Charly Widmer und Peter Cavadini, offizielli Comité Yyfädler
   
 

 

Ihr baidi sin jo offizielli, diplomierti, Comité Faasnachtsroute-Yyfädler ;-)... was genau macht denn e "Yyfädler" ?

  Peter:

D "Yyfädler" isch aigentlig dr verlängereti Aarm vom Comité und sin im Verkeersdienscht understellt. S Comité sälber befindet sich jo an de 3 Standoort, wo si d Blaggedde an die Mitwiirgende vom Cortège abgän bzw. aahefte... und mir sin an gwisse Standoort entlang vo dr Faasnachtsroute verdailt und versueche d Route staufrey z halte ;-)

Und wo stoosch Du ?
Y stand mit myne Kolleege an dr Hammerstrooss, diräggt bim Restaurant "Rhyfälderhoof".

Was isch denn Dyni Uffgoob ?
Myni Uffgoob ischs, ass mer voorem Cortège - wo pinggtlig am 13:30 loosgoo sott - d Waggiswäge, Guggemuusige und Clique wo dusse steen, in Cortège yynehoole und in die richtig Richtig platziere... bi uns geen jo baidi Richtige duure. Punggt 13:30 mien alli loosfaare und wär nit loosfaart, wird uffgschrybe. Mer sin au defiir verantwoortlig, ass dr ganz Cortège lauft und s aiiiiiiigentlig kai Stau gää sott... was zem Gligg bi miir in dr Hammerstrooss nonie bassiert isch... und mer sin fir Kinder zueständig, wo s Mami oder dr Babbe nimm finde.

Was bassiert mit däne Kinder ?
Mer probiere d Mamme oder dr Babbe z finde und sunscht gän mer si dr Bolizey ab... die hänn e glaine Kindergaarte.

     
  Ihr sin jo nit elaige fir d Oornig wärendem Cortège verantwoortlig... wär understitzt Eych no ?
  Peter:

Mer hänn no Verkeerskadette (Firma B.I.G.) wo n ys hälfe und luege, ass d Route frey blybt.

     
 

Und wenn e Grubbe ussem Cortège wott, zem e Pause z mache ?

  Peter:

Denn griege mer e Zaiche und mache dr Haag uff, ass die Grubbe uuse kaa und leen anderi wider in Cortège yyne... s isch quasi wie n'e Verkeersbolizischt oder e Lootsedienscht. In jeedere Clique, Gugge, Waage, etc. gits e Zugscheff und dä muess zue n ys koo und sich aamälde, ass si ussem Cortège wänn und dä griegt denn vo uns e Zaiche wenn guet isch.

Und das funggdioniert au eso ?
Jä scho... mer luege, ass e gwissi Raiefoolg im Cortège vorhande n'isch... zem Byspiil leen mer nit grad e Gugge hindere Clique uff d Route sondern luege, ass mer immer e Waage dezwische hänn... eso wirds fiirs Bublikum e weeneli indressanter.

Und die Aggdiive loose uff Eych ?
Jä klaar... und alli wo nit uff ys loose, wärde halt uffgschrybe... und noo dr Faasnacht gits e Sitzig mitem Comité und alle Yyfädler... alli Yyfädler wärde ainzeln gfroggt wies iine gange n'isch an dr Faasnacht.
Mer kenne also scho mitreede und mien ys au nit alles gfalle losse...

     
 

D Faasnachtsroute isch jo zimmlig lang... wie vyl Yyfädler gits denne ?

  Peter:

Mer sin ebbe 35 Lyt und hänn zuesätzlig no s B.i.g (e Sicherhaitsfirma) zer Understitzig im Groossbasel... mer sin aber emol vyl mee Lyt gsii... also wenn Wärbig mache wottsch, mer sueche immer no Lyt... am liebschte ehemooligi Faasnächtler, wo d Faasnacht au e weeneli kenne :-)

Und Ihr sin solang deert, bis dr Cortège verby isch ?

  Charly: 17:30 - 18:00, denn gits jo au nit me zem yyfäädle und dr Räscht griegt den das au no sälber aane ;-)
     
  Jetz emol e ketzerischi Froog... worum gits immer no e Stau ???
  Peter:

Well hauptsächlig d Clique A) sich nit an d Zyte halte, B) am falsche Standort sin und yyne wänn, numme well halt ihre Cliquekäller in dr Neechi und s eso bequämer isch...

  Charly: ...und C) das machts am schwiirigschte fir uns... dr Dambuurmajoor sait "Yystoo", stoot denn zmitts uff dr Route und bis denn dr hinderscht und letscht ändlig yygstande n'isch, goot das e n'Eewigkait... und eso lang isch aifach d Route gsperrt... si miesste aigentlig usserhalb vo dr Route yystoo, afoo spiile und dr Yyfädler ka denn die andere aahalte und dr Zug yyneloo... aber ebbe, me kapiert das aifach nit... und do gheere gwissi Gugge au dezue ;-)
  Peter: Waisch, wenn binere Clique alli Garde zämmelaufe, denn sin das gly emol 200 Lyt und bis die alli emol yygstande sin, goot das eewig... anstatt ass me denn usserhalb vo dr Route yystoot.
     
 

Und was machsch denn innere sottige Situatioon ?

  Charly:

D Händ verwärfe... vyl mee blybt aim jo nit iibrig.

  Peter: Oder me saits aifach, ass si ab dr Strooss mien... oder sunscht uffschrybe und mälde... git nit anders.
     
  Du hesch gsait, ass Ihr immer no Lyt suechet wo mithälfe... was bruchts doo dezue ? Oder was sin d Vorussetzige ?
  Peter:

Me muess dr Mändig- und / oder Mittwuchnomidaag Zyt haa... d Aamäldig goot via Internet ans Faasnachtscomité http://http://www.fasnachts-comite.ch/ und denn wird me yyglaade.

Und denn griegt me ne Yyfierig ?
Voor dr Faasnacht gits e Bresidänte / Zugscheff-Sitzig und deert sin alli Verträter vo de verschiidene Faasnachtsgruppierige yyglaade... au miir sin denn aawäsend. S Comité dailt denn allne d Wyysige mit und eso ka den niemer saage, si hättes nit gheert. Uff jeede Fall wärde deert au die neye Yyfädler yyglaade. Dernoo griegsch e Getti wo aim alles e weeneli zaige duet und wenn denn s Gfiil hesch, daas elaige z kenne, denn griegsch e Standoort zuedailt. Am Faasnachtsmäntigzoobe gits denn im Waisehuus zämme mitem Comité e groosses Znachtässe... d Bolizey und d Sanität sin iibrigens au yyglaade.

     
  Ihr hänn e rächt verantwoortigsvolle Job, wo seer vyl dehinter steggt...
  Charly:

Dä wird seer hifig underschätzt... mer sin jo kaini beese Kaibe... und wenn mer e Clique aahalte, denn isch das nit well mer ebbis geege Clique hänn... sondern well mer versueche e Syschdeem in Cortège z bringe, ass es au fir d Zueschauer indressant isch... und die wänn jo nit 3 Clique hinderenand gsee.

     
  Kennet Ihr d Faasnacht au e weeneli gniesse oder sin Ihr ständig konzentriert am yyfäädle ?
  Charly:

Wenn dr Cortège lauft und niemer yyne wott, denn ka n y au emol zumene Waggiswaage aane und grieg vellicht sogaar no ebbis ;-)

Und wenn emol go schiffe muesch ?

  Peter: Also y stand jo an dr schlimmschte Krizig bim "Rhyfälderhof"... s git kai Ort wo si uuse und yyne mien... und das no in baide Richtige... dorum sin mer deert zu dritt und denn goot das au ganz guet.
     
  Gits e Klaiderkodex ?
  Peter:

E schwaarzi Jagge und e Huet sin Pflicht, Jeans darf me aahaa und isch kai Brobleem... und nadierlig d Comité-Blaggedde, wo sichtbar an dr Jagge sii muess. Syt 6 Joor hänn mer no e Waarnweschte n'aa, wo vo dr Bolizey voorgää worde n'isch und mer ys erkennt.

     
  Wie gseets mit Waggiswäge uss ? Ihr sin doch bestimmt e danggbaars Opfer oder nit ?
  Peter:

Halt... dasch e n'Eeresach, ass me d Lyt vom Comité nit mit Räppli bewirft... dasch e n'Arrangement zwischem Comité und de Wääge... aber ass mer nadierlig emol ebbis abgriege welll mer grad deert steen, isch jo ganz normaal und absolut kai Brobleem.

Aber e baar Sache griegt me scho au oder ?
Also wenn ys e Waggis e Schettli (Shot) oder e Biggse Bier aabegit, denn saage mer nadierlig nit "Nai" ;-)

     
     
  Wenn Ihr denn Zoobe underwäggs sin, denn erkennt me Eych aber nimm als Comité Mitarbaiter oder ?
  Peter:

Mer sin denn ooni Warnweschte underwäggs, aber d Comité-Blaggedde blybt "Auf Mann". Falls iirgendwo e Klopferey isch, kenne mer dezwische goo und brobiere z schlichte. Au am Morgestraich hänn mer Lyt, wo deert underwäggs sin und e weeneli d Situatioon beobachte.

Und was isch mit de Gschäfter, wo s Liecht brenne leen wärendem Morgestraich ?
Alli Gschäfter wo vergässe hänn d Lampe z lesche, wärde uffgschrybe und an dr Sitzig mitdailt. Denn mien si entweeder aasuuge und s Liecht lesche oder griege ne Buess.

     
     
  Wie lang machet Ihr das jetz scho ?
  Peter:

Die 10. Faasnacht

  Charly: Ych die 8. Faasnacht
     
  Bi Dir Peter, sin jo no Verkeerskadette... was isch d Uffgoob vo däne ?
  Peter:

Wo n y s 3. Joor deby gsii bi, hänn si uns die Verkeerskadette gschiggt, damit si ys entlaschte und luege, ass kaini Lyt duurelaufe oder dr Haag uff und zue mache, etc. Aber das sin jo no sälber Kinder gsii und sin an d Waggiswäge go Däfeli hoole... und dä wo hät sotte uffbasse, hänn mer amänd fascht underem Waggiswaage miesse fiirehoole. Y ha denn em Comité gsait, ass y die Verantwoortig vomene Kindergaarte nimm ibernimm... und hitte isch das nadierlig ganz anderscht, y ha d Kadette vo Bärn und Biel bi mir und die sin wiirglig saggstaarck.

     
  Wenn Du jetz in Dynere Funggdioon als Yyfädler ebbis zue de aggdiive Faasnächtler saage kenntsch... was wär das ?
  Charly:

Gseent nit immer alles eso äng...

  Peter: Sin fair geegeniiber uns... au wenn mer halt emol e Stopzaiche gänn... wenn miir ebber aahalte, denn het das e spezielle Grund und denn soll me au fair blybe.
     
  Wenn jetz 10 Joor zruggluegsch, het sich d Faasnacht im Geegesatz zu friener veränderet ?
  Peter:

Jä si het sich scho veränderet... friener isch no intregiert woorde und hitte heert me gaar nit me... oder "Bisch e Duubel"... weisch das griege mer jo au mit. S git au alls wie mee Clique, wo uff dr Route e groosses Theater ableen... alles mit Absperrband absperre und dernoo aifach wyterlaufe. Das närvt ys denn zimmlig, well mer dernoo alles wider abrysse und entfärne mien. Aber au d Baizefasnacht, dr Keeruss und die groosse Bäll gits nimm, wo s halt friener no gää het.

     
  Was beditet Dir d Faasnacht ?
  Peter:

Draditioon... und bi mit dr Faasnacht uffgwaggse. Ya als 6-jeerige mit drummle aagfange und kunnsch
automaatisch in das Fieber yyne... kaschs aifach nimm sii losse.

     
  Wenn foot bi Dir d Faasnachtsstimmig aa ?
  Peter:

Mitem Vogel Gryff... woby richtig aafoo duets, wenn mer s Material fasse. Y bi jo nimme Aggdiiv underwäggs...
ha das 50 Joor lang gmacht.

Was gheert zem Materiaal fasse ?
D Comité-Blaggedde, s Rädäbäng und und und... denn foots langsam aa... denn goots numme no e baar Daag bis zer Faasnacht :-)

     
  Was macht Di gligglig ?
  Peter:

Wenn y gmietlig mit myne Kolleege zämmehogge ka

  Charly: D Kolleegschaft, d Frindschaft...
     
  Was wirdsch an Fraue nie verstoo kenne ?
  Charly:

D Fraue sälber ;-)

  Peter:

Worum d Männer de Fraue nooseggle... deby hänn mer jo e Fraueiiberschuss uff däre Wält, also sotte d Fraue aigentlig uns Männer nooseggle ;-)

     
  Wär wurdsch gärn emol ins Dschungelcamp schigge ?
  Peter:

Dr Benni Thurnheer... dä wurd sogar d Schlange und alles andere im Dschungel z dood schnuure... do wurde sogaar d Palme no schlapp mache ;-)

  Charly:

Dr Hans-Peter Wessels...

     
     
  No e baar Schlaagweerter, bitte numme mit aim Satz beantwoorte...
  Basel... Peter: Dr Schwingerclub Basel-Stadt...
Charly: FCB und Faasnacht...
  Ziiri... D Stadt sälber isch in Oornig, aber d Lyt muess me nit reede gheere... am beschte allne e Pflaschter uff d Schnuure klääbe...
  Herbschtmäss... Peter: Draditioon, friener wunderscheeni Faargschäft... hitte numme no hoochmodäärn...
Charly: D Herbschtmäss isch OK, d Waremäss gheert ewäg...
  Donald Trump... Peter: E groossi Schnuure und nit dehinter... macht alles kaputt, was dr Obama uffbaut het.

Vyyle Dangg fiir Dyni Antwoorte