Gabriela Tanner, Voorträblerin bi dr Faasnachtsclique "Die Vertschubblete"
   
 

 

Gabriela, Du bisch nit numme im Voordraab vo dr Clique "Die Vertschubblete" underwäggs… sondern au grad no als Zuugsscheffin … was sin denn d Uffgoobe vonere Zuugsscheffin ?

  Gabriela:

Nit seer vyli... voor dr Faasnacht berait y alles voor und zwar eso, ass mer alles binand hänn...

Was denn so ?
Zem Byspiil ass alli Stäggeladärne am Moorgestraich brenne (s Liecht ;-)), halt so glaini Sache. Y bi au an
de Sitzige drby und lueg, ass mer an dr Faasnacht d Voorschrifte yyhalte... all daas liggt in mynere Verantwoortig.

...und luegsch au, ass Dyni Voorträbler richtig laufe...
Jo genau, aber mer sin do zimmlig logger...

Was haisst "logger" ?
Mer sin e loggeri Clique... mer halte n ys an d Reegle, leen aber au s 5 emol graad stoo... mer sin alli nimm die Jingschte und nämmes dorum e weeneli gmietliger ;-)

     
 

"Die Freuden und Leiden eines Vorträblers…" y has Gfiil, ass d Voordräbler immer e weeneli belächlet wärde… zue Unrächt wie n y main, well si seer wichtig sin fir e Clique. Welles sin denn "die Leiden" vomene Voordräbler ?

  Gabriela:

Bi uns wärde d Voorträbler je lenger wie mee gschätzt und s isch iine wichtig, ass mer ganz voorne laufe und Blatz frey mache. Mer sin jo nit esoone riisige Zuug und wenn ys e groossi Clique gryzt, denn mache mer ys halt aifach e weeneli braiter, ass mer guet duurekemme.

Und welles sin denn "die Leiden" ?
Also ych ha kaini Lyyde... y gniess es aifach.

Au am Moorgestraich, wenn Du Di duur die groosse Menschemasse duuredrugge muesch ?
Oder alli Wäg steen ?

Guet das ka schonemol närvig sii... aber y brobier halt immer frindlig z blyybe, aber mänggmol verjaggts aim aifach. Am schlimmschte sin d Kinder - sorry ass y das saage muess - vo Ussländer. Si versteen halt nit, ass me nit vyl gseen, well s Bliggfäld duur d Larve yygschrängt wird. Wenn denn d Kinder aim voor de Bai ummeduurne, denn wirds halt e bitz schwiirig... vor allem, wenn mer hintereme Waggiswaage laufe.
Das ka n y denn als "Lyyde" bezaichne.

Also am Cortège ? Guet dasch au gfäärlig...
Jo waisch, d Kinder stiirme uff dr Waggiswaage und lääse iiberall d Däfeli vom Boode n-uff, wärend miir
beraits scho mitem ganze Zuug kemme... und mer wänn jo kai Kind vertrampe und das quält mi amigs, vor allem wenns no ganz glaini Kinder sin. D Eltere luege denn aifach z weenig uff iiri Kinder, well si oft sälber Däfeli vom Boode uffheebe.

     
 

Und was sin denn "die Freuden" ?

  Gabriela:

Wenn y gheer, wie guet d Sujetumsetzig isch... oder halt aifach ganz voorne z laufe, dass find y seer scheen.

Bisch Du au emol im Spiil underwäggs gsii ?
Jä, y ha n emol pfyffe...

Wie lang hesch denn pfyffe ?
Y glaub sin 4 Joor gsii...

     
 

Wie erläbsch Du im Voordraab d Faasnacht ? Anderscht als im Spiil ?

  Gabriela:

Jä scho... y gsee vyl mee und find, ass ychs vyl gmietliger ha, als die andere im Spiil... s pfyffe isch seer aasträngend gsii fir mii... woby y saage muess, ass y jetz nit soooo musikaalisch gsii bi, vellicht hets mi dorum so gstresst. Wärendem pfyffe, ha n y nit wiirlig vyl mitgriegt vo dr Faasnacht... aber jetz ka n y ummeluege und d Faasnacht gniesse :-)

Hejoo, wärend die andere hinde krampfe... super ;-)
Aber zrugg ins Spiil wottsch nimm oder ?

Nai... mittlerwyle bi n y e iiberzigti Voorträblere...

     
 

Wie lang bisch Du denn scho bi de "Vertschubblete" und was gfallt Dir am beschte an däre Clique ?

  Gabriela:

1984 bi n y yydrätte und 1985 ha n y scho myni eerscht Faasnacht mit ihne gmacht. As y iiberhaupt zue de "Vertschubblete" koo bi, isch eyrem Binggi sy Verdienscht...

Ahjä ? Unsere Binggi ?
Jo genau... y ha zue sällere Zyt afoo lehre pfyffe und bi an dr Allschwiler Faasnacht underwäggs gsi. Aber
als Erwaggseni in Basel e Clique z finde, isch relativ schwiirig. Eyre Binggi isch bi de "Vertschubblete" gsii und het gfunde, ass y au in die Clique koo soll und eso ischs bassiert... speeter isch är denn in e Guggemuusig gange und ych bi bis hitte blybe.

Indressant... und was gfallt Dir am beschte in Dynere Clique ?
Mer hänn nadierlig au unseri Heehe und Dieffe kaa, aber hitte sin mer e gueti Truppe und zämmegwaggse.
Au die neye Mitgliider wo drzuekoo sin, hänn sich guet yygfiegt und basse guet zue n ys. Mer hänn nit
numme d Faasnacht im Kopf, sondern au s gsellschaftligge.

     
 

Isch fir Dii als Zuugsscheffin d Faasnacht eenter stressig, well Du immer iiberleege muesch, in welli Richtig laufe sollsch... oder sprichsch Di voorhär mitem Majoor ab ?

  Gabriela:

Jein... also voor dr Faasnacht nit. Fir dr Moorgestraich hets allerdings e neyi Route gää, do die alt Route unsere Aggdiive nimm gfalle het. Im Voorfäld bi n y aber mit 2 Gspäänli die ney Route abgloffe, well y mi im Glaibasel nit eso guet usskenn.

Aber die Route isch denn gää oder ?
Jo, mer staarte bim Waisehuus und denn muesch e bitz yydaile, well mer bi dr Mittlere Brugg nit im Stau stoo wänn... also mache mer zimmlig gly emol e Pause und zien dernoo duure bis zem Barfi.

Und am Cortège ?
Dr Cortège isch denn nadierlig gää...

OK das stimmt... und zOobe ?
Zoobe losst me mir aigentlig relatiiv vyyl Freyhaite und ka dorum mache, was y wott. Falls y kai Idee me ha,
gang y zem Tambourmajoor und sprich mi mitem ab... nit ass er e schnälle Marsch aasait, wärend ych dr Spaalebärg uffe wott. S ka au sii, ass emol ebber zue mir kunnt und e Wunsch aabringt... bi uns isch fascht alles machbaar ;-)

Also wenn dr Majoor sait, "mer geen jetz ins Glaibasel und blybe deert e Momänt", denn luegsch Du, wie iir deert iibere kemmet und wie lang iir im Glaibasel blyybet...
Im Grund gnoo laufe mer am Mittwuch vom Cliquekäller ins Glaibasel, drille deert e Rundi, dringge n-ebbis und laufe denn wider zrugg ins Groossbasel. Mer hänn ebbe au Lyt, wo nit eso gärn ins Glaibasel geen... well mer aigentlig e Groossbasler Clique sin.

Aber Du bisch jo ainewäg ständig am iiberlegge wo duurelaufe muesch, also esoooo entspannt bisch denn au nit im Voortrab oder ?
S isch underschiidlig... mänggmool stressts mi iiberhaupt nit und mänggmool stressts mi seer staarg. Waisch,
y sag nie "jetz geen mer deert aane", sondern "y ha vooooor deert aanezgoo", s ka jo underwäggs eso vyyl
bassiere, zB. Stau, e Guggemuusig macht grad e Blatzkonzärt, oder wie au immer... si sin nit immer z friide
mit mir, aber das gits halt amigs

     
 

Wie bisch Du denn zue Dym Jebli als Zuugsscheffin koo ?

  Gabriela:

Wo emol vor etliche Joore die doomoolig Zuugsscheffin schwanger woorde n-isch, ha n y dä Job 1x iibernoo. Zue sällere Zyt, sin d Cliquemitgliider no jinger und schwiiriger gsii... y bi also am
Faasnachtsdonnschtigmoorge am 04:00 brielend haim gange und ha mer gschwoore "NIE MEE". Wo denn speeter unseri langjeerigi Zuugsscheffin uffgheert het, hänn si mi gfroggt, ob y dä Job iibernää wurd... y ha denn gsait "OK y brobiers 1 Joor und wenn s mynere Seel nit guet duet, mach ys nimm".

Anschyynend sin alli lieb gsii in dämm Joor ;-)
Si sin alli Ängeli gsii ;-)

Iir hänn jo au e Nummeregirl gäll ?
Jo genau, das mach y au no gärn... mer hänn emol e Faasnacht mitem Sujet "Mir sin flexiibel" kaa und deert isch als Gag e Nummeregirl drby gsii, wo immer d Märsch zaigt het und das hänn si so toll gfunde, ass mer das byybhalte hänn. Aber numme daagsiiber... zOobe nit.

Isch no aasträngend oder ? Streggsch nit aifach d Nummere uffe und die solle gfelligscht luege ;-)
Jo scho... me muess ständig usse umme und bis ganz hintere laufe, denn wider fiire zem Dambourmajor und noonemol uffeheebe.

Do draag y lieber myni Posuune ;-)

     
  Gits e witzigi Situatioon, wo Du emol an dr Faasnacht erläbbt hesch ?
  Gabriela:

Jo, si hänn mi emol versegglet... uffem Minschterblatz hänn si gfunde, ass si mir jetz nimm noochelaufe mien.
S isch denn no e Momänt gange, bis mers gmeergt hänn ;-)

     
 

Was beditet Dir d Faasnacht ?

  Gabriela:

Isch no schwiirig... y ha aifach dr Blausch draa und isch e scheeni Draditioon. Y finds aber au gsteert, ass
me do 3 Daag ummerennt, aber y gniesses au.

     
 

Wenn foot bi Dir d Faasnachtsstimmig aa ?

  Gabriela:

Dasch underschiidlig... mänggmol kunnt d Faasnachtsstimming scho an Wienachte und mänggmool au eerscht am Faasnachtsmäntigmoorge...

     
  Faasnachtsmäntigmoorge... s isch 03:59 und d Laarve isch dunde... dr Countdown lauft... was goot do in Dir voor ?
  Gabriela:

Zeerscht bi n y emol ganz still... denn goots loos und denn kemme zeerscht emol kuurz d Drääne... dernoo laufe mer loos. Y find das aigentlig fascht dr scheenscht Momänt.

     
  Het sich d Faasnacht im Geegesatz zu friehner veränderet ? Und wenn jo, in welli Richtig ?
  Gabriela:

Y find, ass d Faasnacht frächer woorde n-isch...

Mit spitziger Zunge mainsch ?
Nai, d Lyt sin frächer und respäggtlooser geegeniiber de Faasnächtler woorde... aber d Faasnächtler dailwyys underenand au und do ha n y mänggmool scho myni Mieh demit.

     
  Was macht Di Gligglig ?
  Gabriela:

Myni Familie... y ha jo praggdisch 2 Familie...

2 Familie ?
Jo... em Binggi syni Familie isch quasi myni 2. Familie woorde... y kenn die mittlerwyyle scho so lang ;-)

     
  Welles isch Di absoluts Highlight gsii im 2019 ?
  Gabriela:

Uffem Wäg noo Hamburg, ha n y mi runde Geburtsdaag gfyyrt... und nadierlig in Hamburg sälber au
noonemol ;-)

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Gabriela:

Mitem Roger Federer, aber das saage woorschyns alli oder ?

Genau ;-) drby gäbs no soo vyyl anderi... aber är isch nadierlig e tolle Mensch zem dräffe, kai Froog... y
hätt ihn gärn emol als Interviewpartner fir unsere Fasiländer ;-)

"Sag niemals nie"... y ha ihn aimol mit syne Kinder uffem Petersblatz gsee, bi nadierlig nit aane... aber wie n är sich so nadierlig duur d Lyt beweggt, isch scho toll... und ass är amigs an FCB Match goot, find y au toll.

     
  Wär wurdsch am liebschte emol ins Dschungelcamp schigge ? Sott e Perseenligkait sii...
  Gabriela:

Dr Donald Trump...

Und wiesoooooooo ?
Well y dä hool find... är närvt mi, saage mers esoo.

     
  Wenn platzt dr Gabriela emol dr Kraage ?
  Gabriela:

Wenn ainzelni Lyt uff mer ummehagge oder wenn me mi stresst... denn muess y immer uffbasse, ass es amänd nit die falsch Persoon drifft.

Die Persoon, wo denn s Fass zem iiberlaufe bringt, gäll ?
Jo genau.

     
  Was wirdsch an Männer nie verstoo kenne ?
  Gabriela:

Do gits ebbis, wo n y zimmlig doof find...

Aha... und das wär ?
Wieso mien d Männer in dr Baiz immer d WC Diire offe loo ?

D WC Diire ?
Jo, oft stoot in de Baize die WC Diire vom Männer WC offe und das ka n y nit verstoo.

Äh... okeyy :-)

     
  No e baar Schlaagweerter, bitte numme mit aim Satz beantwoorte...
  Kino oder Theater ?

Baides sälte bis nie...

  Basel... My Dehaime...
  Ziiri... Naja...
  Gummiduume...

Bruuch y nit.

Isch das nit numme e Klischee ?
Also miir hänn e Voordräblerin, wo e "Gummiduume" bim Zeedel verdaile aahet, aber ych bruuch das nit.

  Heerbschtmäss... Numme no Wyymäss ;-)
  Klima Gretel (Thunberg)...

Y find die e bitz doof...

  Donald Trump...

Ooberdoof...

Vyyle Dangg fiir Dyni Antwoorte