Yanick (11), Drummelhund vo dr Clique "Dupf-Club"
   
 

 

Yanick, Du bisch jo Dambuur bi de Junge vo dr Faasnachtsclique "Dupf-Club"... wie lang bisch denn scho deby ?

  Yanick:

7 1/2 Joor...

Denn hesch jo scho rächt frieh demit aagfange... was findsch denn so toll am Drummle ?
Bim Drummle ka me ebbis Neys lehre und isch schwiiriger als pfyffe.

Also heschs gärn, wenns e weeneli aaspruchsvoll isch... pfyffe ka jo au e jeede gäll ;-) Wie gseets denn mitem iebe n'uss ? Wievyyl Stunde iebsch denn pro Wuche hmmmmm ?
Stunde... (lacht)

E Minute pro Daag ?
Y bi syt 2 Joor Dambuur in dr Knaabemusig und deert ieb y...

Aber wenn iebsch denn d Faasnachtsmärsch ?
Y nimm d Noote und frogg s Mami, ob si mitpfyfft...

Aber denn keysch jo immer druss ;-))))
(lacht)... mänggmool...

Wievyl iebsch denn jeeeeeeetz ?????
Y bi jo scho guet, aber wenn y jetz no iebe wurd, wär y no vyyl besser ;-))

Also an Sälbschtvertraue fäälts Dir jo nit ;-)... y dängg, mer leen das mitem iebe...

     
  Du hesch beraits 2x hinterenand s indäärne Bryysdrummle vo de Junge im "Dupf-Club" gwunne... Wow... Gradulatioon...
gits iiberhaupt no e Konkurränz bim "Dupf-Club" ?
  Yanick:

Jo scho...

Wievyyl Jungi drummle denn am Wettkampf ?
Mer sin 8 Dambuure.

Aber firs indäärne Bryysdrummle iebsch scho oder ? Sunscht wurdsch jo nit gwinne ;-)
Jo...

     
 

Was gspiirsch, bevoor uff d Biini goosch ? Bisch nervees wie verruggt oder eenter logger und ruhig wie n e Profi ?

  Yanick:

Am Aafang ischs e weeneli koomisch aber wenn y denn uff dr Biini stand, ischs wie innere Broob... bim eerschte Schlaag laufts denn automaatisch...

Hey Du bisch jo e richtige Profi ;-)

     
  Yanick, Du wirdsch jo beraits scho als zuekinftige Drummelkeenig vom offizielle Bryysdrummle ghandlet... wär e Mitmache bim "Offizielle" e n'Optioon fir Di ?
  Yanick:

Näggscht Joor mach y mit...

Mainsch mer kenne Di denn in dr Zytig lääse ?
Y waiss es nit, vellicht...

     
  Am Faasnachtsmäntig und Mittwuch drummlisch jo bi de Junge vom "Dupf-Club"... am Faasnachtszyschdig unterstitzisch s Schissdräggziiglie "Die Gspritzte Wysse", wo s Mami mitpfyfft. Du als Drummelkeenig vom "Dupf-Club" muesch innere Grubbe drummle, wo nit eso talentiert sin wie Du ;-)... steert Di das nit ?
  Yanick:

Mänggmol scho...

Seischs denn amigs au, wenn si dernääbe pfyffe ?
Jä... y drill mi denn um, lipf d Laarve und sags denn...

(laaaach)... dasch richtig eso Yanick... als Drummelkeenig het me s nit aifach ;-)

     
 

Was hänn Ihr denn fir Aggdivitäte bi de Junge im "Dupf-Club" ?

  Yanick:

Mer sin im Herbscht amene Broobewucheänd in Gränche.

Und wie gseet Eyre Daagesablauf uss in Gränche ?
Also am Moorge dien mer usschloofe, denn gits Zmoorge und die wo wänn, deerfe noonemol aaneligge...

Aber Du weisch scho, ass es "Broobewuchänd" haisst oder ? ;-)
Jo... mer dien scho au drummle... s git 3 Grubbe... d Aafänger iebe uffem Beggli, die Mittlere und Foortgschrittene uff dr Drummle.

     
  Wie isch das fir Dii eso kuurz voorem Morgestraich, wenn alles zapplet und die ganz Stadt uff de Bai isch... bisch nervees ? Oder zapplisch au umme ? Oder fraisch Di bis es ändlig loosgoot ?
  Yanick:

Y bi nervees...

Und wenns Liecht abgoot ?
Denn frai mi...

     
     
  Was beditet Dir d Faasnacht ?
  Yanick:

3 Daag ruesse, Goschdym aalegge, mit Frinde zämmesii, Feerie... y bi au als Waggis underwäggs und due d Lyt mit Räppli stopfe...

Y ha gmaint, Du drummlisch ?
Am Faasnachtszyschdig ha n y e Waggisgoschdym aa bim drummle... und wärend dr Pause, bi n y mit mym Brueder (är isch im Vordraab) underwäggs und stopf d Lyt...

Mit "Lyt" meinsch Meitli oder ?
Jo...

Und wenns wytergoot, wider scheen aaständig yystoo, als ob nit gsii wär... Du bisch mer no aine ;-)

     
  Hesch Du au esoone Faasnachtskribble ? Und wenn jo, wenn foot das bi Dir aa ?
  Yanick:

Am Sunntig, wenn d Ladärne yypfyffe wärde...

Eerscht ? Du bisch jo au mittlerwyle e n'alte Haas gäll ;-)

     
  Du machsch jo no im glaine Vogel Gryff Spiil mit... was denn genau ?
  Yanick:

Y bi ne "Ueli"... ha aber au scho mitdrummlet.

     
  Was wottsch Du speeter gärn emool wärde ?
  Yanick:

Y wott gärn zer Bolizey und deert zem SE (Sondereinsatz).

Aber Bolizischt kasch jo nit diräggt wärde... was wottsch denn vorhär lehre ?
Automechaniker

     
  Welles isch denn Di Lieblingshobby ? Was machsch am liebschte ?
  Yanick:

Y faar gärn Penny Board, Longboard, Scooter und Snow Board.

     
  Hesch Du e n'Idool ? Abgsee vo Dym Babbe, em Kuno ;-)
  Yanick:

(lacht)... Jä... 2...

Aha... und sin die wyyblig ?
(lacht)... Nai... dr Lukas Rieger und dr Mike Singer...

Jetz muesch mer hälfe... wär isch das ?
Das sin 2 Teenie-Sänger...

     
  Welles isch Dy absoluts Highlight gsi im 2017 ?
  Yanick:

Wo n ys indäärne Bryysdrummle gwunne ha...

     
  Mit wellere beriehmte Perseenligkait - und Nai Yanick, s Mami gheert do nit dezue - wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Yanick:

Mitem Lukas Rieger.

     
  Y getrau mi gar nit z frooge... Du hesch doch sicher au Meitli bi Dir in dr Klass und die verhalte sich bestimmt mänggmool seer komisch oder ? Gits ebbis, wo Di uffreggt oder Du dr Kopf schittle muesch ? Oder anderscht gfroggt, was wirdsch an Meitli nie verstoo kenne ?
  Yanick:

Wenn mir zem Byspiil en Vordraag halte mien, denn sin mer immer zu zwait innere Grubbe... und wenn ebber miteme Meitli zämme dr Vordraag mache muess, denn wotts Meitli nie reede...

Liebe Yanick, glaub mer... dasch speeter emol umgekehrt und Du regsch Di uff, well si ständig am
reede sin ;-)

     
  Wär wurdsch denn gärn emol ins Dschungelcamp schigge ?
  Yanick:

Dr Cristiano Ronaldo

Dä maggsch nit eso ?
Nai...

Und wieso grad ihn ?
Wenn dä gfoult wird, denn duet är eso, als ob är s Bai broche hät... und Sekunde speeter stoot är uff und lauft ganz normaal wyter, als ob nit gsii wär..

     
     
  No e baar Schlaagweerter, bitte numme mit aim Satz beantwoorte... "Jo" und "Nai" zellt denn nit gäll ;-)
  Drummle oder Gugge ?

Drummle...

Tststststs...

  Basel... Basilisk (Drache) und dr FCB...
  Ziiri...

E groosse See...

  Herbschtmäss... Speed, Tagada, Maximum, Freefall Tower, Kettekarussell...
  Fidget Spinner...

Ou do ha n y ganz vyyl...

Wievyyl denne ?
11

Aber dä Hype isch jo fascht wider verbyy gäll ?
Jä die sin OUT, aber y sammle si ainewäg no.

Vyyle Dangg fiir Dyni Antwoorte