Raere Waggis

	Martin Brogle - E Waggis vo dr Waageclique "Raere Waggis"

Syt 52 Joor gits beraits d Waageclique "Raere Waggis"... het sich d Aazaal vo de Mitgliider im Geegesatz zu friener veränderet ?

Martin:

Friener sins numme 8 Mitgliider gsii, aber hitte sin mer mittlerwyyle 10.

Numme Männer ? Oder sin wyybligi Mitgliider au e Thema ?
Jo mer sin numme Männer... d Fraue deerfe denn an dr Waagevernissage drby si ;-)

An dr Waagevernissage bruuchts jo au e Frau...
Das stimmt... s wird denn immer e Waage-Gotte ussgsuecht, wo unsere Waage dauft und ys alles Gueti fiir d Faasnacht winscht.

Beglaitet si denn eych au e weeneli an dr Faasnacht oder isch das aifach e Sunntig-voor-dr-Faasnacht-Uffgoob ?
Nadierlig isch unseri Waage-Gotte immer ebber, wo au mit unserem Verain verbunde n isch. Wärend dr Routefaart am Faasnachtsmäntig, gits immer 4x e Pause wo s ebbis z dringge git und doo isch si nadierlig immer drby.

Wie lang bisch denn scho bi de "Raere Waggis" ?

Martin:

Y bi syt 33 Joor drby, aber daas Joor wirds myni letscht Faasnacht sii... denn bi n y 70 und e
alte Sagg ;-)

Und wie bisch zue de "Raere Waggis" koo ?
Dasch no eluschtigi Gschicht gsii... mer hänn sällmol e Aggdivmitgliid kaa, wo "Hongkong-Waggis" ghaisse het...

"Hongkong-Waggis" ?????
Joo, dä isch jeedes Joor vo Hongkong uff Basel an d Faasnacht koo... dä het deert im Transpoortwääse gschafft. Im 1986 het är aber nit an d Fasnacht kenne koo und ych bi denn fir iin yygsprunge, was nadierlig fir mii nit aifach gsii isch, aber y ha mi guet gmetzget... und bi sällmol no motiviert gsii.

Und jetz bisch Faasnachtsmied ?
S isch aifch nimme s glyyche...

Findsch denn, ass sich d Faasnacht im Geegesatz zu friener veränderet het, oder ischs vellicht wägge dr keerperligge Aasträngig, ass nimme maggsch ?

Martin:

Nai, d Faasnacht het sich veränderet... me gheert numme no "Hey Waggis, hey Waggis man, hey gimmer ebbis man...", oder si kemme an Waage und stregge aim die groossi Däsche entgeege, oder wenn me ime Kind ebbis git, wirds em grad uss de Händ grisse und do ka n y mi gottsjämmerlig uffreege, ass Erwaggseni Persoone eso bleed sii kenne... esoo bi n y aifach nimme motiviert.

Und wie gseets mitem intrigiere uss an dr Faasnacht ?
Friener isch me am Keeruss in "Gryffe" go leue und im "Leue" go gryffe ;-). Y ha no erläbbt, ass me in de Baize no intrigiert het und vo de Lyt isch au no Andwort zrugg koo... und hitte wenn me ebbis vom Waage aaberieft, wird me numme no bleed aagluegt. Zem groosse Dail sins Ussländer, wo gaar nyt versteen.

Het sich dr Umgangsdoon uffem Waage, wie au unde uff dr Strooss veränderet ?
also wenn me zue ebberem sait "Ou bisch in de Feerie gsii ? Du hesch so scheen bruuni Zeen..." find y das no ok, das daarf me saage... aber flueche wie "gopferdammi" find y gheert weder uffe Waage, no unde uff d Strooss.

Wär fir Dii au emool e anderi Gruppierig en Optioon wie zB. drummle, pfyffe oder sogaar e Guggemuusig ?

Martin:

Nai, absolut nit...

Und wieso nit ?
S isch nie e Thema gsii, well me deert laufe muess und das ha n y nie welle... uffeme Waage wird me halt
gfaare ;-) Abgsee devoo het mi drummle und pfyffe nie graitzt.

Gits e witzigi Anekdoode, wo n emol erläbt hesch ?

	Martin:	S git nadierlig immer witzigi Sache, wo me erläbt... mer hänn emool "Tattoo-Abziehbildli" mache loo... immer am Faasnachtsmittwuch geen mer in "Sutter Begg" bim Wettstaiblatz und wenn d Scheffin vom Laade zue n ys kunnt, wird iire im Dekoltee e "Tattoo-Abziehbildli" aabrocht, quasi e "Tattoo" und dasch immer e Gaudi. Jede neye Raere-Aawärter muess das Prozeedere an de Sutter-Mitarbaiter duurefiere ;-)

Gits au unagnäämi Situatioone uffem Waage ? Zem Byspiil en Orange-Fählwuurf ?

Martin:

Nai aigentlig nit, me isch jo guet versicheret. Me darf nit vergässe, unser Sichtfäld under dr Laarve isch seer yygschränggt und denn kas halt scho ne mool bassiere, ass mer ebber drifft und e Brille kaputt goot... aber do mache mer kaini groosse Diskussioone und reegle denn das au grad... fir daas het me e Versicherig.

...und wie gseets mit Schyybe n uss ? Hesch scho ne mool aini braicht ?
Nai... y schiess kaini Orange in dr Geegend umme, y find das bleed... y schigg d Orange em Empfänger zue.

... soo lang, bis me si nimm fange ka oder ?
Du s git Waggis, wo dr Empfänger eso lang mit Orange yydegge, bis dä die nimm heebe kaa, aber y find das numme bedingt luschtig... well si denn alli uffem Boode lande und d Lyt si nit emol me ufflääse.

... und Lyt uffe Waage zieh ?
Bi de "Raere Waggis" gits ai Deviise... mer ziehn kaini Fraue uffe Waage, näbscht dämm ass es e Kinderstuube
n isch, ischs au gfäärlig.

Was und wievyyl an Materiaal wird anere Faasnacht verbruucht ?

	Martin:	Mer sin jo e ginschtigi Clique, unsere Byydraag isch 800.-- und inbegriffe n isch s Goschdym, d Laarve, 2 Segg Räppli pro Nomidaag, 5kg Dääfeli pro Nomidaag, 2 Kischte Orange, 10 Strüssli und e Schachtle Mimoose. Wenn me will, ka me no Materiaal zuekaufe... ych zem Byspiil kauf no zämme mitem Kolleeg e 2. Schachtle Mimoose und e baar scheeni Roosestrüssli.

Wenn foot dr Waagebau aa ? Isch das fix feschtgleggt oder hängt das vom Sujet ab ?

Martin:

Näggscht Samschtig findet unsere eerscht Waagebau-Samschtig (Anm. 19.10.2019) statt.

Scho ? Wow...
Joo, ab jetz jeede 2. Samschtig... wobyy ych numme fir d Logistik, dh. yykaufe und koche vom Midagässe
zueständig bii... wott jo nit, ass die arme Kärli mit leerem Maage schaffe mien ;-).

Welles isch denn uss bauligger Sicht, s ussgfallenschte Sujet gsii ? Waisch das no ?
Nai waiss y nimme.

3 Sache, wo bi de "Raere Waggis" toll findisch ?

Martin:

Kameraadschaft, Diszipliin und Gselligkait. So wie mer im Momänt zämmegwiirflet sin, sott y aigentlig nit uffheere.

Wie gseets mitem Noowuggs uss ?
Joo dasch nit eso aifach gäll.

Was mainsch, an was kas ligge ?
Bi uns ischs jetz aifach esoo, ass me mindeschtens 20 Joor alt sii muess... aber ebbe, s isch nit so aifach ebber guets z finde, wo au no zue n ys basst.

Gseet me Eych au an dr Kinderfaasnacht ?

Martin:

Jo, aber mer sin nit mit unserem Waage underwäggs, sondern miteme "Schilderli", wo ne Uffbau het und deert sin denn d Kinder druff.

E "Schilderli" ????
Dasch e landwirtschaftliggs Faarziig, wo d Buure friener in Hang gfaare sin, zem s Heu uffzlaade.

Aber Eyri "Raere" gits nit uffem "Schilderli" oder ?
Doch... aifach e Mini-Raere ;-)

Wie grad gsait, Eyer Maargezaiche isch jo die riisig "Räere" uffem Traggdoor... wird die hitte immer no vo Hand drillt ?

	Martin:	Die "Raere" hänn mir friener no vo Hand drillt... dasch myni und em Jügge syni Uffgoob gsii und dasch zimmlig aasträngend gsii... aber syt ebbe 15 Joor wird die "Raere" vomene Elektromotoor aadryybe.

Was beditet Dir d Faasnacht ?

	Martin:	S isch wiirglig schaad, ass es nimm eso isch wie friener... aber fir daas sin nit d Lyt elai draa schuld. Friener het me no renomierti Baize kaa, wie dr "Gryffe", dr "Leue" oder d "Safre", wo immer Schaiawaie gsii isch, aber hitte het das alles noochegloo. Au das ganze Gschiss um d Chaise oder Guggemuusige vom letschte Joor reggt mi uff... do steen si am Stainebärg binere Yyseplatte und waarte, bis e Ross uff d Schnuure keyt... denn wird gfetelet und proteschtiert, sait aber em Kutscher vorhär nit, ass es deert e gfährligi Stell het... nai si waarte no uff so Sache.

Wenn foot bi Dir d Faasnachtsstimmig aa ? Wenn iiberhaupt ?

	Martin:	Bi dr Waagedaufi...

Wie hesch Du als glaine Bueb d Faasnacht erläbt ?

Martin:

Als glaine Bueb bi n y no ganz vyyl mitem Babbe an d Faasnacht gange... mer sin denn immer vo dr Wanderstrooss bis zem Spaalebärg gloffe und deert denn ins Getimmel abdaucht.

Het Di deert scho dr Waggis fasziniert ?
Das het mi scho sällmol fasziniert... doch, doch. Under uns het e Familie gwoont, wo ne Frau im Rollstuel betreut het und mit iire ha n y immer am Nomidag an d Faasnacht deerfe. Mer sin denn immer uff däne reservierte Invalideplätzli gstande, wo me nadierlig die bescht Sicht kaa het... und y ha denn fir sii immer d Orange und d Däfeli gfange... y ha denn nadierlig au immer e huffe vo däm Ziggs griegt ;-)

Was macht Di gligglig ?

	Martin:	Myni Familie, myni Gsundhait, myni Groosskinder und s guete Verhältnis, wo n y zue myne Seen ha.

Welles isch Dy absoluts Highlight gsi im 2019 ?

	Martin:	My 4. Groosskind...

Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?

Martin:

Mit Grace Kelly...

Wieso mit iire ?
Wells e ganz tolli Frau gsii isch... immer uffem Boode blybe, obwool si Fürschtin vo Monaco gsii isch.

Was wirdsch an Fraue nie verstoo kenne ?

	Martin:	Kunnt mer grad nyt in Sinn...

3 Sache wo no unbedingt in Dym Lääbe mache wottsch...

	Martin:	Y bi wunschloos gligglig... waisch y ha scho 2 Härzinfaarkt kaa und wenn emol dr Kischtedeggel gsee hesch, bisch mit weenig z friide ;-)

No e baar Schlaagweerter, bitte numme mit aim Satz beantwoorte...

	Kino oder Theater ?	Eenter Theater... Goosch gärn ins Theater ? Nai... mee ins Musical Theater... Und Kino ? Ins Kino gang y nimm, do schloof y immer yy... y sag amigs "lieber Färnsehmied, als Radioaggdiiv" ;-)
	Basel...	My Haimat...
	Ziiri...	Schnäll in Zuug und uff Basel zrugg...
	Herbschtmäss...	Glänzigi Kinderauge und ych gniess nadierlig mee s kulinaarische deerte...
	Waggis Faasnacht...	Wird immer bleeder...
	Klima Gretel (Thunberg)...	Ab uff e Mond... y ka das nimme heere... eerlig...
	Donald Trump...	E dumme Plauderi...

Vyyle Dangg fiir Dyni Antwoorte