Nai... 111 Joor isch jetz fir ys kai Grund gsii, zem ebbis speziells z mache. Mer hänn beraits im 2007 unser 100jeerigs mitere Juubelrais noo Tuneesie gfyyrt. Speeter hets denn no e Galaoobe und unsere PinUp Kaländer gä..

PinUp Kaländer ? So guet...
Jojo, mit e huffe blutte BMG-Fudis druff... dr Kaländer isch nadierlig wäg wie waarmi Weggli :-)

Du bisch jo Dambuurmajoor, e Amt wo niemer so gärn mache wott, wells mit e huffe Aarbet und Konzentratioon wärend dr Faasnacht verbunde n isch. Wieso duesch Du Diir das aa ?

Wells waansinnig vyl mit Mensche z due het und ych das seer gärn mach. Dä Huffe mit ganz underschiidlige Charaktertype und Bediirfnis z fiere, isch seer spannend und my Ziil ischs, ass amänd vo dr Faasnacht alli gligglig und zfriide haime geen.

Isch das meeglig ?
Mit glaine Abstrich, jä... also Abstrich, well aine vellicht grad daibelet, well y d Pause verlengeret ha... oder ebber froggt sich, worum mer am Donnschtigzoobe um Mitternacht iibere Minschterblatz marschiere, wo doch kai Sau umme isch... wo anderi sage "Hey do iibere Minschterblatz laufe isch s schenschte wo s git um die Zyt"... das gits halt immer und isch fir mii au dr Raiz am Ganze.

Y ha 40 Joor lang drummlet und iirgendwenn emol gfunde, ass y e neyi Herusfoorderig bruuch. Y ha nit d Clique welle wäggsle, sondern ha die Herusfoorderig innerhalb vom Verain gsuecht. Das ganze het au e Voorgschicht kaa, denn my Babbe isch friener scho Dambuurmajoor bi de "Schnooggekerzli" gsi und y bi als glaine Gnäggis scho mitem Majoorestägge duur d Stuube gloffe und ha das irrsinnig gfunde... und y bi nadierlig waansinnig stolz uff my Babbe gsii. Wo denn d BMG e neye Dambuurmajoor gsuecht het, ha n y gfunde, ass y das jetz mach und au kaa.

Und s drummle ?
Du y bi jetz nit unbedingt grad dr absolut Spitzedambuur gsii wo jeedesmool Biibeli griegt, wenn är 2 Stund weeniger drummle ka wie anderi. Fir mii ischs au nit e Verzicht uffs drummle gsii, obwool y das seer gärn gmacht ha. Y gang au immer jeedi Wuche no ins drummle und ieb no e weeneli, bzw. saag d Stiggli aa... so ka n y jeederzyt wider zrugg und d Lyt gweene sich an Rhytmus, wie n y d Märsch aasaag.

Wie lang bisch denn scho Dambuurmajoor ?
Dasch jetz myni 3. Faasnacht.

Y ha immer e weeneli Mieh mit "Reegle"... y interpretier dr Dambuurmajoor vom Ganze... y bi zwoor dä wo entschaidet, aber will do nit dr Ooberscheff spiile. Y wott e nadierligi Autoritätspersoon sii, wo d Lyt schetze und uffen loose... und dasch fir mii s ooberschte Gebot. Bi 65 Aggdiive muess me si e weeneli diszipliniere... zem Byspiil d Abmaarschzyte klaar saage und aine immer reegelmässig z spoot kunnt, denn muesch halt mitem reede. E weeneli muesch scho uff d Disziplin luege... aber Reegle ha n y do kaini.

Also ych erläb d Faasnacht vyyl intensiiver als vorhär wo n y no als Dambuur im Zug gloffe bi. Y bi jetz vyyl presänter, well y gwissi Uffgoobe z erleedige ha und das au my Aaspruch isch, die guet z mache. Mer hänn au kaini fixe Abmaarschzyte... die dail y de Lyt sälber mit... und wenns halt emol schifft wie daas Joor, denn wird au d Pause verlengere. Me isch ständig am entschaide und muess au e weeneli s Gspyyri fir d Glygge haa... wie goots de Lyt ? Sin si mied ? Hänn si kalt ? Isch e gueti Stimmig ? Bhalt y die gueti Stimmig hooch und mach no e guete Maarsch wo si in e gueti Luune bringt, etc. und fir daas muess me halt e weeneli dr Kopf binenand haa.

Wie n y scho gsait ha, y find dr Dambuurmajoor het e ganz wichtigi Rolle an dr Faasnacht.

Innerhalb vonere Clique scho... aber wie gseet vo usse n uss ?
Also myni Erfaarig isch scho, ass d Lyt eggsdreem uff di luege... si luege dr Zug aa und dr Dambuurmajoor isch nadierlig scho aine, wo me im spezielle aaluegt. Au d Kinder wo uff ain zaige... dasch scho ebbis speziells.

Dasch scho immer myni greescht Soorg gsii...
Bi uns ischs esoo, ass dr eerscht Drummelschlaag uffs Liecht ablesche goot... also "Maarsch" schrey y wenns no hell isch. Bi mynere eerscht Faasnscht als Majoor, ha n y e riise Respäggt kaa voor däm Momänt... y bi deert am Gämsbärg gstande und normaalerwys het me immer e Grundlärm... e Grundrusche quasi. Aber genau an däre Faasnacht, ischs genau 5 Minute voorem Moorgestraich pletzlig numme no still gsii... und denn ha n y numme no dänggt "Scheisse, jetz zellts" ;-).

Wie machsch denn das mit dr Zyt ? Y main, am Gämsbärg gits jo kai groossi Uhr ?
Y ha ebber, wo mr die letschte 15 Sekunde ruggwärts zellt und bi 11 Sekunde fang y afoo schreye "Achtig... Morgestraich, die Alte, Celanese, Morgestraich, vorwäärts... Maarsch" und in däne 11 Sekunde muesch das aifach yynegriege, ass dr eerscht Schlaag genau uffs Liecht ablesche basst. Bim eerschte Mool hets perfäggt basst und bim zwaite Mool ischs um 1/10 Sekunde verschoobe gsii, aber dasch niemerem uffgfalle ;-)
Hindedraa hesch denn no Clique wo nit schreye sondern au uff Di loose und das macht aim scho e weeneli nervees.

Wärend dr Faasnacht nit... aber am Oobe wo n y zem Dambuurmajoor gwäält woorde bi. Me het mer offiziell dr Stägge iibergää und dasch sällmol e seer underhaltsaame Oobe gsii ;-). Wo n y denn iirgendwenn emol dehaime aakoo bi, ha n y gmeergt, ass y dä Stägge in dr Baiz vergässe ha. Y ha numme no "Scheisse" dänggt und ha e riise Stress griegt, Bluet gschwitzt und schlächt gschloofe. Am näggschte Daag bi n y denn sofort in "Laiezorn" gange und im Egge isch dr Stägge immer no scheen gstande, als ob nit gsii wär... mir isch e Stai vom Häärze gfalle... das wär e super GAU gsii ;-)

D Faasnacht isch fir mii nadierlig ebbis, wo n y demit uffgwaggse bi... y ha das vo dehaim uss vo mym Babbe mitgriegt. Y bi vo Aafang aa immer als glaine Gnäggis an dr Faasnacht gsii und ha duur daas e staargi Verbindig griegt mit dr Faasnacht. Hitte beditet mir das no ganz vyyl... d Draditioon wo n y seer schetz... au wie sich die Draditioon am verändere isch... es beditet fir mi aber au e Gsellschaftsjoor mit däne Lyt vo dr BMG wo n y seer schetz und well d Faasnacht fir mii nit immer die "scheenschte", aber unverglychbaare Daag sin.

Also definitiiv noo dr Wienacht... maischtens aber 2-3 Wuche voor dr Faasnacht, zem Byspiil bim Bsuech vonere Voorfaasnachtsveraastaltig. Y bi jo no in dr Sujetkommissioon und wenn denn am oorganisiere bisch und froggsch "hänn alli dr Giirtel ? Hänn alli d Schueh" denn meergsch, ass es langsam ans Yygmachte goot. Aber definitiv dr letscht Kick git mer denn unseri Schlusssitzig am Samschtig voor dr Faasnacht.

Y glaub, dä patriarchisch Touch vo de Alte in dr Clique gits nimm eso... y glaub, ass dä uusegwaggse n isch. Friener het me sich jo nit getraut e Alte aazspräche, well die Alte ganz vyyl z saage kaa hänn und die Junge aigentlig gar nit. Hitte keert sich das... die Junge iibernämme Verantwoortig und das bringt nadierlig Veränderige mit sich... au Veränderige, wo s Draditionelle aagratzt. S wird au freyer mit gwisse Theeme umgange, jeede schwätzt mit und bringt sich yy und y dängg, ass sich d Faasnacht au jetz und in de näggschte Joore no staarg verändere wird.

Worum ?
Well y glaub, ass miir Mensche n ys veränderet hänn und mer die Junge numme mit däne Draditioone nimm fasziniere kenne... s brucht immer Neys und dasch au guet eso. Die Junge wänn oft ebbis anders... sie wänn mee, frey si, entschaide kenne und au Sache verändere... aber dasch woorschyyns aber au bi n uns scho eso gsi.

Buur...

Buur ? Ok ;-) und worum bischs nit woorde ?
Y waiss es nit ;-)
Y bi friener in dr Schuel immer e weeneli uss dr Raie danzt, well y immer gsait ha "Y will Buur wärde, well mi Lieblingsdier e Kueh isch" und alli hänn mi denn so schreeg aagluegt. Speeter bi n y denn 4 Moonet uff e Farm go schaffe und het mer au gfalle... aber y bi mer denn nimm sicher gsii, ob y das wiirglig mache soll. My Babbe het denn gsait "Wenn nit waisch was mache, denn machsch s KV" Und dä Wäg bi n y denn au gange.

Wenns de Mensche um mi umme guet goot... und e guete FCB Matsch ;-)

Dasch jetz e haikli Froog, well mi Gruchssinn syt 20 Joor zimmlig yygschrängt isch... aber dr ainzig Gschmagg wo mi an myni Kindhait erinneret und ych hitte immer no schmegge kaa... isch e Tanggstell. Y bi immer mit mym Babbe zem tangge mitgfaare, well das e scheens Färtli gsii isch. Dä Benzingschmagg erinneret mi immer wider zrugg an myni Kindhait.

D Ereffnig vom Pilates und Yoga Studio vo mynere Frau, deert hänn mer eggsdreem vyl Aarbet dryygsteggt

Mitem Che Guevara

Was mer immer wider uffallt isch... wieso kenne mer nit aifach Gescht bi n ys dehaime ha und e Fläsche Wyy, Broot und Kääs uff e Disch stelle ? Wieso muess dr Kääs sälber gmacht, s Broot frisch bagge und s Dischdiechli ney usspaggt sii ? Y wott aifach spontaan e guete Oobe mit däne Lyt verbringe und s vellig wurscht isch, was mer jetz ässe, dringge oder e rumpfligs Dischduech uffem Disch liggt... s entstoot ame e weeneli e Hektik wenn mer Gescht hänn ;-)

1.) Y wurd seer gärn emol noo Patagonie (Siidamerika) raise, well y vo deert so scheeni Bilder gsee ha.
2.) Y wurd seer gärn emol zämme mit mym Ruggsagg uffem Appalachian Trail wandere (Amerika, 3500km lang).
3.) Y wurd seer gärn de Lyt Guets due, ooni ass si meerge, ass ych das gmacht ha.

Dr Donald Trump

Kino... im Theater schloof y amigs yy ;-)

Nonie ebbis gläse oder gsee...

Kennsch gar nit ?
Y kenns vom gheere saage... deent noo Sex... aber y waiss es nit ;-)