Chaise "D' Kaffibohne" mit Guido, Brigitte, Gudrun und Serge
   
 

 

Wie lang gits denn Eyri Chaise "D' Kaffibohne" scho ?

  Gudrun:

Uns gits syt 2002, also syt 15 Joor.

     
  Und Iir sin alles Kaffidringger ? Oder wohär kunnt denn dr Namme "Kaffibohne" ?
  Gudrun:

Nai... Friener sin mer mitem Schiff uffem Rhy gfaare und do hets die beriemti Funggfrequänz uffem Kanaal 10 gää, wo sich d Schiffer underenand ussduscht hänn. Denn hets amigs ghaisse "Gnagi an Salami" oder "Froschmeier an Kaffibohne" und eso het immer jeede gwisst, wär grad mit wäm reede duet... jo und ych bi d Kaffibohne gsi und eso isch denn speeter dr Namme fir d Chaise entstande.

     
  Normaalerwys sitze jo 2 Mitgliider in dr Chaise... aber nit eso bi de "Kaffibohne"... Iir sin z viert... vo Aafang aa ?
  Gudrun:

Mer sin au scho z säggst gsii, aber dasch denn doch e weeneli z vyyl fir e Chaise.

Aber denn verdailt uff 2 Chaise oder ?
Nai mer hänn e groossi Kutsche kaa.

Wow... und wie goot das mitem Blatz ?
Am Aafang wärde unseri Keerb bis zem Rand gfillt und sin denn uff unserem Schooss. Hinder dr Chaise hänn mer no e grosse, alte Schiffskoffer, wo voll mit Material isch. Sytlig vo dr Chaise gits au no Blatz, unseri Blueme steen bi uns am Boode und voorne bim Kutscher gits au no Sache wo mer deponiert hänn ;-)

Und wo isch dr Wysswyy ?
Dä befindet sich hinde im Schiffskoffer... woby mer kai Wysse, sondern Cüpli dringge ;-)

Ou Pardon ;-)

     
 

Iir sin jo beriemt fir Eyri Kaffibohne-Päggli, wo n Iir am Cortège verdailet gäll ?

  Gudrun:

Genau... mer mache zig zig vo dääne Kaffibohne-Päggli... dasch e Kaffibohne wo in Schoggi yypaggt isch... mer wärde sogaar am Cortège noo dääne gfroggt.

Wie vyyl vo dääne Päggli gits pro Faasnacht ?
Ebbe 2000 Stigg... wenns numme längt ;-)



     
  Ischs scho immer Eyre Draum gsii, uffere Chaise Faasnacht z mache ? E anderi Optioon wie Drummle oder Pfyffe hets nie gää ?
  Guido:

Also bi miir nit... y ha zwoor jeedes Joor an dr Faasnacht frey gnoo, bi aber nie aggdiiv deby gsii. Y bi eerscht duur myni Partnerin dezue koo... d Brigitte isch jo scho deby gsii und dasch au die Zyt gsii, wo mer zu säggst uff dr Chaise gsii sin. Und jetz hets mer dr Eermel so richtig yynegnoo und will nimm uffheere ;-)

  Gudrun:

Und jetz sin mer sogaar eso vergifteti Faasnächtler, ass mer voor dr Basler Faasnacht im Goschdym zem Carneval vo Venedig raise.

Und wie kemmet Iir deert bi de Lyt aa ?
Sauguet... me muess sich aifach - wie iiberall - benää und au im entsprächende Goschdym underwägg sii, wo au zem Carneval vo Venedig basst. Do aigne sich die klassische Basler Goschdym wiirglig seer guet dezue.

  Serge: Es ist sehr mystisch...
     
  Iir bruchet jo gemäss Voorschrifte au Beglaiter, wo näbe de Ross laufe oder ?
  Guido:

Jä... pro Ross, ai Beglaiter.

  Brigitte:

Y finds no wichtig ass me waiss, ass unsere Kutscher nit numme an dr Faasnacht faart, sondern au sunscht. Är het mehreri Blaanwääge und isch mit dääne Ross immer underwäggs... au voor dr Faasnacht lauft im Stall immer Faasnachtsmuusig, ass sich die Ross an dä Lärmpeegel gweene.

Au Guggemuusig ?
Jo sicher ...

  Gudrun: Unser Lieblingsross "Magdalena" lauft am liebschte hintere Guggemuusig... die liebt das und dänzlet sogar no debyy ;-)
     
 

Wie erläbet Iir d Faasnacht uffere Chaise ?

  Brigitte:

S isch e tolls Gfiil... und die glaine Gnäggis saage au wider "Danggscheen" wenn si ebbis vo n ys griege... oder frooge ganz aaständig "Daarf y bitte ebbis haa?" und dasch seer scheen.

  Guido: 3/4 vo de Lyt sin aaständig und frindlig, egal ob Jung oder Alt... nadierlig gits au anderi, aber dasch iiberall
esoo.
     
  Hänn Iir s Gfiil, ass sich d Faasnacht im Geegesatz zue friener veränderet het ?
  Serge:

Friener isch nadierlig d Faasnacht bis noo Glaihynige gange oder bis zer Allschwiiler Gränze oder sogar bis noo Rieche. Hitte isch d Faasnacht numme no in dr Innerstadt bresänt und usserhalb isch nit me... dasch aifach verbyy.

Stichwoort "Faasnachtsball"...

  Gudrun: Hejoo... die hets im Gundeli Quartier, wie au im Rest. 3 Keenig z Glaihynige gää.
     
  Und Veränderige uss dr Sicht vo dr Chaise ?
  Gudrun:

S isch underschiidlig... aber wo mer ys immer druff achte isch, ob ebber e Blaggedde aahet... dasch ganz wichtig fir ys.

  Guido: Apropos Lyt, dasch nadierlig au immer e weeneli vom Wätter abhängig... wenns scheen Wätter isch, denn sin d Lyt au ganz anderscht.
  Serge: S isch doch wie im Militäärdienscht... am Mittwuchzoobe verzellsch numme no vo de glatte Sache ;-)
     
  Was mache "D' Kaffibohne" zOobe wenn dr Cortège verbyy isch ?
  Gudrun:

Am Mäntig isch unser Cortègeabschluss bi dr Muba. Aaschliessend geen mer deert ins Pub und genne n ys eerscht Mool e groosse Dringg... dä hänn mer ys denn wiirglig verdient ;-). Dernoo geen mer gmietlig go zNachtässe und blybe mee oder weeniger im Glaibaasel.

Und am Zyschdig ?
Am Zyschdig sin mer Charivaari und z Fuess underwäggs. Mer bsueche denn unseri Pasivmitgliider in de verschiidene Baize...

     
  Was verbruucht me denn so an Materiaal uffere Chaise ? S git jo immer soone Klischee... Chaise sigge jo kai emotionaals Fiirwäärg und heebe d Rose am Stiil fescht, bis d Faasnacht verbyy isch ;-)
  Gudrun:

Das mache mir nit und fihle n ys au nit devoo bedroffe.
Numme scho die 2000 Kaffibohne-Päggli... stell Dir emol voor, was das fir e Volume git. Dr Blatz uffere Chaise isch jo begränzt und mer sin au kai Waggiswaage. Mer hänn Schoggisache debyy, sunschtigi Siessigkaite, ebbis z dringge, Blueme, etc. etc. aigentlig miesste mer no e Aahänger haa.


  Brigitte: S het e jeede syn Baschtkoorb uffem Schooss und unseri Päggli ligge maischtens in dr Mitti uffem Boode. In jeedere Pause fille mer denn wider unseri Keerb ussem Schiffskoffer uff und das muess denn aifach länge.
     
  Und wie gseets mit Mimose uss ?
  Gudrun:

Wenn mer Mimose hätte, wär fir ys d Faasnacht noere Stund erleedigt... mer reagiere allergisch druff.

   

 

  Stiige d Lyt mänggmool uff d Chaise und bediene sich sälber ?
  Gudrun:

Das hets emol in dr Rhygass gää, aber unsere Kutscher isch seer uffmeergsaam gsii und het em mit dr Paitsche e baar uff d Finger klopft... denn ischs erleedigt gsii ;-)

   

 

     
  Vo Chaise waiss me jo au, ass si eenter e weeneli zrugghaltend sin... gits aber au emool e Momänt, wo me intregiere duet ? Oder kunnt das fir Eych nit in Froog ?
  Brigitte:

Nai... mer dien scheen wingge, sin frindlig, gänn e Päggli und denn isch dä Fall erleedigt.

  Serge: Friener in dr alte Zyt, hänn jo numme d Lyt vom "Daig" e Chaise gmacht... noem Motto "Me het nit und git nit"... und ganz friener het me sogar no Muusig uff dr Chaise gmacht, do hets nit sunschtigs gää.
     
  Chaise sin jo au fir iiri ussergweenlige und wunderscheene Goschdym bekannt... do sin Iir jo kai Ussnaam. Wie lang schafft me amene sottige Goschdym, bis alles wiirglig eso isch, wie me wott ?
  Gudrun: Mer hänn e wiirglig tolli Schnyderin, wo all die groossaartige Idee vom Serge umsetze duet. S kas gää, ass dr Serge zmitts in dr Nacht uffstoot und sait "Hey, jetz ha n y die Idee". Au s Goschdym fir d Faasnacht 2018 isch syni Idee gsii und y ka Dir saage, das wird wider e tolls Goschdym wärde... aber ebbe, s ganze nimmt nadierlig scho seer vyl Zyt in Aaspruch, bis es denn au wiirglig eso isch, wie mer wänn.
  Brigitte: ... und fir uns immer wider e Gläägehait, ys z dräffe zem aine schnappe ;-)
     
  3 Sache wo n Iir bi de "Kaffibohne" schätze dien ?
  Brigitte: Dr Zämmehalt (au underem Joor, nit numme wärend dr Faasnacht) und s Mitenand.
  Gudrun: Mer hänn ganz tolli Passivmitgliider... au underem Joor.
  Serge: Und e tolle NiggiNäggi fir unseri Passivmitgliider.
  Brigitte: Und unser Highlight isch nadierlig dr Samschtig voor dr Faasnacht, denn schmigge und fille mer unseri Chaise.
     
  Wenn foot bi Eych s Faasnachtskribble aa ?
  Gudrun: Zum aine bi dr Sujetsitzig und zem andere jetz im Dezämber, wenn mer zämme die Päggli voorberaite... speetischtens aber bi dr Blaggedde-Vernissaage.
     
  Was beditet Eych d Faasnacht ?
  Brigitte: D Voorfraid usszlääbe.
  Gudrun: E Stigg Haimat und Kultuur.
  Serge: Isch e Stigg Basel, gheert zue Basel und y hoff s blybt in Basel.
     
  Wenn Iir ebbis an d Zueschauer vo dr Faasnacht saage kenntet... was wär das ?
  Serge: Ass si uff iiri Kinder uffbasse... vor allem wägge de groosse Reeder an dr Chaise... und geegesytigs Verständnis fiirenand... Faasnächtler wie au die andere.
  Gudrun: Mer verdaile numme Sache, wo Kinder au feschtheebe kenne... und eso muess y mir kaini Gedangge driber mache, ass das Kind under d Reeder koo kennt, falls emol ebbis falle losst.
  Guido: Y finds schaad, ass vyli Zueschauer mit dr Plastikgugge ummelaufe... die wänn immer numme ebbis und d Faasnacht indressiert die iiberhaupt nit... si luege weder d Laarve, no s Goschdym aa... Hauptsach si griege iiri Gugge voll mit Sache... isch egal mit was... au mit Sache, wo si nit emol bruuche kenne.
     
  Was macht Di gligglig ?
  Guido:

Myni Partnerin :-)

     
  Welles isch Dy absoluts Highlight im 2017 gsi ?
  Brigitte:

Y ha zämme mit dr Gudrun e riise Geburtsdaagsiiberraschigsparty fir dr Guido organisiert.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Serge:

Mitem Dani vo Wattenwyl... syni ganzi Aart wo n är an sich het, gfallt mer seer.

     
  Was hesch Du als glains Maitli emol welle wärde ?
  Gudrun:

Grooss und staarg :-)

Hesch Du als Maitli e Idool ka ?
Y bi uff dr Peter Kraus gstande... my ganz Zimmer isch voll vo Peter Kraus Poster gsii.

     
  Was wärdet Iir an Männer nie verstoo kenne ?
  Gudrun: Ass si nie pinggtlig sii kenne.
  Brigitte: Ass är nit haime will, wenn är sott ;-)
     
  Was wärdet Iir an Fraue nie verstoo kenne ?
  Serge: Ass mer si ebbe nit versteen ;-)
  Guido: Ass si zeerscht in 5 Lääde ebbis go sueche mien ums amänd wider im eerschte Laade kaufe... und ych immer mittschumple muess.
     
  Wär wurdet Iir gärn emol ins Dschungelcamp schigge ?
  Alli:

Dr Hans-Peter Wessels und dr Baschi Dürr

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Gudrun: Theater... bi nit esoone Kinomensch.

  Basel... Guido: Glaibaasel... und numme Glaibaasel.
  Ziiri... Brigitte: E Katastroophe... d Stadt wär scheen... aber schaad, ass si bewoont isch ;-)
  Herbschtmäss... Serge: Achtibaan... wenn naime e Achtibaan stoot, gang y sofort druff.
  Chaise Faasnacht... Gudrun: Sensationell... nie ebbis anders.
  Baasler Rhywiera oder Palmestrand ? Guido: Palmestrand... y bi ne Siidländer und die hänn dr Summer lieber als dr Winter.
  Donald Trump... Brigitte: Goot mi nit aa... dasch in Amerika.
  50 Shades of Grey ... Alli: Hä ? Was isch daas ??

Vyyle Dangg fiir Eyri Antwoorte