Dominique Heller, Radiomoderadoor vo Radio Energy "Mein Morgen"
   
   

 

Du bisch jo aine vo de beliebtischte Basler Radiomoderadoore und beglaitisch ganz Basel frieh am Moorge in neye Daag... wie vyl Voorberaitig bruchts fiir soone Sändig und wenn foot me doo demit aa ?
  Dominique:

Kai gueti Show ooni gueti Voorberaitig...
D Voorberaitig isch ganz wichtig und praggdisch die halbi Mieti. Mer sin zem Gligg e relativ groosses Team fir die 3 Energy Statioone in der Schwiz (Bärn, Basel und Ziiri). Im Momänt sins 12 Lyt, wo fir die Moorgeshow schaffe und genau in däm Momänt, wo mer do mitenand reede, sin vyl Produzänte beraits am neyi Theeme uffgryffe. Mer hänn e langfryschtigi Blaanig wo me waiss, welli groosse Theeme kemme... wie zB. d Swiss Indoors und denn nadierlig daagesaggduelle Gschäft... was bewegt moorn d Lyt in Basel und das baut me denn in d Sändig yy.

Zeerscht duscht me sich im Team anere regionaale Sitzig uss, dernoo kunnt e nationaali Sitzig mit alle
3 Energy Teams in dr Schwiz und dä Ussdusch isch nadierlig seer wichtig. Am Schluss bestimmt dr
Scheffproduzänt was gmacht wird und d Lyt schaffe denn bis zOobe. Ych kumm denn am 04:00 ins Studio und lueg mer alles aa, was mer so an Doonmateriaal baraat hänn... setz alles zämme und baschtle esoo myni Show. Wenn y die vyyle Lyt im Hintergrund nit hät, wurd die Show nit eso guet deene.

     
  Wie beraits gsait, bisch Du jo scho am 04:00 im Büro... bisch quasi dr Redaggdioons-Moorgeliecht-Aaknipser…
Wenn Du dr Liechtschalter druggsch, was goot Dir do als allereerschts duur dr Kopf ?
  Dominique:

"Allein, allein"... scho wider dr Eerscht... Gopferglemmi ;-)

     
  Syt wenn bisch Du Radiomoderadoor und was fasziniert Di an däm Bruef ?
  Dominique:

Syt iiber 10 Joor und myni Faszinatioon isch, ass kai Medium schnäller isch als s Radio. Wenn jetz ebbis bassiert, kenne mer sofort dr Reegler uffmache und ebbis driiber verzelle. Dr Radiomoderadoor schafft bim Heerer Bilder im Kopf... im Färnseh griegsch s Bild voorgsetzt und muess sich nit debyy voorstelle. Du kasch Dir nit Dyni aigeni Gschicht ussmoole, sondern griegsch si voorgsetzt. Das goot bi uns im Radio nit, y muess innere bildligge Sprooch reede und dasch d Faszinatioon.

     
 

Dyni Stimm isch jo seer markant und kennt fascht e jeede… isch das mänggmool e Fluech oder eenter e Sääge ? Kunnt do nit e jeede und maint "Y kenn Dii....wart y has grad...Dyni Stimm...."
  Dominique:

Nai dasch e Sääge... dangg däre Stimm verdien y jo myni Batzeli und vo däm häär isch das absolut OK.
Im Geegedail... s zaigt jo, ass me ebbis richtig gmacht het, wenn d Stimm widererkennt wird. Me ka no soone markanti Stimm haa, wenn das wo die Stimm verzelle duet Müll isch, denn meergt sich das niemmer... vo däm här isch das immer seer scheen.

Dr Aaspruch an e Radiomoderadoor isch zimmlig grooss oder ?
Radio isch nimm eso wie friehner, wo me aifach in sym Hyysli gsässe n isch und moderiert het. Hitte macht me ganz vyyl Sache glychzytig, fliesst alles inenand yyne und duurs Internet isch d Presänz au e ganz anderi woorde. Grad voor kuurzem het mi ain im Döner Laade aagsproche und sich bedanggt, well y ihn jeede Moorge wegge due. Dasch doch toll oder ? Noonemool, myni Stimm isch e absolute Sääge und y hätt nie dänggt, ass y mit mynere Stimm Gäld verdiene ka ;-)

S scheene am Radiomoderadoor isch doch, ass me mit de Lyt uffstoot... s isch e seer intiimi Situatioon.
Me stoot quasi mit de Lyt under dr Duschi, im Baad, bim Moorgekaffi... me isch praggdisch e Familiemitgliid, wie dr Hund "Bello" und isch jeede Moorge doo.

     
  Kasch Di no draa erinnere, wo s allereerscht Mool voorem Mic gsässe bisch ?
  Dominique:

Jäjä klaar, dass vergisst me nie... dasch wie bim eerschte Mol Sex und das vergisst me au nie mee. Me schwitzt 1000 Dood, dänggt "Das schaff y nie" und wott aifach, ass es schnäll verbyy goot. Iirgendwie griegt me s umme und funggdioniert aifach... aber wie immer im Lääbe, mit dr Routine foots denn au langsam afo Spass mache.
     
  Du moderiersch jo au s groosse Openair vo Energy "Energy Air" und driffsch e huffe Stars... gits e witzigi Anekdoote wo emol erläbt hesch ?
  Dominique:

Do gits nadierlig ganz vyyl... mer hänn zem Byspiil bim letschte Energy Air Konzärt, e bekannte Muusiker ins Hotel bringe miesse, well dä noo dr Show z dieff ins Glas gluegt het. Oder denn gits no dr Herbert Grönemeyer... mit ihm hätt y e Interview iiber si neys Album fiere sotte und wo n är gmeergt het, ass y uss Basel kumm, het är mit mir iiber dr FC Basel afo philosophiere. Mer hänn e halb Stund numme iiber dr FCB greedet und y ha myni Froog immer noonig kenne stelle. Denn kunnt pletzlig syni Prässedante und maint "Herr Grönemeyer muss jetzt Mittagessen..." und y ha denn zue mym Scheff miesse ooni Andwoorte vom Grönemeyer. Denn hänn mer aifach e scheeni Sändig iiber dr Grönemeyer und dr FCB gmacht.

Oder s Dräffe mitem 50cent, em Rapper uss de USA... me het kenne maine, s goot um de Bresidänt uss de USA. Iiberall im Hotelgang sin groossi, schwaarzi Bodyguards gstande... wie im Film. Denn kunnsch ins Zimmer und gseet e glaine, ruhige und verschupfte Maa mitere Cola in dr Hand wo ständig am rülpse gsii isch... und ganz lyslig greedet het ;-)

Y kennt no 100 Gschichte verzelle... aber ebbe, die Stars sin au numme Mensche und was me meergt isch, je greesser dr Promistatus isch, desto aagnäämer sind si. Me het immer s Gfiil, ass die ganz groosse Stars seer arrogant sin, aber dasch nit eso.

     
 

Also schwängge mer langsam zer Faasnacht iibere... was beditet Dir d Faasnacht ?

  Dominique:

3 Daag mit weenig Schloof... e Ussnaamesituatioon in dr Stadt und immer wider aimoolig.

Weenig Schloof, well Du underwäggs oder am Schaffe bisch ?
Well y schaffe muess und s au ganz wichtigi Daag sin fiir dr Sänder, d Faasnacht uff e kreativi Aart abzhandle. Aber miir kunnt nadierlig z guet, ass y kai aggdiive Faasnächtler bi und doodemit au kai Indrässekonfliggt ha. Aber me wott jo au näbbscht em schaffe no ebbis vo dr Faasnacht mitgriege und isch denn nadierlig au no e weeneli uff dr Gass. Y lieb Schnitzelbängg und lueg die au seer gärn uff Telebaasel und denn wirds halt spoot... und wie Du gsait hesch, aine muess am Moorge am 4i s Liecht aamache ;-).

Drifft me Di au emool imene Goschdym aa oder eenter nit ?
Eenter nit... d Laarve ha n y aigentlig s ganz Joor duure n aa ;-)
     
  Wenn foot bi Dir d Faasnachtsstimmig aa ?
  Dominique:

Maischtens im Jänner, wenn die eerschte Sitzige mitem Team stattfinde dien. Mer brobiere jo immer irgend e tolli Aggdioon an dr Faasnacht z starte und dräffe n ys Aafangs Joor, zem das z bespräche. Y bi sälber au an Voorfaasnachtsveraastaltige und als Basler kunnt me jo automaatisch in die Stimmig yyne... dasch wie soone Fluetwälle, wo ain mitziet.

     
  Wie hesch Du d Faasnacht als glaine Bueb erläbt ?
  Dominique:

Y bi jo uffem Land uffgwaggse und ha d Faasnacht gliebt... und wenn me denn no in d Stadt an die groossi Faasnacht het deerfe mitgoo, denn isch das nadierlig fiir e glaine Gnopf gigantisch gsii. S eerscht Mool dr Moorgestraich z erläbe isch ebbis, wo me nimm vergisst. Als Junge ha n y e Zytlang an dr Faasnacht in Aesch mitgmacht... y ha mit e baar Frinde zämme e Waageclique grindet und au e Waage baut. Am Daag voor dr Faasnacht leggt me d Sache uuse, luegt ass alles baraat isch... und ganz pletzlig spiilt s Wätter e ganz groossi Rolle, wo aim vorhär Wurscht gsii isch.

     
  Het sich d Faasnacht im Geegesatz zu friener veränderet ? Und wenn jo, in welli Richtig ?
  Dominique:

D Draditioone vo dr Basler Faasnacht sin immer no erhalte blyybe und das find y seer scheen. Y dängg, die Mischig uss Draditioon und neye, innovatiive Sache wo e weeneli uffkoo sin, mache d Faasnacht faarbiger, frächer, schnäller und lutter... und das bruchts au.

     
  Wie schwiirig ischs an dr Faasnacht dr Dominique Heller z sii ?
  Dominique:

Wie n y scho gsait ha, isch s moderiere am Moorge e seer intiimi Sach... me gheert quasi zer Familie und dorum het me au s Gfiil "Hey mer kenne n ys aigentlig". Dr Schwizer isch e seer zrugghaltende Mensch, aber wenn är an dr Faasnacht drungge het, denn verliert är syni Hemmige und kunnt uss sich uuse... aber dasch maischtens luschtig und git ganz tolli Gspreech... ka aber dailwyys au seer aasträngend sii. Aber im Normaalfall ischs immer underhaltend und y reed au gärn mit de Lyt.

Und muesch dängg au ständig und iiberall ain mitdringge oder ?
Jä isch eso ;-) "Hey Heller, gaile Siech kumm emol..." und den muesch halt immer mit de Lyt ain mitdringge und dasch fascht s greescht Brobleem... de muesch deert e Wysse dringge, doo no ain und deert au no ain und iirgendwenn kasch aifach nimme ;-)

  Gits wärend dr Faasnacht au emol e Momänt, wo aifach naime aanestoosch, d Faasnachtsluft yyneziesch und dänggsch "Wow jetz isch Faasnacht" ?
  Dominique:

Unser Studio liggt jo zmitts im Faasnachtskueche und wenn dr Moorgestraich so langsam geege 06:30 am usspändle n isch, mach y s Fänschter uff und zieh mer die ganz spezielli Atmosphäre yyne. Dasch soone maagische Momänt, wo n y gniess... Faasnachtsmagie puur.

     
  Was hesch Du emol als glaine Bueb welle wärde ?
  Dominique:

Y ha immer Kapitän uffeme groosse Ozeaan-Dampfer welle wärde...

Worum heschs nit gmacht ?
Gueti Froog... hmmm... y ha denn gmeergt, ass mer in dr Schwiz gaar kai Meer hänn. Doo druffaabe ha n y my Draum uffgää und ha Pilot welle wärde... aber dasch denn au nit woorde... s ainzig wo n y flieg, isch uff d Naase. Denn ha n y halt ebbis anders gmacht ;-)

     
  Hesch Du als glaine Bueb en Held kaa ?
  Dominique: Jä, dr Bud Spencer isch myn Held gsii und y ha syni Film gliebt. Y mag mi no guet draa erinnere, myni Eltere hänn mi immer ins Bett welle schigge und y ha denn ständig gsait "No ai Schleegerey... bitte... denn gang y ins Bett" ;-)
     
  Was macht Di gligglig ?
  Dominique:

Myni Familie... y bi jo grad voor kuurzem Babbe woorde :-). Gligglig mache mi aber au Situatioone, wo d Lyt uff mi zuekemme... siggs an dr Faasnacht oder sunscht naime. Oder wenn ebber uff Di zuekunnt und sait "Hey Du bisch e coole Typ und y wott Dir Dangge saage... Du weggsch mi jeede Moorge und stand mit Dir uff". S git jo nit scheeners, als wenn Du mit Dynere Aarbet anderi Lyt gligglig machsch... und denn knipst me au jeede Moorge am 04:00 s Liecht gärn aa ;-).

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Dominique:

Bi miir ischs dr Gschmagg vo Lavändel. Friener sin mer immer uff Siidfranggrych in d Feerie gange und näbem Feeriehiisli hets e groosses Lavändelfäld kaa. Als Kind ha n y dä heerlig Gschmagg immer in dr Naase kaa und jetz wenn y das schmegg, wird y sofort an myni Feerie in Siidfranggrych erinneret.

     
  Welles isch Dy absoluts Highlight gsi im 2017 ?
  Dominique:

Jeede Daag wenn y Haim kumm und my Soon gsee...
Alli wo Babbe sin, kenne do mitfiile... und alli wo noonig Babbe sin und das lääse, miens unbedingt wärde...
s git nit scheeners. Brueflig isch my Highlight 2017s "Energy Air" im Stade de Suisse gsi mit 40'000 Bsuecher. D Byyljee wärde als "Danggerscheen" verloost und verschänggt... d Zueschauer zaale also nit und wenn me soone Aaloss moderiere darf, isch das wie d Magie vo dr Faasnacht.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Dominique:

Mitem greeschte Held, wo d Stadt Basel jee fiirebrocht het... mitem Roger Federer.
Unglaublig was dä Maa no in sym "hooche" Tennisalter laischtet. Y ha bis jetz laider nonie s Vergniege kaa ihn z dräffe. ROGER, WENN DAS JETZ LIISISCH... BITTE MÄLD DI BI MIIR... Y WURD DI AU ZEM ÄSSE YYLAADE ;-)

     
  Gits en Lieblingsoort in Basel ?
  Dominique:

Wasser isch ebbis wo n y seer gärn haa und mi beruhigt... bruch y immer mol zwischeduure, wenn mi d Praktikante wideremool geergeret hänn... denn sitz y an Rhy aabe... und nadierlig my Radiostudio, wo praggdisch my Woonzimmer isch.

     
  Was wirdsch an Fraue nie verstoo kenne ?
  Dominique: Worum si soo vyyl Handdäschli in verschiidene Faarbe bruuche... oder dailwyys sogaar in dr glyyche Faarb, 5 Däschli. Y sag denn "Schatz, blau hesch doch scho..." Si sait denn "Haalt... dasch e anders blau"... aha... aber do kennt me no wyter mache mit de Schueh, etc.
My Frau sait immer "S git nie gnueg Klaider... s git numme zweenig Schrängg"
     
  3 Sache wo no unbedingt in Dym Lääbe mache wottsch...
  Dominique:

1.) Aimool uff dr Kommandobrugg vo dr "Queen Mary" stoo und hupe...
2.) Y wurd gärn vermeert in dr Daag yynelääbe... ooni Blaanig...
E Daag imene Sexlaade schaffe und luege, wär do eso yynekunnt und was alles so kauft wird.

     
  Wär wurdsch gärn emol ins Dschungelcamp schigge ?
  Dominique:

Alli Ziircher wo behaupte, s "Sächsilüüte" sigg speggdakulärer als d Basler Faasnacht.

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Theater ha n y gnueg dehaime, doorum Kino...

  Basel... Ai Liebi...
  Ziiri... Hahahahahahahaha (Aameergig: Lacht lut)
  Herbschtmäss... Noch ne Runde, Runde, RRRRRRRRRuuuuundeeeeeeeee... und am Schluss kai Gäld me im Sagg.
  Radio Energy... S kreativschte... s schnällschte... und speggdakulärschte Schwizer Radio.
  Baasler Rhywiera oder Palmestrand ? Jo klaar... hallo ?!?!? Baaaaasel...
  Donald Trump... Soorgt fir ys Journalischte immer wider fiir groossi und gueti Schlaagzyyle.
  50 Shades of Grey ... Peitschschsch... auaaaaa......

Vyyle Dangg fiir Dyni Antwoorte