Claudia Haerri, Kinschtlere vom Laarveatelier "Larvestube"
   
 

 

Hitte sin mer im Imbergässli 5 und wenn me in das Huus yynekunnt, denn knackts und knirschts iiberall bim Stäägelaufe... heerlig... do z schaffe, muess e Draum sii. Wie alt isch denn das Huus ?

  Claudia:

Das Huus isch um 1300 baut woorde und isch ains vo de weenige Hiiser, wo 1356 s groosse n-Ärdbeebe iiberstande hänn... also wiirglig ains vo de eldischte Hiiser z Basel.

Das gseet me scho an dr Stääge...
Jo genau :-), die Stääge isch scho vellig ussdrampt und het Lecher... s ganz Huus stoot iibrigens under Dänggmoolschutz

Wie lang gits Eyer Atelier scho doo im Huus ?
Mer sin jetz scho s 15. Joor doo und hänn das Atelier vo 2 eldere Daame iibernoo...

Dasch aber doomolls scho e Faasnachtsatelier gsii oder ?
Jä... die baide Daame hänn das Atelier au scho 20 Joor lang kaa und hänns vorhäär vom bekannte Laarvekinschtler Guschti Hohl iibernoo.

Das Atelier het also e richtigi Faasnachtsgschicht...
Ka me eso saage, jä... das Atelier isch ebbe 60 Joor alt... nadierlig het sichs im Geegesatz zue friener e
weeneli veränderet, dasch klaar.

Also wenn me doo eso ummeluegt, kennt mer maine, ass jeede Momänt d Frau Faasnacht yynekunnt ;-)

     
 

Iir sin jo zu zwait... wie isch denn die "Larvestube" entstande ? Hesch Du scho immer e Larveatelier welle oder wie isch
das gsii ?

  Claudia:

Iiberhaupt nit :-). Also dasch esoo gsii... die 2. im Bund, isch myni Mamme d Doris Aebi. Si het joorelang Faasnacht mit de "Goschdymfratze" - e Fraueclique - gmacht und hänn iiri Laarve doo mache loo. Wo denn
die baide eldere Daame voor 15 Joor iir Atelier hänn welle uffleese - si sin jo scho baidi iiber 70 gsii - het my Mamme gfunde, ass me so ebbis wunderbaars und draditionells nit aifach uffgää daarf. Si het mi denn gfroggt, ob mer zämme das Atelier iibernää kennte...

Hesch Du denn scho kinschtlerischi Fähigkaite kaa ?
Y ha d Schuel fir Gstaltig gmacht... oder bessr bekannt als Kunschtgwärbschuel... aber Laarve mache isch nadierlig scho ebbis ganz anders und sin au ins kalte Wasser gwoorfe woorde... aber mer hänn das jo au eso welle. Uff jeede Fall hänn mer aagfange und glyy druffaabe het ys no e guete Frind vo dr Doris, dr Toni Bürgin, understitzt.

Aber Larve mache isch jo velligs Neyland fir Eych gsii... kei Angscht kaa ?
Nai... d Sonja (aini vo de eldere Daame wo uffgheert het) het ys seer understitzt und zaigt, wie me Laarve guet kaschiert, wie me mit Eel moolt, etc. und esoo hets denn aagfange :-)
Aber waisch, y ha jo scho als Kind innere Clique Faasnacht gmacht und au scho Larve kaschiert...

Wow... y bi beyydruggt...

     
 

Iir sin "Laarvemacher" vo dr alte Schuel, wo no Draditioon und Handwärg grooss gschrybe wird. Iir stellet Eyri Laarve usschliesslig uss Babyyr här… wär Kunststoff e n-Alternatiive fir Eych ?

  Claudia:

Nei, nei, nei... absolut kai Alternatiive fir uns. S schaffe mit Babyyr gfallt ys halt und isch seer aagnääm zem draage. Mer hänn jo das nadierlige und draditionelle welle iibernää, wo do im Atelier scho iiber 60 Joor pfläggt woorde n isch... und do draa wänn mer nit ändere.

Kunststoff wär also e Greiel fir Eych ;-)
Jä... woby s e huffe Lyt git, wo uff Kunststofflaarve schweere. Y ha aimool anere Faasnacht e Kunststofflaarve drait, ha denn aber miesse saage... Nai... dasch absolut nit fiir mii.

E Laarve kaschiere isch vyyl scheener...
Uff jeede Fall... und vyl scheener zem aalegge. S kaschiere vonere Laarve isch wiirglig e wunderscheeni Aarbet... mitem Babyyr z schaffe, mitem Lyym und wie am Änd e neyi Laarve entstoot.

     
 

Was macht fir Dii d Faszinatioon vom Laarve mache n-uss ?

  Claudia:

Aifach mit de Händ ebbis wunderbaars z erschaffe...

Und das jeedes Joor wider uffs Neye...
Jä genau... und me waiss au nie, wär im näggschte Joor wider kunnt... woby mer scho Clique und Grubbe
hänn, wo jeedes Joor wider zue n ys kemme, aber dasch jo au nit immer sicher.

     
 

Isch das Dyn Draumbruef ?

  Claudia:

Isch no schweer zem saage... mittlerwyyle isch s vellicht scho ebbis wie ne Draumbruef woorde. Do in dämm alte Huus ischs nadierlig au wunderbaar zem schaffe und au dr Kontaggt mit de Lyt, wo sich uff ebbis fraie,
wo si denn vo n ys griege...

Aber dasch jetz scho Dyn Hauptbruef oder ?
Näbscht myne Kinder, isch das nadierlig jetz scho myn Bruef... aber s isch halt e Saison-Bruef. Y schaff aigentlig vom Septämber bis in Meerz relativ seer sträng...

Und was machsch in dr Faasnachtsloose Zyt ?
Mer feen aigentlig dirägg noo dr Faasnacht wider aa mit unserer Aarbet... mer luege was fählt und was mer bruuche und bstelle noo. Die guete Idee kemme mir maischtens wärend dr Faasnacht, dernoo bi n y scho bald wider im Atelier zem Neys usszbrobiere... und im Summer sin mer amigs au im Atelier, aber numme ai Daag in
dr Wuche. Y gniess nadierlig scho die Zyt, wo e weeneli weeniger loos isch ;-)

     
 

Wenns uff d Faasnacht zue goot, wie lang schaffsch denn amigs ? Daag und Nacht ?

  Claudia:

S kunnt immer e weeneli druff aa... y schaff immer am Mäntig, Donnschtig und Samschtig dr ganz Daag, aber
s git denn au Wucheänd- und Oobeschichte wo dezue kemme.

     
 

Wie het sich s „Laarve mache“ im Geegesatz zue friener veränderet ?

  Claudia:

Grundsätzlig ischs bi uns schon no esoo wie friener... was aifach dezue kunnt isch, ass me jeedes Joor wider uff d Suechi noo irgend ebbisem isch... sigs e bstimmts Babyyr oder gueti Hoor, wo mer emol kaa hänn und s
aifach nimm git.

     
  D Konkurränz im Laarve mache wird jo nit glainer, was underschaidet Eych vo de andere Laarvemacher ?
  Claudia:

Mer sin jo eener e glains Atelier und mache ebbe 350 Laarve im Joor... anderi mache 7000 und y glaub nit, ass miir fir anderi e groossi Kongurränz sin. Mir nämme n ys seer vyl Zyt fir d Lyt und geen uff iiri Winsch yy...
und au bim aabasse luege mer, ass d Laarve wiirglig guet sitzt. Mer hänn nit eso vyl Blatz do inne und sin dorum au e weeneli neecher bi de Lyt ;-)

     
 

In wie vyyl Schritt entstoot e kaschierti Laarve ?

  Claudia:

Zeerscht suecht me sich e Laarve n-uss... mer hänn ebbe 300 verschiideni Foorme zer Usswaal...

Stellet Iir denn au neyi Gipsfoorme häär ?
Jä... mer mache jeedes Joor fiir d Faasnacht, neyi Portraits vo spezielle Lyt. Wenn jetz ebber e Wunsch
vonere Laarve het, wo mer d Gipsfoorm nit hänn, denn wurde mer die nadierlig häärstelle... im Joor sin das ebbe 2-3.

Und wie goots wyter ?
Wenn mer d Foorm hänn, denn wird die Laarve kaschiert. Dernoo losst me si droggne und dasch ganz wichtig, ass die Laarve wiirglig drogge n-isch. Uff dr Innersyte wird denn e Schellack uffdrait und d Ussesyte wird mit Dispersioonfaarb aagmoolt, ass si wätterfescht isch. Dernoo wird si ussgschnitte und denn kund dr Kund zem aabasse vo dr Laarve verbyy. Am Schluss wird si denn mit Eelfaarbe bemoolt.

     
 

Het sich dr Bryys im Geegesatz zu friener veränderet ?

  Claudia:

Nai, nit wiirglig... mänggmool mien mer dr Bryys aabasse, wenn s Materiaal diirer woorde n-isch, aber im Groosse und Ganze het sich nit vyl veränderet.

     
  Wenn an dr Faasnacht Dyni Laarve gseesch, erfillt aim das e weeneli mit Stolz oder dänggt me doo nit eso draa ?
  Claudia:

S isch aigentlig immer seer scheen, wenn me syni Laarve an dr Faasnacht gseet und macht aim nadierlig Stolz... voor allem wenn me die ganz Figuur mitem Goschdym gseet.

Machsch Du aggdiiv an dr Faasnacht mit ?
Am Faasnachtszyschdig bi n y zämme mit Frinde und de Kinder miteme Schyssdräggziigli underwäggs... gang aber au sunscht seer gärn dr Cortège go luege.

     
  Was beditet Dir d Faasnacht ?
  Claudia:

D Faasnacht beditet miir scho seer vyyl und gheert aifach zue mym Lääbe. Y muess allerdings au saage, ass y s ganz Joor mit dr Faasnacht z due haa und au froh bi, wenn si denn umme n-isch. Aifach au emol wider ebbis anders im Voordergrund stoot... wenn au numme fir kuurzi Zyt ;-)

     
  Kunnt bi Dir - drotz Dynere Aarbet s ganz Joor duure - ainewäg e weeneli Faasnachtsstimmig uff ?
  Claudia:

Dooooch nadierlig :-)

Wenn foot die aa ?
Am Samschtig voor dr Faasnacht, sobald dr letschte Kunde syni Laarve abghoolt het... denn wisse mer,
ass mers wideremool gschafft hänn und mit allem rächtzytig feertig woorde sin. Mer hänns bis jetz wiirglig jeedes Joor gschafft, ass mer am Samschtig am 12:00 zuemache kenne... und denn goots bi mir au mit dr Faasnachtsstimmig loos :-)

     
  Du hesch jo das Atelier mit Dynere Mamme zämme... goot das guet ? So Mamme und Dochter ?
  Claudia:

Du das funggdioniert aigentlig erstuunlig guet... mer ergänze n ys seer guet. Sii duet mee kaschiere und ych
bi fir d Frisuure, dr ganz Uffbau und s moole vo dr Laarve zueständig.

     
  Wie hesch Du als glains Maitli d Faasnacht erläbbt ?
  Claudia:

Myni Eldere sin baidi Faasnächtler innere Clique gsii... woby my Babbe amigs am Faasnachtszyschdig innere Gugge mitdrummlet het :-))))

Aha e GUGGEMUUSIGER ;-)
(lacht lut)... my scheenschts Erläbnis isch gsii, wo n y als 4-jeerigs Maitli mit däre Guggemuusig ha deerfe
mitlaufe... zämme mit mym Brueder sin mer oft am Faasnachtszyschdig deby gsii. Y ha aber au am Cortège mitere Clique pfyffe und die Geegesätz hänn mi immer seer fasziniert.

     
  Was macht Di Gligglig ?
  Claudia:

Myni Kinder, myni Frinde und doo schaffe z deerfe...

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Claudia:

Wär mi immer fasziniert het, isch dr Jean Tinguely gsii...

     
  Jetz kunnt d Froog vo alle Frooge... was wirdsch an Männer nie verstoo kenne ?
  Claudia:

As si nit Multitaskingfähig sin... das ka n y nit verstoo ;-) ahjo und no ebbis, ass sie ständig dehaime im stoo brinzle mien *laaach*.

     
 

Was het sich uss Dynere Sicht in de letschte 30 Joor am maischte veränderet ?

  Claudia:

Die ganzi Digitalisierig... au die Junge Lyt, wo die ganzi Zyt numme no an iirem Iphone hogge, find y het sich in de letschte Joore eggsdreem veränderet... au s perseenlige goot langsam verloore, me reedet nimm mitenand, sondern jeede glotzt numme numme no in sy Smartphone yyne.

     
  No e baar Schlaagweerter, bitte numme mit aim Satz beantwoorte...
  Kino oder Theater ?

Kino zem spontaan emol schnäll z goo und Theater, wenn me e scheene n-Oobe blaant...

  Basel... Haimat und doo isch me dehaime...
  Ziiri... In Ziiri woont myni beschti Frindin und duur daas, gang y au gärn deert aane...
  Herbschtmäss... Ganz vyyl scheeni Erinnerige und Emotioone und gheert aifach zue Basel...
  Laarve... Näbscht mynere Familie, no my wyters Lääbe...
  Klima Gretel (Thunberg)...

Find y guet... y finds toll, was si aagrisse het und stand voll dehinter...

  Donald Trump...

Y beschäftige mich nit mit dämm und doo muess me au nit dezue saage...

Vyyle Dangg fiir Dyni Antwoorte