Soraya Ackermann, Majoorin vo dr Guggemuusig "Miggeli Schränzer"
   
 

  Iir sin 1987 grindet woorde und händ daas Joor Eyre 30. Burzeldaag deerfe fyyre... wie lang bisch Du den scho bi de "Miggeli Schränzer" ?
  Soraya:

Näggscht Joor sins 29 Joor... bi also syt dr 3. Faasnacht deby.

Mit wellem Instrumänt hesch aagfange ?
Mit Cinelle... allerdings hets 2 oder 3 Joor speeter e greesseri Abwanderig gää, was nadierlig zer Folg kaa het, ass alli Regischter zimmlig underbsetzt gsii sin. Vyli Fraue hänn denn miesse uff die verschiidene Regischter verdailt wärde, sunscht wäre mer nit spiilfähig gsii... y ha denn ins Posuuneregischter gwäggslet.

Also ins Keenigsregischter... e waise Entschaid ;-). Du reedisch vonere greessere Abwanderig... wie vyl Fraue sin den amänd no debyy gsii ?
Mer sin mit 11 Naase an dr Faasnacht gloffe und sythär spiil y Posuune.

     
  Wie bisch zue de "Miggeli Schränzer" koo ?
  Soraya:

Duur myni Kollegin wo mi mitgnoo het... allerdings isch si denn nit eso lang blyybe, aber ych ebbe scho... e treus "Miggeli" ;-)

     
 

S git jo e haartnäckigs Gricht iiber d "Miggeli Schränzer"... stimmt das, ass Iir uss dr Guggemuusig "Gülle Schlüch" entstande sin ? Me sait, d Partnerinne hätte die Gugge grindet... stimmt das ?

  Soraya:

Jo y waiss, dasch ys au immer noogsait woorde. Waisch mer hänn vyyli Joor dr Ruef kaa "Wenn d Schlüch doo sin, sin d Miggeli nit wyt". S isch nadierlig scho esoo, ass sich 7 Fraue, devoo 4 vo de "Gülle Schlüch"-Männer zämmedoo hänn und d "Miggeli Schränzer" grindet hänn.

Und hitte ? isch die Verbindig zue de "Gülle Schlüch" immer no vorhande ?
Nai, hitte isch das nimm eso.

     
  30 Joor... e stolzi Zaal fir e Verain... hänn Iir Eyer Jubeljoor gnosse ?
  Soraya:

Jä klaar... zämme mit dr Nicole ha n y fiir dr Faasnachtsmäntig e Iiberraschig oorganisiert und e baar Guggemuusige sin bi n ys verbyy koo und hänn e Geburtstagsständeli brocht. Mer hänn e glaine Apéro gmacht und hänns wiirglig sauglatt kaa.

Und am Bummel ?
Dr Bumme isch au speziell gsii... zeerscht sin mer ins Frey-Schoggimuseeum noo Buchs, dernoo zem Midagässe noo Konstanz und aaschliessend ins Sea Life.

Und e Ussfluug ?
Bi uns gits jeedes Joor e "Miggeli-Bummel" und daas Joor ischs e Wellness-Wucheänd gsi... e bitzeli fir die elderi Generatioon ;-), aber die Junge hänns au gnosse... vor allem denn in dr Karaoke-Bar ;-)

     
  Wie gseets mit Eyrem Noowuggs uss ?
  Soraya:

Mer kenne n ys momentaan nit beklaage... mer sin mittlerwyyle 30 Fraue.

     
 

3 Sache wo Du bi de "Miggeli Schränzer" schetzisch ?

  Soraya:

1) Y find, ass mer e seer guete Zämmehalt hänn... wenns ebberem schlächt goot, isch me firenand do.
2) Mer sin alli eggsdreem motiviert und wänns zue ebbisem bringe... vor allem musikaalisch.
3) Unseri Frindschaft... und do daarfs au emol schreeg deene ;-)

Absolut... mer verfelsche alli unseri Basler Faasnachtskultur, well alli maine, wie ne Luzärner Gugge spiile z miesse und das find y seer schad... das sin nit miir und das gheert au nit zue n ys... s daarf ebbe au emol schreeg oder schief deene.

     
  Wär e gmischti Gugge e Alternatiive fir Dii ?
  Soraya:

Nieeemoooooolllllsssss... ganz nooem Motto "Aimool e Miggeli, immer e Miggeli".

     
  Jetz muess y aber emol ebbis looswäärde... Du spiilsch jo im Keeeeeenigsregischter (Posuune)... wie kunnt das, ass me vom Keenigsregischter ins Amt vom Majoor wäggslet ???
  Soraya:

Y ha aigentlig gaar kai Waal kaa... im Joor 2002 hets wäärend dr Faasnacht e unerwaarteti Veränderig gää und mer sin pletzlig ooni Majoorin doogstande. Doo druff aabe bi n y in d Manor, ha e Pfyffe kauft, ha s Amt vo dr Majoorin iibernoo und denn ischs loosgange ;-)

Du hesch wärend dr Faasnacht ussem Nit uuse iibernoo ?
Ussem Nit uuse... Jä.

Und wie isch das fir Di gsii ?
Y waiss gar nimm... isch ämel guet duuregange ;-) Iirgendwie hänn mer das zämme phaggt und hänn ys geegesytig gholfe... jo und sythär mach y das 15 Joor.

Und s gfallt Dir immer no ?
Saage mer emol esoo, vermuetlig mach ys no bis 2019 und denn isch vellicht Zyt zem uffheere... y bi e weeneli Faasnachtsmied woorde. Mer hänn jo bi uns e sog. Zyschdigsclub, deert ka me aane, wenn me mind. 20 Joor bi de "Miggeli" gsii isch und 50% vo de Broobe bsuecht underem Joor. het... denn daarf me am Faasnachtszyschdig mitspiile und das wär eventuell no e Optioon fir mii.

     
  Du spiilsch aber no Posuune gäll ?
  Soraya:

Bim Cortège nit, aber zOobe scho. Mer hänn nie e groosse Majoorekopf kaa und vo dämhär funggdioniert das mitem spiile seer guet. Y bi nit ebber, wo aifach numme voorne stoot und d Yysätz aazaigt... das ha n y vo Aafang aa gsait und mach das au nit.

     
  Wie erläbsch Du d Faasnacht als Majoorin ?
  Soraya:

Y fiil mi deert voorne aifach seer wohl und y sag myne Fraue au immer - und dasch au maischtens my letschte Satz im Majoorebricht - ass y jeedes Mol seer stolz bi, deert voorne laufe z deerfe... und mänggmool grieg y au Gänsehut wenn si spiile.

     
  Welles sin die 3 goldige Reegle vonere Majoorin ?
  Soraya:

1) Mer sin e Frauegugge und wärend mer laufe, goot me aaständig mitem Alkohool um...
2) Ass si uff mi loose...
3) Und ass me pinggtlig isch... y sag e Zyt und denn lauf loos... do kenn y nit.

     
     
  Wie leen sich Dyni Fraue fiehre ? Loose si uff Di ?
  Soraya:

Grundsätzlig guet, das muess y wiirglig saage... wenn y meerg, ass si spiilerisch am Aaschlaag und mied sin, denn mach y Schluss und geen zämme ain go schnappe.

     
     
  Hets au emol e witzigi Situatioon gää ?
  Soraya:

S Iiblige halt... me wird vom Zug iiberhoolt oder si sin pletzlig nimm hindedraa... y glaub das erläbt jeede Majoor emol.

     
  Het sich d Faasnacht im Geegesatz zue friener veränderet ? Und wenn jo, in welli Richtig ?
  Soraya:

D Faasnacht isch nimm daas, was si emol gsii isch. Y ha s Gfiil, ass me n ys die wiirglig guete Baize wäggnoo het und vyyli wisse gaar nimm, was ys d Faasnacht beditet. Y ha in de letschte Joore eso vyyl schlächti Erfaarige mit Bsoffene gmacht, wo absolut kai Aanig vo dr Faasnacht hänn. Si kemme Dir entgeege, laufe duur dr Zug und das macht mi aifach hässig. Y ha au scho aine an dr Jagge miesse phagge und ussem Zug wärfe... dasch mer denn egal. Das ha n y friener nie eso erläbbt... friener het me no Aastand und e gwisse Respäggt kaa.

Iir sin kai Baizegugge oder ?
Nai nimme... mer hänn demit uffgheert. Waisch, in dr Baiz mache d Lyt kai Blatz me wenn me yynekunnt und spiile wott oder sitze doo und heebe sich d Oore zue... oder hänn e dumme Latz und das mien mer nit haa.
Mer spiile numme no in groosse Baize wo mer au Blatz hänn.

     
  Wie ischs Verhältnis under de 4 groosse Frauegugge ?
  Soraya:

Friener hets die Rivalitäät zwische de Frauegugge gää und das het mi immer seer gsteert. S het denn emol e Joor gää, wo s Sujet "Frauenpower" aggduell gsi isch und zwor hänn do alli 4 Frauegugge zämme gspiilt. Wärend de Broobe bi n y denn emol in d Mitti gstande und ha gsait "Y ha n e Wunsch an alli... mer sin doch alles Fraue und mache zämme Faasnacht... s wär doch so scheen, wenn mer zämme an dr Faasnacht au ebbs dringge kennte, ooni die ganz Rivalitäät underenand". Y ha wirglig s Gfiil, ass es nimm eso schlimm isch, wie au scho. Y ha ne gueti Frindschaft mit Fraue vo andere Guggemuusige gschlosse und freu mi au immer, wenn y ebber driff.

     
  Was beditet Dir d Faasnacht ?
  Soraya:

Friener het mer d Faasnacht seer vyyl beditet... aber langsam isch das wäg... verblasst.

     
  Wenn foot bi Dir d Faasnachtsstimmig aa ?
  Soraya:

Y bi nimm nervees voor dr Faasnacht... die ganz Voorfaasnacht isch fir ys e "Yylaufe" oder wenn mer annere Waagevernissaage spiile. Aber s Kribble kunnt denn speetischtens am Sunntig voor dr Faasnacht, wenn in dr Stadt d Ladärne yypfyffe wäärde... wobyy s pfyffe nit eso my Ding isch, aber s isch ainewäg ebbis draditionells und scheens.

     
  Was macht Di gligglig ?
  Soraya:

Myni Familie macht mi gligglig und wenns mym Sohn guet goot.

     
  Was hesch Du emol als glains Maitli welle wärde ?
  Soraya:

Coiffeuse...

Worum bischs nit woorde ?
Well my Mamme gsait het "Mit däm verdiensch kai Gäld" ;-)

     
  Hesch als glains Maitli en Held kaa ?
  Soraya:

Jä... "Die Rote Zora" und y bi wiirglig emol die Rooti Zora gsii... y ha sällmol zämme mit e baar Schuelkolleege e Bandi grindet und y ha denn deerfe die Root Zora sii... obwool y kaini roote Hoor ka haa :-)

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Soraya:

Bi unsere Broobewucheänd sin mer maischtens imene Laagerhuus underbrocht. S luschtige isch, ass die ältere Laagerhiiser soone spezielle Gruch hänn... vor allem in dr Duschi oder Wäschbeggi. Y waiss no ganz genau, wie dsa friener im Lager gschmeggt het... s isch no schwiirig zem erkläre... und jetz, wo mer daas Joor wider im Broobewuchänd gsii sin, isch mer das grad in Sinn koo wo n y das gschmeggt ha... genau wie im Schuellaager.

Wo verbringet Iir denn Eyer Broobewucheänd ?
In Langebrugg

     
  Welles isch Dy absoluts Highlight gsi im 2017 ?
  Soraya:

S Geburtsdaagsgschänggli vo mym Sohn... das het mer ganz guet doo.

Was hesch denn griegt ?
E wunderscheene Aahänger...

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Soraya:

Y hätt jo 3 ;-)

Aha... und welli denne hmm ?
1) Dr Gölä, wo n y iibrigens daas Joor perseenlig anere Autogrammstund droffe ha...
2) Dr Guido Maria Kretschmer... dr Moodedesigner.. dä find y so lässig.
3) Und denn nadierlig dr George Clooney
.

Hejoo... Bravo... und vermuetlig no mit iim e Nespresso Kaffi dringge ;-)

     
  Was wirdsch an Männer nie verstoo kenne ?
  Soraya:

KAI KOOOMMMMEEEEENNNNNDAAAAAR !!!!!

     
  3 Sache wo no unbedingt in Dym Lääbe mache wottsch...
  Soraya:

1) Y wurd gärn emol noo New York goo...
2) Y wott gärn emol Oma wärde...
3) Und y gang näggscht Joor zämme mit mynere Cousine und mynere Schweegere no Rom.

     
  Wär wurdsch gärn emol ins Dschungelcamp schigge ?
  Soraya:

Dr Baschi...

Dr Sänger ? Magsch dä nit ?
Naaaiii... mir gfalle syni Täggscht nit und är isch mer nit sympatisch... dä soll ruhig emol ins Dschungelcamp go.

     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Eenter Kino... kunnt aber immer uffs Brogramm druff aa wo grad lauft...

  Basel... E Stadt am Rhy...
  Ziiri... Rivalitäät im Fuessball... druurig aber woor...
  Herbschtmäss... Riiseraad... y bi immer gärn uffs Riiseraad und uffem Minschter ischs no vyyl scheener...
  Frauegugge... Dr Zämmehalt mit andere Frauegugge...
  Baasler Rhywiera oder Palmestrand ? Palmestrand...
  Donald Trump... Isch e seer unsympatische Mensch...
  50 Shades of Grey ...

Y gang zämme mit myne Fraue dr 3. Dail im Kino go luege :-)

Ou nai... wie findsch die Film ?
Es sin im Fall au Männer im Kino gsii gäll... isch e riise Gäldmaschinerii...

Wie findsch d Umsetzig vom Thema ?
S isch jetz nit e Film wo n y immer wider wurd go luege... y ha dr Film gsee und s isch vellicht zem uffrische, wenn mer wideremool e Fraueoobe mache :-)

Vyyle Dangg fiir Dyni Antwoorte