschafte. S ganz Gäld wird uffeme groosse Disch ussgleert, sortiert und zellt... also Fremdwährige, Hooseknepf, Faasnachtsblaggedde, etc. und dasch immer e ganz luschtigi Sach.

Im Schnitt sin s denn zwische 105 - 120Kg Minz wo do zämmekemme :-)

Wow... unglaublig... und wäm kunnt das Gäld zguet ?
S Gäld goot an verschiideni Instutitioone vom Glaibaasel, wo sich fir Lyt yysetze, wos nit eso guet goot und Understitzig bruuche... immer e sinnvolli Sach und voor allem waiss me, ass es an de richtige Stelle goot.

     
  Hesch scho n emool e Schrittzeller verwändet ? Wie vyyl Kilomeeter rennsch do am Daag umme ?
  Ueli:

Nai, aber e andere "Ueli" hets emol gmässe... mer beweege n'ys zwische 25 - 30km, aber das meergt me
gaar nit ;-)

     
  Hets au emol e witzigi Situatioon gää ?
  Ueli:

Die gits ständig... aber letscht Joor het doch daatsächlig ain brobiert, e Faasnachtsblaggedde ins Käseli yynezdrugge... noo 2 Minute muesch em denn sage "Loos jetz Digge, die goot jetz aifach nit do yyne".

     
  Gits denn au e n'Aart Wettkampf under de "Ueli" ?
  Ueli:

S ganze Gäld goot in e Sagg und me waiss nit, welle "Ueli" wie vyyl gsammlet het... und mer hänn jo au s Motto "Mer sin Spiilfrinde". Do muess e jeede dryybasse und mer wärde wiirglig zue Frinde und do hets kai Blatz fir Konkurränz underenand.

Dräffed Ihr Eych au emol underem Joor ?
Jä, bi uns gits e Moonetshogg, gmainsaami Ussfliig, e Schiwucheänd, e Summerblausch, etc.

     
  Het sich d Spänderfraid im Geegesatz zue friener veränderet ?
  Ueli:

Die isch Plus / Minus glyy... friener hets aifach vyl weeniger Dänz vo de Dier gää... mer reede do vo
6 - 8 Dänz und hitte sin s 50 !!! Me isch vyl mee underwäggs und y wurd behaupte, ass es wider e weeneli zuegnoo het mit spände. Me meergt, ass d Lyt gärn fir e guete Zwägg Gäld gänn und das find y seer scheen.

     
  Was beditet Dir d Faasnacht ?
  Ueli:

Ganz vyyl... kuum isch dr Vogel Gryff verbyy, kumm y in d Faasnachtsstimmig... syt y Glai bii, mach y Faasnacht und bi mit Härz und Bluet e Faasnächtler.

     
  Wenn foot bi Dir d Faasnachtsstimmig aa ?
  Ueli:

My eerschts Etappeziil isch nadierlig ganz klaar dr Vogel Gryff und denn goots aber mit Vollgaas uff d Faasnacht zue ;-)

     
  Was hesch Du emol als glaine Bueb welle wärde ?
  Ueli:

"Ueli"und Fiirweermaa ;-)

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Ueli:

Bi miir sins d Aenisbreetli, wo myni Groossmamme amigs friener gmacht het. Jetz macht si mi Mamme und zwor nooem genau glyche Rezäpt wie friener.

     
  Welles isch Dy absoluts Highlight gsi im 2017 ?
  Ueli:

Y faar syt vyle Joore zämme mit mynere Frau ins Piemont... dasch quasi unseri 2. Haimat woorde. Mer hänn ys e glains Ciabot kauft und hänn ys e langjeerige Draum erfillt... dasch e Räbhiisli und stoot zmitts in de Räbe. Do mer baidi seer engagiert sin und e weeneli weenig Zyt fiirenand hänn, isch das unsere Oort, wo mer ys zruggzieh kenne.

Dr Räbbärg gheert nit dezue ?
Nai dä nit ;-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Ueli:

Mitem Sean Connery oder wenn är grad kai Zyt hät, denn mitem Roger Federer ;-)

     
  Was wirdsch an Fraue nie verstoo kenne ?
  Ueli:

Wie me sich 3x am Daag umzieh kaa...

     
  3 Sache wo no unbedingt in Dym Lääbe mache wottsch...
  Ueli:

1.) Was y sicher noonemool mache wott, isch e Asierais...
2.) Mit 55 d Koffer pagge und definitiiv ins Piemont ziigle...
3.) Y spiil syt 3 Joor Posuune und ha 2 Joor lang Stunde gnoo. Duur myni vyle andere Hobbies wo n y no ha, isch das e weeneli in Egge groote und y wott unbedingt wider reegelmässig Posuuneunterricht nää.

     
  Wär wurdsch gärn emol ins Dschungelcamp schigge ?
  Ueli:

Dr Beni Thurnheer... dä wurd alli zem Camp usseschnuure... dä find y richtig miesaam. Dä wurd numme Dschungelkeenig wärde, well sich alli andere s Läbe gnoo hänn ;-)

     
  No e baar Schlaagweerter, bitte numme mit aim Satz beantwoorte...
  Kino oder Theater ?

Kino... Theater isch nit eso my Ding...

  Basel... E wunderbaari Stadt am Rhy...
  Ziiri... Het die bessere Baize, wie miir do z Basel...
  Herbschtmäss... Sait mer nit me... heggschtens no mitem Gottemeitli und denn het sichs...
  Baasler Rhywiera oder Palmestrand ? Mittlerwyle im Summer d Rhywiera und im Heerbscht denn dr Palmestrand...
  Vogel Gryff... Fir mii dr schenscht Daag im Joor...
  Donald Trump... Druurig ass esoo aine, Bresidänt vomene sottige Land wärde kaa...
  50 Shades of Grey ...

Indressiert mi nit... ha n y nie ebbis gsee oder gläse...

Vyyle Dangg fiir Dyni Antwoorte