Hitte isch me nimm zfriide wenn me Dääfeli oder e Orange griegt. Wenn si ebbis griege, denn wärfe sis grad uffe Boode... s wird nimm estimiert. Was mer au immer mee uffalt isch, ass seer vyl Alkohool verlangt wird... oder stregge grad dr offene Plastiksagg entgeege und das find y nit eso lässig... dasch friener nit eso gsii.
Au wenn d Lyt d Orange zruggschiesse... das bassiert sicher ebbe 3-4 mol pro Daag und isch seer unagnääm fir ys... au wenn me d Orange an Rugge oder d Larve griegt... fir mii absolut fäälende Respäggt.

Und wie ischs mitem intregiere ? Macht me das hitte no oder ischs e Religgt uss alte Zyte ?

S intregiere findet hitte praggdisch nimm statt, dasch friener no anderscht gsii... entweeder versteen si di nit oder s haisst denn "Halt d Schnuure und gimer lieber ebbis". Fir e Waggis wirds doch eerscht luschtig, wenn är e Uffhänger griegt wo n är uffnää und denn intregiere kaa... s isch doch e gää und e nää. Friener hänn d Lyt mee mit de Waggis intregiert als hitte... do isch au emol e Spruch uffekoo und denn hesch miesse luege, wohär dä koo isch und denn ischs Wäggselspiil loosgange. Wenn y d Laarve aahaa, denn schnuurts aifach...

Und am Donnschtigmoorge schnuurts au no ?
Am Donnschtig nimme ;-)

Die eerschte 3 oder 4 Joor hänn mer das no gmacht in de Baize, aber das het denn gly emol uffgheert. Vyli Lyt versteen di gaar nimm (Ussländer) oder hänns nit glatt gfunde, well si grad am ässe gsii sin. Y find aifach, wenn scho emol e Waggis miteme fräche Muul yynekunnt, denn machsch mit... au wenn grad am ässe bisch... s isch schliesslig Faasnacht. Aber au d Baizer hänn das nit eso toll gfunde und denn hänn mer mitem intregiere uffgheert.

S kunnt nadierlig immer uff d Aazaal vo de Aggdivmitgliider druff aa... mänggmool sin mer mee, mänggmool weeniger. Mer hänn rund 4 Segg Räppli pro Naase... bi 9 Aggdivmitgliider git das ebbe 800kg Räppli. Dezue kemme ebbe 600kg Orange und Banaane, 100kg Däfeli und sunschtigs, ebbe 70kg Blueme und denn nadierlig no Sujetbezoogeni Sache.

Das wäre denn ebbe 1.5 Tonne an Materiaal... wow...

Am Samschtignomidaag noo dr Waagevernissage wird glaade, wobyy d Räppli, Orange und Banaane immer jewyyls am Mäntigmoorge voorem Cortège in d Clarastrooss und am Mittwuchmoorge uff dr Kasärneblatz gliiferet wärde.

Aber Mäntigmoorge isch scho grad e weeneli seer knapp mit dr Liiferig... hänn Iir au scho emol zitteret well nit koo isch ?
Hänn mer au scho, jä... oder Orange sortiert, well vyli fuul gsii sin und mer nit gwisst hänn, ob mer iiberhaupt no Orange fir dr Cortège iibrig hänn. D Liiferfirma het aber denn Kullanz zaigt und ys dr Bryys fir d Mittwuch-Liiferig gstriche.

Sin Mimösli au e Theema ?
Ganz friener hänn mer numme Mimoose kaa, hitte eenter numme no zer Dekoratioon vom Waage... s isch halt e Bryysfroog.

Jä... bi mynere allereerscht Faasnacht und s Glas het e groosses Loch kaa... e wiirglig scheene Duurschuss ;-)

Wirft me iiberhaupt no Orange zue de Lyt uffe, wo am Fänschter steen ?
Also friener hänn mer das gmacht und d Orange in 2. oder 3. Stogg bänglet... mittlerwyle mache mer das aber nimme. Eerschtens fange d Lyt d Orange eh nit, zwaitens isch d Ziilgenauigkait au nimm s Nonplusultra und drittens hänn mer jetz e Dach, wo das Ganze zimmlig verhinderet.

Jä, wenn d Lyt d Orange zruggschiesse, aber das ha n y jo scho gsait.

S het allerdings emol e Situation gää, wo n ys alli seer beriehrt het... y waiss nimm gnau, obs dr Faasnachtmäntig oder Mittwuch gsii isch, isch jo au Wuurscht. Uff jeedefall sin mer dr Cortège gfaare und unser Aggdivmitgliid dr Cyrill het eme glaine Bueb e Hampfle Däfi welle gää... dr glai Bueb streggt syni Hand uffe und dr Cyrill sait "Du muesch baidi Händ nää... aini längt nit" und dr Bueb sait denne "S goot nit, y ha numme ai Hand...". Wo mer denn bim zNachtässe iiber die Situatioon greedet hänn, sin mer alli seer beriehrt gsii... dä Bueb isch mit däre Situatioon umgange, als ob är 2 Händ kaa het... ganz normaal und isch mit sich z friide gsii. An dä Momänt dängg y amigs
seer oft no.

Mer hänn emol fir e Sujet e Parfümfläschli-Set baschtlet. Jeedi Fläsche het e aige Etikette kaa, obwool in jeedere Fläsche s glyche Parfüm drinn gsii isch. Im "Schnabel" sin mer denn in 1. Stogg uffe gange und hänn die Parfümfläschli an die Daame im Saal verdailt. Mer hänn aber voorhär gsait, ass si die Fläschli do inne nit uffmache selle... aber Fraue loose jo nie uff Männer ;-). Mer sin kaini 3 Minute in däm "Schnabel" gsi und scho hets deert grauehaft noo Parfüm gstungge... s isch e riise Gaudi gsii.

Bi uns ischs jo kai "Muess" und sin jo au nit immer alli doo... denn kunnts nadierlig au uffs Sujet druff aa... bruchts jetz zeerscht d Handwärger oder e baar wo zeerscht moole... aber in dr Reegel sin immer mee als d Hälfti vo de Aggdivmitgliider wo an Waagebau kunnt.

Wenn feen Iir mitem Waagebau aa ?
Also in de letschte 8 Joor hänn mer immer Mitti Novämber demit aagfange... s Sujet sott me Ändi Septämber, Aafangs Oggdoober ha find y. Jo, denn gits halt au emol e Samschtig, wo me mee schnuure duet und dr Blausch het als schaffe... das muess au sii zwischeduure... aber die Zyt muess denn nadierlig am näggschte Samschtig wider uffghoolt wäärde. Y bi jetz syt 35 Joor bi de "Gwäggi" und has nonie erläbbt, ass es speditiiv gange n isch ;-)

Mer mache Indärn wider e Raisli, aber sunscht isch nit blaant... mer fyre das fir ys elaige.

Zeerscht emol geen mer gmietlig go zNachtässe... dernoo sin mer zämme uff dr Gas. Maischtens hänn mer no ebbis in de Hoosesegg wo mer verdaile kenne und das git amigs au no luschtigi Episeedli. Y ha au scho erläbbt, ass mer 4h voorem Hotel "Basel" gstande sin und e moorts Gaudi mit Schmuck kaa hänn.

Und am Faasnachtszyschdig ?
Do hänn mer uffem Kasärneblatz unser Racletteässe. Urspringlig ischs emol fir die Aggdiive dänggt gsii, aber mittlerwyle ischs e glaini Instutitioon woorde ;-)

Bi miir isch Fiiroobe, y bi z alt... und unseri Aggdivmitgliider wo mer uffem Waage hänn, griege laider numme Dechtere aane ;-). Neyi Lyt rekrutiere mer ussem Frindes- und Bekanntegrais... oder hänn Indressänte, wo sich bi dr Waage-IG gmolde hänn. Fir d Faasnacht 2019 hänn mer 2 Indressänte... mol luege was doo debyy uusekunnt.

Fraue als Aggdivmitgliider sin nie e Thema gsi oder ?
Nai... zumindescht nit solang ych deby bi.

Seer vyyl... d Faasnacht het mi aigentlig scho immer fasziniert... ebbis uff d Bai z stelle und s ganz Drummumme.
Y mag au d Schnitzelbängg, d Gugge und d Clique... s kunnt aifach alles zämme und machts fir mii seer speziell. Fir mii isch d Faasnacht aber au daas, wo im Hintergrund lauft... wie ne Waagebau, d Sitzige wo me het, s zämme lache, etc. D Faasnacht am Mäntig und Mittwuch isch fir mii s "Schaulaufen" und am Mittwuchnomidag muess me mi amigs fascht uff e Waage uffe priigle... y wott am liebschte im Goschdym ummelaufe und aifach deert stoo blybe, wo mers gfallt... e Aug voll nää und dernoo ain schnappe... aifach eso d Faasnacht erläbe. Als Aggdiive griegsch seer wenig vo dr "laufende" Faasnacht mit.

Sobald mers Sujet wisse, foot s Fieber langsaam aa... speetischtens aber an dr Allschwiler Faasnacht.

Lokfierer... Yysebaane hänn mi scho immer fasziniert und y kumm jo au ussere Yysebähnler-Familie. My Babbe und Groossbabbe hänn baidi bi dr SBB gschafft.

Wieso bischs nit woorde ?
Well y aigentlig immer gärn zaichnet und gmoolt ha... dorum hets mi mee in die Richtig zooge und ha den Bauzaichner glehrt.

Myni Eltere sin nit vo Basel... si hänn d Faasnacht zwor verfolgt, sin aber mit ys nie an d Faasnacht gange. Speeter het mi denn my Brueder am Mäntig und Mittwuch mit an d Faasnacht gnoo, hänn aber immer speetischtens am 18:00 wider miesse dehaime si. Als glaine Gnäggis ha n y immer gstuunt und ha d Faasnacht ganz toll gfunde... im spezielle aber hänn mi immer d Waggiswäge fasziniert... au hitte no... zämme ebbis baue und denn demit loosfaare.

Wenn myni Familie und Frinde au gligglig sin... wenn my Umfäld harmoonisch isch, denn goots mir guet.

Frisch gschnittes Gras... das het e ganz ganz ganz feyne Gschmagg... ebbis Rains. Y bi seer oft bi mym Unggle und myne Groosseltere in de Feerie gsi... sie hänn e groosse Gärte ka und deert het me halt au amigs miesse dr Raase maie... und dä Gruch ha n y gliebt... au hitte no.

Dasch grad Kiirzlig gsii... und zwoor ha n y mit mynere eldischte Änkeldochter d Laarve sälber gmacht.

Mitem Fidel Castro... Y hät gärn emol mit däm Typ welle schwätze, worum är das eso gmacht het... syni Idee, syni Beweeggrind.

Was mi am maischte uffregt isch, ass si eso kompliziert sin und ussere Mugge e Elefant mache kenne... dasch aifach unglaublig.

1.) E Rais mit dr Transibiirische Yysebaan... und zwor mit dr alte Yysebaan.
2.) Zämme mit mynere Frau s Neyjoorskonzärt in Wien gniesse... im goldige Saal.
3.) Und ai Wunsch ha n y mir beraits scho erfillt... und zwor bi n y 1996 bim änglische Cupfinaal im Wembley Stadion in London debyy gsii.

Dr Hans-Peter Wessels... dä kasch in Dschungel schigge wenns goot... fir mii macht dä e Wischiwaschi Politik und isch nimm glaubwiirdig.

Kino...

Loos y waiss es git e Buech und e Film... aber y ka nit aafoo demit...