Eva Nidecker, TV Moderatoorin
   
   

 

Wie lang bisch Du scho in dr Mediewält underwäggs und wie ischs dezue koo ?

  Eva:

1999 ha n y in Basel myni Matuur abgschlosse und mi in Ziiri fiirs Studium fir Meediewüsseschaft aagmolde, wo n y dr Uffruef vo Telebasel gsee ha. Telebasel het ebber fir d Sändig "Mash" gsuecht... soone Allrounder wo ne weeneli alles macht... e bitzeli Kamera, e bitzeli Redaggdioon und e bitzeli Moderatioon. Y ha mi druff aabe firs Casting bewoorbe, bi au aagnoo woorde, ha denn das ebbe e Joor lang gmacht und näbebyy no studiert...
dasch jetz mittlerwyle bald 20 Joor här ;-)

Und nodäm Joor bi Telebasel ?
Hets Schwyzer Färnseh SRF e Uffruef fir d Jugendsändig "Oops!" gstaartet, wos au wider e Casting gä het dezue. Y ha baidi Runde iiberstande und dasch denn au myn Yystiig zem SRF gsi.

Und Dy Studium ?
Y ha 4 Joor lang studiert, aber näbebyy immer gschafft... 60% fir die Sändig "Oops!" und denn isch jo no d Radiosändig "Virus" dezue koo. Y ha denn my Studium gschmisse, was aber au OK gsi isch... y bi nit so dr Akadeemiker-Typ ;-)

Wie ischs denn wytergange ?
Y ha denn immer mee gmacht... Muusigsändige, Underhaltigssändige und verschiideni Events moderiert, aifach ganz underschiidligi Sache. Wo n y mit 28 Lenze noo Paris gange bi, hets e Underbruch gää... y ha 3 Moonet in e Sproochschuel welle... und bi denn hängge blybe.

Loss mi roote... wägge dr Liebi oder ?
Nei nit emol... im Geegedail, y bi do in dr Schwiz verliebt gsii ;-)

Was het Dir die Zyt in Paris gää ?
Seer vyyl... aifach emol loosloo zem sich imene neye Umfäld z beweege, wo aim niemer kennt. Y glaub, dass wurd jeedem emol guet due zem sich ney z entdegge... uusezfinde "Wär bi n y aigentlig und was wott y ?".
Die Erfaarig isch seer hailsaam gsii fir mi.

     
  Kasch Di no draa erinnere, wo Du s eerscht Mool voor dr Kamera gstande bisch ? Wie isch das gsi fir Di ?
  Eva:

Jo dasch bi Telebasel gsi und y bi eggsdreem nervees gsii. Am Aafang bringsch s aifach noonig und me isch esoo mi sich sälber beschäftigt, ass me alles perfäggt macht... aber das goot nadierlig nit und grad am Aafang macht me ganz vyl Fääler, wo au dezuegheere.

     
  Du machsch jo mittleryle sovyyl... Radio, Färnseh, Events, Interviews, etc.... Kunnt d Eva au emol zer Rueh ?
  Eva:

Hejooooo, das deent numme noo ganz vyyl ;-)

Aber Du bisch scho e Powerfrau... wie kasch Di denn entspanne ?
Monotonie ha n y nit gärn, y bruch d Abwäggslig. S tolle an mym Job isch doch, ass y eenter emol am Wucheänd schaffe due und defiir am Mäntig und Zyschdig frey ha... y ka mir dr Daag yydaile und dasch ganz toll. S git Wuche, wo n y seer vyl z due ha und denn gits wider e Wuche, wo weeniger loos isch... y bi do seer
frey und dasch wiirglig scheen. Y fulänz aber au seer gärn emol dehaim uffem Sofa und zieh mer Netflix yyne... oder dringg gärn emol e Bier mit myne Frinde... dasch myni Aart zem Energie tangge.

     
 

Was fasziniert Di an Dym Bruef ?

  Eva:

S Vyylsytige, dr Kontaggt zue ganz vyyl verschiidene Mensche... dr Yybligg in die verschiidenschte Beraich vom Lääbe, wo mer sunscht verschlosse wäre... dasch wirglig e ganz groosses Privileeg, wo me haa deerf und isch eggsdreem spannend.

     
  Schwängge mer emol langsaam in d Faasnachtswält... was beditet Dir d Faasnacht ?
  Eva:

Ganz, ganz vyyl... woby ych aigentlig eerscht seer spoot zer Faasnacht koo bi, well mer immer in d Skifeerie gange sin. Y ha d Faasnacht nie esoo "gläbbt", bis y denn myn eerschte Frind kaa haa, wo bi de "Verschnuuffer" drummlet het. Y ha mer denn das emool aagluegt und bi begaischteret gsii. Y ha denn mit 17, innerhalb vomene Joor, s ganz Repertoir vo de Junge pfyffe. Y ha denn au s eerschtmol an dr Faasnacht mitmache deerfe... y waiss hitte noonig, wie n y das ganze Repertoire aanegriegt ha ;-)

Noo 2 Joor ha n y denn scho im Stamm deerfe mitpfyffe... sythär bi n y mitem Faasnachtsvirus infiziert. Y glaub,
d Faasnacht muess me läbe, zem si z verstoo... egal in wellere Foorm. Eerscht wenn me e Dail devoo darf sii, griegt me dä Spirit vo dr Faasnacht mit. Aber au dr kinschtlerisch Aspäggt isch seer scheen... s Ussenander- und Umsetze vo de Theme... oder sichtbaar mache in Foorm vo dr Ladäärne, begaischteret mi halt au seer.

     
  Du moderiersch jo em Baasler syni liebschti Sändig und bisch so quasi fir ys Baasler d Frau Faasnacht. D Voorberaitig fir soone Sändig nimmt jo ganz vyl Zyt in Aaspruch. Wenn foot me do aa mit dr Blaanig ?
Wie muess me sich das vorstelle ?
  Eva:

Hitte (Aameergig: 2.11.2017)... mer hänn am 12i unser eerschts Dräffe und bespräche emol zämme, was mer so fir dr Querschnitt in Focus setze kennte... was gits fir Theeme wo in dr Luft steen ? Was kennt spannend sii fiir ys ? Aber au dr Cortège wird en eerschts mol besproche... was kennte mer im 2018 anderscht mache ? Welle Gascht kennt me live uff dr Mittlere Brugg yylaade ? Aber so richtig loos mit dr Blaanig goots eerscht, wenn dr Rädäbäng dusse n isch und me alli Sujets kennt.

Isch d Moderatioon vom Cortège aifacher zem blaane, wells e Live-Sändig isch ?
Im Geegedail, s isch vyyl uffwändiger... me muess sich in alli Sujets vo de Stammclique yynelääse. Z Dritte schrybe mer alli Clique n aa zem no e weeneli mee Informatioone z bikoo als daas, wo me im Rädäbäng läse ka... dasch vyl Aarbet wo me do mache muess.

Und bim "Querschnitt" ?
Dr "Querschnitt" isch fir mii als Moderadoorin e glainere Uffwand. Noo Wienachte ha n y myn Ablauf und kaa aaschliessend myni Moderatioone dezue schrybe. D Helfti vo dr Sändig bestoot uss Schnitzelbängg, dasch esoo und d Zueschauer wänn das au... voor allem Zueschauer usserhalb vom Kanton. Aber d Draidääg vom "Querschnitt" sin relativ uffwändig... mer sin also wiirglig vom Moorgestraich bis zem Ändstraich mit verschiidene Kamera-Teams underwäggs, damit au alli Aspäggt kenne yygfange wärde.

Produzäntin und Redaggter sichte voorzue das Materiaal, entschaide sich, was dryykunnt und was nit. D Cutterin schnydet voorzue ainzelni Sequänze vom Querschnitt, well Samschtig isch schnäll emol und denne muess alles feertig sii.

Am Frytig drifft me sich aber denn scho wider und am 17:00 isch denn d Abnaam vom Ändschnitt... me luegt sich alles noonemool aa, korrigiert vellicht no s aint oder ander bis ebbe am 19:00 und denn gits e Nachtschicht - die zwaiti nooem Ändstreich. Vom Frytig uff Samschtig due n ych und d Produzäntin no zämme täggschte... und dasch doch e groosse Uffwand. Me muess s richtige Maass an Täggscht finde, die bassende Woort und wott in däre knappe Stund e scheeni Gschicht verzelle. Das ka denn bis am 05:00 am moorge goo und am 09:00 verdooni denn s Ganze.

Du bisch also vom Moorge- bis zem Ändstraich fir d Sändig underwäggs... vermissisch s pfyffe nit ?
Am Zyschdigzoobe hänn mer fir e baar Stindli frey und denn bi n y nadierlig no e weeneli underwäggs und klingg mi yy bime Schyssdräggziigli... aber speetischtens um Mitternacht bi n y denn wider dehaime, well y am Moorge
jo scho wider voor dr Kamera stoo muess.

Aber denn bisch pfyffend underwäggs oder ?
Genau... s deent halt amigs nit immer eso perfäggt ;-)

     
 

Wenn am Donnschtigmoorge symbolisch die letscht Klappe fallt, gits denn e kollektiivs Uffschnuufe ? Dringgt me no ain zämme oder geen denn alli grad haime ?

  Eva:

Also in de letschte 2 Joor ischs esoo gsii, ass mer am Donnschtigmoorge komplett uff dr Schnuure gsi sin... aber me umarmt sich no e Momänt und winscht sich e gueti Zyt... dernoo streeme alli in verschiidene Richtige devoo. Aber mer hänn vorhär no 1 gmainsaams Nachtässe am Mittwuchoobe, wo me die vergangene, intensiive Draidääg revue bassiere losst und mitenand aastoosst, bevoors denn in Richtig Ändstraich goot.

     
  Gits wärend dr Faasnacht au emol e Momänt, wo aifach naime aanestoosch, d Faasnachtsluft yyneziesch und dänggsch "Wow jetz isch Faasnacht" ?
  Eva: Die gits ganz vyyl... wie gsait, au wenn mer sträng am schaffe und vyl am ummeseggle sin, gits dezwische immer wider ganz vyl Zyt wo n y grad nit z due haa bzw. am waarte bi... oder dr Kameramaa irgendwo naime anderscht kurz ebbis yynehoole muess... denn blyb y au emol stoo und gniess aifach das Dryybe am Spaalebärg oder bim Bermuda-Dreyegg. Y gniess das seer, aifach deert z stoo und d Lyt z beobachte... dasch fir mii au e Dail vo dr Magie "Faasnacht".
     
  Moderatioon am Cortège... e scheens und bekannts Gsicht... Schlaagwort "Waggis" ???? E danggbaars Opfer ?
  Eva:

Jä dasch letscht Joor unglaublig oft bassiert und y finds luschtig... dasch doch glatt :-)

Gits au Momänt, wo e weeneli schwiirig sin mit de Waggis ?
Nai, nai iiberhaupt nit... y has bis jetz immer luschtig kaa mitene. Y daarf jo au Räppli in de Hoor haa, das gheert au dezue. Aber s isch nadierlig bleed, wenn di vo allne Räppli befreyt hesch und denn kunnt dr näggscht Waage und me isch scho wider voll... aber dasch denn halt esoo. :-)

     
  Wie isch das fir Di gsii, s Eerb vom Heinz Margot z ibernää ?
  Eva:

Y ha groosse Respäggt devoor kaa. S isch nadierlig e groossi Fraid fir mi gsii, wo n y aagfroggt und zem Casting yyglaade woorde bi. Y ha mer aber au glychzytig iiberleggt, ob y wiirglig in die groosse Fuessstapfe vom Heinz Margot drätte ka. Y bi halt e anderi Generatioon, jinger und eerscht no e Frau... do gits woorschyns au gwissi Voorbehalt bi ne baar Zueschauer... aber ebbe grad dorum ha n y mir au gsait "Hey y mach das jetz aifach" und zwoor uff myni Aart.

Y ha groosse Respäggt wie n är das gmacht het, alles in Värsfoorm z moderiere ha n y nadierlig scho super gfunde... dasch aber dr Heinz Margot gsii und nit yych. S wär pyynlig, wenn y das uff die glych Aart mache wurd und das mach y nit und ka n y au nit. Y machs wie n y bii, y verbieg mi nit und dasch glaub au dr ainzig Wäg wo goo kasch. Aber y ha nadierlig am Aafang scho leer gschluggt... aber das gheert au dezue ;-).

Dr Erfolg zaigts jo au, ass uffem richtige Wäg bisch...
Du s git sicher au Gägner, wo dr Heinz vermisse... ha aber au ganz vyl positivi Ruggmäldige griegt, ass es guet und scheen isch. Y machs jo weder fiir die aine no die andere, sondern well y Fraid draa haa. Y ha au glehrt mit Kritik umzgoo... me darf das nit perseenlig nää.

     
  Wenn foot bi Dir d Faasnachtsstimmig aa ?
  Eva:

Bi mir isch das speetischtens bi dr Blaggedde-Ussgoob oder wenn dr Rädäbäng dusse n isch. Aber aigentlig foots jetz scho langsam aa... au hitte wenn die eerscht Sitzig stattfindet, dasch so fir mii e weeneli dr "Kickoff"... aber dr Staartschuss isch denn scho ab Neyjoor wenn d Blaggedde kunnt.

     
     
  Wie hesch Du als glai Maitli d Faasnacht erläbt ?
  Eva:

Myni Eldere hänn kai Stamm-Clique-Faasnacht gmacht, sondern sin miteme Schyssdräggziigli underwäggs gsi.
Myni eerscht Erinnerig an d Faasnacht isch eenter d Schuelfaasnacht vo dr Primeli gsii, wo me denn eso duurs Quartier zooge n isch mit de sälberbaschtlete Laarve und Goschdym. D Erinnerig an dr Cortège isch denn eso gsii, ass me d Faasnacht so duur d Bai vo de Lyt gsee het... oder me imene Laiterwäggeli gsässe n isch und das alles vyyl z lut gfunde het... aber denn hets wie so ne Bruch gää und y bi denn immer in d Skifeerie gange.

     
     
  Het sich d Faasnacht im Geegesatz zu friehner veränderet ? Und wenn jo, in welli Richtig ?
  Eva:

Dasch no schwiirig... y gang emol devoo uss, ass sich d Faasnacht veränderet het... vellicht nit im Grundwäse, sondern eenter vo dr Aart und Wyys, wie d Themene umgsetzt wärde. Aber was aigentlig immer scho so gsii isch, ass me sich getraut het Satiire z bedryybe und das het me sich au deerfe uusenää. Bitterbeesi, aber au druurigi Sache deerfe z thematisiere, aber dasch immer eso gsii und wird au hitte no eso bedryybe. D Ladärne sin modärner woorde, me moolt nit numme no, sondern druggt und setzt au technischi Konstruggdioone yy... was es friener nit gää het.

     
  Wie schwiirig ischs an dr Faasnacht d Eva Nidecker z sii ?
  Eva:

Grundsätzlig ha n y an dr Faasnacht iiberhaupt kaini Berierigsängscht... an dr Faasnacht goot me seer offe mitenand um und y bi ne seer offene Mensch. An dr Faasnacht ha n y e seer e hoochi Toleranzgränze, y liebs mit de Lyt z schwätze... und denn gits halt die baar weenige Momänt, wo denn amigs e weeneli miesam sin.
Bsoffeni, wo am 02:00 am moorge ins Bild laufe oder dr Max vor dr Kamera mache... aber au denne bi n y professionell und nimms mit Humor. Numme aimool bi n y wirglig hässig woorde, well aine die ganz Produggdioon uffghalte het. Aber y ha seer seer vyl Verständnis und soone Kamera zieht nadierlig au ganz vyl Uffmeergsamkait uff sich, dasch ganz klaar aber das gheert au dezue. S soll jo au nit statisch wiirge, d Faasnacht isch lebändig und do muess es au blatz fiir Iiberraschige ha.

     
  Gits e witzigi Anegdoote, wo emool erläbt hesch ?
  Eva: Jä, dasch an mynere allereerscht Faasnacht gsii... y bi sällmol im Vordraab bimene Schyssdräggziigli mitgloffe und ha iiberhaupt kai Aanig kaa, wie schnäll me do laufe muess. Uff jeede Fall bi n y zvoorderscht gloffe, ha kuum uss mynere Laarve gsee und iiberhaupt nit mitgriegt... y bi aifach gloffe, und gloffe und gloffe... solang, bis mi myn doomoolige Frind am Eermel zupft het. D Clique isch nämmlig scho lang linggs abbooge, wärend ych immer no wyter graduss gloffe bi ;-)
   
  Was hesch Du emol als glains Maitli welle wärde ?
  Eva: :

Nie daas, wo alli andere Maitli in däm Alter hänn welle wärde... me het jo immer syn Draumbruef in die Frindschaftsbiechli gschrybe, wie Dierärztin, Kranggeschweschter, ebbis mit Ressli mache, etc.
Y ha gärn gmoolt und Klavier gspiilt... y ha immer welle Pianischtin oder Muusikerin wärde.

     
  Hesch Du als glains Maitli e Idool kaa ?
  Eva:

Y ha fir dr Bryan Adams gschwärmt und immer jeede Schnipsel ussem "Girl" oder "Bravo" ussgschnitte und in mi Bryan Adams Daagebuech yynekläbbt, Songtäggscht usswändig glehrt und an Konzärt gange... wie me sich das eso vorstelle ka ;-)

     
  Was macht Di gligglig ?
  Eva: Gsundhait... z wisse, ass es myne Liebschte guet goot, macht mi gligglig... oder ebbe d Freyhait. Y bi ne seer freyhaitsliebende Mensch, wo sich ungärn in Schrangge wyyse losst... oder ime starre Raschter funggdioniere muess. Wenn y meerg, ass y iirgendwo gfange bi, denn wird y ungligglig.
     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait erinneret ?
  Eva:

Wenn y im Heerbscht iirgendwo im Wald underwäggs bi, s Liecht ganz speziell isch, s raschle vom Laub gheer und e Briise myni Naase kitzelet... denn dängg y immer an myni Kindhait, wo n y dr Summer bi myne Verwandte in Kanada verbrocht ha. Dr Indian Summer in Kanada het immer dä spezielli Duft ka, mit däm spezielle Liecht und däm Grisch vom Laub... und immer wenn y genau die Situation iirgendwo erläbe due, denn erinneret mi das sofort an Kanada.

     
  Welles isch Dy absoluts Highlight gsi im 2017 ?
  Eva:

Y surf jo syt ebbe 3-4 Joor obwool y aigentlig Angscht voorem Wasser ha... surfe isch fir mii wie ne Therapie und entsprächend mach y bim lerne numme so Baby-Steps. Und jetz ha n y im Meerz in Mexiko myni allereerscht Wälle kenne ritte und dasch esoone unglaublig scheens Gfiil gsii.

Stehend ?
Stehend... ok y bi nit lang gstande, ebbe 3 Sekunde ;-) aber y ha dr Push vo dr Wälle genau im richtige Momänt verwitscht. Leider hets kaini Ziige kaa und myni Frinde hänn mer das nit welle glaube... aber y waiss es und dasch d Hauptsach :-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Eva:

Y wurd gärn emol mitem Roger Federer e Bier go dringge... y finden als Sportler faszinierend, genauso syni Perseenligkait wo n är usstraalt. Y has Gfiil, ass är no rächt entspannt und boodeständig isch... das wär sicher no e scheene Momänt.

     
  So liebi Eva, jetz kunnt d Froog vo allne Frooge ;-) Was wirdsch an Männer nie verstoo kenne ?
  Eva:

Ouuuuuuuuu... aigentlig numme ebbis... worum um Himmelswille, wärfe die Männer iiri Klaider uffe Boode, obwool 10cm näbedraa dr Wäschkoorb stoot ???? Oder au sunscht uffe Boode... das find y amigs no e spannends Fenomeen... aber guet, dasch woorschyns aine vo dääne Underschiid zue de Fraue ;-)

Hesch Du au e Schue-Tick ?
Y wurd saage, im Verglyych zue andere Fraue eenter underduurschnittlig. Y muess au ganz eerlig sage, ass y nit zue däne Fraue gheer, wo gärn go shoppe. Y hasses Klaider oder Schueh z kaufe... y gang ebbe 1-2 mol pro Joor ganz elaige fiir mii effiziänt go my Ziggs kaufe und denn isch wider Rueh.

     
  In Sache zaubere bisch Du jo quasi die wyyblig Ussgoob vom David Copperfield… welles isch den Dyn Zauberklassiker wo am liebschte zaige duesch ?
  Eva:

Y ha ne sauguete Kartetrigg, aber laider ha ni grad kaini Karte debyy, sunscht hätt y Dir dä grad zaige kenne. Also aigentlig sins 2 Triggs, wo sich seer guet zer spoote Stund aigne... wenn d Lyt denn e weeneli käppelet sin und nimm so gnau uff myni Finger luege ;-). Normaalerwyys ha n y immer e groossi Handdäsche miteme Kaartedegg deby... oder mit e baar Sache, wo me so zem zaubere brucht.

Wie bisch denn zem zaubere koo ?
Y ha friener dr David Copperfield im Joggeli gsee und als Juugendligi ha n y dä immer toll gfunde. Y bi denn sogar in Ziiri in e Zaubergrundschuel gange, aber e weeneli entdischt gsii... me sitzt do, frait sich uffs zaubere, gseet pletzlig hinder d Kulisse und isch entdischt, ass dr Trigg numme so banaal isch. Aber zaubere find y toll...
bi mym eerschte Job als Zauberassischdäntin bi n y sogaar versäggt woorde ;-)

     
  Wär wurdsch gärn emol ins Dschungelcamp schigge ?
  Eva:

Dr Donald Trump... deert gheert dä aane... dä Aff.

     
  3 Sache wo no unbedingt in Dym Lääbe mache wottsch...
  Eva:
1.)

Y wott gärn mol e Marathon laufe...

2.)

Y wott gärn emol uff e Wältrais...

3.)

Bim Zauberwiirfel "Rubik's Cube" wott y gärn myni Beschtmaarge vo 2 1/2 Minute underbiete... zB. innerhalb vonere Minute...

4.) Oder e wohltätigs Projäggt uff d Bai stelle. Das wird y au emol mache, dass waiss y.
   

 

  No e baar Schlaagweerter, bitte numme mit aim Satz beantwoorte...
  Kino oder Theater ?

... Kino... well ys aifach au mee gläbbt ha. S Theater het mi nie ganz yynezieh kenne, y bi eenter dr Kino oder Film Mensch. Y bi iiberhaupt kai Fantasy Fän, do kasch mi jaage demit...
y lieb Draame und Komödie... aifach noo bim Mensch.

  Buech oder Heerbuech ? ... Heerbuech... y loos amigs no gärn bim jogge e Podcaast. Y liis vellicht 3 Biecher im Joor und das au numme in de Feerie. E tolle Krimi in Buechfoorm find y lessig, do bisst me sich duur die 400 Syte und het e guets Gfiihl debyy, wenn me denn das Buech eso in dr Hand hebt, ganz vergilbt, dr Gschmagg schmeggt und s voller Stolz wider ins Regal zruggstelle duet.
  Basel... ... my Haimat, wo n y fiir ganz vyl Sache schetze due und immer wider find, ass mer wiirglig stolz si kenne uff die Stadt. Mer hänn soovyyl mee z biete als numme Faasnacht und FCB.
Basel isch e Kultuurstadt und e Forschigsstandoort... und si het iire aigene Spirit wo me gspiirt.
  Ziiri... ... e tolli Stadt, wo au vyl z biete het. Isch fir mii voor allem brueflig zem schaffe sehr indressant... und het au e tolli Gaschtrokultur.
  Baasler Rhywiera oder Palmestrand ? ... do nimm y dr Palmestrand... so seer y d Baasler Rhywiera schetz im Summer, aber wenn y wähle kennt, denn wurd y myni Fiess gärn im waarme Sand gspiire welle und e schwumm im Meer go nää.
  Heerbschtmäss... ... in eerschter Linie sin das fir mii Kindhaitserinnerige. Y gang zwoor immer no mit myne Göttibuebe, Neffe und Nichte uff d Herbschtmäss und gniess das au seer, aber uff d Baane gang y nimme... dasch mer z wild und wird mer schlächt debyy. Maagebroot, brennti Mandle und Zuggerwatte ässe, find y ebbis ganz tolls :-)
  Donald Trump... ... isch e Schoofseggel...
  50 Shades of Grey ... ... wo s Buech ney uff dr Märt koo isch, ha n ys aagfange läse... am Aafang isch s no spannend gsii, aber denn hets mi afo langwyyle und iirgendwenn ha n ys denn uff d Syte gleggt. Y has nit emol feertig gläse... dä ganz Hype um das Ding umme, isch mer aigentlig rächt uff e Sänkel gange.
D Thematik find y no spannend... ka me mache und het sicher gueti Diskussioone ussgleest... . aber isch jetz nit eso myyns. Die ganz komerziallisierig vo däm Thema, isch mer geege dr Strich gange.

Vyyle Dangg fiir Dyni Antwoorte