Und wie isch Dyni eerscht Faasnacht als Majoor gsii ?

Nimm Paugge spiile z kenne, het mer scho seer weh doo... aber y ha d Faasnacht ainewääg seer gnosse... aifach dr ganz Verain fiere z deerfe, obwool y aigentlig kai Fierigspersoon bii, het mer scho seer vyyl Spass gmacht.

Und Dyni Händ ? Sin nit am "imaginääre" Paugge spiile gsii ????
Dooooch... bsunders wenn si iiri Märsch bzw. dr Rythmus gspiilt hänn... aber y bi jetz ganz voorne gsii und ha Spass draa kaa.

Apropos Rythmus... Eyre Schlaagrythmus isch jo friener legendäär gsii... wenn me Eyre Schlaagrythmus scho vo wytem gheert het, het me gwisst, aha jetzt kemme d "Schlangefänger" umme n-Egge... gits dä wideremol z gheere ?
Also mer hänn scho no unsere typische Schlangefänger-Rythmus... dr Marc Kissling het nadierlig friener dä Rythmus ganz anderscht gwiirblet und mit sym "Kissling-rolle" dämm Marsch syn typische Groove verbasst. Hitte wiirble mer dä Marsch e weeenli anderscht, isch aber grundsätzlig immer no dr glyych
Schlangefänger-Marsch wie friener.

Y has yygangs scho erwäänt, Iir sin e rächt groossi Gugge und zer Zyt mit 48 Aggdiivmitgliider/inne underwäggs...

Mer sin scho 64 Naase gsii...

64 ? Wie fiehrt me esoone groosse Verain ?
Du, s isch wie iiberall... 64 Lyt hänn 64 verschiidene Charakteere und dasch nadierlig nit immer aifach. Noo dr Trennig sin mer no 35 Naase gsii, jetz sin aber wider bi 48... also mitem Vordraab zämme.

Maa und Frau... goot das zämme innere Gugge ?
Seer... woby s au innere Männergugge amigs klepft. Guet, vellicht goot me mit Fraue scho e weeneli
anderscht um, als mit Männer... und si sin au noodraagender ;-) aber alles in allem ischs toll und y muess saage, ass y mi seer wool fiihl in dämm Verain.

Du als Majoor, erläbsch e ganz anderi Faasnacht als ych... dasch klaar... aber wie erläbsch si Du ? Konzentriert ? Aagspannt ? Ständig am iiberlegge, wo als näggschts aanegoo sollsch ?

Die 3 Daag sin fir mi e raini Konzentratioonssach und dringg au seer weenig Alkohool, me muess jo schliesslig e Voorbild sii fir dr Verain. Mer hänn e Ablaufblaan mit de Muusigstiggli, aber y muess ainewääg immer e weeneli d Stimmig vom Bublikum gspiire und spondaan entschaide, was mer als näggschts spiile kenne oder nit. Dr Cortège isch grundsätzlig voorgää, aber zOobe muesch halt au immer wider luege, wo mer duurelaufe kenne, wo s stoggt oder ob vellicht e anderi Gugge grad e Blatzkonzärt git, wo mer au spiile hänn welle, etc...

Sprichsch Di mitem Voordraab ab ?
Si luege zrugg und ych sag amgis, wo s duure goot... und mänggmol stress y si au e weeneli ;-). Wenn me hinte im Zuug lauft, denn losst me sich fiere... wenn me aber ganz voorne lauft, denn fiersch alli und dorum bi n y denn au 3 Daag lang aagspannt. Aber s isch scho toll wenn mer bim Comité verbyylaufe und me d Lyt kennt. Was au no drzue kunnt isch, ass me under dr Laarve ganz fir sich elai isch und aifach numme dr gaili Sound gniesst, wo vo hinde fiire kunnt.

Und am Donnschtigmoorge ?
Am Donnschtigmoorge nooem Abdrätte, bi n y denn wiirglig doodmied und kaputt.

Welles sin Dyni 3 goldige Reegle als Majoor ?

Wie lauft dr Faasnachtsmäntig bi Eych ab, also vo dr Besammlig bis zem Staart ? Gits do e bstimmts Rituaal bi Eych ?

Am Faasnachtsmäntig driff y mi immer am 11:00 mitem Schlaag- und em Sousapon-Regischter zem
gmainsaame Apéro... si sin au die Eerschte, wo mi im neye Goschdym gseen. Nooem Apéro laufe mer zämme
ins Volggshuus, wo denn die andere uff ys waarte... und s letscht Joor isch ganz toll gsii, well mer doo no unser alts Goschdym verabschiidet hänn.

Denn goots loos... yystoo... kuurz voorem eerschte Pfyff in d Faasnacht... was dänggsch ?
"Woooh... s isch gail"
und winsch mer, ass alles eso lauft, wie n ys blaant ha.

Jetz emol e ketzerischi Froog... sind Majoore, Divas ?

Hmmm... ka scho sii, ass mer mänggmool Divas sin... y main, y wird aaglegt und abzooge... also d Laarve ;-)

Und vo dr Perseenligkait här ?
S ka scho sii, ass me 3 Daag lang e Diva isch...

Daarf me bi Dir au Kritik aabringe ?
Jä, klaar uff jeede Fall... uss Fähler ka n y lehre... aber mänggmol muesch halt au saage, wo s duure goot... wie gsait, s ka scho sii, ass mer 3 Daag lang Divas sin *lach*.

Y glaub au ;-)

Hets emol e witzigi Situatioon an dr Faasnacht gää ?

Jä, letscht Joor und y ka mi no seer guet draa erinnere... ka me iibrigens au no uff Youtube gsee. Wie immer, ha n y am Faasnachtsmittwuch vom Comité e Bluemestruss griegt, sin denn wytergloffe und hänn kuurz druffaabe e Pause gmacht. Wo s denn wytergange n-isch, ha n y gaar nimm an dä Bluemestruss dänggt ka
und ha d Laarve aagleggt. Mer sin denn d Freyestrooss durab bis zem Märtblatz gloffe und gheer, wie si hindedraa alli lache und Megge mache... y ha dä Bluemestruss vergässe vom Huet wäggznää... die sin no uff mynere Laarve glääge und hänn bi jeedem Schritt mitgwippt... bis ys denn gmeergt haa ;-)

Wenn jetz uff Dyni vyle Faasnachtsjoore zruggluegsch... het sich d Faasnacht in däre Zyt veränderet ? Und wenn joo, in welli Richtig ?

Friener sin mer mit dr Guggemuusig in jeedi Baiz go spiile und me isch au willkomme gsii... dasch hitte laider nimm eso. Was au no isch - und s isch druurig aber woor und ych sälber bi au e Ussländer - aber hitte hänn mer aifach z vyl Lyt, wo nimm wisse, was d Faasnacht iiberhaupt no isch. Myni Eltere sin au "Secondos", aber die hänn d Faasnacht no anderscht aagluegt, als die Lyt in dr hittige Zyt. S git au vyl mee Aggressioone an dr Faasnacht und me het kai Respäggt me. S isch hitte e n-anders "feschte" als friener.

Was beditet Dir d Fasnacht ?

S isch e Bestanddail vo mym Lääbe woorde, au wenns myni Eltere nie verstande hänn, worum das eso isch. Ych als Spanier ha immer genau eso welle Faasnacht mache, wie myni schwizer Frinde au und eso bi n y in die Faasnachtswält yynekoo. Y bi doo uffgwaggse und fir mi isch d Faasnacht s "A" und s "O" in mym Lääbe woorde.

Und uffheere ?
Y ka mers nit voorstelle... wenn y kai Faasnacht me mache wurd, denn wär y ganz sicher wäg in däre Zyt.
1994 ha n y mer d Achillessehne grisse und ha kai Faasnacht mache kenne... y ha briehlt wie ne Schlosshund.

Wo n y 8 Joor alt gsii bi, ha n y unbedingt au welle Faasnacht mache und ha wiirglig seer hart miesse drumm kämpfe bim Babbe. Schlussändlig ha n y denn in Voordraab vo dr "Pfäffi Clique" deerfe... speeter ha n y aagfange drummle... bi aber aifach z fuul gsii...

Wenn foot bi Dir d Faasnachtsstimmig aa ?

Sobald die eerschte Uffdritt kemme... oder bi dr Marschbroob... aber so richtig yyschloo duets denn am Sunntig vor dr Faasnacht.

Was macht Di gligglig ?

Wenn s miir und mym Umfäld (Familie, Frinde) guet goot...

Ass si uns Männer nie Rächt gää kenne... ass si immer so vyl Schueh kaufe mien... ass si ständig iiri Klaiderschrängg umbiige mien...

D Adela Smajic...

Gmischt... fir mii isch e Männergugge toll... aber binere gmischte Gugge hesch halt anderi "Boböleli", wo me vellicht binere Männergugge nit het, aber das machts halt ebbe spannend...

Myni 2. Haimat...

Welles isch denn Dyni 1. Haimat ?
Valencia... y bi aber in Basel uffgwaggse und fiihl mi doo seer baslerisch-spanisch...

Isch e seer scheeni Stadt und läbt... das ganze Gschiss um Ziiri indressiert mi nit wiirglig...

Kindhaitserinnerige... zwoor nimm eso wie friener... die alte Halle fähle mer seer...

Männer stärbe fascht draa...

Find y au und isch nit zem spasse...
Fraue begryffe das aifach nit, aber miir sin denn wiirglig seer seer schweer grangg...

Genau... IIR FRAUE LÄÄSET DAS

S wird e groosses TamTam um die Frau gmacht, indressiert mi aber nit wiirglig... woby... ooni die Greta, gäbs woorschyns kai Hänsel und Gretel... so wird me Influencer... muess y mer glaub au emol iiberlegge...

New York...

Isch e seer unbeliebte Mensch... het mee Geegner, als Befiirwoorter und isch e gfährlige, unberächebaare Maa, wo n ys ins Verdärbe bringe kennt.