Martin Zingg, Atelier "Larven-Zingg"
   
 

 

Du gheersch zwyyfelloos zue de eldischte Laarveateliers in Basel, wo no s draditionelle Handwärgg pfläge... wie lang gits Dy Atelier scho ?
  Martin:

Wenn y daas eso genau wisst... ;-)

Urspringlig ha n y Graafiker glehrt... dasch in dr Zyt vo 1964 - 1968 gsii.. dernoo sin mer uff e Wältraisli und hänn d Jugend gnosse. Wo mer wider zruggkoo sin, hänn mer miteme glaine Laarveatelier im Dolderwäg aagfange...

Wär isch denn "Miir" ?
 My Brueder und yych... ganz friener bevoor mer mitem Laarvegschäft aagfange hänn, sin mer an dr Herbschtmäss gsii und hänn Marionette, Puzzles und Käsperlfiguure verkauft... aber dasch e brootloosi Aarbet gsii. Me ka nit produziere, verkaufe und maine, ass me do no grooss Gäld verdiene ka. Mit däre Erkentnis hänn mer denn aaschliessend miteme Laarveatelier aagfange...

Und s Laarveatelier het sällmool mee brocht ?
Nai... mer hänn alli Negadiiv verschänggt und hänn s Atelier wider uffgää... mer hänn numme Glaikundschaft kaa und sin ständig ummegsegglet fir ebbis, wo nit yybrocht het. Speeter sin mer vonere groosse Clique aagfroggt woorde und hänn denn gfunde, ass mers noonemool brobiere sotte ;-)

Und wenn isch das gsii ?
Aafang 70er Joore... do sin mer in dr Stücki z Glaihynige gsii und zwoor eso lang, bis sie denn deert zue gmacht hänn.
     
  Du machsch jo nit numme kaschierti Laarve, sondern au sottigi uss Kunststoff...
  Martin:

Aigentlig bi n y nie e Frind vo Kunststofflaarve gsii... aber y bi ne Typ, wo gärn ussbrobiert und au scho e baar verschiideni Patänt aagmolde het... vo dämhär het mi dr Kunststoff scho au indressiert.

Wie bisch denn uff d Idee koo, Kunststofflaarve z mache ?
Y ha fir e Wärbeuffdraag ebbe 700 Kunststofflaarve miesse mache, wo anere Mäss vom Moolerverband zem bemoole verdailt woorde sin. Fir daas ha n y denn e Dieffziehapparaat baut und deert ewäg hänn mer denn Kunststoffhiet uss Polystyrol häärgstellt. In dr Schwiz gits jo fascht kaini Huetfabrigge me und die Hiet wo me im Internet kaufe ka, sin z glai und gseen aifach z "Clownesque" uss. Mer hänn denn aagfange sälber Hiet z zieh und unser Sortimänt isch mittlerwyle seer grooss woorde... mer kenne praggdisch
alles mache.

Y gsee do grad e huffe alti Baasler Schuggerhelm vo friener... Waansinn wie ächt die ussgseen :-)
Die sin vomene Originaal härgstellt woorde, mer hänn au e alte, klassische Schwizer Fiirweerhelm und nadierlig Baasler Hietli, etc.

     
  Wo liggt denn dr Underschiid zwischere kaschierte undere Kunststofflaarve ? Ka me mit Kunststoff mee Details
uusehoole ?
  Martin:

Nai... dasch e Froog vom Kenne... wenn me zem Byspiil e Foorm vomene Politiker mache muess und iin nadierlig au erkenne sott, denn kunnt me ums kaschiere fascht nit drummumme. Dr Uffwand fir ai Laarve isch nadierlig imäns und dorum kunnts au uff d Stiggzaal druffaa.
     
 

Wie kemme denn Kunststofflaarve bi de Lyt aa ?

  Martin:

Bi uns ischs ebbe 50:50... mit mee Tendänz zue Kunststoff... s het nadierlig alles syni Voor- und Noodail.
Dr Bryys isch dr grooss Voordail, aber schwitze duet me in baide Laarve glych staarg. Dr Kunststoff isch e thämperatuurneydraals Materiaal, dh. wenns dusse kalt isch, denn ischs in dr Larve au kalt und dr Dampf innerhalb vo dr Laarve duet sich als Kondänswasser niiderschloo.
Bi dr Babyyrlaarve schwitzt me glyych, aber wells Babyyr besser isoliert, ka dr Dampf besser abzieh statt kondensiere.
     
  Du bisch jo no ebber vo dr alte Schuel und y dängg, Du kaschiersch jo au vyl lieber Dyni Laarve. D Aart und Wyys vo dr Häärstellig het sich - im Geegesatz zue friener - nit groossaartig veränderet... oder doch ?
  Martin:

S technische Prinzip het sich nit veränderet... mer hänn e weeneli e Veränderig in dr Negadiivhäärstellig, aber sunscht ischs fascht no genau glych wie friener.

Hesch Du s Gfiil, ass d Aasprich vo de Kunde - im Geegesatz zue friener - greesser woorde sin ?
Oder d Sujets ? Oder d Faasnacht ?
S het sich scho veränderet... also was d Sujets betrifft. S kunnt halt immer uff d Lyt druff aa und wie si das Sujet umsetze. Aber was es mit dr allgemaine Tendänz z due het, ischs estheetische Empfinde... hitte hets Internet e saumässige Yyfluss. Friener ha n y no ganz e huffe, handzaichneti Entwiirf vonere Laarve griegt, aber das stirbt vellig uss. Hitte grieg y e Ussdrugg vom Internet und s haisst "Soone Laarve wänn mer".

Au dr Trend zem Horror und Gruusige bi de Laarve isch feststellbaar... do kemme Glaasauge yyne, fuuli Zeen wo wie ächt ussgsee mien, do muess Bluet laufe, etc.... das het mit dr Basler Faasnacht nit me zdue, sondern goot in Richtig Halloween oder Disneyland. Do sin mer halt iiberhoolt und wird au emol e Faggdoor sii wo mer saage, mer kennes au blyybe loo.

Also Du wottsch au gaar kaini Horror Laarve mache oder ?
Nai das mach y nit... denn hogg y lieber an d Sunne.

     
  Hitte wird jo vyl im Internet kauft und d Konkurränz vo de Laarvemacher isch jo in Basel zimmlig grooss. Wenn jetz s Joor 2017 aaluegsch... bisch zfriide demit ?
  Martin:

Y bi immer zfriide... s Laarvegschäft isch kai Gschäft, wo me vyl Gäld uff d Syte scheffle kaa. Wenn y e Joor iiberläbe ka, denn isch das scho super.

Bisch mit Dynere Uffdragslaag zfriide ?
Jo, dasch wie jeedes Joor... die ainte springe ab und die andere kemme dezue. Wenn friener e guete Kund s Atelier gwäggslet het, denn het är das em Laarvebauer gsait... dr Laarvebauer muess jo blaane, Personaal oorganisiere, Materiaal bstelle, etc. aber hitte isch das nimm dr Fall... oder e Clique kunnt kurzfrischtig und wott no ebbis... das goot au nimme.

Das goot jo scho elaige wäggem Materiaal nimm dängg y emol...
E Byspiil... dr Bascht fir d Berigge het me friener in dr Schwiz kauft... isch au e Schwizer Patänt gsii. Mittlerwyle kunnt dä uss Italie und me muess grad 10kg pro Faarb bstelle... bis das Materiaal doo isch, goot das 3-5 Wuche und denn muess es no veraarbaitet wärde... do ka me hitte aifach nimm kuurzfrischtig koo und ebbis welle... do hänn d Lyt afach kai Aanig was do dehinter steggt.

     
 

Wie lang brucht me fir e Laarve z mache (inkl. Negadiiv) ? Also wenn si nit ab Stange kunnt...

  Martin:

Zeerscht bruucht me gueti Foteli, am beschte miteme Syteprofiil... Zaichnige wäre besser. Denn muesch dr Doon (Leem) hoole und aafoo modeliere... 1-2 Daag, sofärns grad uff Aahiib klappt. Denn muesch e meerdailige Negadiiv mache, denn kunnts kaschiere, moole, aabasse, etc.

Rächnet sich denn das alles ?
Nai das rächnet sich nit und isch nadierlig e Mischrächnig... und Ändi Saison bisch froh, wenns guet uusekoo isch... und dr administratiiv Uffwand het enorm zuegnoo.

     
  In de letschte 40 Joor hänn sich bestimmt e huffe Negadiivfoorme aagsammlet... wie vyl hesch vo däne und was machsch demit ?
  Martin:

Dasch wiirglig esoo... me getraut sich fascht nit e Negadiiv fuurtzkeye, aber me machts ainewäg... und genau denn kunnt aine und wott vo däm Negadiiv e Laarve ;-)

Wie vyyl sins denne ?
Mittlerwyyle sins 700 Kaschierfoorme und ebbe 300 Dieffziehfoorme... im Käller hänn mer fascht kai Blatz me und s wird au immer schwiiriger e Foorm z finde wenn me si brucht... obwool mer duureoorganisiert sin.

Und was isch mit dr Foorm vom Majoor ?
Dr Majoor isch aigentlig e Technik vo "dr verloorene Foorm" und das haisst, ass me zeerscht dr Majoorekopf in Styropor schnitzt und aaschliessend iiber-kaschiert. Dernoo leest me de Styropor uuse und duur daas isch jeede Majoor e Ainzelstigg.

     
  Ab wenn foot bi Dir die ganz strängi Zyt aa ?
  Martin:

Jedes Joor speeter... friener hänn mer in dr Stücki scho im Septämber mitere Beleegschaft vo 5-6 Maa voll gschafft. Hitte ka me saage, Ändi Oktoober oder sogaar Mitti Novämber foots eso richtig afo aazieh.

Wieso das ?
Well d Lyt im Internet yykaufe und s bstellte Produggt noo 2 Daag an dr Liiferadrässe im Schwoobeland liggt... oder me goot ins Waarehuus und nimmt ebbis vo dr Stange... und bi de Laarve maint me, ass das genau eso isch. Do isch emol e Frau in d Wärggstatt koo, isch e zytli stoo blyybe und het ys bi dr Aarbet zuegluegt...
nooeme Zytli maint si "Jeee Siiii... do wird jo no alles vo Hand gmacht". Dasch fir die vellig unbegryffbaar gsii und eso kemme ebbe hitte ganz vyl Kunde und wisse nit, was do no an Aarbet dehinter steggt.
     
  Wenn denn dr letscht syni Laarve abghoolt het... gits denn e Momänt wo duureschnuufsch und saisch "Ändlig feertig" ?
  Martin:

Das sowiso und isch wie d Leeri noo dr Faasnacht.

     
  Wenn an dr Faasnacht Dyni Laarve gseesch... erfillt aim das mit Stolz oder luegt me das relativ niechtern aa ?
  Martin:

Me luegt, wie dr Zug zämme mitem Goschdym wiirgt und dasch nadierlig immer toll. Me gseet denn nadierlig au Sache, wo me besser hät mache kenne, dasch ganz klaar. Y lueg mer aber au Ziig vo de andere Ateliers aa und wenn die toll ussgseen, denn fraids mi au.

     
  Was beditet Dir d Faasnacht ?
  Martin:

D Faasnacht isch in Basel e Stigg vo unserem Läbe und y bi jo mit däm uffgwaggse... y ha scho als glaine Gnäggis zämme mitem Babbe in dr Kuchi Laarve gmacht. Y ha sälber au drummlet, allerdings wider uffgheert well y in d RS ha miesse. Dernoo ha n y e baar Joor pfyffe, ha Schnitzelbängg gmacht und bi als Voordrääbler underwäggs gsi.

     
  Wenn foot bi Dir d Faasnachtsstimmig aa ?
  Martin:

Isch insofäärn nimme doo, well y sälber jo au nimm aggdiiv Faasnacht mach, aber y gniess es ainewäg... y ka am Stroosserand stoo, zueluege und mi draa fraie.

     
  Het sich d Faasnacht im Geegesatz zu friener veränderet ? Und wenn jo, in welli Richtig ?
  Martin:

Jo sicher, dasch jo klaar... in myne Auge gheert d Faasnacht weder in e Museum, no ins Wältkultuureerb... d Faasnacht isch e Zuestand, dasch wie s Fiirwäärgg an Silveschter oder 1. Auguscht... das macht tschschsch bumm und denn isch feertig... me hets gsee und erläbt und kas nimm hoole und in d Stuube leege.
Näggscht Joor ischs wider e anderi Faasnacht...

     
     
  Was macht Di gligglig ?
  Martin:

Solang me gsund duur d Wältgschicht laufe kaa... und im Summer schwimm y seer vyl im Rhyy und relax gärn.
     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Martin:

Jo nadierlig, do gits ganz vyl eso Gschmägger... aber e ganz intensiive und wunderbaare Gschmagg hets friener im "Villars Kaffeegeschäft" kaa. Die hänn Schoggi und Kaffi verkauft und in däm Laade hets denn die ganz spezielli Gschmagg in dr Luft kaa. Als glaini Buebe sin mer amigs numme in dä Laade yyne, zem go schmegge und dasch eso sensationell guet gsii. Oder dr Schellack isch au eso ebbis gsii, obwool mer scho lang kaine me verwände.

Wohär kunnt aigentlig dr Schellack ?
Dasch d Usschaidig vo dr Schellack-Luus und isch friener dä hutneutraali Lack gsi. Dr Schellack muess me mit Sprit leese und ebbe dä Gschmagg het me friener ständig in dr Naase kaa.

Eme Mitarbaiter isch e Gutsch Nitro ussgloffe und das het nadierlig bestiaalisch gstungge... mer hänn d Fänschter uffgmacht und duuregliftet... do kunnt uff aimool e Kund yyne und maint "Hmmmm heerrlig wie das noo Laarvelack schmeggt".... deby hets iiberhaupt nit mit Laarvelack zdue kaa, s isch aifach numme d Voorstellig gsi, ass es imene Laarveatelier eso schmegge muess ;-)
     
  Was wirdsch an Fraue nie verstoo kenne ?
  Martin: D Fraue ;-)
     
     
  No e baar Schlaagweerter, bitte numme mit aim Satz beantwoorte...
  Kino oder Theater ?

Baides seer sälte...

  Basel... Isch my Lääbe...
  Ziiri... Het au scheeni Oort...
  Herbschtmäss... Gheert dezue... Juugenderinnerige, d Romantik vo friener isch verloore gange...
  Kaschierti Laarve... Het me Seel als d Kunststofflaarve...
  Baasler Rhywiera oder Palmestrand ? Basler Rhywiera gniess y in volle Ziig und wenn y am Nomidaag dr Rhy durab schwimme und dernoo no e weeneli aaneheggle kaa, isch das toll.
  Donald Trump... Abwaarte... d Alternative wär nit besser gsi...

Vyyle Dangg fiir Dyni Antwoorte