Martin Kaeslin, Brauerey Fäldschlessli, regionaale Verkaufslaiter Nordweschtschwiz
   
 

 

Martin, welli Uffgoobe het denn e regionaale Verkaufslaiter ?

  Martin:

Das beinhaltet s Fiere vomene Verkaufsteam, wo sich um die ganz Gaschtronomie, Aaläss und Events in dr Regioon kimmeret.

Was gheert denn zer "Regioon" ?
Me ka saage, Basel und Baselland, wo bis zer Sproochgränze zem Jura goot. Wirtschaftlig ischs e seer indressanti Regioon... zwor geograafisch nit eso grooss, aber defiir wirtschaftlig e indressants Fäld fir d Brauerey Fäldschlessli.

Wie vyl Mitarbaiter gheere zue Dym Team ?
Im Momänt sins 6 Mitarbaiter, wo uff die verschiidene Regioone uffdailt sin. Si bsueche d Gaschtronomie und verkaufe unser gsamts Sortimänt.

...wo jo nit numme uss Bier bestoot... nimm y emol aa ;-)
Genau... zem Sortimänt gheert Bier, Mineraalwasser, Siessgeträngg, Wyy und Spirituoose. D Produggt Bier und Mineraalwasser stelle mer als Produzänt sälber här und denn gits no 2-3 Lizänzproduggt wie Queens
(Orangina, Schweppes, etc.), wo mer in Lizänz härstelle. Dr Räscht wird vo andere Produzänte zuekauft.

     
  Was dänggsch, was isch d Faszinatioon vom Bier ? Worum dringge eso vyl Lyt Bier ?
  Martin:

Bier isch e Gnussmittel... alli Produggt wo ebberem Fraid und Gnuss beraite, sin nadierlig vyl aagnäämer zem verkaufe und Bier isch ganz klaar e Gnussmittel. 90% vo dr Bevelkerig het sich mit dämm Produggt beraits scho emol beschäftigt und waiss, um was es goot... s bringt Gselligkait mit sich. Bier dringgt me in dr Reegel sälte elai, sondern maischtens in Gsellschaft. S Ganze het fir mi au mitem Produggt als solches im Zentrum zdue und dorum machts au sovyl Fraid, das Produggt z verkaufe. Mer bringe vyl Fraid zue de Lyt... y reed jetz aifach vom normaale Gnuss und nit vom Iibergnuss ;-). Zuedäm isch Bier nit numme e n'aifachs Produggt, sondern isch au e groossi Wisseschaft.

     
 

Wie lang bisch Du scho in däre Branche underwäggs ?

  Martin:

Im Oggdoober 2018 sins 20 Joor...

     
  Wenn me bi dr Brauerey Fäldschlessli ney yygstellt wird... gheert do e Bierbraukuurs zem Standaardbrogramm ? ;-)
  Martin:

S isch uff jeede Fall kai Vorussetzig ;-)

S isch aber e groosses Aaliige vo dr Firma, ass e jeede wo in dr Brauerey Fäldschlessli schafft, au wiirglig iiber dr ganz Ablauf Bschaid waiss... also vom Bier braue und welli Biersoorte ass es git. Voor 20 Joor isch das no e weeneli anderscht gsii, doo het me e seer guets Yyfierigsbrogramm griegt, wo alli Statioone vo dr Firma beinhaltet het. Me isch in dr Produggtion gsi, in dr Logistik, im Serviceberaich und in dr Verwaltig... das Yyfierigsbrogramm isch ebbe 2 Moonet gange.

Und wie ischs hitte ?
Hitte muess jeede Mitarbaiter, also vo dr Delifonischtin bis zem Diräggter, e sog. Bierkompetänzkurs absolviere. Dasch die neyscht Gschicht, wo syteme Joor lauft und mer wiirglig wänn, ass jeede Mitarbaiter als Botschafter vom Bier uffdrätte ka... isch e ganz e tolli Sach und kunnt au seer guet bi de Mitarbaiter aa.

Wie lang goot dä Bierkompetänzkurs ?
Me muess 2 Daag investiere und wird vom aifachschte, bis zem schwiirigschte Bier braue (inkl. Bierstil) gschuelt. Do druss entwiggle sich wiiderum Lyt, wo vellicht sogaar bis zem Bier-Sommelier ussbildet wärde.

Y ha gar nit gwisst, ass es e Bier-Sommelier git...
Jä das gits... s git e Schwizer und e internationaale Bier-Sommelier.

     
  Wievyl Biersoorte gits denn bi Eych ?
  Martin:

Mer hänn rund 43 Biersoorte im Offenusschangg und wyt iiber 200 Fläschebier im Sortimänt... nationaal wie au internationaal.

Und härstelle ?
Bi de Offebier stelle mer ebbe 60% sälber häär und 40% kemme uss dr Grubbe... also wo duur Carlsberg produziert wird... mer gheere jo zer Carlsberg Grubbe. D Schwizer Bier wärde aber alli bi uns häärgstellt... mer hänn in Rhyfälde und im Wallis e Brauerey.

     
 

Welles isch em Schwizer sy liebschts Bier ?

  Martin:

Basel isch e klassischi Laagerbier Regioon... mer hänn nadierlig mit Warteck, Fäldschlessli, etc. Brauereye kaa, wo mit Laagerbier aagfange hänn und s isch immer no s maischt drunggene Bier in dr Schwiz. Jetz kunnt d Entwigglig dezue, wo mer jo in de letschte 4-5 Joore intensiv in de Medie mitgriegt het... s geen neyi Glaibrauereye und Microbrauereye n'uff und die sin nimm im Beraich "Laagerbier" dätig, sondern im Beraich "Spezialitäte"... und eso wird dä Spezialitäte-Märt waggse. Aber s Laagerbier hebt immer no 70% vom Märt.

     
  Ischs Joor 2017 e n'erfolgryychs Joor fir Eych gsii ? Y dängg, ass dr Biermärt zimmlig hart umkämpft isch...
  Martin:

Dr Biermärt isch definitiiv hart umkämpft, dasch eso...
D Brauerey Fäldschlessli het e guets Joor hinter sich, das ka me eso saage... mer sin zfriide mitem Voluume und au mitem Erdraag. In dr Regioon Basel hänn mer e lange Negatiivtrend kenne stoppe und in e positiive Trend umwandle... aber s isch e harts und aasträngends Joor gsii.

     
  Um d Wienachtszyt gits jo das bekannte Wienachtsbier... worum gits aigentlig kai Faasnachtsbier ?
  Martin:

E Faasnachtsbier als solches gits aigentlig nit...

Ischs au nie e Theema gsi ?
Also Faasnachtsbier gits scho, aber nit bis uns in dr Firma... s git Glaibrauereye, wo sottigi Bier braue, woby das maischtens e Etikette-Gschicht isch. Wenn mer e n'Aasatz mache, also e Charge produziere, denn wär d Basler Faasnacht e z glaine Märt mit numme 3 Daag... dorum mache mer s Wienachtsbier, e Friehligsbier und e Summerbier, wo fir 2-3 Moonet häärgstellt wird.

Kasch Du Bier sälber braue ? Heschs scho n'emol gmacht ?
Also vom Ablauf här kennt ys scho... allerdings wurd y die 1. Charge nit sälber dringge ;-)

     
  Was fasziniert Di an Dym Bruef ?
  Martin:

D Uffgoob als solches fasziniert mi, well y dääglig dusse und mit Lyt zämme bi... und well y my ganzes Netzwärgg uffbaue und nutze ka... und... me "Fraid" verkauft. Me kunnt miteme Theema, wo de Lyt Spass macht. S isch e tolls Produggt, mit däm me gärn zem Kund goot und dasch myni Faszinatioon, wo Spass
macht.

Du bisch jo in dr lokaale Gaschtronomie seer bekannt... isch doch toll oder ? Denn kasch iiberall Gratis-Bier dringge ;-)
Jo :-))) dasch eso... s wird aim datsächlig oft gratis aabotte... y due mi aber doo seer zrugghalte well y find, ass das nit Sinn und Zwägg isch... im Geegedail, die mien jo au e Gschäft mache und s Gäld verdiene und fir daas sin mer nit doo zem das ussznutze. Aber s git sicher Glägehaite und Yylaadige wo me denn au gärn aanimmt.

     
  Rutsche mer jetz emol e weeneli in d Faasnacht yyne... dr Faasnächtler isch jo e zimmlig duurschtige Gsell... wie muess me sich das voorstelle, wievyl Liter Bier geen den wärend dr Faasnacht iiber d Theeke ?
  Martin:

Also vom Konsuum här ischs esoo, ass me nadierlig langjeerigi Erfaarigswärt het... und ainewääg gits immer wider staargi Yyfliss, wo s Dringgverhalte beyyflusse... wie dr Zytpunggt vo dr Faasnacht und s Wätter. Ischs kalt und rägnet, denn wirds eenter e Kaffi Lutz Faasnacht.... wenns aber warm isch und me gmainsaam dusse e Bier dringge ka, denn ischs nadierlig besser fir uns ;-)

Und wie blaane d Wirt ?
Gueti Wirt kenne d Zaale vo de letschte Joore und wisse, wie si sich uff d Faasnacht voorberaite mien... und die wo e weeneli Hilf bruuche, beroote mer und gänn Tipps was me an Vorroot ebbe bruucht. S git aber au Wirt, wo in däre Zyt ihr Sortimänt verklainere und zem Byspiil numme Lagerbier verkaufe... die weengischte Gescht verlange Spezialbier an dr Faasnacht.

Wievyl Liter Bier dringgt me denn jetz an dr Faasnacht ?
Y dängg, ass zwische 150'000 und 200'000 Liter Bier vo uns fliesse dien... aber ebbe, das ka bis zu 40% schwangge.

     
  Welle n'Yyfluss - umsatzmässig - het fir Eych d Faasnacht ?
  Martin:

D Faasnacht isch nadierlig immer ebbis speziells und findet jo nit numme in Basel statt, sondern in dr ganze Schwiz. Wenn mer ys aber numme uff d Basler Faasnacht beschrängge, foot d Voorberaitig beraits scho wider noo dr letschte Faasnacht aa. Mer sitze mit de Wirte zämme und bespräche wies gloffe n'isch und wo me optimiere kaa. Dr Stresspunggt foot aber im Oggdoober / Novämber aa, denn beraite sich d Wirte uff d Faasnacht voor. Die feschti Gaschtronomie het me im Griff, diejeenige wo aber uff dr Strooss mitere Aimoolbewilligung underwäggs sin, kemme denn au no dezue und denn wirds langsam stressig.

Isch sicher e Herussfoorderig firs Undernämme oder ?
Jo dasch eso... s git jo au no die gsetzligge Yyschränggige und mer dien ys au entsprächend druff voorberaite... vom Bestellbiro iiber d Logistik bis zem Verkauf isch das e seer intensiivi Zyt... und mer wänn die au guet bewältige.

Aber y nimm emol aa, ass es nie Ängpäss git ;-)
Also Bier gits immer gnueg, wenn daas mainsch ;-)
D Froog isch eenter, stoot gnueg Materiaal zer Verfiegig. Wenn me Offebier usschänggt, brucht me n'e Durchlaufkiehler, vellicht no e Buffet, usw. und das kennt e Ängpass wärde, wells Materiaal wo zer Verfiegig stoot iirgendwo begränzt isch.

Vo wievyyl Durchlaufkiehler reede mer do ?
Mer bringe wärend dr Faasnacht noonemool - zuesätzlig zem bestehende Bestand - ca. 70 Durchlaufkiehler an die verschiidene Verkaufspinggt in dr Stadt und dasch doch relativ vyyl. Und wenns halt kaini Kiehler me het, denn muess me halt Biggse oder Fläschebier verkaufe.

     
     
  Du heschs e baarmol aaditet... mit welle Yyschränggige hänn Ihr denn z kämpfe ?
  Martin:

Mer hänn nadierlig uffgrund vo de gsetzlige Voorgoobe, seer vyl Yyschränggige... zB. ass mer d Innerstadt
- und do findet d Faasnacht jo au statt - numme bis 11:00 beliifere deerfe und mer bringe jo nit numme e baar Faasnachtskiechli, sondern Gwicht und dorum ischs fir uns seer wichtig, ass mer in d Neechi vo dääne Lokaal faare kenne. Au vom Ablauf här sind mer seer yygschränggt... im Normaalfall muess me d Waar innerhalb 24h bi n ys bstelle, ass si am näggschte Daag ussgliiferet wärde ka... jetz mach das emol anere Faasnacht... dasch fascht unmeeglig. In däre Zyt feen unseri Mitarbaiter friener afo schaffe und kenne d Bstellige bis 07:00 entgeege nää und beraits bis speetischtens 11:00 ussliifere.

Am glyche Daag ???
Genau... Bstellschluss isch am 07:00 und bis 11:00 het är syni Waar... aber das mache mer numme fiir d Basler Faasnacht.

     
     
  Und am Faasnachtsdonnschtigmoorge wird dief duuregschnuuft, dängg y emol ;-)
  Martin:

Daas mach y aigentlig scho am Faasnachtsmäntig, denn deert muess jo scho alles stoo und baraat sii... mee kasch denn nimme mache.

     
  Was hesch Du emol als glaine Bueb welle wärde ? Bierkeenig ? ;-)
  Martin:

Friener ha n y mi seer fir d Natur indressiert und ha denn au die mathemaatisch-naturwisseschaftligi Richtig yygschlaage... was y aber amänd nit wyterzooge ha... aifach im Beraich Natur schaffe, dasch myni Idee gsii.

     
  Was macht Di gligglig ?
  Martin:

Aigentlig jeede Daag, wenn y am Moorge uffstand und zfriide bi.

     
  Welles isch Dy absoluts Highlight gsi im 2017 ?
  Martin:

Y flieg seer oft in d Feerie und jeedi vo däne vyle Raise isch e Highlight gsii und hinterleen seer scheeni Erinnerige. Mer mache kaini typische Badefeerie, sondern Raise, wo mer ebbis mitnää wänn... und was mer mitnämme isch seer oft, wies de andere Lyt uff dr Wält goot und kemme mitere gwisse Deemuet zrugg und dängge, wie guets ys aigentlig goot in däm Land.

Bier spiilt jo au in de Feerie e Rolle... verglycht me s Bier in de fäärne Länder mit dämm vo Fäldschlessli ?
Das macht me automaatisch... mer sin jetz grad uffere Insle n dr Karibik gsii und hänn die ainzig, lokaali Brauerey bsuecht... und hänn ys nadierlig duuredeguschtiert ;-) Y ha Underlaage mitgnoo und wird die au dr Firma emol abgää... und denn luege mer wyter ;-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Martin:

Mitem Phil Collins

     
  Was wirdsch an Fraue nie verstoo kenne ?
  Martin:

Wie si Autofaare ;-)

     
  3 Sache wo no unbedingt in Dym Lääbe mache wottsch...
  Martin:

1) Y wott gärn emol zämme mit myne Kinder in d Feerie, aber s het bis jetz aifach nie klappt...
2) Y wott gärn emol ane Live Konzärt vom Phil Collin
3)Und y wott gärn emol vo däre Wält eso goo, ass niemer e Schaade devo drait... wott alles erleedigt ha und frey vo Schuld sii.

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Kino... Theater isch nit eso my Ding... Musicals scho eenter...

  Basel... Myni Haimat, myn Frindeskrais und doo sin myni Wuurzle, wo n y nie uffgää wurd ...
  Ziiri...

E Wältstadt mit indressanter Entwigglig, aber y kenn mi deert nit uss... und wott nit unbedingt e Ziircher sii ;-)

  Herbschtmäss... Friener e ganz tolli Sach und gheert zue Basel... nimmt aber e Entwigglig aa, wo n y nit ganz zfriide bi demit. Friener het me sich an dr Herbschtmäss no woolgfiilt, hitte ischs ussenandergrisse und verzettlet...
  Baasler Rhywiera oder Palmestrand ? Ändlig het me d Basler Rhywiera entdeggt und wird au gnutzt... s muess numme no e weeneli blaanter umgsetzt wärde, ass sich niemer me gsteert fiilt...
  Bier... Beglaitet mi nit eerscht syt 20 Joor ;-)... Bier isch my Lieblingsgeträngg und wirds immer
blybe...
  Donald Trump... Indressanti und kuurligi Persoon... y muess aber saage, ass y eenter e Brobleem mitem amerikaanische Läbe ha. Alles was deert uss dr Politik und Wirtschaft kunnt, isch fir mi e "No Go"... und jetz hänn si au no die richtig Persoon dezue gfunde und das machts mer no weeniger sympaatisch... dr Donald isch fir mi e duureknallte Spinner...
  50 Shades of Grey ...

Kenn y numme dr Namme.

Vyyle Dangg fiir Dyni Antwoorte