Marcus Hablützel, Dambourmajoor vo de "Basler Rolli Fasnachtsgsellschaft 1969"
   
 

 

Syt 1969 gits d Faasnachtsgsellschaft "Basler Rolli", wie vyyl vo dänne 51 Joor bisch Du denn scho drbyy ?

  Marcus:

Die ganze 51 Joor... und bi no aine vo de weenige, wo vo Aafang drbyy isch.

Du bisch e Grindigsmitgliid ?
Jo, aber nit aggdiiv an dr Grindigsversammlig, y bi sällmol eerscht 8 Joor alt und aifach drbyy gsii, wo das Ganze entstande n-isch.

Wie sin denn d "Basler Rolli" entstande ?
D "Basler Rolli" sin ussere Abspaltig vo dr "Wettstai Clique" entstande und sin im Joor 1969 noo dr Faasnacht grindet woorde. Am Aafang ischs nadierlig no kai Stammverain gsii, sondern aifach numme emol e Fasnachtsgsellschaft... erscht im 1972 isch denn die "Jungi Garde" drzuekoo und esoo het sich das denn wyterentwigglet.

Denn sin d "Basler Rolli" Dyni eerscht Clique gsii als Gnäggis ?
Nai, y bi 1 Joor voor dr Abspaltig, bi de "Wettstai Gnorzi" yydrätte und ha mit drummle n-aagfange... y ha denn deert myni 1. Faasnacht gnosse und bi denn mitem ganze Harscht zue de "Basler Rolli" mitgange.

     
 

Ych entschuldige mi fir myni Unwissehait, aber was genau beditet "Basler Rolli" ?

  Marcus:

E "Rolli" isch aigentlig e Kater... unseri Clique isch im Binniger Schloss grindet woorde und bi dr Grindigsversammlig, het me nadierlig nooeme Cliquenamme gsuecht... iirgend ebber het denn uffere Statue, e Katz gsee und esoo isch denn die Idee mitem "Kater vo Basel" geboore, wo denn amänd d "Basler Rolli" druss woorde sin.

Jo genau, gseet me jo au in Eyrem Clique-Logo...

     
 

Und scho sin 51 Jeerli verbyy gange... apropos... letscht Joor hänn Iir jo Eyer 50-jeerigs Faasnachtsjubileeum gfyyrt… wie hänn Iir denn Eyer Juubeljoor gstaltet ?

  Marcus:

Aagfange hets miteme tolle Neyjoorsapéro, denn isch d Faasnacht koo und alli 3 Ziig hänn s glyche Goschdym aakaa... mer sin miteme gstiiflete Kater und em Sujet "Ain fir alli, alli fir aine" underwäggs gsii und dasch nadierlig e riisige und tolle Zuug gsii. Dr Bummel het denn jeedi Grubbe fir sich gmacht... aber mer hänn ys immer mol wider zemene gmainsaame Umgang droffe. Im Septämber hets denn no im ZicZac e groosses Fescht fir d Mitgliider gää und als Abschluss jetz denn no e gmainsaams Wienachtsässe.

S Sujet vom "Drummeli" isch jo e groossi Zytrais gsii und Iir hänn e bsundere Joorgang ussgspiilt...
Genau... mer hänn nadierlig s 1969, unser Grindigsjoor gnoo und d Apollo Moondlandig ussgspiilt. Unseri baide Instruggder, dr Lucien Stöcklin und dr Patrick Hersberger, hänn drzue e neye Maarsch "dr Apollo" gschryybe.

     
 

Mittlerwyyle kennet Iir uff 200 Aggdiivmtigliider zelle, was jo rächt grooss isch fir e Clique... wie gseets denn mitem Noowuggs uss ? Isch das au e Thema bi Eych ?

  Marcus:

Also jetz im Momänt hänn mer iiberhaupt kaini Brobleem mitem Noowuggs... mer hänn rund 70 Jungi in dr
"Junge Garde" und dasch nadierlig super. Aber y ka mi au draa erinnere, ass mers scho anderscht kaa hänn... my Soon zem Byspiil, isch scho mit 4 Damboure und 15 Pfyffer in dr "Junge Garde" gloffe... also daas hets au scho gää... aber ebbe, im Momänt sin mer seer zfriide... vyl Jungi sin uss aigener Produggzioon... offebaar sin mer seer aggdiiv gsii in de letschte Joore ;-)

Absolut, das find y au... was isch denn dr grooss "Spirit" in Eyrer Clique ? Oder was macht Eyre guete Zämmehalt uss ?
Dasch nadierlig jetz schwiirig fir mii, well y numme d "Basler Rolli" kenn ... mer sin staarg uffs musikaalische fokussiert... dasch immer e groosses Thema gsi bi n-ys und dä Aaspruch het ys au präggt. S andere isch sicher au s Gsellschaftligge, dr Blausch haa zämme... drzue kunnt, ass mer nit eso "formaal" sin, also gwissi Ämtli hänn mer lang gaar nit kaa... bi uns stoot d Faasnacht und s zämme "Muusig" mache an eerschter Stell.

Hänn Iir e Cliquekäller ?
Mer hänn kai effentligge Cliquekäller, numme e Baschtelkäller... mer geen lieber in d Baiz ain go schnappe.

     
 

Kemme mer emol e weeneli zue Diir und Dynere Funggdioon als Dambourmajoor... Majoor sii isch jo nit jeedermanns Sach, me ka nimm pfyffe und drummle, isch immer konzentriert, etc. also e Ämtli, wo nit jeede mache wott... was isch denn fir Dii dr Impuls oder dr Usschlaag gsii, zem das z mache ?

  Marcus:

Fiir mii ischs an eerschter Stell e groossi Eer gsii und fiil mi au priviligiert, ass y zmitts drinne d Muusig gniesse daarf. Y ka au in mynere Funggdioon d Clique-Stimmig beyyflusse. Wo n y 1999 noo 7 Joor USA zruggkoo bii, het my Majoor-Voorgänger grad demissioniert ka. Y bi also wider zrugg gsii, ha aber myni Marschsicherhait nimm so wiirglig kaa... ha jo au in däne 7 Joor nimm drummlet... Jo, denn hänn si mi gfroggt, ob y das Amt vom Majoor iibernää wurd... was y denn uff d Faasnacht 2000 au gärn gmacht haa, esoo bi n y denn au grad wider voll dinne gsii.

Wie lang isch Dyni Bedänggzyt gsii ?
Y ha genau 5 Minute driiber noodänggt... s isch fir mii wie gsait e groossi Eer gsii und ha mi seer driiber gfrait, ass si mi iiberhaupt gfroggt und an mi dänggt hänn. Mer hänn lang Majoore kaa, wo in dr Vergangehait weder drummlet no pfyffe hänn, dämentsprächend hänn si au nie so rächt gwisst, wenn dr Marsch feertig gsii isch. Si hänns zwoor guet gmacht, sin aber halt doch numme Statischte gsii und das het mi - als aine wo hindedraa gloffe n-isch und drummlet het - aigentig immer gsteert. My Voorgänger isch dr eerscht gsii wo gwisst het, wie d Märsch geen, well är friener drummlet het... und y ha denn gfunde, ass dr Majoor zue mir basst.

Angscht hesch nit kaa ? Y main, isch doch e groossi Verantwoortig, wenn me das nonie gmacht het...
Y bi nadierlig am Aafang scho e weeneli unsicher gsii, ob y das wiirlig kaa... aber mittlerwyyle mach y das jetz scho 20 Joor und finds cool. Y ha aber vo Aafang aa gsait, ass y am Faasnachtszyschdig drummle und au in d Iebigsstunde goo wurd... y will jo schliesslig nit my drummeltechnischs Handwärg verliere.

Denn kasch weenigschtens no dr Faasnachtszyschdig als Dambour e weeneli gniesse...
Genau... mer sin am Faasnachtszyschdig miteme Zyschdigsgribbli underwäggs und do "riehr" y mit. Zoobe
drifft me sich denn am 22:00 zemene gmainsaame Umgang mit allne, wo Luscht hänn... und fir e baar Stund iibernimmt ebber anders dr Majoor.

Goot denn das fir Dii, am Faasnachtszyschdig hindedryy z laufe oder beobachtisch mit Aargusauge dr Majoor?
Y muess mi denn amigs scho richtig zruggnää, ass y mi nit dryymisch ;-)

     
 

Kasch denn d Faasnacht als Majoor iiberhaupt gniesse ? Oder bisch ständig am iiberlegge, wo jetz duurelaufe muesch ?

  Marcus:

Also als Majoor muesch nadierlig scho dr Kopf bi dr Sach haa, kaschs jo nit aifach bambele loo. Y sprich mi immer mit dr Zuugsscheffin ab und dasch immer e seer gueti Zämmenaarbet. Mer kommuniziere oft mit Zaichesprooch und y ha au mi perseenliggs Nummeregirl, wo d Märsch aazaigt... y ka jo nit schreye bi so vyyl Lyt. Si lauft au immer nääbe miir und hilft mer bim aa- und ablegge.

Aber als Majoor erläbsch Du d Faasnacht sicher anderscht als miir oder ?
Y sag immer, ass y dr bescht Blatz haa... voor miir d Pfyffer und hinde miir d Damboure... s gheert kain dr Sound eso guet, wie n ych und y grieg au oft Hienerhutt drby. Duur myni langjeerig Erfaarig, waiss y mittlerwyyle ganz genau, vo wellem Egge mer wie lang wo anne hänn. Y sag denn e Marsch aa, so ass es denn uffgoot... usser s kunnt mer grad ebbis entgeege, wo n y nit erwaartet haa. Maischtens glingts mer, ass mer mitem gailschte Marsch zem Byspiil ins Schoofgässli yybiege und denn verregge immer alli... dasch denn myn perseenligge Eergyz, ass das klappt :-)

Und d Clique gspiire...
Y gspiir si seer guet... wenn y meerg ass si mied sin, denn mach y kaini schnälle Märsch me und wenn y meerg ass si gail sin, denn gib y Vollgaas und wenn si denn d Laarve abziehn und gliggligi Gsicher hänn, denn gfallt mir das seer.

     
 

Kasch Di no an Dyni allereerscht Faasnacht als Majoor erinnere ? Wie isch Dir deert gange ? Sicher nit eso entspannt wie hitte...

  Marcus:

Nai scho nit... nadierlig isch me am Aafang no e weeneli unsicher und nervees gsii, aber d Route ha n y jo kennt und s Zämmespiil mitem Zuugsscheff het sich mit de Joore au optimiert... aber die Souveränität griegsch denn nadierlig eerscht mit dr Zyt, wenn me uss dr Erfaarig schepfe kaa.

Und denn ka me d Faasnacht au enter gniesse...
Genau !

Wie losst sich dä "Huffe" fiehre ?
Seer guet muess y saage... und sunscht griege si denn e Fiidbägg an dr Lämpesitzig ;-)... an miir orientiert me sich... y lueg au immer, ass y rächtzytig uss dr Baiz bi und pinggtlig baraat stand... denn klappts aigentlig guet.

     
 

Dr Moorgestraich isch jo immer e spezielle Momänt... me isch e weeneli aagspannt und wott meegligscht zem optimaale Zytpunggt "Maaaarsch" schreye... nämmlig genau denn, wenn s Liecht abgoot...

  Marcus:

Klappt au...

Eerlig ? Denn bisch aber aine vo de ganz weenige, wo dä Momänt genau uff e Punggt drifft...
Numme aimool hets nit klappt, well d IWB vor e baar Joor s Liecht e Minute speeter abgschalte und mi
esoo versegglet het...

Gits denn voorem Moorgestraich e bstimmts Rituaal, ass dr perfäggti Zytpunggt driffsch ?
10 Minute voorem Moorgestraich, gib y e Zaiche und sag, ass me sich langsam aalegge und baraat stoo muess... denn zaig y mit dr Hand d Minute n-aa, wo no verblyybe bis es loosgoot...

Und Dyni Uhr stimmt genau...
Am Oobe voorem Moorgestraich, lyt y uff d Nummere "161" aa und stell myni Uhr genau uff d Sekunde n-yy... kuurz bevoor s loosgoot, sag y aa, waart aber mitem Wort "Marsch" bis s Liecht abgoot und in dr Reegel
bassts aigentlig immer...

     
 

Me stoot denn eso doo, waartet bis s Liecht abgoot und denn goots ändlig loos... was goot do in Dir voor ?
Kai Lampefieber mee ?

  Marcus:

Doch scho... aber s isch eenter dr Oobe vorhär... me luegt, ass alles baraat isch und hofft, ass me joo nit verschlooft. Aimool isch mers hundseeländ schlächt gsii und denn ha n y halt schnäll miesse umme Egge, aber denn isch wider guet gange. D Voorfraid isch aigentlig vyyl greesser...

     
 

Welles sin Dyni 3 goldige Reegle als Majoor ?

  Marcus:

1. Pinggtligkait... y glaub, wenn dr Majoor scho nit pinggtlig isch, wirds denn schwiirig...
2. D Clique gspiire isch fir mii no wichtig... gspiire wie si druff sin...
3. Klaari Aasaage mache und klaari Zaiche gää...

     
 

Hets emol e witzigi Situatioon an dr Faasnacht gää ?

  Marcus:

Glaini und luschtigi Situatioone gits immer emol... aber voor e baar Joor, hets emol e witzigi Situatioon gää...
unsere beschte Dambour und Drummel-Instruggder het sällmol pausiert und y ha gfunde, e Drummelkeenig wo pausiert, das gits jo gaar nit... s ganz Joor duure hänn mer en hoochgnoo wägge dämm. Wo mer denn wider emol zämme am Stammdisch ghoggt sin, ha n y gsait "Du und kai Faasnacht mache, das gits jo gaar nit..."
und är het gmaint "S git aigentlig numme ai Amt, wo n y gärn emol mache wurd... dasch dr Majoor" und ych
ha denn druff aabe gsait "und ych wurd gärn wideremol drummle".

Und denne ?
Mer hänn alles minutiees blaant und am Moorgestraich het är denn my Stägge gnoo und ych syni Drummle... und eso isch är die ganz Faasnacht Majoor gsii und ych ha drummlet. S hets am Aafang nit emol ebber gmeergt, ass är am Morgestraich dr Majoor gsii isch... eerscht bim eerschte Halt. Dasch e richtigs Highlight
gsii fir mi und het voll yygschlaage.

     
  Was beditet Dir d Fasnacht ?
  Marcus:

S isch e riisigs Hobby, e tolle Aaloss und frai mi immer uff die Originalität, d Vyylfalt, d Frinde, dr Blausch... aifach uff alles. S Gsamtkunschtwärg "Faasnacht" isch sensationell und was do alles uss de Kepf kunnt, isch ainzigaartig. Au die ganze Voorfaasnachtsveraastaltige sin jo mittlerwyle e richtigi Kultuur woorde. Wenn y dängg, ass es friener numme s "Drummeli" gää het, so sin s hitte so vyyli Voorfaasnachtsveraastaltige... unglaublig. Y gang au immer gärn an Schlussoobe vo de Schnitzelbängg go Väärsli loose... wär iibrigens au
emol ebbis wo n y gärn mache wurd.

     
 

Wenn foot bi Dir d Faasnachtsstimmig aa ?

  Marcus:

Wenn d Blaggedde uusekunnt, denn foots langsam aa mitem kribble und wenn nadierlig d Marschiebige kemme... aber y kas nit uff genau ai Momänt feschtmache. Mänggmool sin mer am "Drummeli" oder am "Charivari" drby und denn gseet me sich fascht jeede n-Oobe... das drait sicher au zer Faasnachtsstimmig
byy, ganz klaar.

     
 

Wenn jetz uff die 50 Joor zruggluegsch... het sich in däre Zyt d Faasnacht veränderet ? Und wenn joo, in welli
Richtig ?

  Marcus:

Uff dr ainte Syte isch d Faasnacht greesser, faarbiger, dynaamischer und musikaalisch aaspruchsvoller woorde... also was do an musikaalischem botte wird, isch Spitzeklass... uff dr andere Syte find ys miesaam, ass me bald alles uff d Goldwoog leege muess und nit aifach emol e Mogge keye loo kaa, wie aim dr Schnaabel gwaggse n-isch... und wenn denn doo drzue dr falsch Studänt am Disch hoggt, landisch in dr Zytig oder uff Facebook...

Doo hesch wiirglig rächt... und s bissige vo dr Faasnacht goot dorum verloore, well e jeede Angscht voor e Aazaig het und me nyt me bissigs saage bzw. schryybe deerf...
S git immer ebber, wo Mieh miteme Värsli uffere Ladärne oder eme Sujet het, aber das sin au maischtens gaar kaini Faasnächtler und daas find y eenter e schlächti Entwigglig. Au das iibermääsige Sicherhaitsthema wird zeme Zwang, wo me hitte het... siggs Waggiswääge, wo bald niene mee faare deerfe...

Theema "Chaise"...
Joo ebbe... das Thema mit de Ross vom letschte Joor... mein Gott... ok vellicht ischs sträng gnoo nit
unbedingt dr Hauptsinn im Lääbe vomene Ross, wäärend dr Faasnacht fir 2h duur dr Cortège z laufe... uff dr andere Syte laufe uff dr ganze Wält Ross an iirgendwelche Umziig mit und friener sin si sogaar in dr Armee gsii. Friener hets niemer gsteert und hitte isch gly alles uff Socialmedia z lääse und jeede ainzelne het duur daas e groossi Stimm. Mit Facebook-Yydrääg ka me hitte ganzi Masse beweege... y sag jo nit ass es falsch isch, aber d Gwichtig stimmt aifach nimme.

     
 

Kemme mer jetz no e weeneli zem privaate... was macht Di gligglig ?

  Marcus:

Bi dr Faasnacht ischs, wenns fäggt und harmoniert... und im privaate Lääbe sin s die guete Frindschafte und wenn d Balance zwische privaatem und em gschäftligge stimmt... y rais und fotografier seer gärn und das alles macht mi gligglig.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Marcus:

Mitem Louis Armstrong... y ha gärn Jazz und find dr Louis Armstrong e super Typ, obwool y aigentlig ebbe gaar nit vyyl waiss vonem...

Fir daas wär jo denn dä Oobe dänggt ;-)

     
 

E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait zrugg erinneret ?

  Marcus:

Y bi scho au e Naasetyp und ha seer vyyl Erinnerige, wo mit Grich verbunde sin... siggs e Parüm vonere Daame, wo n y emol aaghimmlet haa oder vyyle andere Grich...

Gits vellicht no e spezielle Gschmagg ?
Jo, dr Guugelhopf vo mynere Mamme, wo n y amigs zem Geburtsdaag griegt haa... dä hets genau 5x pro Joor gää (mer sin e 5-kepfigi Familie gsii) und het immer bsunders guet gschmeggt. My Babbe het e Innedekoratioonsgschäft kaa und y ha deert seer vyl gschafft und mitgholfe... und y ka mi an e spezielle Lyym erinnere, wo n-e aigene Gruch kaa het... dä isch seer dominant in dämm Gschäft gsii.

     
  Was wirdsch an Fraue nie verstoo kenne ?
  Marcus:

Wieso si immer saage, y haigs nit gheert... drby hänn si s gaar nit gsait... oder wie isch das gange ???
Si saage, si haiges gsait, aber y has nie gheert ? Aber y glaub, dä Dialoog hänn mer alli scho kaa ;-)

     
  Wär wurdsch am liebschte emol ins Dschungelcamp schigge ? (Sott ebber si, wo me kennt)
  Marcus:

Dr Trump und dr Erdogan solle zämme ins Dschungelcamp und Käfer frässe...

     
  No e baar Schlaagweerter, bitte numme mit aim Satz beantwoorte...
  Fraue- oder Männerclique ?

Y kenn numme Gschmischt... aber y meerg au, wie anderi Mieh hänn, wenn si numme s
aint ooder s ander sin... si hänn s in spezielle Sache guet, aber drfiir mitem Noowuggs mieh...

  Basel...

My Stadt, myni Haimat... doo fiil y mi wool...

  Ziiri...

Gits au ;-)

  Herbschtmäss...

Gniess y immer jeedes Joor und fang bim Jeffery's aa...

  Doo muess y unbedingt no aane in mym Läbe...

Y wott gärn emol no uff Chile...

  Klima-Gretel
(Greta Thunberg)...

Y finds Gschiss um die Persoon e weeneli schwiirig, s Thema find y aber eggsdreem wichtig fir uns und isch matschentscheidend... vellicht bruuchts esoone Figuur au zem d Lyt wachzrittle... si het ämel ainiges bewegt...

  Donald Trump...

Isch e n-Idiot und finds unglaublig, ass mer iiber dä reede muess... aber s git laider jo no anderi Idiote uff däre Wält.

Vyyle Dangg fiir Dyni Antwoorte