Pietro und Stefano Papini, Gschäftslaitig vo dr Firma "Fortura AG"
   
 

 

D Firma "Fortura AG" stoot jo fir dr Import vo Spiilwaare und Gschänggartikel... und het au e groossi Abdailig "Faasnacht", wo seer beyydruggend isch... isch das e Familieundernähme ?

  P. Papini: Noo dr Wältwirtschaftskriise vo 1929, isch unsere Unggle dr Otto Fortura vo Frankfurt in d Schwiz koo. Er het in Sissach e Stigg Land kauft und 1931 e glaini Gummi-Balloonfabrik baut. Im 2. Wältkrieg hets denn kai Rohstoff mee gää... also dr Kautschuk wo me fir d Produggdioon vo däne Balleen brucht het. Me het denn miesse uff "Spiel und Kurzwaren" umstelle... synerzyt sin das denn Schuebändel, Butzlimpe, etc. gsi. In däre Zyt hets no die bekannte "Husierer" gää, wo denn das Material diräggt bi de Lyt verkauft hänn. Do het zem Byspil aine bi sym VW Käfer d Sitzbängg uusegrisse und s Auto mitem ganze Materiaal belaade... und eso isch är denn vo Hof zue Hof gfaare und het syni Waar verkauft. Speeter sin den die Husierer langsam ussgstoorbe und denn het me mit Import uss Japan, Korea, Thailand und China aagfange.
     
  Wie isch das fir Sii als junge Maa gsii ? Isch das klaar gsi, ass Si iirgendwenn emol die Firma wyterfiere ?
  P. Papini:

Bi unserer Generatioon isch das no e weeneli anderscht gsii... do isch me de Eltere no gfolgt. Y bi allerdings eerscht 1979 in d Firma yydrätte... vorhär ha n y no "Ökonomie" studiert und bi aigentlig nit gwillt gsi, in das Gschäft z goo. Irgendwenn hets denn halt emol ghaisse "Entweeder kunnt aine vo eych baide ins Gschäft oder mer mache zue". Doodruffaabe bi n y denn am 1. April 1979 in das Gschäft yydrätte und has aifach emol brobiert...

Und denn zämme mit dr Familie gschafft ?
Jä... d Mamme isch myni Seggredärin gsii, dr Babbe Zolldeklarant und Lagerischt und my Unggle Otto Fortura dr Scheff.

     
 

Friener zue Zyte vo "Spiel und Kurzwaren", ischs Sortimänt scho grooss gsi... aber hitte isch die Firma riisig... wie vyl Artikel hänn Si denn in Ihrem Sortimänt ?

  S. Papini:

Mer reede vo ca. 12'000 - 13'000 Artikel

Wahnsinn... hauptsächlig Faasnachtsartikel ?
D Faasnacht macht e Dail devoo uss... ebbe 20%, aber s isch immer schwiirig zem saage, was jetz genau Faasnacht isch. Mer sin jo au seer staarg im Beraich Goschdym, Accessoires, etc. verdrätte und dasch nadierlig ebbis, wo iibers Joor duure goot... s isch denn nit numme Faasnacht spezifisch. Hitte reedet me vo
"Party Fashion" und das het wiirglig ebbis... hitte isch me fascht bi jeedere Party verklaidet und dasch bi de Junge seer IN.

Welli Artikel sin den Faasnacht spezifisch ?
Das sin Räppli und Däfeli.

     
  Sie hänn s ganz Joor Faasnacht... miesst aigentlig e Draumbruef sii ;-)... nit ?
 

S. Papini:

 

 

 

 

 

Jä... wahnsinnig ;-) aber s isch effeggdiiv scho esoo, ass es bi uns seer oft luschtig zue und härgoot. Mer sin jo im Beraich "Chilbi" dätig und d Basler Herbschtmäss isch unser Gschäft... deert ischs voor allem e bryysdryybendi Sach und muess me wiirglig seer haart verhandle... sowool uff dr Verkaufs-, wie au uff dr Yykaufssyte, wells numme no um dr Bryys goot. Denn hänn mer uff dr andere Syte dr Beraich "Faasnacht" und das het au seer vyl mit Humoor z due. Mer lache wirglig seer vyl bim Yykaufe, wells aifach luschtigi Sache git. S git au so Trends - wie uff dr Goschdymsyte iibrigens au - wo me finde muess.

Denn raise Si in dr ganze Wältgschicht umme und luege noo neye Artikel ?
Dasch immer e weeneli verschiide... my Brueder, wo fir d Spiilwaare zueständig isch, fliegt regelmässig uff Asie, well halt 80% vo de Spiilwaare und Plüschdierli vo deert kunnt. Dr schwizer Märt isch e glaine Märt... dh. e Container voll Waare in dr Schwiz z verkaufe, isch seer aaspruchsvoll... aber im Beraich "Spiilwaare und Plüsch" griege mer dr Container voll. Im Beraich "Faasnacht", wie Goschdym, Accessoires, Gadgets oder au Gschänggartikel, isch dr schwyzer Märt aifach z glai sin zem e Container uss Asie z fille... do geen mer denn eenter uff die verschiidene Mässe in Ditschland, Franggryych oder Italie.

Und wie gseets mit de Räppli und Däfeli uss ?
Die kemme praggdisch zue 99% uss Europa... und grad bi de Räppli besteen joorelangi, vertrauensvolli Beziehige zue de Lieferante... und wenn me pletzlig emol e baar Tonne Räppli mee brucht als sunscht, denn wurd das ooni gueti Beziehige nit funggdioniere.

     
  Wie vyyl Räppli ka denn e Lieferant produziere ?
  P. Papini:

Unser Lieferant ka pro Daag guet 5 Tonne Räppli produziere... das sin 500 Segg à 10kg... aber dasch aigentlig au nit vyyl.

Aber wenn doch d Noofroog eso grooss isch, worum produziert me denn nit mee ?
Well die Zyt wo me Räppli bruucht, relativ kuurz isch. Dr Lieferant produziert näbeby no anderi Sache uss Kunststoff und mit däm fillt me noo dr Faasnacht d Lecher bis in Heerbscht yyne. Wär will scho noo dr Faasnacht bis in Septämber yyne no Räppli kaufe ???? Dorum feen miir beraits im Summer scho aa mitem bunkere vo Räppli, ass mer denn die entsprächendi Mängi hänn wenns denn sowyt isch.

Vo wievyl Tonne Räppli reede mer do ?
Das sin meereri hundert Tonne... fiir Basel elaige brucht me scho ca. 120 Tonne fir d Faasnacht.

Bligg ins Räppli Lager:

     
  Gits denn au gwissi Trendfaarbe bi de Räppli, wie zem Byspiil Gold ?
  P. Papini:

Goldigi Räppli hänn mer scho kaa, aber die hänn mer relativ diir verkaufe miesse... und denn het me immer s Brobleem, ass es au ussgseet wie Gold und nit wie Kupfer oder Bronze. Richtigs goldigs Babyyr wär vyl z diir... do wurd e Sagg nimm 20.-- sondern 60.-- koschte und dä Bryys zaalt kai Clique.

Wie gseets mit silbrige Räppli uss ?
Silber griege mer no relativ guet, aber deert ischs Brobleem, ass Silber relativ starg kläbt und mes au
schlächt entfärne ka mit dr Butzmaschiine... und dorum ischs nit eso beliebt. Dr Verkauf vo silbrige Räppli het in de letschte 5 Joor um 30% abgnoo. E Zytlang ischs e vellige Boom gsii und mer hänn d Noofroog fascht nit befriidige kenne. Wenn me silbrigi Räppli in d Luft wirft und d Sunne dryy schyynt, denn glitzerets eso richtig scheen und das hänn am Aafang alli Clique welle.

Und sunscht an Trendfaarbe ?
Voor 1 oder 2 Joor ischs Theema "White Dinner" e beliebts Sujet gsi an dr Basler Faasnacht und alli hänn wyssi Räppli welle. Mer hänn gmaint mitem daasjeerige Sujet "D Boscht goot ab" sigg dr Trend uff gääli Räppli... aber bis jetz ischs noonig eso.

Welli Faarb lauft den gaar nit ?
Grien und Orange...

Denn gits jo no gmischti Räppli...
Genau... aber die verkaufe mer in Basel nit, sin aber in dr Weschtschwiz seer gfroggt, well si 30% billiger sin... s isch au vo dr Qualität nit eso guet, wie me sich das in Basel gweent isch.

  S. Papini: S isch no indressant... in Basel sin gmischti Räppli e absoluts "No Go" und wenn Lyt das vo n ys wänn, denn roote mer massiv devo ab. Au s Comité het de Faasnächtler empfoole, ass si numme aifaarbigi Räppli kaufe selle und das kunnt au vo doohäär, ass me nit will, ass d Lyt d Räppli vom Boode uffheebe und wider bruuche... s isch e Kodex, ass me numme aifaarbigi Räppli bruucht.
     
  Ihr beliiferet jo au e huffe Waggiswäge in Basel...
  P. Papini:

Genau... mer beliifere d Waage-IG, mache aber au Diräggtgschäft.

  S. Papini:

Fir die baide Cortège-Daag in Basel, biete mer vorOrt e Liiferservice und das machts au e weeneli speziell in
Basel. Voorem Cortège wärde d Sammelplätz vo 3-4 Laschtwäge beliiferet und d Lyt kenne denn s Materiaal
deert abhoole. Mer beliifere am Mäntig und Mittwuch ca. 60 Cliquene und das muess zwische 07:00 - 11:00 iiber d Biini goo.

D Waggiswäge wärde diräggt voorem Cortège beliiferet und y frogg mi do immer... was bassiert, wenns emol mitere Liiferig uss iirgendeme Grund nit klappt ?
Mer hänn e sottigi Situatioon zem Gligg nonie kaa, aber das wär nadierlig dr Super GAU fir d Waggiswäge... aber ebbe, bi uns sin gnueg Laschtwäge underwäggs, do ka nit bassiere.

     
  Wievyl Mitarbaiter sin denn bi Ihne beschäftigt ?
  P. Papini:

Doo am Standoort in Zunzge sins 40 Mitarbaiter und inneralb do dr ganze Firma ebbe 70.

     
 

Welles isch den Eyer Produggtekniller ? Was lauft denn eggsdreem guet ?

  S. Papini:

Im Goschdymberaich ischs immer no s Einhoorn... letscht Joor ischs nadierlig dr Pikachu gsii, aber was im Momänt eso im Trend liggt, isch dr Groovy Style... also 60er und 70er Joore.

Aber wenn me do ständig immer die Trends beobachte muess, dasch doch wie ne Grootwanderig oder nit ?
Jä dasch eso... aber wägge dämm goot me jo au an d Mässe und deert gseet me beraits scho 2 Joor in d Zuekunft. S git au bstimmti Lieferante, wo wie ne Glaaskuugele hänn... dasch wie in dr Moodewält... die gseen das vorus. Me ka nadierlig au Trends setze... im Spiilwaare Berych isch das eso... zB. uffgrund vo Film, wo in de Kino laufe.

Donald Trump Gummimässgli sin au gfroggt ?
Nadierlig, die sin letscht Joor e Hit gsii...

     
  Gits au emol e Momänt, wo me miteme gwisse Stolz duur das beyydrugende Lager lauft und dänggt "Wow, das hänn miir alles uffbaut" ?
  S. Papini:

Y glaub, mer dängge baide "Daas vyyle Gäld wo do liggt, hoffentlig verkaufe mer das alles" ;-))
Me het aigentlig gar kai Zyt, zem Stolz z sii... s muess immer wyter und wyter laufe.

  P. Papini:

S isch immer e Kampf... s ganze Gschäft isch e Kampf... und e guete Bekannte het mer emol gsait "Dr Handel isch immer im Wandel"... s isch nit fix, s veränderet sich immer wider und wenn di nit mitveränderisch, denn bisch verloore...

Friener sin mer imene glaine Laager im Urgebäude vo dr Fortura AG in Sissach gsii. Im Joor 2001 sin mer denn noo Zunzge in e neys, groosses Gebäude ziiglet und dasch nadierlig scho e n'anderi Dimensioon gsii. Nadierlig isch me am Aafang Stolz gsii, aber denn kunnt gly emol dr Gedangge, ass me das alles zaale muess... und iirgendwie gweent me sich draa und s isch aifach eso.

     
  Wenn me sovyyl Faasnacht um sich umme het... goot me denn iiberhaupt no an die aigentlig Faasnacht ?
  S. Papini:

Wenn y an d Faasnacht gang, denn lueg y nadierlig, ob unseri Räppli und Däfeli ummefliege...

  P. Papini:

Y gang numme ganz weenig an d Faasnacht, aber wenn y gang... denn lueg y, obs d Orange und Mimose vo uns sin...

Gits e Underschiid zwische de Orange ?
Mir verkaufe numme Bluetorange uss Sizilie, kennt me an de blaue Schachtle. S git aber no Blondorange uss Spanie. D Bluetorange hänn mee Saft und sin e weeneli glainer als Blondorange... und ligge besser in dr Hand.

     
           
  Was beditet Ihne d Faasnacht ?
  P. Papini:

Fir uns isch d Faasnacht s beschte Gschäft vom Joor... das ka me eso saage.

  S. Papini: S isch scho ebbis Bsunders und e ganz anderi Gsellschaft... dr Faasnächtler wott syni Räppli und syni Däfeli... denn macht me e Sujet und kauft d Waar dezue. Binere Party ischs umgekehrt... me kauft d Waar und macht denn s Sujet dezue... vo dämhär isch d Faasnacht scho speziell und kultureller.
     
  Het sich s Kaufverhalte vo de Kunde im Geegesatz zu friener veränderet ?
  P. Papini:

Wo friener d Waage-IG grindet worde n'isch, sin alli Cliquene mit der Waage-IG solidaarisch verbunde gsii und hänn ihr Wurfmateriaal deert yykauft. Hitte ischs ebbe no 1/3 vo de Cliquene wo das no macht und die andere 2/3 kaufe deert yy, wo s 3 Rappe billiger isch.E Byspiil sin Räppli... wenn e Sagg naime 50 Rappe billiger isch, denn wird dä deert kauft... aber wenn me sich iiberleggt, ass e Waggiswaage während dr Faasnacht vellicht 10 Segg brucht, denn sin das ganzi 5 Frangge... und e Kaffi Lutz koschtet mee ;-)... dasch denn aifach e weeneli e Missverhältnis.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  P. Papini:

Channel No5... my Mamme het ihr Läbe lang numme Channel No5 verwändet und wo si denn 1999 gstoorbe
n'isch, ha n y vo ihre e Koffer geerbt. Wo n y Joore speeter dä Koffer ussem Käller ghoolt und uffgmacht ha, isch deert drinn e Biechli glääge und das het noo Channel No5 gschmeggt und an mi Mamme erinneret.

  S. Papini: Dr Gruch vomene Baby... do kemme mer immer myni aigene Kinder in Sinn... und s andere sin brennti Mandle.
Friener ha n y immer zämme mitem Babbe d Schausteller bsuecht und deert isch immer dä Gschmagg vo brennte Mandle in dr Luft gsii... und das erinneret mi immer an my Babbe.
     
  Welles isch Ihr absoluts Highlight gsi im 2017 ?
  P. Papini:

Am 17. Oggdoober isch my eerschts Grosskind - d Valeria - uff d Wält koo und das macht gligglig.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  P. Papini:

Mitem Jovanotti wurd y gärn emol imene guete italiänische Restaurant go ässe, plaudere und nadierlig bim Singe zueloose.

     
  Was wärde Si an Fraue nie verstoo kenne ?
  P. Papini:

Wenn Dehaime 5 Klaiderschrängg voll sin und me in de Feerie ainewäg no 5 Limpe kaufe muess...

  S. Papini: Ass me eso kompliziert ka sii...
     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

P. Papini: Kino...
S. Papini: Theater...

  Basel... P. Papini: Mittelalterliggi Kultuurstadt...
S. Papini: Kultuurzentrum... und e guete Arbetgäber...
  Ziiri... P. Papini: Hänn e tolle See, e schlimme Dialäggt... und kai Faasnacht ;-)
S. Papini: Wirtschaftligs Zentrum vo dr Schwiz...
  Herbschtmäss... P. Papini: E Gschäft fir uns und Stress...
S. Papini: Gschäftlig s Änd vom Joor und dr Aafang vo dr Faasnacht...
  Fortura AG... S. Papini: Die geilschti Firma weschtlig vom Uraal...
  Donald Trump... P. Papini: Gar nit eso schlimm, wie alli gmaint hänn...
S. Papini: Unberächebaar und het e schlächteri Präss, als är haa miesst...

Vyyle Dangg fiir Ihri Antwoorte