Nathalie Tellenbach, stellverträtendi Gaschtgäberin vom Restaurant "Leuezorn"
   
 

 

"Gaschtgäberin"... das deent eso scheen...

  Nathalie:

Jo, s deent e weeneli scheener als "Gschäftsfierer"... do mer d Gaschtronomie liebe und das au mit Häärzbluet mache, ischs vyl scheener "Gaschtgäber" z saage... s isch neecher bim Gascht und mer sin s jo au.

     
  Bisch Du scho immer in dr Gaschtronomie underwäggs gsi ?
  Nathalie:

Jo, aigentlig scho... y ha mit 17 myni Lehr als "Koch" aagfange und bi 10 Joor uff dämm Bruef blyybe... y ha denn no zuesätzlig d Hotelfachschuel in Luzärn gmacht und speeter my aige Restaurant ereffnet. Laider ha n y uss verschiidene Grind wider miesse uffheere...

Und wie lang schaffsch jetzt scho im "Leuezorn" ?
Im "Leuezorn" aagfange ha n y als Betriibsassistäntin im 2016 und bi jetz Stv... also aigentlig bi n y immer in dr Gaschtronomie gsii.

Was isch denn Dyni Faszinatioon vo dr Gaschtronomie ?
Aigentlig alles... Koch wird y immer im Härz blyybe, y fiil mi unglaublig wool in dr Kuchi... dr Wäggsel an d Front isch nit aifach gsii, aber au daas ha n y seer liebe gleert und macht mer seer vyl Spass.

E Wäggsel zrugg in d Kuchi kunnt nimm in Froog ?
Am liebschte wurd y baides mache ;-)

     
 

Wird me als glernte Koch iiberhaupt no vo syyne Frinde zem Ässe yyglaade ?

  Nathalie:

Y wird seer oft yyglaade... aber zem koche ;-)
Myni Frinde frooge mi denn immer "Nathi, koche mer zämme ebbis feyns ?"... aber amänd koch ych denn ;-)

Kocht au emol ebber fir Dii ?
S wird seer sälte fir mi kocht, was y seer schaad find. D Lyt hänn s Gfiil, ass y si kritisiere wurd, aber das ha n y nonie gmacht. Mittlerwyyle wisse das aber myni Frinde und koche au fir mi... y gib heggschtens no Tips wenn y dernoo gfroggt wird.

     
  Mache mer emol e fliegende Wäggsel vom koche zer Faasnacht... dr "Leuezorn" isch jo e Hoochbuurg vo de Faasnächtler und befindet sich zmitts im Härze vo dr Stadt... wenn foot d Blaanig und d Voorberaitig uff d
Faasnacht aa ?
  Nathalie:

Aigentlig diräggt noo dr Faasnacht... zem Byspiil d Schnitzelbangg-Reservatioone... noo dr Faasnacht 2017 sin mer beraits fir d Faasnacht 2018 komplett ussbuecht gsii... dezue kemme no d Stammreservatioone vo de groosse Cliquene, wo zem Zmoorge und zem Znacht kemme.

Wie vyyl Mitarbaiter schaffe den im normaale Daagesgschäft ? Also im Service ?
3 Mitarbaiter...

Und wärend dr Faasnacht ?
21 ;-)

     
  Und wie lauft das mitem Materiaal ? Bier, Ässe, etc. ? Ka me iiberhaupt esoone Aaloss blaane ?
  Nathalie:

Jä klaar... mer blaane das uffgrund vo de Erfaarigswärt wo mer hänn. Mer luege d Bstellige vom letschte Joor aa und bespräche das mitem Liiferant, wie mer am beschte optimiere kennte. Aber effeggdiiv blaane ka me so ebbis nit wiirglig, do hets ganz vyli Faggdoore wo e Yyfluss haa kenne. Au s Wätter spiilt e groossi Rolle... dringge d Lyt eenter Bier oder Kaffi Lutz...

S Bier ussgange isch Eych aber nonie oder ? ;-)
Nai... y glaub, daas wär e Skandaal ;-)

Wie gseets mit dr Dekoratioon uss ?
Dekoriert wird maischtens am Samschtig voor dr Faasnacht... mer hänn s groosse Gligg, ass das d Faasnachtsclique "BMG" iibernimmt. In dr Zwischezyt stelle mer um, dh. alli Disch und Stiehl wärde duur Feschtbangg-Garnituure ersetzt.

Y ha gläse, ass am Samschtig vor dr Faasnacht e groosse Aaloss stattfindet...
Jo genau, d Faasnachtsclique "BMG" oorganisiert s eerscht Mool e groosse Masggeball im "Leuezorn"... emol luege wie das eso aalauft... y finds uff jeede Fall e tolli Idee.

     
 

Wie isch denn Dyni Bresänzzyt wärend dr Faasnacht ? Wie muess me sich das voorstelle ?

  Nathalie:

Die isch sicher mee als sunscht... die ganz Oorganisation und Koordinatioon wärend dr Faasnacht muess nadierlig scho stimme und bi 7000 Gescht wo mer in dääne Daag im Huus hänn, isch das scho seer wichtig. Maischtens fang y am 08:00 aa und schaff denn bis Mitternacht.

     
  Hesch denn au emol Zyt, zem e weeneli Faasnachtluft z schnuppere ?
  Nathalie:

Eerscht ab Mitternacht gang y emol kuurz an d Faasnacht, denn 4h schloofe und scho goots wider wyter ;-)

Und wie gseets mitem Morgestraich uss ?
Doo ha n y laider kai Zyt zem luege... aber dasch OK fir mii.

     
  Wie erläbsch Du als Gaschtgäberin d Faasnacht ?
  Nathalie:

Als seer spannend... am maischte hänn mi nadierlig die positiive Ruggmäldige vo de Gescht gfraid, s isch e seer gueti Wärbig fir dr "Leuezorn" gsii. Y ha vyl tolli Gescht kenneglehrt und s het drotzallem immer wider Gläägehait zem schwätze gää.

     
  Welles sind wärend dr Faasnacht Dyni 3 goldige Reegle als Gaschtgäberin ?
  Nathalie:

1.) Definitiiv kai Alkohool dringge und e klaare Kopf bhalte...
2.) Sich nit uffreege und d Rueh bewaare...
3.) Und nadierlig dr Iiberbligg bhalte.

     
  Hets au emol e witzigi Situatioon gää wärend dr Faasnacht ?
  Nathalie:

Die gits immer...

Und e bsunders witzigi ?
S isch aigentlig jeede Daag luschtig... mänggmool kemme e baar Waggis miteme groosse Sombrero bi n ys verbyy und verdaile bim intregiere eso glaini Gschänggli an d Gescht... dasch immer seer luschtig und git e gueti Stimmig.

     
     
  Wie goots Dir am Donnschtigmoorge, wenn alles verbyy isch ?
  Nathalie:

Denn bi n y aifach numme no mied... wenn alles butzt isch und alli Mitarbaiter usscheckt sin, denn bi n y froh, ass es verby isch... aber y frai mi ainewäg wider uff näggscht Joor... y und ha d Faasnacht seer gärn.

     
     
  Ka me saage, ass d Faasnacht e umsatzstaargi Zyt isch ?
  Nathalie:

S isch sicher e umsatzstaargi Zyt, aber nimme die steergscht... aber das het nadierlig au mit de hooche Keschte z due, wo me het... zem Byspiil d Mitarbaiter... normaal sin bi n ys 3 Lyt im Service beschäftigt und wärend dr Faasnacht sin 21 und das meergt me nadierlig scho. D Faasnacht isch guet, aber au koschteintensiiv.

     
  D Gaschtronomie macht jo im Momänt schweeri Zyte duure... wie bisch Du mitem 2017 zfriide ?
  Nathalie:

Mer hänn definitiiv e guets Joor kaa und bi dorum seer zfriide mitem 2017.

     
  Was beditet Dir d Faasnacht ?
  Nathalie:

Y frai mi jeedes Joor uff d Faasnacht... d Gescht sind logger druff und me lehrt sich au e weeneli besser kenne als sunscht underem Joor. Mer hänn aber au Gescht, wo numme zer Faasnachtszyt in "Leuezorn" kemme und das find y seer schaad. S git aber au ganz vyli Reservatioone vo usswärtige Gescht, wo dr Schnitzelbangg-Oobe gniesse wänn, was seer scheen isch.

     
  Wenn foot bi Dir d Faasnachtsstimmig aa ?
  Nathalie:

Dasch bi mir ebbe e Wuche voor dr Faasnacht... me iiberleggt sich ständig, ob me alles richtig gmacht het, ob alles vorhande isch und nit fääle duet, het me gnueg Mitarbaiter yyblaant, etc.

     
  Was hesch Du emol als glains Maitli welle wärde ? Usser d Gaschtronomie...
  Nathalie:

Als glains Maitli ha n y immer gsait, ass y nie imene Büro schaffe wurd. Y ha nie esoone Bruefswunsch kaa wie die andere Meitli... y ha in däre Zyt seer vyl Kinder ghietet und alli hänn gfunde, ass y unbedingt
Glaikindererzierin wärde sott... ha dasu au emol brobiert, aber mi denn doch anderscht entschiide und Koch im Restaurant "Zem Goldige Stärne" glehrt.

     
  Was macht Di gligglig ?
  Nathalie:

D Aarbet macht mi gligglig...

Und privaat ?
Zämme mit myne Frinde ebbis undernää... oder aifach au emol nit mache find y au seer scheen.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Nathalie:

Wyssi Schoggi...

Ookeeeyyy... und worum wyssi Schoggi ?
Friener hets bi uns numme ganz sälte Schoggi fir d Kinder gää... und wo n y emol uff Ooschtere vo mynere Oma e glains Schoggihäsli griegt ha, isch das nadierlig für mii e n'absolute Draum gsii... ebbe das Häsli isch uss wysser Schoggi gsi. Immer wenn y wyssi Schoggi iss, erinneret mi das an myni Oma.

Und was es mänggmoo au no gä het, isch... Mocca Joghurt Stichfescht... und s muess stichfescht sii ;-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Nathalie:

Mitem Nicolas Cage...

     
  Was wirdsch an Männer nie verstoo kenne ?
  Nathalie:

Vyyyyyyyyl ;-)

Y finds immer e weeneli aasträngend, wenn si myn Job und myni Aarbetszyte nit versteen... und das verstand ych denn nit, ass me das nit verstoot ;-)... schliesslig het me mi eso kenneglehrt.

     
  3 Sache wo no unbedingt in Dym Lääbe mache wottsch...
  Nathalie:

1.) Y wott mi gärn wider sälbstständig mache... eenter "Klein, aber fein"...
2.) Denn wurd y gärn emol 2-3 Moonet uff e Rais und e weeneli ebbis vo dr Wält gsee...
3.) Und y wott mer emol e sunnegääli Corvette kaufe :-)

     
  Wär wurdsch gärn emol ins Dschungelcamp schigge ?
  Nathalie:

Dr Donald Trump...

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Musical ;-)

  Basel... Haimatstadt, Rhy, Summer, scheen...
  Ziiri... Vyl Lyt und das ha n y nit eso gärn...
  Herbschtmäss... Fir mi nit eso wichtig...
  Baasler Rhywiera oder Palmestrand ? Palmestrand... well y sunscht seer oft am Rhy unde bi, wenn y frey ha...
  Leuezorn... Y stand am Moorge n'uff und frai mi waansinnig uff d Aarbet...
  Donald Trump... Y mag dä Typ nit und ha s Gfiil, ass är Amerika kaputt macht...
  50 Shades of Grey ...

Nit gläse und nit gsee...

Isch an Dir verbyygange ?
Nai, y ha vyl devoo gheert, aber ha s Buech nit gläse und dr Film au nit gsee... do gits anderi Biecher, wo n y zeerscht läse wott.

Vyyle Dangg fiir Dyni Antwoorte