Mike Müller - Inhaber vom "Blaggedde Müller"
   
 

 

"Des Baslers liebste Brosche" und fescht verknipft mit dr Basler Faasnacht… syt 1920 und beraits in dr 4. Generatioon gits dr Blaggede-Müller scho. Wie isch das fir Dii gsii ? Bisch Du scho als glaine Gnäggis duur die Wärgstatt grennt ?

  Mike:

Jä klaar ha n y das scho vo glai uff mitgriegt und ha scho amigs als glaine Bueb deerfe mithälfe... au
wenn s numme Blaggedde yypagge gsii isch... y bi also vo Aafang aa diräggt involviert gsii. Au speeter als Teenager ha n y in dr Wärgstatt mitgschafft und bi scho immer mit dämm Gschäft verbunde gsii.

     
 

Isch das fir Di scho immer klaar gsii, ass Du emol in d Fuessstapfe vom Babbe stoosch ? Oder hets vellicht sogaar emol e andere Draumbruef gä, wo Du als glaine Bueb im Kopf kaa hesch ?

  Mike:

Nadierlig ha n y vyl Indrässe und sicher au anderi Wäg im Kopf kaa, wo n y gärn yygschlaage hät... aber iirgendwie hets mi halt doch doo paggt und yynezooge. Y ha dänggt, y mach gärn Faasnacht und dä Bruef het
zu 90% mit dr Faasnacht z due, also verbind y doch s Praggdische mitem Scheene und esoo bi n y aigentlig drzue koo. Y ha aber no e Brueder und fir uns isch immer klaar gsii, ass das Unternämme in dr Familie blyybe und nit "Exdäärn" gää wird.

Das find y seer scheen...

     
 

Y glaub, die weenigschte Lyt wisse wie d Produggdioon vo dr Faasnachtsblaggedde ablauft... wenn (zytlig) griegsch Du d Zaichnig oder dr Entwuurf vo dr neye Blaggedde und wenn foot d Produggdioon aa ?

  Mike:

D Zaichnig grieg y beraits noo de Summerfeerie...

Scho ?
Dasch jo e ussgschrybene Wettbewärb und Yygoobeschluss isch denn Mitti Auguscht... kurzi Zyt speeter wird denn die ney Blaggedde ussgwäält.

Ok denn hänn Iir gnueg Zyt fir d Produggdioon...
Mer mien gnueg Zyt haa...

Wie vyyl Schritt sin nootwändig, zem e Blaggedde härstelle ?
Vo dr Zaichnig ewägg, sins mindeschtens 9 Schritt... also vom Gipsmodäll bis zer Verpaggig. Drzue kunnt no,
ass mer nadierlig unseri Wärgzygg au sälber härstelle.

Und wie vyl Blaggedde wärde denn härgstellt ?
Daas liebe Markus, isch e Ghaimnis ;-)

Okeee...

     
 

Welle Wärt het denn die goldigi Blaggedde wiirglig ?

  Mike:

Au daas isch nadierlig e Ghaimnis, aber me kennt jo d Blaggedde uffschnyyde und denn waiss me s au, was sich drunder versteggt... aber s isch nadierlig au d Aarbet, wo dr goldige Blaggedde dr Meerwärt git. Uff die silbrigi Ooberflechi kunnt no e zuesätzligs Plättli, wo vo Hand uffgläbbt wird... das haisst, jeedi ainzelni Blaggedde wird zämmeglyymt.

Und was bassiert mitem "Gold" ?
Jeedi Blaggedde wird galvanisiert, das haisst, chemisch vergoldet und mer reede do faggtisch vomene Ächtgoldaadail wo jeedi goldigi Blaggedde het.

Wie lauft das mitem galvanisiere ab ?
Me muess sich voorstelle, die Blaggedde kemme in e Bad wo ne Goldplatte drinn isch und mit Hilf vo dr
Elektrolyse, wird das Medall vo dr Blaggedde mitere Schicht vom andere Medall - also däre Goldplatte - iiberzooge. Me ka also wiirglig saage, ass es e Ächtvergoldig isch und e gwisse Wärt het... uff jeede Fall.

Denn kunnt jo no s Bijou drzue, wo no wyteri Schritt bruucht...
Genau...

     
 

Wird fir jeedi Blaggedde s glych Grundwärgzyg verwändet ?

  Mike:

Im 2011 hets e Jubiläumsblaggedde gää und do sin alli 3 Blaggedde glyych grooss gsii... aber dasch e n-Ussnaam gsii, das haisst, mer bruuche pro Blaggedde jewyls e Wärgzyg.

     
 

Iir produzieret jo nit numme Blaggedde, sondern no e ganz huffe anderi, tolli Sache... kasch uns e glaine Yybligg in Eyer Sortimänt gää ?

  Mike:

Mer stelle zuesätzlig no Pin's und Medaillie här, wie au Abzaiche oder Usszaichnige, verkaufe Zinn Waare und dien die au grad no uff Wunsch graviere... s isch also e groossi Pallette, wo mer no zuesätzlig näbbscht de Blaggedde mache. Wenn s denn in Richtig Summer goot, stoot mee dr Sport im Voordergrund, wie Lychtathleetik oder Fuessball.

Also mit Pokäl und so...
Genau... Pokäl und Medaillie. Was mer au scho syt längerem produziere deerfe, isch d Medaillie fir dr Basler Stadtlauf, wo jeedes Joor iirgend e Kuriosität vo dr Stadt druff isch.

Dennt no rächt abwäggsligsryych...
Jä das ka me eso saage, woby mer nadierlig scho 90% fir d Faasnacht produziere. Näbscht em Comité, sin s au Clique, wo diräggt zue n ys kemme und e aigeni Blaggedde produziere leen... zB. e Jubiläumsblaggedde oder e Abzaiche.

     
 

Wie vyl Lyt schaffe denn bi Eych im Betriib ?

  Mike:

Mer beschäftige 5 Mitaarbaiter innere Feschtaastellig und ab Auguscht stogge mer uff mit wytere 10 Lyt. Mer bruuche wiirglig eso vyl saisonali Usshilfskreft, ass mer die Blaggedde rächtzytig feertig griege.

Denn kasch jo entspannt in d Wienachtsfeerie goo ;-)
Nai laider nit ganz... mer feen im Auguscht aa und uffs Jooresänd zue, wird denn immer stressiger... mer produziere jo nit numme fir d Basler Faasnacht, sondern au fir bis zu 40 anderi Gmainde. Die hänn alli die ähnlige Liifertermiin und denn kunnt nadierlig im Novämber / Dezämber alles zämme.

     
 

Du bisch jo sälber au als Aggdiive Faasnächtler underwäggs... bi wäm denn ?

  Mike:

Y bi als Dambour bi dr "VKB" underwäggs.

Sobald d Blaggedde im Umlauf isch, ka n y mer voorstelle, ass Du Dir no ainiges in dr Clique aaloose muesch... gits Lob oder Tadel ? Y main, Du kasch jo nit drfiir, wenns Sujet bleed isch... das kunnt jo nit vo Dir, sondern dueschs jo numme umsetze...
S Echo mitzgriege, isch nadierlig immer wider spannend... woby d Lyt jo scho au wisse, ass y am Sujet relatiiv weenig mache kaa... aber s isch immer wider scheen, e Feedback z griege, ob d Blaggedde guet woorde n-isch oder ebbe nit.

     
 

Hänn Iir aigentlig scho vo Aafang aa d Blaggedde fir d Basler Faasnacht härgstellt ?

  Mike:

Zwische 1920 und 1939 hänn mer immer mol wider d Blaggedde produziert und ab 1939 duurgehend bis hitte.
Taatsächlig isch die allereerscht Comité-Blaggedde vomene Ditsche häärgstellt woorde... är het aber sy Atelier
in Rieche kaa und mi Ur-Groossbabbe het bi ihm d Lehr gmacht :-)

Ok, denn ka me das jo no verdrätte ;-)
Richtig, genau... au wenn das die maischte Lyt nit eso gärn gheere, aber d Blaggedde isch e importierti Ware uss Ditschland gsii und kai Erfindig vo de Basler. Dr Wilhelm Dollinger het die Blaggedde noo Basel importiert.

     
 

Welle Bruef bruch y do, ass y bi Eych mitschaffe kaa ?

  Mike:

Myni feschtaagstellte Mitarbaiter sin Graveure... allerdings eenter vom alte Schlaag, wo no wiirglig s alte Kunschthandwärgg glehrt hänn. Hitte isch dä Bruef immer technischer und als wie mee uff e Computer ussgrichtet woorde... unsere Betriib goot allerdings mee ins Kunschthandwärgg und das macht nadierlig d Suechi nooeme neye Mitarbaiter nit unbedingt aifacher.

Denn schaffe bi Dir au mee älteri und vor allem langjeerigi Mitarbaiter... was jo au seer scheen isch..
Genau... alli feschtaagstellte Mitarbaiter sin aigentlig scho iiber 15 Joor do im Betrieb. Y bi quasi dr Jingscht vo alle und dä wo am weenigschte lang doo isch ;-)

     
 

Und wenn an dr Faasnacht underwäggs bisch und Dyni Blaggedde gseesch... dänggsch amigs au "Wow die ha n ych gmacht" oder ischs aifach e Uffdraag gsii, wo jetz erleedigt isch ?

  Mike:

Also mii erfillts mit Stolz wenn y gsee, ass d Blaggedde de Lyt gfallt... grad wenn y jetz an d 2019er Blaggedde dängg mit dr Muba, das het esoo vyle Lyt gfalle... nadierlig wells au e emotionaale Wärt kaa het, aber y bi nadierlig scho seer Stolz druff, ass mer esoone tolli Blaggedde hänn deerfe mache. Wenn y aber an dr Faasnacht underwäggs bi, denn lueg y eenter wär kai Blaggedde am Revert het ;-).

     
  So, aber jetz geen mer wiirglig zer Faasnacht iibere... was beditet Dir d Faasnacht ?
  Mike:

Y frai mi jeedes Joor wider uff Faasnacht und y kennt nit sii ooni. Aifach 3 Daag anderscht deerfe z sii... s fasziniert mi immer wider uffs Neye, wie mer ys alli uff die 3 scheenschte Daag fraie... brueflig wie au in dr Clique.

Jä dasch scho eso...
Die 3 Daag geen eso schnäll verbyy und am Donnschtigmoorge sin denn alli wider druurig, wells scho wider verby isch.

     
 

Du hesch jo scho gsait, ass aigentlig s ganz Joor mit dr Faasnacht z due hesch... gits denn ainewäg e Momänt, wo bi Dir d Faasnachtsstimmig uffkunnt ? Und wenn jo, ab wenn ?

  Mike:

D Blaggedde-Ussgoob isch fir mii fascht e weeneli wie ne Erlyychterig und versuech denn au e Strich zwische Bruef und Privaatem z zieh... im Privaate kunnt d Faasnachtsfraid, wenn ys Goschdym gang go aabrobiere oder bim Laarve aabasse... oder wenn y die eerscht Wärbig vo de Voorfaasnachtsveraastaltige gheer, denn foots scho langsam afo kribble.

Guet das verstand y jetz no... s aint isch dr Job, liiferisch ab und denn kunnt s Privaate...
Genau... denn isch au dr Drugg ewägg und ka mi denn uff d Faasnacht fraie.

Gäll an dr Blaggedde Vernissaage bisch drby oder ? Griegsch denn au emol e baar aaständigi Woort vom Comité zgheere ?
Jo bim Blaggedde-Värs wärde mer nadierlig erwäänt, aber au sunscht wird das immer verdanggt und druff uffmeergsam gmacht, ass d Blaggedde wideremol vo uns gmacht woorde n-isch ;-).

     
  Het sich d Faasnacht im Geegesatz zu friehner veränderet ? Und wenn jo, in welli Richtig ?
  Mike:

Isch no schwiirig z saage... y glaub, fir mii nit. Klaar macht me e weeneli anderscht Faasnacht, wenn me elder wird... macht lenger Faasnacht, wott so glyy wie meeglig wider uff d Gass uuse und so lang wies goot gniesse... aber sunscht find y nit wiirglig, ass sich d Faasnacht groossaartig veränderet het.

     
  Wie hesch Du als glaine Bueb d Faasnacht erläbt ?
  Mike:

My Babbe isch friener Guggemuusiger gsii und hitte uffeme Waage und ych sälber mach Faasnacht, syt y 8 Joor alt bi... aber y bi aigentlig au vorhär scho immer am Stroosserand gstande und ha d Faasnacht gnosse.

     
  Was macht Di Gligglig ?
  Mike:

D Faasnacht :-)

     
  Welles isch Dy absoluts Highlight gsii im 2019 ?
  Mike:

Myni Hochzyt...

Oh seer scheen, y gradulier ganz häärzlig... wenn denn ?
Dangge... im Summer in Thailand.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Mike:

Mitem Roger Federer... är isch fir mii aifach dr Inbegriff vomene perfäggte Schwizer. Sy Image isch unverwieschtlig und e bessers Image ka me gar nit haa. Är isch au e riise Voorbild, nit numme als Tennisspiiler, sondern au als Mensch.

     
  Wo uss Dynere Sicht bisch Du "Taläntfrey" bzw. welles Talänt hättsch gärn no ?
  Mike:

Y hät gärn e weeneli mee Geduld.

     
  Was wirdsch an Fraue nie verstoo kenne ?
  Mike:

Wieso si immer dopplet eso vyl Handdäsche bruuche, wie s Wuchedäg het...

Grandiooooos :-)

     
  Wär wurdsch am liebschte emol ins Dschungelcamp schigge ? (Sott ebber si, wo me kennt)
  Mike:

D Tamara Funiciello...
(Aameergig: Dasch e polarisierendi Jungpolitikerin)

     
  No e baar Schlaagweerter, bitte numme mit aim Satz beantwoorte...
  Pin oder Blaggedde ?

Blaggedde...

Kai Pin ?
Wääääääääääääh... also fir d Faasnacht.

  Basel...

Scheenschti Stadt...

  Ziiri...

Scheene Fluughaafe...

  Herbschtmäss...

Brennti Mandle...

Kindhaitserinnerige ?
Hmmm... sage mer s emol esoo, y ha friener Angscht voor de Baane kaa... aber das het sich mittlerwyle gänderet, y gang fascht iiberall druff... usserem Freefall Tower...

  VKB...

Die beschti Clique...

  Klima-Gretel
(Greta Thunberg)...

Y finds OK wenn me sait, ass me ebbis firs Klima mache wott... aber fir mii ischs mee Grach als ebbis anders...

  Donald Trump...

Nit dr hellscht...

Vyyle Dangg fiir Dyni Antwoorte