1991 het Iiri eerscht Modeschau im Füglistaller in dr Freyestrooss stattgfunde… wie ischs Iine sällmol gange ?
S eerscht Mol e Modeschau, s eerscht Mol wo me syni Kolleggdioon de Lyt presentiere darf... oder isch alles so professionell duureoorganisiert gsii ?

Nai, iiberhaupt nit... wenn y hitte uff die Modeschau zrugglueg, denn frogg y mi scho, was y deert gmacht haa...

Wells vellicht e weeneli chaotisch gsii isch ?
Nai, nit unbedingt chaotisch... me het friener nit die Stilsicherhait kaa, wo me hitte het... s isch alles no seer "suechend" gsii. Me het das Ganze noonig eso stimmigsvoll presentiert, wie me das hitte macht... aber dasch jo au s scheene draa, me het no dr juugendlig Lyychtsinn kaa und nit grooss driiber noodänggt
was hät si kenne... me hets aifach gmacht. Hit wurd das nimm goo wie friener wo n y no 27 gsii bi, do het me no alles anderscht gsee.

Die Unbeschweerthait vo dr Juugend... me isch aifach loosgange und het gmacht...
Y glaub, me muess e Mittelmaas finde...

Mänggmol wott y au eso unbeschwärt sii...
Also y bi hit scho au no esoo, ass y im Voorfäld mee blaan... aber wenn s um Kreatioon goot, denn bi n y
au no seer unbeschwärt. Y iiberlegg mir nit vyyl drbyy, sondern s kunnt denn aifach... y glaub, wenn s zue "verkopft" isch, denn wirds au nit guet... me verliert denn z vyyl an Kreativität...

Denn kunnt no dr Zytdrugg vo de Modeschau drzue...
Genau... me ka jo nit scho Wuche voor dr Modeschau mit dr Aarbet aafoo, sondern isch im Zytdrugg und
ka nit vyl driiber noodängge. Zue mynere Zyt in dr Kunschtgwärbschuel, hänn d Lyt z vyl amene Modäll ummestudiert und y ha sällmool scho gwisst, ass das definitiv nit guet koo wird... dasch wie ne Mooler wo
e Bild moolt und eerscht am Änd dr Namme firs Bild bestimmt. Wenn me z vyyl iiberleggt was me macht, denn wirds au "zkantig".

Wievyl Modeschaue gits pro Joor ?

Mer produziere 2 Kolleggdioone pro Joor... s ka aber au sii, ass mer mänggmool Speziaalprojäggt hänn, wo no e 3. Kolleggdioon bruucht... aber do goot denn s Augemeerg mee uff d Show.

Aber isch denn immer no s glyych Gewuusel hinter dr Biini, wie me das eso im Färnsee amigs gseet ? Y find das immer waansinnig, dasch ai Stress und bis alli Modells aagleggt sin, bis alles lauft... do isch me jo fix ud feertig am Änd oder ?
Hmmm... Nai, y glaub, y ha do e weeneli dr Vordail, ass y au grad no die ganz Choreografie, d Gschicht und
d Themaatik vo däre Modeschau bestimm und das ka n y in ainere Persoon mache... dasch nadierlig e groosse Voordail. Mir liggt das seer guet und denn ischs aifach und git kai groosses Chaos. E Modeschau isch immer seer aasträngend... au bis emol alli Klaider feertig sin, etc.

Wie lauft denn esoone Modeschau ab ?
Am Moorge am 09:30 kemme alli Modells und denn wird s "Fitting" gmacht, das haisst. s wärde alli Klaider und Accessoires aabrobiert und falls neetig, korrigiert. Denn kunnt d Broob mit mynere Choreografie und dasch denn scho au seer aasträngend fir myni Modells, doo alles bis am vieri im Kopf sii muess. Jo und denn foot d Modeschau aa... dasch wiirglig e rächt aasträngende Daag, aber nit hektisch... denn in dr Hektik verliert me au gärn d Närve. Dorum ischs enoorm wichtig, ass jeede waiss, was är z due het.

Und wenn d Modeschau feertig und dr Voorhang gfalle n-isch ? Staartet denn d Party oder d Entspannig ? Guet, mer hänn 8 Modeschaue, das haisst 4 Daag lang mit je 2 Modeschaue und me daarf nit scho noo dr
eerschte loosloo...

Aber noo dr letschte ?
Jä... aber au nit z fescht, me muess jo am näggschte Daag wider alles zruggbringe und dernoo foot jo die aigentligi Aarbet mit de Kunde n-aa... me muess jo au luege, ass me das ganze Ziggs au verkauft ;-)
Guet, vyyl wird au grad vorOrt bstellt, aber dernoo kunnt d Kundschaft zue mir ins Atelier und dasch fir mii denn fascht die aasträngenderi Zyt.

Inwiefärn ?
Well me sich mee uff die Kunde yystelle muess... jeedi Kundin isch jo ainzigaartig und wenn me jeedi Stund e Kundin het, denn isch me zOobe scho rächt mied. Drzue kunnt jo no die ganz Aarbet, wo me am Daag
nyt het mache kenne und denn goots fir mii mit de Nachtschichte genau eso wyter, wie voor dr Modeschau... s isch aasträngend, aber au scheen.

Was macht für Si d Faszinatioon vo Stoff, Mode und Schnyydere uss oder anderscht gfroggt, was fasziniert Si an däm Bruef ?

Ass es immer wider wäggslet... s isch nie glyych. S git immer wider neyi Materiaalie, neyi Stoff, neyi
Design und inspiriiere mi immer wider uffs Neye und dasch nadierlig seer scheen, wenn me sich vo däm verfiere loo kaa.

Kenne Si au emol abschalte ? Zem Byspiil Dehaime... oder dängge Si immer iiber neyi Kreatioone noo ?
Jäjä, y ka seer guet abschalte...

Vo waas leen Si sich am liebschte inspiriiere ? Gits e bstimmte n-Oort ?

Feerie sin immer seer gueti Inspiratioonsquelle... mer dauche baidi und dauche isch immer mit ganz vyyle
Faarbe und Foorme verbunde. Mer hänn au scho ne mool uffgrund vomene Fisch-Foti, e Stoff aafeertige loo... oder letscht Joor vomene Foti mitem Bluetmond, wo ne Frindin gmacht het. Letscht Joor sin mer in Marakesch gsii und hänn ys vonere andere Kultur inspiriiere loo und sin nadierlig au e weeneli uff de Spuure vom Yves Saint Laurent gwandlet... well är jo in Marakesch seer vyyl gmacht het.

Si hänn jo in Saudi Arabie d Schwiz mitere Modeschau representiere deerfe... sogaar s Keenigshuus isch aawäsend gsii. Wie isch das fir Si gsii, wo d Aafroog ins Huus koo isch ? Und wie ischs Iine deert in Saudi Arabie gange ?

Die Aafroog isch jo vo Schwiz Tourismus koo und mer hänn denn schnäll emol gmeergt, ass si sich nit vyl iiberleggt kaa hänn... s het sovyl Frooge gää wie dr Glaube, d Religioon, d Modells, d Logistik, Visa, Voorberaitige, etc. Si hänn dänggt, ass esoone Modeschau schnäll emol uff d Bai gstellt isch. Wo mer si denn emol uff die ganze Brobleem uffmeergsam gmacht hänn, sin iiri Auge zeerscht emol ganz grooss woorde...

Isch jo au lang nit klaar gsii, ob si die Modeschau mache oder nit...
S Ganze isch lang uff "Messers Schneide" gstande... nadierlig au wägge de Koschte. Au vo dr Zyt här isch alles seer knapp gsii und nit emol e Moonet gange bis zem Abfluug. Me darf jo au numme yyraise, wenn me e perseenligi Yylaadig vom Keenigshuus het und die hänn mer jo noonig kaa. Aber fir uns ischs nadierlig seer spannend gsii, eso ebbis imene fir uns fremde Land deerfe z oorganisiere und stattfinde z loo.

Wie hets denn mit de Modells ussgsee ? Hänn Si Iiri aigene deerfe mitnää ?
Nai, mer hänn d Modells vo deert miesse nää und hänn au vyyli Setkarte vo Modells griegt... aber die hänn mer nit unbedingt bruuche kenne und het syni Zyt bruucht, bis mer alli kaa hänn. Au voor dr Modeschau hänn mer numme 2 Modells deerfe n-aalegge, die andere hänn sich alli numme vo Fraue aalegge loo.

Wie ischs denn fir Si gloffe ? Erfolgryych nimm y emol aa...
Erfolgryych ischs vo dr Show här gsii, aber jetz nit vom Verkauf... aber het mer nadierlig tolli Kontaggt yybrocht und au e seer scheene Artikel in dr "Vogue". S isch e tolli Erfaarig gsii und nadierlig au e groossi Eer, ass mer das hänn deerfe zaige in somene Land.

Hänn Si denn fir Saudi Araabie e spezielli Kolleggdioon entwoorfe ?
Jä, mer hänn nadierlig e spezielli Kolleggdioon zämmegstellt... mer hänn e Dail vo dr neye Kolleggdioon mitgnoo und die no e weeneli ergänzt, well mer gwisst hänn was si gärn hänn. Au mit dr Muusig hänn mer miesse luege, me ka jo nit an dr Modeschau Muusig abspiile, wo e vulgäre Täggscht hänn.

Jä do muess me scho an seer vyl dängge... au an so Klainigkaite wie d Muusig. Was het Iine jetz dä Ussfluug an Erfaarig broocht ?
S isch e ganz tolli Erfaarig gsii und wird y ganz sicher nie mee vergässe. S het bi uns au gwissi Voorurdail geegeniiber vo de Lyt abbaut, well si alli au seer seer häärzlig zue n ys gsii sin. Klaar s isch au e gwissi Schicht gsii, wo sich das het kenne laischte und deert gsii isch.

Gwissi Tendänze sind beraits scho vo de Stofflieferante voorgää... nadierlig gits verschiideni Farbvariatioone, aber me meergt beraits an de greessere Stoffmuschter, ass die jetzt tendenziell besser laufe als die, wo aifach au no draa hängge.

Und ? Und ? Und ? Welli Faarbe sins jetz ?
Jo also im Summer gits nadierlig immer no lychteri Faarbe wie Beige oder Pastellfaarbe... aber au afrikaanischi und ethnischi Yyfliss spiile e Rolle.

S isch nit eso aifach gueti Lyt z finde, wo das Handwärgg gärn mache... si meerge denn au gly emol, ass es nit esoone aifache Bruef isch und me mit dämm nit unbedingt ryych wird ... und in dr Schwiz sowieso. Ass denn die Lyt au uffem Bruef blyybe und ainewäg iire Wäg geen, dasch nit eso sälbschtverständlig.

Schwängge mer emol zer Faasnacht iibere... hänn Si schonemol fir e Clique e Fasnachtsgoschdym entwoorfe ?

Jä klaar, y bi jo friener e n-aggdiive Faasnächtler gsii und ha ganzi Ziig und vyyl Goschdym entwoorfe, wie au Ladärne und Laarve gmoolt.

In wellere Clique sin Si denn gsii ?
Zeerscht im "Barbara Club" und denn bi de "Naarebaschi".

Und hitte ?
Nyt mee...

Au kai Gluscht me ?
Nai... y ha mi jo iiregendwenn emol miesse entschaide, well y immer 2 Wuche noo dr Faasnacht myni Kolleggdioon ha. Y ha gmeergt, ass me aigentlig nit rächt mache kaa... also au nit d Faasnacht richtig gniesse und denn ha n y mi entschiide, ass y uffheere due. S duet mer au nit weh und y schaff jo oft au wärend dr Faasnacht do in mym Atelier und grieg no e weeneli ebbis mit und das längt mir.

Und fir sich sälber emol e ussgfalles Goschdym entwoorfe ?
Das ha n y scho gmacht und sogar bim Bryyspfyffe e Goschdymbryys gwunne :-)

Si sin jo au emol im Fasnachtscomitee gsii...

9 Joor...

Was isch denn genau Iiri Uffgoob gsi ?
Y ha vyli Uffgoobe kaa... aber myni Hauptuffgoob sin d Blaggedde gsii. Y ha au firs Drummeli seer vyl gmacht und d Subventioone sin au e wichtigs Thema gsii mitem Verdailschlissel, wo n y entwoorfe ha. Y ha mi deert aigentlig rächt ins Ziggs gleggt und denn nadierlig au gmeergt, ass mi das alles waansinnig vyl Zyt koschtet het und ha denn au noo 9 Joor uffgheert.

Was beditet Iine d Faasnacht ?

D Faasnacht isch fir die Stadt enoorm wichtig und beditet de Mensche doo ganz vyyl. Si isch fir d Mensche au e soziaali Institutioon... also au fir Mensche, wo vellicht nit eso vyl Frinde hänn und das find y ebbis vom imposantischte an dr Faasnacht, ass alli Schichte aagsproche und verdrätte sin... und nadierlig au s musikaalische wie au s kinschtlerische find y toll und gangs au immer gärn go aaluege.

Wenn foot bi Iine d Faasnachtsstimmig aa ?

Die gits ebbe nimm eso bi miir... y bi denn innere andere Stimmig... in dr Stimmig vom kreiere vo mynere neye Kolleggdioon ;-)

Au kai Voorfaasnachtsveraastaltig ?
Y gang vellicht ans Drummeli, aber sunscht an kai anderi Voorfaasnachtsveraastaltig.

Het sich d Faasnacht veränderet ?

Was mii an dr Faasnacht närvt, isch die Intoleranz... mänggmool dängg y, ass d Basler Faasnächtler do e weeneli toleranter sii kennte. Wenn me in dr Wält ummekunnt und mit vyyl underschiidlige Lyt verkeere
darf... und sich denn so Diskussioone in de Cliquene aaloose muess, denn ischs fascht unerdrääglig, was
die alli fir Brobleem hänn... und das find y wiirglig seer aasträngend.

Myni Eldere sin Oschtschwizer... my Brueder und ych sin imene Aldershaim uffgwaggse...

Imene Aldershaim ?
Jo, myni Eldere sin Verwalter vomene Aldershaim gsii und mir sin aigentlig immer in däre Wuche wäggange.
Myni Gotte het unbedingt emol an d Basler Faasnacht welle und denn bi n y mit iire wideremol doo an dr Faasnacht gsii... kuurzi Zyt speeter bi n y in e Clique.

Und hitte ? Spontan amigs e Bsiechli an dr Faasnacht ?
Am Mäntignomidaag genn mer maischtens emol an Cortège und zOobe immer neyme go ässe... mer hänn do unseri 3 Baize, wo mer immer aane geen.

Am maischte gligglig machts mi, wenn y anderi gligglig mache kaa... und wenns aim gsundhaitlig guet goot.

Y glaub, dasch die letscht Modeschau gsii... alles isch so rund gloffe, also vo dr Yylaadig bis zer Bresentatioon... dasch sicher ains vo de Highlights gsii in dämm Joor.

S wär woorschyns dr Yves Saint Laurent, wo mi als Mensch indressiere wurd... syni Abgrind, etc. y ha dä immer seer faszinierend gfunde als Modeschepfer.

Jä nadierlig... s git vyli Sache wo aim e Bild voor Auge fiert, wenn me ebbis schmeggt.

Gits denn e spezielle Gschmagg ?
Myni Eldere hänn e Feeriehuus im Appezällerland kaa und das frisch gschnittene Grass, s Heu oder die spezielli Gwitterstimmig wärde aim immer wider in Erinnerig gruefe... also das sin eso myni Kindhaitserinnerige.

Ich würde es Herrn Wessels gönnen... aber ich könnte auch Frau Ackermann schicken...

Theater... dasch fir mii e seer inspirierende Oort...

Fir mii e ussgsprochene intelligänte Mensch, verruggt, geniaal... und wär au ebber gsii, wo n y gärn kenneglehrt hät...

Isch fir mii my Haimat...

Isch nit my Haimat...

Isch e scheeni Kindhaitserinnerig...

Isch e scheeni Gschicht... het aber nit mit unserem Bruef z due ;-)