Jo also y bi jo nit sälber uff die Idee koo, y bi do dryygwaggse. Friener het me d Marroni no bi n ys dehaime uffem Kuchidisch yygschnitte und do isch nadierlig immer ebbis loos gsii. Do sin 3-4 Fraue bi n ys gsässe, wo dr ganz Daag d Marroni yygschnitte hänn. Y ka mi no seer guet draa erinnere, wie n y als glaine Gnäggis die Babyyrgugge uss dr Sunntigszytig gmacht ha. Zämme mit mynere Urgroossmamme hän mer die Gugge miesse voorberaite und in e Kischte phagge... dasch e riise Aarbet gsii.

Marroni yyschnyyde isch au e gsellschaftligge Event gsii oder ?
Jo genau... d Marroni sin immer um mi umme gsii... my ganz Lääbe lang.

Und ka au devoo lääbe...
Wenn me e gueti Saison het, denn blybt au ebbis hängge... aber... me muess au e lange Schnuuf haa.

Wie sin denn Dyni Aarbetszyte ?
Am Wienachtsmärt schaff y jeede Daag... und sunscht ha n y am Sunntig zue... oder wenn s Wätter schlächt isch oder in Streeme rägnet.

Also ains muess y saage, y iss nit seer vyyl Marroni... aber wenn y iss, denn maischtens vo Dir... sie schmegge aifach anderscht. Was macht denn e gueti Marroni uss ?

Abgsee vo dr Qualität, ischs sicher au d Aart, wie me d Marroni breetle. Y due si immer zeerscht scharf aabroote bis si lycht schwaarz sin (nit verbrennt) und das macht denn au dr Gschmagg uss. Y muess ehrlig saage, ass 50% vo myne Kunde alles Stammkunde sin, und zem Dail scho Joorzähnte bi mir kaufe, bzw. d Generatioone.

Wie isch das mit dr Qualität vo de Marroni ?
S wird immer schwiiriger gueti Waar z griege, well d Ärnte aifach die Mängi nimm bringt, wie voor 20 Joor.
D Laagerhalle in Italie wärde nimme voll... und wenns weenig Marroni het, wird alles iiber dr Bryys abgwigglet.
Friener ha n y 3-4 Liiferante kaa und hitte sins no 2... zue de Zyte vo mynere Groossmamme hänn mer d Marroni no in dr Märthalle kauft... doo hesch die Waar no vorhäär kenne aaluege.

Normaalerwyys kemme si immer uss Italie... aber do syt e baar Joor d Waar in Italie knapp woorde n isch, gits no Marroni uss Spanie und Portugal... aber die will y nit, die schmegge mer z faad. Aber wenns nit me anders git, muess y halt die nää... oder konsequänt dr Laade zuemache. Me baut sich e Kundschaft uff, wo e top Qualität gwoont isch und denn kasch nit aifach ebbis nää, wo weeniger Qualität het... das goot nit.

Aber in dr Schwiz gits jo au Marronibuure...
Im Tessin gits au Marroni, aber y ha kaini vo deert. Sogaar d Marroniverkaifer im Tessin hoole iiri Waar in Italie. Y waiss au nit wie vyyl Marroni im Tessin gärntet wärde. Die ganz ärnterey isch e unglaublige Krampf... in Italie finde si jo au kaini Lyt me, wo das no mache wänn. Im Flachland goots jo vellicht no, aber in de Bärge ischs denn nimm eso luschtig Marroni z ärnte. Dezue kunnt no dr Ussschuss, wo zimmlig gewaltig isch... vo 100kg kasch 40Kilo fuurtschiesse.

Z Basel broote die maischte mit Holzkohle.

Wo isch dr Underschiid ?
Vom reeschte här gseets genau glych uss, aber d Marroni hänn halt nit dr typisch Holzgschmagg. Y find, ass me d Marroni wo mit Gas gmacht sin, nit schmeggt wenn me dr Deggel lipft... und mit Holzkohle schmeggt me das ebbe und dasch fir mi e ganz wichtige Punggt. Me muess d Waar schmegge, sunscht kemme d Lyt nit.
Me lauft jo immer dr Naase noo, dasch wie bi de brennte Mandle. Am beschte verkauf y, wenns e weeneli kalt isch und e Biise goot... denn schmegge d Lyt d Marroni.

Vom 23. Septämber bis zem letschte Bummelsunntig... aber do muess me immer e weeneli luege was s Wätter macht.

S Wätter spiilt jo e groossi Rolle...
Dr Staart im Septämber 2017 isch e absoluti Katastroophe gsii... s isch aifach z waarm gsi und bi 24 Grad verkaufsch kaini Marroni, do bisch numme e Witzfiguur.

Du bisch bi Wind und Wätter am Stand... wie haltet me das duure ?
Y schaff jo no als Sanitär und bi au immer dusse... y ha nie e Job ka wo n y dinne schaffe muess... ha n y au nie welle und kennt das au gaar nit. Me muess sich halt richtig aalegge und denn haltet me das uss ;-)

Me nimmt e normaali Brootpfanne miteme Deggel... s Voluume muess glai si... denn vyl Gas bis d Marroni schwitze und uffspringe. Denn vom Fiir nää und langsaam breetle losse. Im Baggoofe wurd y d Marroni nit mache, do ischs Voluume vyyl z grooss und bringt nit.

Y bi kai Faasnächtler... my Läbe lang isch d Faasnacht, Marroni verkaufe gsii... s isch fir mii e Gschäft.
Me hoggt deert an dr beschte Laag und bruch kai Färnsee... bi mir lauft d Faasnacht voorem Laade duure ;-)
Wenn d Lyt guet druff sin, bi n y 14-15h dusse und dasch seer kurzwyylig. Aber s git nadierlig au anderi Faasnachte wo s rägnet und dasch denn fir alli nimm luschtig.

Voor 20 Joor ischs no e guets Gschäft gsii, aber hit nimme... s git efang an jeedem Egge Ässständ. Isch d Faasnacht weermer, denn isst me mee Siessigkaite... isch si kelter, denn ischs eender myni Zyt. Aber s groosse Gschäft isch d Faasnacht scho lang nimme und y muess eerlig saage, ass bi mir noo dr Wienachte d Saison zue 80% gloffe n isch.

Die scheenscht Zyt isch zOobe oder z Nacht... denn gseet me, wie die scheene Ladärne und Guggemuusige verbyy laufe... dasch wiirglig seer scheen. Dr Zyschdigzoobe isch absolut dr bescht Daag, do bi n y voll drinn und d Lyt sin guet druff.

Bim Guggekonzärt uffem Barfi hesch jo e Logeblatz ;-) aber denn laufts Gschäft oder ?
Denn brummt dr Laade, jä ;-) denn bisch wiirglig 5-4h nonstop am schaffe.

Y find, ass d Faasnacht braaver woorde n isch... friener isch alles e weeneli frächer gsii und me het sich mee getraut zem saage.

Zfriideni Mensche

Immer wenn y e Banaane zämme mitere Orange iss, denn bringt mi das sofort in myni Kindhait zrugg. Friener ha n y als glaine Gnäggis seer oft e verdruggti Banaane mitere Orange zem ässe griegt und dä Gschmagg isch mer e Lääbe lang blyybe.

Sobald d Marroni Saison verbyy isch, gang y maischtens 2 Moonet in d Feerie und dasch denn my Highlight vom Joor.

Dä Klaiderwaan oder däm Scheenhaitsideaal, wo vyyli Fraue nooyyfere... y glaub, ass sich d Fraue sälber demit eso under Drugg setze.

Kaufe d Fraue anderscht als d Männer ? Also uff d Marroni bezooge...
Uff jeede Fall... bim zaale sin d Fraue seer voorsichtig... zeerscht kunnts Minz und denn eerscht kunnt d Noode. Dr Frau ischs absolut egaal, wie vyyl Lyt no hindedraa steen... do wird soolang nooem Minz kniiblet, bis es basst ;-)

Hihihihihi....sooooo guet :-) und dr Maa ?
Dr Maa kaa 10 Finfliiber im Hoosesagg haa, är zaalt immer mit dr Noode... und maischtens no mit dr greeschte wo n är het ;-)

1.) Z Basel in e Schiff yystiige und in Singapore wider uusstyyge... aifach zytloos raise.
2.) Y wurd gärn emol zämme mit mynere Dochter e Wuche noo New York goo.

Dr Magdalena Martullo Blocher...

Theater...