Hptm. Guido Sommer vo dr Basler Bolizey, Dienschtstellelaiter Beziirk Groossbasel und Gsamtyysatzlaiter vo dr Basler Faasnacht
   
 

 

Zem aafoo zeerscht emol e grundsätzligi Froog... wie wird me denn Bolizischt und wie gseet dr Ussbildigswäg bis zer Priefig uss ?

  G. Sommer:

Zeerscht kunnt sicher emol die inneri Yygääbig, ass me dä Bruef mache wott. Me muess aber au sage,
ass dä Bruef seer vyylsytig und spannend isch... aber au Soziaalkompetänz vorussetzt. Nadierlig gits
au seer aaspruchsvolli und emotionaal belaschtendi Momänt, wo me die aigeni Duurhaltefähigkait - oder au Resiliänz - aaluegt
.

Gits wärend dr Ussbildig au Situatioone, wo me an syni Gränze kunnt ? Y main, me ka das jo nit lehre... entweeder isch me belaschtbar oder nit...
Jä dasch eso und mer schaffe nadierlig scho mit psycholoogische Aasätz zem uusezfinde, wie belaschtbaar dr Bolizischt isch und wo n-är sälber an syni Gränze kunnt... das wird mit Rollespiil oder Rollesituatioone daargstellt und in dr Grundussbildig trainiert.

Welles sin denn d Vorussetzige oder Raamebedingige, ass me dr Lehrgang bsueche daarf ?
S Mindeschtalter isch 21 Joor, me muess Schwizer Biirger sii oder mindeschtens d Niiderlassigsbewilligung "C" haa, e abgschlosseni Bruefslehr oder e heechere Schuelabschluss, nadierlig e yywandfreye Leymund haa, kaini Yydrääg im Stroof- und Betryybigsregischter, mindeschtens 160cm grooss sii, psychisch und physisch wiiderstandsfähig und sott sich guet in mindligger und schriftligger Aart ussdrugge kenne.

Und denn kunnt d Uffnaamepriefig...
Genau... denn kunnt d Aignigspriefig und die beinhaltet e Spoorttescht, e Ditschtescht, e Intelligänztescht, e Delifoninterview und Rollesituatioone, wo me d Belaschtbaarkait uusefinde will... und ganz am Schluss kunnt s aigentligge Voorstelligsgspreech.

Okey... dasch aber zimmlig aaspruchsvoll...
Jo, dasch esoo... und wiirglig ganz am Schluss nooem Voorstelligsgspreech, kunnt no die
vertrauensärztliggi Untersuechig... denn het me s ändlig gschafft ;-)

     
 

Denn goots ändlig loos... wie lang goot die Ussbildig ?

  G. Sommer:

D Grundussbildig goot 12 Moonet und findet in dr Bolizeyschuel in Hitzkirch statt, wo si die theoreetische und taggdische Grundlaage lehre. Derno kemme si in Lehrverbund vom Kantoon yyne, wo si die kantonaale Gegääbehaite lehre und deert hänn si denn au scho die eerschte praggdische Yysätz... aber nadierlig no
in dr Grubbesteergi. Noo 12 Moonet im Lehrverbund, kunnt denn d Fähigkaitspriefig, wo si denn s
Zertifikaat zem Bolizischt/in griege.

Dernoo het me s ändlig gschafft und alli Priefige bestande... wie goots denn wyter ?
Noo dr Priefig isch me fir 24 Moonet underwäggs und macht gwissi Pflichtmoduul... das haisst, me isch fir
e gwissi Zyt imene Rotatioonsverfaare bi dr Verkeersbolizey, bi Speziaalformatioone und bi dr Sicherhaitsbolizey im Yysatz. Noo dääne 2 Joor, ka me sich denn wyter spezialisiere, wenn me das gärn wott und Aignigsabkläärige mache loo.

     
 

Also wo n y vorhäär in Kannefäldboschte yynekoo bii, ha n y ganz vyyl jungi Bolizischte und Bolizischtinne gsee... wie gseets denn generell uss mitem Noowuggs bi dr Basler Bolizey ?

  G. Sommer:

Guet, dasch immer e Theema... d Basler Bolizey - wie au vyli anderi Bolizeykorps - kämpfe nadierlig immer um guete und kompetänte Noowuggs. Friener ischs no esoo gsii, ass me generatioonsiibergryfend
Bolizischt/in woorde n-isch, das haisst. dr Unggle, Babbe, Soon, etc. sin scho Bolizischt gsii... aber hitte isch das nimm eso. Mer sin seer aggdiiv in dr Aigewäärbig und momentaan lauft grad e tolle Clip uff Facebook / Instagram, mitem Titel
"Die Entscheider". Deert goots drumm, ass dr Bolizischt/in innert kuurzer Zyt, e n-Entschaidig felle mien, ass si zem Erfolg kemme... und s zaigt au d Attraktivität vo dr "Bolizey" und
iiri Vyylsytigkait. Mer hoffe nadierlig, ass mer eso die junge Lyt uffwegge und fir ys gwinne kenne.

Iir sin jo au scho vom Schwizer TV Sänder "3+" beglaitet woorde oder ?
Jä das stimmt, mer hänn in de letschte 2 Joor in dr Serie "Notruf - Retter im Einsatz" e seer aggdiive Part kaa und dasch wiirlig e n-Erfolgsgschicht gsii... "3+" het Rekoordyyschaltquoote kaa und isch fir uns nadierlig e tolli Gschicht gsii.

     
 

Wie lang sin Sii denn scho bi dr Bolizey ?

  G. Sommer:

Amene Gebuurtsdaagsfescht vomene guete Frind ha n y mi entschlosse, d Bolizeyschuel z mache und
bi jetz im 28. Dienschtjoor.

Was hänn Si denn vorhär gmacht ?
Y bi glehrte Carrosseriespängler gsii...

28 Joor isch e langi Zyt... wenn Si jetz die hittigi Zyt mit friener verglyyche... het sich dr Bruef vom Bolizischt/in veränderet ?
"Die ainzigi Konstanti isch d Veränderig..." und das bezieht sich nadierlig au uff dr Bolizeybruef. S isch seer wichtig, ass mer in dr gsellschaftlige wie au in de gsetzlige Veränderige flexibel sin. Dr Apparaat "Bolizey" het sich fundamentaal veränderet... zB. in dr Oorganisatioon, in dr Struktuur, weeniger Standoort drfiir
mee Effiziänz, etc. aber do sin mer nit elai, das goot alle andere Kanteen genauso. D Gsellschaft het sich nadierlig au veränderet, hit isch en Bolizey Offizier, e Manager und Psycholoog, muess d Mitarbaiter understitze, Beziehige pfläge, Wärtschetzig bringe... aber au klaari Ziilvorgoobe gää und dasch wiirglig essenziell wichtig.

     
 

Was macht fir Sii d Faszinatioon "Bolizey" uss ?

  G. Sommer:

Die Unberächebaarkait in Bezuug uff dr Dienschtalldaag... me waiss aigentlig nie, wie sich dr Daag entwigglet und die Unberächebaarkait isch seer spannend... aber mänggmool au seer herussfoordernd. D Faszinatioon isch sicher au, ass mer innerhalb vo dr Oorganisatioon seer vyyl Meegligkaite hänn, zem sich perseenlig wyterzentwiggle. Y sag immer, wenn me 15 oder 20 Joor bi dr Schuggerey schafft, denn het me au e guete Ruggsagg... siggs mit Erfaarige, die vyylsytige Ussbildige oder d Fierigslehrgäng, wo me gmacht het... s isch e Läbensschuel.

Ischs Iire Draumbruef ?
Jä... scho in mynere Kindhaitszyt isch dr Bolizischt e Perseenligkait gsii... me het anem uffegluegt, het e gwissi Eerfuurcht aber kai Angscht kaa... und me het en bestuunt. Hitte isch das nimm ganz eso und dr Bolizischt wird anderscht aagluegt... aber sällmol het mi das seer beyydruggt und Jä... s isch my Draumbruef und aini vo de beschte Entschaidige in mym Läbe gsii... y bi stolz druff, e Basler Schugger sii z deerfe :-)

     
 

So, jetz schwängge mer emol zer Faasnacht und do nimmt mi nadierlig wunder, wie Si als Bolizischt d Faasnacht erlääbe...

  G. Sommer:

Y bi syt 2014 Gsamtyysatzleiter vo dr Basler Faasnacht und die "3 scheenschte Dääg" sin so quasi s
Finaale... aber s haisst fir mii au immer "Noo dr Faasnacht, isch voor dr Faasnacht". Fir mii foot d "Faasnacht" scho vyl friener aa und zwoor mit dr guete Zämmenaarbet mitem Comité, mit dr BVB, mit dr Rettig, etc. wo s nadierlig ganz vyl Absprooche bruucht. Ych sälber bi kai aggdiive Faasnächtler, aber d Basler Faasnacht hets mer scho aadoo... uff dr ainte Syte d Draditioon wo pfläggt wird und uff dr andere Syte Basel, wo me in däre Zyt imene positiive Ussnaamezuestand erlääbe daarf... und daas eerscht no bi
dr Ussiebig vo sym Bruef... was gits Scheeners.

     
 

Isch s Thema "Terror" bresänt an dr Faasnacht ?

  G. Sommer:

Mer sin in dr Schwiz - und bsunders au in Basel - gliggligerwyys voor sottige schregligge Aaschleeg verschoont woorde und in dämm Zämmehang, dusche mer ys dääglig mitem nationaale
Noochrichtedienscht uss und beurdaile laufend d Laag... eso kennte mer ziilgrichtet die richtige Maassnaame umsetze, falls es sowyt koo wurd... aber y ka Iine saage, ass unseri Mitarbaiter dissbeziiglig beschtens ussgrischtet und au entsprächend ussbildet sin.

     
 

E Bolizischt isch jo immer e danggbaars "Opfer" fir d Waggis... wie isch das fir Sii am Cortège, wenn me reegelmässig mit Räppli yydeggt wird ? Und wie isch Eyri Aggzeptanz in dr Beveelkerig ?

  G. Sommer:

Me gspiirt scho, ass dr Basler Schugger zer Faasnacht gheert und e Bestanddail devoo isch. Dr Basler Schugger daucht reegelmässig in Sujet's uff - mer sin scho gspannt uff d Tesla-Sujet's - und wird au gärn gsee an dr Faasnacht... und dasch au unser Ziil. Die gueti Sicht- und Aasprächbaarkait inmitte vo däre Menschemasse wie Familie, Kinder, Faasnächtler, etc... dr Schugger gheert drzue. S isch ys au ganz wichtig, ass die Sozialisierig zwische unsere junge Mitarbaiter/inne und dr Beveelkerig amene Cortège oder Moorgestraich stattfindet.

Aber me muess au e Stigg wyt e haarti Hutt haa... vor allem zOobe, wenn d Lyt scho e weeneli alkoholisiert sin oder ? Woby s jo immer Gränze git, ob e Spruch jetz luschtig isch oder nit... also als Bolizischt muess me scho ebbis yystegge kenne...
Jä dasch esoo... y bi au scho als junge Bolizischt uff e Waggiswaage uffezooge woorde und me het mer myni Schulterpatte "ussgleent"... im eerschte Momänt bi n y denn scho e weeneli gfruschtet gsii, aber eenter ab mym Verhalte, ass y das iiberhaupt zuegloo haa und nit e Schritt wyter hinte gstande bi.
Y glaub, ass es e Lernfäld isch, wo me sich als Bolizischt im Klaare sii muess... me begit sich sälber in Situatioone, wo me denn ussbaade muess. D Verhältnismässigkait isch wichtig, dr Bolizischt soll au ebbis yystegge kenne... nadierlig gits iirgendwenn e rooti Gränze, wo iiberschritte woorde n-isch... aber denn ischs wichtig, ass me als Unifoormierte frindlig aber diräggt reagiert und Rueh bewaart. Mer wänn jo nit als Spiilverdärber uffdrätte und sensibilisiere dorum au unseri Mitarbaiter/inne voorem Yysatz an dr Faasnacht.

E Spruch isch jo nit immer grad e Spruch...
Y sags emol esoo... s isch e n-Underschiid, wenn e Faasnächtler e Spruch keye losst, oder e
"n-erläbnisorientierte" und mänggmool au alkohoolisierte Jungerwaggsene...

"Erläbnisorientierte"Jungerwaggsene... dä isch jetz aber ganz guet :-)
Jo dasch wiirglig ebbis, wo mer unser Augemeerg druff hänn... d Faasnacht wird denn schwiirig, wenn mer
2 underschiidliggi Indrässensgruppierige uffem Blatz hänn, wie zem Byspiil s "Gläbbergässli"
(Anm. Grienpfoolgass).

S "Gläbbergässli"... e Brennpunggt...
Jo dasch e Klassiker mit 2 verschiidene Indrässensgrubbe... zem aine hänn mer die, wo saage "Mer hänn s glyche Rächt doo z sii, wie d Faasnächtler au" und uff dr andere Syte hänn mer d Faasnächtler, wo saage "Wenn miir duurelaufe, denn bruuche mer Blatz" und dämm hänn mer au Rächnig drait. Sobalds yydungglet und dr Alkohoolpeegel stiggt, zaige mer Unifoormpresänz. Mer hänn im Voorfäld scho e huffe Gspreech am runde Disch gfiert und s wird bauliggi Veränderige gää. Drzue kunnt, ass s WLAN noo uuse abgstellt wird und s git e Communiqué mit Verhaltensreegle... s brucht vo alle Syte e guete Wille, aber schliesst nadierlig nit uss, ass mer am Änd ainewäg no "Kraagenaarbet" hänn.

*lach*... "Kraagenaarbet"... aber die gits jo immer...
Die hänn mer jeedes Joor... aber s isch iiberschaubaar.

     
 

Gits e witzigi Aneggdoote, wo Si emol an dr Faasnacht erläbt hänn ?

  G. Sommer:

Au als Yysatzlaiter isch me an dr Faasnacht z Fuess underwäggs und bespricht sich mitem Comité. Wo n y also uffem Wäg deert aane gsii bi, isch mer e glaine Bueb als Waggis verklaidet, mit dr Laarve underem
Aarm und ganz groosse Auge entgeege koo... är het mer gsait, ass är syni Eltere verloore haig. Y ha ihn denn an d Hand gnoo und kuurzi Zyt speeter hänn mer denn syni Eltere wider gfunde. Nodämm sich die groossi Uffreegig wider gleggt het, streggt mer dä Bueb e Blüschbärli entgeege, wo n är ussem Waggissagg gnoo het und sait "Liebe Bolizischt, dangge ass Du my Mamme und my Babbe gfunde hesch"... dasch jetz vellicht nit e witzigi Situatioon gsii, aber ganz sicher e seer scheeni
.

     
 

Denn kemme mer doch grad zem Theema "Verlooreni Kinder yysammle"... wie grooss isch das Thema an dr Faasnacht ?

  G. Sommer:

"Verlooreni Kinder" isch e Duurthema und letscht Joor hänn mer 29 Kinder vermittle kenne. Entweeder het unseri Patrouille besoorgti Eltere wo saage "Y find my Kind nimme..." oder si hänn s Kind grad. Wenn Eltere e Kind sueche, gits e "Subito" Mäldig iibere Fungg und 3/4 vo de Fäll, ka me d Eltere und s Kind in seer kuurzer Zyt wider zämmefiere.

Und bi de andere Fäll ?
Bi de andere Fäll kemme d Kinder uff e Spiegelhoof-Boschte, wo si professionell betreut wärde, bis mer d Eltere gfunde hänn... aber die maischte Kinder wärde scho "uff Blatz" vermittlet. Was ys seer hilft, isch dä Kinderbadge mitem "Pätty" druff - unsere Bolizeyhund - wo mer verdaile und me denn dr Namme vom Kind, wie au d Delifonnummere druffschrybe ka. Dasch e tolli Sach und griegt me uff jeedem Bolizeyboschte und au bim Comité.

     
 

Wenn Si de Lyt e Faasnachtsmitdailig mit uff e Wäg gää kennte... was wär das fir aini ?

  G. Sommer:

D Mitdailig vo dr Basler Bolizey isch:
Mit mee Toleranz zwische de Faasnächtler und de Nit-Faasnächtler, kennt mer vyylem ussem Wäg goo... bsunders an Oort, wo s temporär Menschemänge git und Brobleem uffdauche kennte. Mit e weeneli guetem Wille und Fingerspitzegfiil, kennt me ganz vyyl uusehoole, ooni ass es immer grad d Bolizey bruucht.

Welles sin denn die 3 goldige Reegle vomene Bolizischt an dr Faasnacht ?
Ganz wichtig isch, ass me d Uffraagstreyi immer voor Auge het, egaal was bassiert... jeede Bolizischt/in muess wisse, was syn Uffdraag isch. Denn isch e frindliggs, aber bestimmts Uffdrätte enorm wichtig... grad in emotionaale Situatioone wo s no Unbedailigti het... und denn isch au no wichtig, ass me e Fuesspatrouille eso wählt, ass si guet sicht- und aasprächbar isch.

     
 

Sin Si au emol privaat an dr Faasnacht underwäggs ? Und wenn jo, kenne Si sich entspanne und d Faasnacht gniesse, oder isch ai Aug ständig am iiberpriefe vo dr Laag ?

  G. Sommer:

Jä nadierlig bi n y au emol privaat underwäggs und gniess die scheene Momänt vo dr Faasnacht, zB. bimene Bsuech imene Cliquekäller oder gang mit mynere Familie s Guggekonzäärt go loose. Nadierlig ka me nit ganz abschalte und luegt e weeneli "brueflig" umme, aber y ka mi scho au seer entspanne und d Faasnacht gniesse.

     
 

Was beditet Iine d Fasnacht ?

  G. Sommer:

D Faasnacht isch fir mii mit vyyl Draditioon verbunde und wird au immer vo wältpolitische, haikle Theme beglaitet, wo duur d Faasnacht nit zensuriert wärde sott, sondern me ebbe die haikle Theeme als Sujet ussspiile daarf... und genau dasch esoone ungschriibes Gesetz vo dr Faasnacht, wo n y ganz toll find.

     
 

Wenn foot bi Iine d Faasnachtsstimmig aa ?

  G. Sommer:

D Faasnachtsstimmig kunnt bi mir am Sunntig voor dr Faasnacht am 23.30, wenn y an myni Lyt d Befählsussgoob fir dr Moorgestraich mach. Dasch dr Momänt, wo mer die letschte Absprooche mitem Comité mache und dasch denn au dr Momänt, wo s langsam aafoot. Sobald am 04:00 s Liecht abgoot, bi
n y in dr Yysatzzentraale, wo e Keerzli brennt... und dasch esoone stimmigsvolle Start in d Basler Faasnacht.

Geen Si au an Voorfaasnachtsveraastaltige ?
Wenn s Comité iiri Meediekonferänz in dr Baselditsche Biini macht, sitz y in dr Reegel im Bublikum und beantwoort Frooge zer Sicherhait. Y gang aber au emol ins Drummeli oder Charivari.

     
  Was macht Si gligglig ?
  G. Sommer:

Wenn y mi Job richtig mache kaa... y gsee mii als glains Zaanreedli imene groosse Uhrwäärg... wenn vonere Leesig, wo n y mitentwigglet haa, e gueti Ruggmäldig kunnt... denn macht mi das gligglig.

Und Privat ?
Myni Familie... und dasch s Wichtigschte in unserem Bruef, ass me e "grieni Insle" het. Y ha die "grieni Insle" nit immer kaa... zB. wo myni Dochter voor e baar Joor schweer grangg woorde n-isch und s isch
seer schweer wenn me meergt, ass die "grieni Insle" nimm dehaime n-isch, sondern am Aarbetsoort, wo
me syni Kolleeginne und Kolleege het... und genau die Erfaarig ha n y gmacht... si isch unbezaalbaar
gsii und het mi präggt... und fir die Erfaarig bi n y enoorm danggbaar.

     
 

Welles isch Iir absoluts Highlight gsii im 2019 ?

  G. Sommer:

D Yyfierig vom Tesla... bevor das Auto iiberhaupt uff dr Strooss gsii isch, hänn mer ys ainiges miesse n-aaloose und y due mi jetz nit explizit uff das yyloo, das stoot mir nit zue... aber y ka Iine saage, ass ych s wiirglig geniaal find, ass d Kantoonsbolizey Basel-Stadt esoone Inovatioonsgaischt und au Muet bewyyse het. Das Auto isch jo wältwyt bi uns zem eerschte Mool als Patrouillefaarziig yygsetzt woorde und die Diskussioone hänn ainiges an Närve und Emotioone koschtet... aber y finds e tolli und inovatiivi Sach.
Denn ha n y no e Hundestaffle iibernää deerfe und do ha n y e riise Fraid... y find dr Yysatz vomene
4-Bainer e wunderscheeni Sach und e Hund verstoot ain immer.

     
  Mit wellere beriehmte Perseenligkait wurde Si gärn emol e scheene Oobe verbringe und aifach numme plaudere (ka au scho gstoorbe sii) ?
  G. Sommer:

Mitem Louis de Funès... mit synere Sälbschtkoomik schafft är s, d Lyt z begaischtere. Är het emol gsait "Lachen ist für die Seele dasselbe, wie Sauerstoff für die Lungen" und das drifft vellig uff mii zue.
Y sag immer... in dämm Momänt, wo mer im heggschte Konfliggtmomänt dinne sin und s denn schaffe, e Entspannig yynezbringe - vellicht au duur e Sälbschtrefleggdioon und me au emol iiber sich sälber lache
kaa - denn hänn mer aigentlig scho gwunne.

     
  Was wärde Si an Fraue nie verstoo kenne ?
  G. Sommer:

Iiri Faszinatioon an Schueh... und worum me eso vyl Schueh haa muess, ha n y immer noonig ganz verstande ;-)

Verstand y au nit ;-)

     
  No e baar Schlaagweerter, bitte numme mit aim Satz beantwoorte...
  Velo oder Tesla ?

Mer bruuche baides...

  Basel...

E n-Oort mit Draditioon, Foortschritt, Inovatioon und Läbensqualitäät, wo alles wunderbaar zämmespiilt... und nadierlig die scheenschti Stadt am Rhy...

  Ziiri...

Spoortligge Geegner, aber au kameraadschaftliggi Aarbetskolleege, wo mer vyyl vonand lehre kenne...

  Herbschtmäss...

Näbscht dr Faasnacht und em Vogel Gryff, aini vo de scheenschte und draditionellschte Veraastaltige. Y lieb d Atmosphäre an dr Heerbschtmäss, d Liechter, dr Gschmagg... aifach alles...

  Basler Bolizey...

Isch zem "aalänge" doo... d Basler Bolizey leggt au groosse Wärt uff Transparänz, Biirgerneechi und Inovatioon... und versuecht immer verhältnismässig z handle...

  Doo muess y unbedingt no aane in mym Läbe...

Vo mym alte Bruef, ha n y immer no Benziin im Bluet und mii fasziniert die amerikaanischi Weschtkischte, Kalifoornie, etc. und doo wott y gärn noonemol aane und miteme alte Ford Mustang duur d Geegend faare.

Vyyle Dangg fiir Iiri Antwoorte