Lukas Thiele - Dambourmajoor vo de "Lälli Clique Basel 1902"
   
 

 

Syt 1902 gits d "Lälli Clique" scho und zellt zwyyfelloos zue de eltschte Faasnachtsgsellschafte in Basel. Y dängg mol nit, ass Du zue de Grindigsmitgliider gheerscht ;-), aber syt wie vyl vo dääne 117 Joor gheersch Du drzue ?

  Lukas:

Loss mi emol iiberleege... y bi 1995 zue de "Lälli" koo, bi also jetz 25 Joor drby...

Und vorhär scho innere n-andere Clique gsii ?
Jä... myni Eltere und Groosseltere hänn alli bi de "Luuskaibe" Faasnacht gmacht... dasch e Pfyffer- und
Damboure-Grubbe, aber mittlerwyle ooni Damboure... und y bi deert als glaine Binggis immer im Voordraab mitgloffe. S isch allerdings nit meeglig gsii, bi de "Luuskaibe" e Instrumänt z lehre, well si das nit aabotte hänn. Vyyli Kinder vo de Aggdiivmitgliider sin bi dr "Lälli Clique" gsii, also bi n y au deert aane.

Und in dr "Lälli Clique" hesch au drummle glehrt...
Genau...

     
 

E Clique mit rund 200 Aggdiivmitgliider, isch jo scho rächt grooss... wie gseets denn mitem Noowuggs uss ?

  Lukas:

Mer hänn s Privileeg, ass mer immer no 2 kompletti Ziig uff d Bai stelle kenne... also e Binggis Zug und e Jungi Garde mit aigenem Voordraab und aigener Ladäärne... und daas Joor ischs esoo, ass mer in jeedem Zug ebbe
25 bis 30 Kinder drby hänn... also insgesamt knapp 60 aggdiivi Junggardischte.

Dasch wiirglig toll, also kaini Brobleem mitem Noowuggs...
Mer hänn e gsunde und motivierte Noowuggs, aber s git nadierlig immer emol wider sogenannti
"Joorgangslecher" und das gseet me denn im Voordrab und speeter im Spiil... und ganz vyyl speeter denn im Stamm... aber grundsätzlig hänn mer kai akuts Noowuggsbrobleem.

Me muess de Junge ebbis biete... au underem Joor dängg y oder ?
Unsere Junggarde_Voorstand isch do seer engagiert und luegt guet zue de Junge... dasch seer wichtig.

     
 

Bi sonere groosse Clique, isch sicher au dr Zämmehalt ganz wichtig... s mitenand, ka n y mer voorstelle. Was isch denn dr bsunderi "Spirit" in Eyrer Clique ? Oder was underschaidet Eych vo andere Cliquene ?

  Lukas:

Y ka Dir jetz nit genau saage, was bi n ys so ainzigaartig isch... aber was y bi n ys schetz, isch dr Umgang mitenand und mer gänn ys soorg. Mer sin e groosse Huffe, aber das machts zem Dail au e weeneli aifacher.
Mer sin aggduell e relatiiv junge Stamm, was mer guet gfallt. S git au e huffe Jungi, wo Verantwoortig iibernämme und mithälfe.

Und me hilft sich geegesytig...
Genau... näbscht em Dambourmajoor, bi n y no Sujet-Obmaa und wenn y fir d Faasnacht Hilf bruuch, denn kemme immer vyl Lyt wo mer hälfe und dasch ganz toll. Aber nadierlig gits au bi uns emol Brobleem oder me rybt sich anenand... aber wenn mer denn zämme Faasnacht mache, denn isch das Zämmegheerigkaitsgfiil scho grandioos

Dr Moorgestraich mache alli Gruppe gmainsaam oder ?
Jä... und dasch aifach Hammer, wenn mer alli zämme yysteen und 4 Tambourmajoore gmainsaam laufe... das git aim scho n-e Tschuudere.

     
 

Y ha gheert, ass es bi Eych e Pfyfferschuel fir Erwaggseni git... wie muess me sich das voorstelle ?

  Lukas:

Voor e baar Joor hänn beschlosse, ass mer unsere Noowuggs nit numme iiber die Jungi Garde generiere wänn.
Mer hänn im Voordraab vyl Lyt kaa, wo gärn emol ebbis anders hänn welle mache... zem Byspiil afange pfyffe. Mer hänn denn aagfange, e Pfyffer-Erwaggsenekuurs aazbiete und hänn das Projäggt, 2 Joor lang aggdiiv bewoorbe.

Und wie isch dr Erfolg gsii ?
Seer guet... mer hänn e huffe Indressänte kaa, wo hänn welle lehre pfyffe. Die Aggdioon isch eso guet gloffe, ass mer jetz zweenig Inschdruggdoore drzue hänn und dorum hänn mer das nimm so aggdiiv bewoorbe... mer wänn jo nit ebbis aabiete, wo mer amänd nit mit dr neetige Qualitäät abdegge kenne.

Isch denn die Pfyfferschuel fiir Erwaggseni, e separaati Gruppe usserhalb vo dr Clique ?
Nai, die Lyt wärde wie Aggdiivmitgliider im Verain behandlet... also sin in d Clique yydrätte und an dr GV uffgnoo woorde. Si sin aber wyterhiin als Voordräbler mitem Stamm underwäggs, bis si e gwissi Aazaal vo Märsch pfyffe kenne... und daas Joor kenne die eerschte als Pfyffer im Stamm mitlaufe.

Y find das e tolli Sach, s git e huffe Erwaggseni, wo gärn emol pfyffe wänn und sunscht kai Meegligkait hänn, das z lehre...

     
 

Du bisch jo friener als Dambour underwäggs gsii und entweeder isch me mit Passioon Dambour oder mit Passioon Pfyffer... aber wie kunnts, ass e Dambour d Faasnacht als Majoor erlääbe will ? Isch das Zuefall gsii, oder hesch aifach emol ebbis anders welle ussprobiere ?

  Lukas:

Grundsätzlig bi n y scho als glaine Bueb miteme Alufolie umwigglete Holzstägge, in dr Stuube als Majoor ummegloffe und ha das unglaublig toll gfunde... no bevoor y drummle glehrt ha. Aber innere Junge Garde ka me jo nit "Dambourmajor" lehre, sondern drummle und pfyffe... also ha n y mi firs Drummle entschiide. Wo s denn drum gange n-isch, an dr Faasnacht mitdrummle zdeerfe, het dr Inschdruggter gfunde "Loos, Du bisch noonig sowyt, aber kasch entweeder im Voordraab mitlaufe oder sunscht als Dambourmajoor"... und dasch nadierlig perfäggt gsi fir mii. ;-).

Und denn bisch fir immer Dambourmajoor blyybe...
Nai ebbe nit... y ha s Joor druff wider als Dambourmajor welle laufe, aber das het my Inschdruggder nit welle, schliesslig bi n y jo in dr Junge Garde gsii zem lehre drummle... y ha denn doch no glehrt, aaständig z drummle und ha dr Räscht vo mynere Binggis-Zyt in dr Junge Garde als Dambour verbrocht.

Und wo denn im Stamm gsii bisch ?
Bi n y wyterhin Dambour gsii... allerdings hänn mer am Faasnaschtszyschdig e Grippli, wo d Lälli-Familie ungezwunge mitenand laufe deerfe und die hänn nie e Majoor kaa, wo n y immer sehr schaad gfunde ha. Noo kurzer Absprooch mitem Stamm-Dambourmajoor, ha n y am Mäntig und Mittwuch drummlet und am Zyschdig bi n y als Dambourmajoor mit dämm Grippli underwäggs gsi... und jetz ischs grad umgekeehrt ;-)

Also bisch denn speeter au Stamm-Dabmourmajoor woorde...
Richtig... das mach y jetz scho 7 Joor und am Faasnachtszyschdig due n y drummle.

     
 

Isch d "Lälli" scho immer e gmischti Clique gsii ?

  Lukas:

Nai, denn 1902 sin Fraue no kai Theema gsii in dr Clique... aber iirgendwenn het d "Lälli" aagfange, Maitli in die Jungi Garde uffznää... hänn aber nadierlig zue sällere Zyt nit in Stamm kenne und dorum het me d Gruppierig "Harem" grindet. S het also dr Männer-Stamm und dr "Harem" mit de Fraue gää.

Und wenn die Fraue elter woorde sin ? Also im Alter vo dr "Alte Garde" ?
Iirgendwenn hets denn emol no die "Alt Garde" gää, aber d Fraue hänn nadierlig au deert nit yyne kenne...
dorum het me denn e wyteri Gruppierig grindet... "D Gluggere".

"D Gluggere"... sooo guet... sin aber alles aigeni Gruppierige gsii oder ?
Das sin alles aigeni Gruppierige innerhalb vo dr "Lälli Clique" gsii... mit aigenem Sujet und aigener Ladäärne.

Wenn isch denn dr Zämmeschluss vo "Männli" und "Wyybli" koo ?
1993 het me beschlosse, ass me dr Stamm fir die junge Fraue effnet... und d "Gluggere" het me 2002 in die "Alt Garde" integriert.

     
 

Wie erläbsch Du als Dambourmajoor d Faasnacht ? Sicher anderscht als mir im Spiil...

  Lukas:

Im Vrglyych zue mynere Faasnacht als Dambour, ha n y jetz nadierlig dr Kopf mee binenand und acht mi vyyl bewusster uff myni Cliquekolleege. Y acht mi au mee uff unser Repertoire, etc. und duur daas grieg y d Faasnacht anderscht mit, als wenn y mi sunscht als Dambour mitdryybe loss und e Popcorn in dr Mängi bi.

E Popcorn in dr Mängi... ganz scheen *lach*

     
 

Was fasziniert Di am Tambourmajoor ?

  Lukas:

Uff dr ainte Syte griegt me s Musikaalische vyl besser mit, als wenn me im Spiil mitdrummlet... also wenn mer zOobe duure Gässli zien und s denn eso richtig pfäfferet, denn isch das wiirglig cool... und uff dr andere Syte ka me saage, wo mer jetz duurelaufe oder was mer spiile... y ha quasi my aige Wunschkonzäärt und das gfallt mer nadierlig scho seer..

Du bestimmsch, was goot an dr Faasnacht...
Jo... oder saage mer "mitbestimme"... y mach das nie ganz elai und bi au nit dr Typ wo sait "jetz danze alli noo mynere Pfyffe...", aber y reed gärn mit. Ych und my Zugscheff - wo ganz voorne an dr Spitze lauft - sin zämme
e guets Team... in de Pause stegge mer oft d Kepf zämme und spräche n ys au mit de Spiilscheffe n-ab, wie grad dr Zuestand vo dr Clique n-isch und entschaide denn, welli Märsch mer no spiile.

     
 

Friener isch dr Dambourmajoor au e weeneli d Galioonsfiguur vo dr Clique gsii... seer beachtet, seer gschetzt und isch aigentlig e seer eerehafte Boschte gsii, miteme ganz groosse Wärt in dr Clique... isch das hitte immer no so ?

  Lukas:

Y glaub scho, ass dr Majoor no dä Status het und y meerg das mänggmool au... wenn y ebberem sag, ass y
Dambourmajoor innere Clique bii, denn griegt me oft esoone eerfirchtigs Nigge... aber fir mii perseenlig isch das gaar nit emol so wichtig und y kas eerlig gsait au nit eso wiirglig noovollzieh.

Aber d Wärtschetzig griegt me immer no...
Griegt me, jä... Defacto isch dr Major bis zem Bummel aane, dr Obmaa vo dr Clique... unsere Obmaa git an dr Faasnachtssitzig am Sunntig voor dr Faasnacht, s Zepter an Majoor ab...

...und goot in d Feerie ;-)
Also s Amt goot in d Feerie ;-)... y bi in däre Zyt bis zem Bummel quasi dr Scheff vo dr Clique.

     
 

Welles sin Dyni 3 goldige Reegle als Majoor ?

  Lukas:

Y ha kaini goldene Reegle, wo n y fir mii aabebäte due... aber d Aasprich, wo n y an mi sälber haa sin:

1.) ...ass y konsequänt bi...
2.) ...ass y pinggtlig bi...
3.) ...ass y riggsichtsvoll bi und mi uff d Clique acht... aber grad d Konsequänz isch die Reegle, wo aim schlussändlig au zer Autoritäät verhilft...

Bi welle Situatioone ?
In Bezuug uff d Marsch- und Routewaal... au wenn s mänggmol nit jeedem basst.

     
 

Dr Moorgestraich isch jo immer e spezielle Momänt... me isch aagspannt und wott meegligscht zem optimaale Zytpunggt "Maaaarsch" schreye... nämmlig genau denn, wenn s Liecht abgoot... hesch Du e bstimmts Rituaal oder e Atomuhr ?

  Lukas:

Y ha sälber kai Uhr und wo n y s eerscht Mol Dabmourmajoor gsii bi, ha n y mi aifach dryybe loo und in dr färni e Kirchduurmglogge gheert, wo 4i gschlaage het und das het glängt zem "aasaage". Y ha mer dänggt "Jetz ha n
y "aagsait", jetz muess y au "Marsch" schreye...". Wenn ys verhau, denn ha n y weenigschtens e gueti Gschicht... also ha n y "Maaarsch" gruefe und s Spiil isch mer gfolgt... het aagfange und genau mitem eerschte Drummelschlaag, ischs Liecht abgange. Eso guet driff y das woorschyns in mym ganze Läbe niemee und wo n y in dr eerschte Pause in d Baiz koo bi, hänn si mi mit groossem Applaus empfange.

Isch halt immer e weeneli e Lotteriespiil gäll... aber grundsätzlig loosisch immer no uff die Kirchduurmglogge ?
Je no Wind und Lyt, heert me d Glogge e weeneli besser oder schlächter, aber y sag aifach per Gfiil aa... mänggmol isch s Liecht au scho ab. Y versuech immer dr optimaali Zytpunggt z dräffe, aber y mach mi do jetz nit verruggt.

     
 

Me stoot denn eso doo, waartet bis s Liecht abgoot und denn goots ändlig loos... was goot do in Dir voor ?
Kai Lampefieber mee ?

  Lukas:

Y ha sälte Lampefierber, aber denn ha n ys... y ha myni Laarve n-aa und näbe mir steen die glaine Dambourmajoore vo de Binggis und dr Junge Garde und y lueg, ob si richtig steen. Y meerg wie s langsam ruhig wird um mi umme und die Stilli gniess y und loos, ob y iirgendwenn die bleedi Kirchduurmglogge gheer...
und denn goots loos.

Saisch Du elai aa, oder zämme mit de glaine Majoore, wo nääbedraa steen ?
In dr Reegel sag y elai aa...

     
  Was beditet Dir d Faasnacht ?
  Lukas:

Rationell aagluegt, isch mer d Faasnacht nit so wichtig... uff dr andere Syte, nimmt si e seer e groosse Dail vo mym Lääbe yy. Y bi syt 10 Joor im Voorstand und mindeschtens 1x in dr Wuche fir d Clique underwäggs... vo dämhäär waiss y das woorschyns eerscht, wenn y emol kai Faasnacht me mach, was si mer aigentlig beditet het.

Denn ischs aifach e tolls Hobby fir Dii...
Genau... si macht mer Fraid und underem Joor mach y vyl fir d Faasnacht und das beditet mer fascht mee, als
d Faasnacht sälber.

     
 

Wenn foot bi Dir d Faasnachtsstimmig aa ?

  Lukas:

Samschtig und Sunntig voor dr Faasnacht, foot bi miir d Voorfraid aa.

     
 

Wenn jetz uff die 25 Joor zruggluegsch... het sich in däre Zyt d Faasnacht veränderet ? Und wenn joo, in welli
Richtig ?

  Lukas:

D Faasnacht veränderet sich zämme mit dr Gsellschaft. S isch e uralti Draditioon, wo sich draditionell verändere muess... d Faasnacht isch jo doo, zem dr Gsellschaft dr Spiegel aanezheebe und vo dämhäär ka si gar nit staatisch blyybe. Friener het d Faasnacht mee deerfe... ob das guet oder schlächt gsii isch, vermag y nit z beurdaile... aber me isch sicher scheerfer und spitziger gsii, als hitte

     
 

Kemme mer jetz no e weeneli zem privaate... was macht Di gligglig ?

  Lukas:

Harmonie ha n y seer gärn...

Wär nit...
Mii machts gligglig, wenns e gueti Stimmig git... und wenns kai gueti Stimmig het, machts mi gligglig, wenn y dezue byydraage kaa, ass es wider e gueti Stimmig git. Y bi n-e hilfsberaite Mensch und s fraid mi, wenn y ebberem e Fraid mache kaa.

     
  Welles isch Dy Highlight gsii im 2019 ?
  Lukas:

Y bi syt 2 Joor Babbe und do isch jeede Daag e Highlight fir mii...

     
 

E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait zrugg erinneret ?

  Lukas:

Joooo, binere guete Gazpacho Subbe... denn bi n y grad im Gaarte vo mynere Groossmamme und iss Gazpacho Subbe. Oder e Hanfsail, wo niechtelet und mooderet... denn bi n y im Materiaalkäller vo dr Pfadi...

     
  Was wirdsch an Fraue nie verstoo kenne ? Dängg draa... Dyni Frau liest mit ;-)
  Lukas:

Si hänn oft s Gfiil, ass si ebis nit schaffe oder kenne, obwool si das aigentlig brobleemloos miechte. Y find, si deerfte sich amigs ruhig e weeneli mee zuedraue... Männer saage drfiir eenter "Klaar ka n y das..." und amänd isch s denn kaputt...

*laaaaach* genau...

     
  Wär wurdsch am liebschte emol ins Dschungelcamp schigge ? (Sott ebber si, wo me kennt)
  Lukas:

Dr Dieter Bohlen...

     
  No e baar Schlaagweerter, bitte numme mit aim Satz beantwoorte...
  Fraue- oder Männerclique ?

Baides het syni Berächtigung... y bi fir e gmischti Clique...

  Basel...

Haimat... do bi n y dehaime... do bi n y grooss woorde und isch in mym Häärze...

  Ziiri...

Het e seer scheeni Altstadt, wo n y laider no vyl z weenig kenn...

  Herbschtmäss...

Isch in mynere Kindhait e riise Highlight gsii und hitte aifach z diir...

  Doo muess y unbedingt no aane in mym Läbe...

Skandinaavie...

  Klima-Gretel
(Greta Thunberg)...

Y ka si zwoor verstoo, mag aber iiri Methodik nit eso... was si bewegt und wär si alles bewegt, find y nit schlächt... aber fir mii daibelet si e weeneli z vyl umme... vellicht
bruchts das au. Mitem Thema het si sicher rächt, aber d Aart und Wyys basst mer nit...

  Donald Trump...

Doo verstand y d Methodik au nit ;-)

Vyyle Dangg fiir Dyni Antwoorte