Social Meedia spiilt jo mittlerwyyle au e ganz groossi Rolle, vor allem im Beraich "Tourismus"… gits bi Eych Vollzytaagstellti, wo sich usschliesslig um die Thema "Facebook", "Instagram", Wärbevideos, etc. kimmere ?

Jo, mittlerwyyle scho... voor 19 Joor hets das jo noonig gää und mer hänn ai Mitarbaiter kaa, wo sich 30% um d Websyte kimmeret he... mittlerwyyle hänn mer 3 Vollzytmitarbaiter, wo sich um d Websyte, Social Media, etc.
kimmere, well au grad im Beraich "Tourismus" dä Umbruch seer frieh koo isch. Wenn y das mit andere Branche verglyych, sin miir eggsdreemi Voorryter... mer kenne unser Image nimm im klassische Sinn, wie Inseraat oder Wäärbig, beyyflusse, sondern hänn s Marketing aigentlig an Konsumänt abgää... das haisst, wenn dr Konsumänt unseri Stadt positiiv erläbbt, denn macht äär das Marketing fir ys... oder anderscht gsait, me muess sich guet iiberlegge, wie me dr Gascht drzue beweege kaa, ass är positiiv iiber Basel brichtet bzw. postet und daas au vo alle glääse wird.

Apropos Social Media, s Wienachtsvideo vo Basel Tourismus, isch jo enorm viral gange und e absolute Knaller woorde… wie bisch Du uff die tolli Idee koo ? Het me mit somene Erfolg grächnet ?

Miir als Basel Tourismus, wärde jo mit unsere Aggdivitääte nie eso richtig in dr Stadt woorgnoo, well miir vor allem im Ussland - wie USA, China, etc. - unser Gäld yysetze und esoo Wäärbig fir Basel mache, das haisst, mer hänn wie kai Berächtigung, ass mer in Basel ebbis mache deerfe... jeede Frangge wo mer doo ussgää wuurde, wär aigentlig schlächt ussgää... usser bi Wienachtskaarte. Mer finde, ass mer unsere Partner fir die gueti Zämmenaarbet "Dangge" saage deerfe... und daas miteme ooriginelle Uffdritt, wo mer au glyychzytig uff unser kompetänte Marketinguffdritt hiiwyyse. Also zämmegfasst haisst das, ass mer unseri Wienachtskaarte au drzue nutze zem zaige "Hey mer sin e innovatiivi Firma... Du waisch zwor nit was mer mache, well mer immer im Ussland däätig sin, aber jetz mit däre Wienachtskaarte mache mer uff ys uffmeergsaam". Mer finde, ass es jetz emol Zyt wär, anstell vonere Wienachtskaarte uss Babyyr, emol e Film z draie.

Und denn isch die Idee geboore gsii...
Genau... Mer hänn denn mit dr glyche Agenduur, wo mer mitene scho voor 4 Joor dr Pokémon Film drait hänn,
Kontaggt uffgnoo und gsait, ass mer en Wienachtsgruess draie wänn... hänn aber au gsait, ass mer dr Film esoo produziere wänn, ass är viraal goo kaa und vellicht 100'000 Lyt eraicht.

Und denn isch dä Film so ebbis vo viraal gange...
Absolut... dä Film isch vo iiber 1 Millioon Lyt wältwyt aagluegt woorde...

Wie isch das fir Dii gsii, anstell vom Büro, emol amene "Filmset" schaffe z deerfe ?
S isch seer indressant gsii und het denn doch fascht e halbe Daag bruucht, bis mer alles im Kaschte kaa hänn, wie mer s hänn welle.

Doo goots iibrigens zem Film:

Mer ka jo fir 40.- Frangge, Mitgliid vo Basel Tourismus wärde... was griegt me als Geegelaischtig ?

Y muess do vellicht no e weeneli usshoole... myn Vor-Vorgänger - dr Doggter Gutzwiller - isch in de 60er Joore politisch seer aggdiiv gsii und d Aazaal vo de Mitgliider isch bi ungefäär 4500 gsii. Wo n-är denn uffgheert und my Voorgänger - dr Hanspeter Richner - iibernoo het, isch d Mitgliiderzaal kontinuiirlig uff 2000 zrugggange...
aber au in myne 18 Joor, isch d Mitgliiderzaal zrugggange... aber mittlerwyyle isch unseri Uffgoob au klaar yygschränggt woorde als Marketingoorganisatioon vo Basel im Ussland. Aigentlig ischs esoo, ass me uss Solidaritäät als Mitgliid drby isch und wott, ass Basel au im Ussland bekanntgmacht wird... und dasch aigentlig
dr Geegewäärt vo dääre Mitgliidschaft.

Friener hets no als Geegewäärt e Buurezmoorge oder e Mitgliiderrais gää... het also die 40 Stutz quasi wider verbutzt...
Bis vor kurzem hets no e Bonheftli gää...

Kenn y und ha das no toll Idee gfunde...
Genau... aber s isch denn esoo woorde, ass d Administratioon vo dääne 2000 Mitgliider, fascht z uffwändig woorde n-isch... und aigentlig isch me jo uss Solidarität e Mitgliid, ass mer unseri Uffgoob au im Ussland
woornää kenne und hänn dorum alles e weeneli aabasst.

Und wie gseet die Aabassig uss ?
Mer hänn gsait, ass mer e weeneli ginschtiger wäärde und drfiir s Bonheftli wäggfallt... woby das Bonheftli
amänd sowieso numme weenig gnutzt woorde n-isch... die 40.- Frangge selle e Understitzig sii, ass mer ebbe
au im Ussland schaffe kenne.

So, jetz schwängge mer emol e weeneli zer Faasnacht... isch d Faasnacht fir Dii perseenlig e Theema ? Bisch vellicht sogaar als Aggdiive underwäggs ?

Klaar isch d Faasnacht fir mii e Theema... und bi sogar mitem Voordraab vo de "Chromosömli" underwäggs.

Eerlig ? Find y toll :-)
Dr Voortraab bruuchts jo au an dr Faasnacht ;-)... y bi halt nit eso muskaalisch und ha das als Kind au nit eso mitgriegt, aber d Faasnacht isch aifach ganz anderscht, wenn me si als Aggdiive erläbt und fir die Erfaarig bi n y seer danggbaar.

Am Moorgestraich bisch au drby ?
Alles...

Was goot in Dir voor, wenn 1 Minute voorem Moorgestraich in dr Formatioon stoosch und waartsch, bis es
ändlig loosgoot ?
Y bi uffgreggt und y muess au saage, ass es immer e weeneli knapp mit dr Zyt wird... y waiss nie, ob ys rächtzytig bis zem Moorgestraich schaff ;-). Aber grundsätzlig sin das fir mii 3 wunderscheeni und entspannti Dääg... aber y fokusier mi au uff die 3 Daag... das haisst, bi dääne Cliqueussfliig underem Joor, bi n y nit drby.

Ab wenn kunnt bi Dir d Faasnachtsstimmig uff ?

Bi miir kunnt d Faasnachtsstimmig maischtens eso um dr 9./10. Jänner, wenn s "Pfyfferli" aafoot und ab denn isch bi mir s Theema "Faasnacht" bresänt... oder wenn d Kolleege pletzlig kai Zyt me hänn, well si drummle mien am "Charivaari" oder am "Drummeli"... denn meerg y, ass d Faasnacht nimm wyt isch.

Syt 2017 zellt unseri Faasnacht zem Wältkultuureerb… waiss me - uss Sicht vom Basel Tourismus - was ys das bis jetz brocht het ? Mee Gescht ? Mee mediaali Bresänz ?

Die eerschte 1-2 Joor hets scho vyyl mee Journalischte gää wie sunscht. Am Sunntig voor dr Faasnacht, betreue mer zämme mitem Felix Rudolf von Rohr, ca. 15 Meedieschaffendi und erklääre was in de näggschte Daag eso bassiert. Mer oorganisiere d Bewilligunge und zaige, wo si am beschte iiri Kameraas aanestelle kenne, etc... und denn hänn mer scho gmeergt, ass pletzlig dopplet sovyyl Lyt koo sin. Mer hänn gspiirt, ass duur dä Status "Wältkultuureeb" ebbis bassiert isch... aber s het au wider e weeneli noogloo. Y glaub scho, ass es ebbis wie n-e offiziells Qualitäätslabel isch und au mit Draditioon und Kultuur z due het. D Faasnacht isch ebbis, wo ganz staarg in dr Bevelgerig veranggeret isch und me ganz fescht Soorg drzue git.

Me behietets au wie ne koschtbaare Schatz und pflägts au... und das find y seer scheen.

Wie gseets Ussland unseri Faasnacht ?

Unseri Faasnacht isch nadierlig bsunders in Ditschland e groosse Begriff, aber au in Franggryych und nadierlig in de wältwyte Faasnachtsgraise, wo au iiber dr Karneval in Rio, Venedig oder Japan Bschaid wisse.

Aber Basel Tourismus "promotet" unseri Faasnacht nit im Ussland oder ?
Voor 20 Joor isch d Faasnacht fascht e weeneli iiberdominant gsii und zwaar esoo staarg, ass me iiber Basel gaar nit anders me gwisst het, als "Baselworld", Novartis und d Faasnacht... me het denn das Theema "Faasnacht" e weeneli rue loo und anderi Raisegrind noo Basel in Voordergrund gstellt.

Me ka jo nit numme wägge dääne 3 Daag noo Basel raise...
Richtig... aber jetz in de letschte 3 Joor, hänn mer das Theema *Faasnacht" wider versteerggt uffgnoo... zem au wideremool uff s histoorische Basel hiizwyyse. Basel gits jo scho syt ganz vyyle Joorhunderte... mitem Minschter, em Humanismus, etc. und do wänn mer nadierlig in die neye Määrt wie USA und China, bsunders druff hiiwyyse.

Sehr guet... und jetz wärde mer no e weeneli perseenlig... was macht Di gligglig ?

Nadierlig myni Frau und my Kind, aber au immer no my Job... und wenn y neyme Skifaare oder Windsurfe kaa, denn isch das scho au ebbis, wo mer seer vyyl beditet.

Die eerschte Schritt vo mynere Dochter...

Miteme spirituelle, buddhistische Mönch... wo mer e weeneli iiber das Theema "Buddha" verzelle kennt... me gheert jo immer wider Sache wo n y denn dängg, ob das wiirglig eso verruggt isch...

Also mitem Dalai Lama ?
S muess nit grad dr Dalai Lama sii... e eltere, waise buddhistische Mönch wurd mer länge.

Ass si d Tendänz hänn... "Joo" z saage, wenn si "Nai" maine... und "Nai" saage, wenn si "Joo" maine...

E Klassiker ;-)

Blatzt Dir au emol dr Kraage ? Und wenn jo, bi waas ?

Also was y gaar nit gärn ha isch, wenn me fuuli Ussreede bringt, wenn ebbis nit gange n-isch... denn isch mer lieber, wenn ain s Fiidle drzue het und sait "Y has nit gmacht" oder "Y has nit kenne"... aber sich denn uuseschnuure, das mag y gaar nit und macht mi hässig.

"Z Basel an mym Rhy..."

Isch au toll ;-)

Faasnacht... und ganz wichtig fir ys...

Dr Wild Maa...

Heliskiing in Kanada...

Die wurd y mitnää zem Heliskiing in Kanada...

Y hoff, ass dä Spuug bald wider vrbyy isch...