Dr Leu vom "Vogel Gryff"
   
 

  Du hesch jo die groossi Eer, e Dier im grosse Spiil vom "Vogel Gryff" deerfe z danze... nämmlig dr Leu.
Wie lang danzisch Du scho dr Leu ?
  Leu:

Näggscht Joor danz y dr Leu zem 5. Mol...

Die Zyt wo me e Eerezaiche danze darf, isch jo begränzt oder ?
Genau... me darf e Eerezaiche 6 Mol danze.

     
 

Jetz nadierlig die groossi Froog... wie lauft das ganze Prozeedere ab, bis me amänd denn ändlig e Eerezaiche
danze darf ?

  Leu:

Zeerscht muess me sich bi de 3E aamälde, dasch klaar... und grad bi de Junge Gsellschaftsbrieder ischs esoo,
ass si maischtens au grad s Indrässe hänn, zem ins groosse Spiil z koo... fir daas muess me sich noonemool separaat bim Spiilscheff aamälde. Dr Spiilscheff oorganisiert dr ganz Daag vom "Vogel Gryff" und weiss au grad,
fir welli Charge är ebber bruucht.

Ka me den wähle, was me im groosse Spiil mache bzw. danze wott ?
Nai ka me nit... s isch laider kai Wunschkonzärt ;-)

Guet... und wie goots denn wyter ?
Wenn me d keerperliggi Verfassig het, dr Spiilscheff aim s Verdraue schänggt und me ganz vyyl Gligg het, gits e demokraatischi Abstimmig innerhalb vo de Spiilmitgliider (28 - 30 Maa) und denn isch me e Mitgliid im Spiil.
Dernoo muess me sich uffe schaffe...

Denn gits also quasi e Hierarchi innerhalb vom Spiil ?
S git quasi e Hierarchi dasch richtig...

Denn kas au sii, ass me zeerscht als "Ueli" underwäggs isch, anstell vomene Dier ?
Dasch esoo... s git e Grundablauf, das haisst. me isch zeerscht Kassewaart. Dr Kassewaart segglet dr ganz Daag mitem Ruggsagg umme, ass d "Ueli" iiri Kässeli leere kenne (10-12x).
Y bi zeerscht e zytlang Kassewaart gsii, bis y denn fir 5 Joor als blau/wysse "Ueli" underwäggs gsi bi
.

     
  Und denn isch dr grooss Momänt koo...
  Leu:

Wenn me die entsprächendi, keerperliggi Verfassig het... au grad e Charge frey wird und aim dr Spiilscheff s Verdraue schänggt, ass me e Dier danze deerf... jo denn isch nadierlig dr grooss Momänt doo und me wird e
soogenannts "Baby Dier", esoo saage mer däm im groosse Spiil.
3 - 4 Joor bevoor dr Voorgänger uffheert mit danze, wird s "Baby Dier" in de Spiilbroobe an die Uffgoob aanegfiehrt.

Das haisst, Du hesch also au scho Dy Noofoolger beraits drby...
My Noofolger danzt beraits au scho an de Spiilbroobe mit... vo usse gseet das immer aifacher uss ass es in Wiirgligkait isch, aber bis me emol esoone Danz dinne het und das Zämmespiil zwische Dambuur und Dier perfäggt basst, das bruucht halt syni Zyt. Me ka sich jo denn au sälber ussrächne wenn die 6 Joor verbyy sin und me ändlig sälber draa kunnt... und dasch denn au dr Zytpunggt, wo dr Puls noonemool uffegoot und d Aaspannig seer grooss wird.

     
  S kemme jo au no anderi Faggdoore usser dr Danz drzue...
  Leu:

Genau... näbscht dr Aaspannig, muess me zem aine imene Goschdym und zem andere uff dr Strooss voor ganz vyl Lyt danze, wo zueluege. 50 Dänz lang in däm Goschdym stegge und dä Daag z erläbe wo rund 12 Stund lang goot, dasch noonemol e anderi Schuehnummere und ka me nit in de Broobe lehre.

     
 

Wie gseet denn Dyn Daagesablauf am "Vogel Gryff" uss ?

  Leu:

Am Oobe voorem "Vogel Gryff", findet immer im Saal vo dr Muba unseri Hauptbroob statt und me meergt beraits
scho, wie aagspannt me isch. Noo dr Broob goots denn Haime und ab ins Bett, aber schloofe isch nadierlig seer schwiirig bi däm Kopfkino wo me het.

Wenn stootsch denn amigs uff ?
Y stand maischtens am 06:00 uff. Dernoo driff y mi denn mit e baar Spiilfrind bimene liebe Frind dehaime - wo aggduell au grad my Dambour isch - zem Kaffi und Gipfeli. S isch immer e gueti Stimmig vorhande und nadierlig e groossi Voorfraid uff e scheene Daag. Nooere halbe Stund gang y denn zem Kaffi "Spitz", wo n y mi in Rueh umzieh kaa und no e weeneli Zyt fir mii ha.

Wenn muesch denn baraat syy ?
Am 08:30 gang y denn langsam in Meriansaal, wo beraits d "Ueli" mit iirem Lääberliässe aafeen... unser Ässe foot denn am 09:00 aa... woby me am Disch voorem Ässe sitzt, aber in Gedangge scho am eerschte Danz isch... do goot im Kopf ganz vyl ab.

Und denn ?
Nooem Läberliässe am 09:45, verabschiide mer (ych und dr "Vogel Gryff") dr Bolizey Oldtimer, wo denn mitere Delegatioon in Richtig Horscht vom "Wild Maa" faart. Denn kunnt aigentlig fir uns die miehsaamschti Zyt vom ganze Daag...

Wieso ?
Mer geen denn zrugg ins Hotelzimmer und waarte aigentlig numme no bis es sowyt isch und me d Kanooneschüss vo dr Daalfaart gheert.

     
  Kasch Du Di aigentlig elaige aalegge ?
  Leu:

Jeedes Dier het 3-4 Beglaiter, well me sich jo nit komplett elai aa- und abzieh kaa... dorum kunnt denn nadierlig au immer mol wider dr Spruch "Wenn nit aastänig bisch, stelle mer Di in Egge und denn kasch sälber luege was
machsch" ;-)).
Ain vo de Beglaiter prieft vom Känzeli uss, uff wellere Heechi s Flooss grad isch, ass mer rächtzytig baraat sin... woby ych maischtens scho e baar Minute friener dr Kopf aalegg zem mi draa gweene.

... und me nit seer vyl gseet...
S isch aigentlig wie innere Daucherglogge... dr Kopf wird mit Riemli aabegspannt und fixiert, as är guet hebt bim springe. Dernoo geen mer (ych und dr "Vogel Gryff") zem Känzeli aabe, wo mer dr "Wild Maa" empfange und iim d Referänz erwyyse.

     
  Wie gseets mit Lampefieber uss ? Oder ischs mit dr Zyt e gwissi Routine ?
  Leu:

Nooem 2. Joor isch sicher e gwissi Routine doo... me waiss wie s ablauft, aber s Lampefieber isch nadierlig ainewäg immer doo und legt sich aigentlig eerscht nooe baar Dänz. Wenn me uffem Känzeli stoot, het me au kai Zyt mee zem grooss driiber noozdängge... me waiss, ass es ab jetz lauft und dä Daag eso schnäll wider verbyy isch.

     
  Wie goots Dir bim letschte Danz ? Ischs e gwissi Erlychterig oder vellicht enter mit Weemuet verbunde ?
  Leu:

Y frai mi immer seer uff dä letscht Danz, wells ebbis ganz speziells isch... s isch nämmlig dr Danz fir dyn Dambour. Me het dr Dambour immer dr ganz Daag im Rugge, är beglaitet di, är drummlet fir dii und me isch so quasi e
2er-Gspann. Bim letschte Danz im Meriansaal, danz y denn vo vorne uffen zue.

Wie Du scho gsait hesch, gits zwische Dier und sym Dambour e ganz bsunderi und dieffi Frindschaft, me muess sich blind uffenand verloo kenne...
Dasch eso... sunscht wurds au gar nit eso guet funggdioniere, wenn me kai Basis het. Mer gseen ys au reegelmässig underem Joor und är isch au e seer änge Frind vo mir woorde.
Aber zem noonemol uff dyni Froogg zruggzkoo... bim Schlussdanz herrscht esoone Gfiilschaos... e Danggbarkait, ass me noonemol als Dier het deerfe danze... denn sicher au e gwissi Erlyychterig, ass me dr Daag guet iiberstande het und denn nadierlig au e gwisse Stolz wo me het.

E Gnuss ?
D Lyt saage immer "gniesses"... aber e Gnuss wie am Strand z ligge, oder e 7-Gänger mitere guete Fläsche Wyy, isch s nit... s isch eenter e groossi Eer ass me das noonemool het mache deerfe und dorum isch fir mii au dä letscht Danz e Gnuss oder Usskoschte. S isch fir mii ebbis ganz speziells und y waart au immer mitem Danz, bis Rueh im Saal isch. Bim danze heeb y myni Hand e weeneli speeter als sunscht, well das dr Momänt fir myn Dambour isch, wo n är au verdient het. Me darf nit vergässe, was fir e Laischtig die Damboure bringe... nit numme firs Dier, sondern au wärend mer duur d Stadt laufe, drummle si in dr Formatioon. Die Wärtschetzig mitem letschte Danz find y groossaartig.

     
  Bim letschte Danz gits au no e gwisses Rituaal gäll ?
  Leu:

Jo genau... me losst quasi syn Dambour nit feertig drummle.

Und wie goot das ?
Dr "Wild Maa" zem Byspiil, leggt d Wuurzle vo sym Baum uffs Fäll vo sym Dambour, dr "Vogel Gryff" syni groossi Pranke uffs Drummelfäll und ych spring myn Dambour aifach aa... was amigs e Herussfooderig isch, well y diräggt uss dr Draiig kumm. Ych perseenlig finds e wunderscheens Rituaal.

     
 

Du hesch als "Leu" e enoorms Sprungpensum wenn me das eso saage darf... Du springsch aigentlig dr ganz Daag wärendem danze und y bewundere das seer... machsch Du e speziells Krafttraining ? Sunscht hebt me das jo nit duure oder ?

  Leu:

Ooni Krafttraining goots nit... alli 3 Dier mache in iirgendere Foorm ebbis fir iiri Fitness. Ych fir myn Dail jogg s
ganz Joor duure und versuech esoo myyni Grundkonditioon z heebe. Das hilft au bi dr Erhoolig am näggschte Daag, me isch denn au vyyl schnäller wider fit.

Apropos... wie gseets "Bräschtemässig" uss nooem groosse Daag ?
Me isch sich s halt nit gwoont, 12h oder lenger in däm Goschdym z stegge. Dr Kopf druggt enoorm uff dr Nacke und dr Rugge schmärzt zimmlig staarg... am näggschte Daag fiihl y mi immer wie ne Robbe am Strand... y roll mi ussem Bett, roll mi uff d Couch und roll mi wider zrugg ins Bett :-).
In de letschte Joore isch fir mii s SoleUno immer e grossi Hilf gsii bi dr Regeneratioon... aifach emol 2-3h im waarme Wasser ligge, feerderet d Erhoolig unglaublig und me ka drby seer guet abschalte.

     
  Was mi immer seer an Dym Danz fasziniert, isch dr Sprung uss dr Draiig uffe Voorgsetzte zue... bisch scho emool in e Voorgsetzte yynegsprunge ? Wie zem Byspiil bim "Vogel Gryff", wo syn Schnaabel bim vernaige seer nooch am Gsicht vom Voorgsetzte verbyy goot...
  Leu:

S isch e gwisse Erfaarigswärt wo me het. Wo n y im eerschte Joor uff dr Strooss danzt ha, ischs fir mii seer schwiirig gsii alles abzschetze, wo in de Draiige sich jetz grad was genau befindet. Bim iebe het me Wänd wo sich nit beweege, aber uff dr Strooss het me kaini Orientierigspinggt wo aim hälfe und dasch im eerschte Joor seer schwiirig gsii zem abschetze.

...und denn kunnt no die yygschrängti Sicht drzue...
Genau... d Auge vom "Leu" sin numme mandelgroossi Effnige und das schränggt s Sichtfäld seer staarg yy... aber dasch nadierlig e Gwoonetssach und me het au syni Sprungtaggtig.

..und scho ain aagsprunge ?
Saage mer esoo... s het scho lychti Rämperli gää, aber daas wird denn mit Humoor uffgnoo ;-)

     
  Was macht fir Dii d Faszinatioon vom "Leu" uss ?
  Leu:

D Faszinatioon fir mii isch, was es in miir und bi glaine Kinder ussleest... und wie toll ass es isch, ass esoone Draditioon au noo hunderte vo Joore immer no esoone Begaischterig bi de Lyt ussleest. Fir mii ischs immer e
Draum gsii, emol e "Ueli" deerfe z sii und ass es jetz no e Dier isch, macht mi nadierlig bsunders stolz, gligglig und isch e groossi Eer fir mii.

     
  S git jo au no e glains Spiil... wie isch do d Beziehig zue de Glaine ?
  Leu:

S git sogaar 2 glaini Spiil... ainersyts daas vom Waisehuus - s Kischtlispiil - und zem andere vom Jugendfeschtverain Glaibasel. Mer hänn zue baide e Bezuug, well baidi Spiilscheffe au bi uns im groosse Spiil mit drby sin. Mer sin au immer mol wider zue de Spiilbroobe vo de Glaine yyglaade, zem d Damboure aazluege,
d Schritt z kontrolliere, etc. Mer hänn sogaar aimool e gmainsaami Spiilbroob...

Ahjä ? Sauguet...
Jo denn danze alli Wild Männer, alli Vogel Gryff und alli Leue wie au alli Damboure spiile zämme und dasch immer e ganz tolli Sach.

     
  Du bisch jo au als Faasnächtler underwäggs und y waiss nadierlig, ass dr "Vogel Gryff" und d Faasnacht nit mitenand z due hänn... aber wie isch das fir Dii, nimmsch dä Daag no e weeneli mit oder fraisch Di jetz beraits uff d Faasnacht ?
  Leu:

Also y bruuch immer e Momänt... y ka nit aifach dr Schalter umlegge und saage "Dr Vogel Gryff isch umme und jetz kunnt d Faasnacht"... s kunnt au immer e weeneli druff aa, wie nooch die baide Aaläss zämme ligge... wenns z nooch isch, ha n y das nit eso gärn. Me het denn kai Zyt zem Abschiid nää... y ha denn lieber e weeneli e Spatzig dezwische, ass y mi uff d Faasnacht fraie kaa.

     
  Was beditet Dir d Faasnacht ?
  Leu:

Fir mii isch d Faasnacht ebbis, wo nit vo Basel drennbaar isch... ebbis wo nit drennbaar vo mynere Kindhait isch... sich 3 Daag lang dryybe z loo und d Stadt vonere Syte erlääbe z deerfe, wo s sunscht vellicht numme no 1-2 mol git im Joor... dasch seer scheen z gspiire. Laider gits das numme no ganz sälte in unserer Zyt und doodezue mien mer wiirglig Soorg draage, ass das draditionelle vo dr Faasnacht au in de näggschte Joor nit verloore goot.

     
  Het sich d Faasnacht im Geegesatz zue friener veränderet ?
  Leu:

Y mag dä Satz "Friener isch alles besser gsii..." nit wiirglig... s het au friener Sache gää, wo nit toll gsi sin. Sicher het sich d Faasnacht veränderet und dasch au guet esoo, ass me gwissi Sache anderscht macht. Was sich aber ganz sicher veränderet het, isch d Baizelandschaft... laider... grad wenn me ins Glaibasel luegt, die alte Spunte wo no dr Arbaiter und dr Banggdiräggter zämme amene Disch ghoggt sin, die gits laider nimme oder numme no verainzelt. Y find aber, ass sich dr Grundgedangge vo dr Faasnachtsdraditioon und au s Niveau vo dr Muusig staarg verbesseret het. Was mir perseenlig nit so gfallt, sin die Horrorkepf mit Lychtdioode und gruusige Zeen im Luzärner Stiil... das het fir mii nimm vyyl mit dr draditionelle Basler Faasnacht mit de kaschierte Laarve z due.

     
  Wie hesch Du als glaine Bueb d Faasnacht erläbbt ?
  Leu:

Y bi scho als glaine Gnäggis im Waggisgoschdym am Stroosserand gstande und ha au scho relativ frieh mit pfyffe aagfange. In de baide eerschte Joor muess me im Voordraab mitlaufe, well me musikaalisch noonig sowyt isch.
Aber grad die Zyt im Voordraab isch seer intensiiv gsii fir mi. Me daucht als 6 jeerige in e Wält ab, wo eso unglaublig und yydrigglig isch. Me ka d Faasnacht so richtig yynezieh und iiberall ummeluege was do grad bassiert.

     
  Was macht Di Gligglig ?
  Leu:

Myni Frau, myni Familie oder ganz aifachi Sache, wie zem Byspiil mit guete Frinde e wunderscheene Oobe gniesse z kenne.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait zrugg erinneret ?
  Leu:

Jo... Härdepfelstogg mitere bruune Sauche... das erinneret mi sofort an dr Gschmagg in dr Kuchi vo mynere Urgroossmamme... vyli Gschmaggserinnerige an myni Kindhait kemme oft vom Ässe.

     
  Welles isch Dy absoluts Highlight gsi im 2019 ? Abgsee vom "Vogel Gryff"...
  Leu:

Unseri Feerie in Andalusie und Schottland.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Leu:

In mynere Kindhait ha n y immer dr Michael Jordan (Basketball) bewunderet, y bi sogar amigs um Mitternacht uffgstande zem dr NBA Finaal z luege... oder mitem Tony Blair (ehem. Premier vo Ängland) oder Roger Federer.

     
  Jetz kunnt d Froog vo alle Frooge... was wirdsch an Fraue nie verstoo kenne ?
  Leu:

Worum Fraue esoone groossi Handdäsche drby hänn und denn ainewääg bis ganz aabe länge mien, zem ebbis uusehoole... in Sache Schueh darf y bi mynere Frau kaini bleede Sprich mache, do ych mindeschtens glych vyyl Schueh ha wie sii... wenn nit nomee ;-) und im Bad bi n y genauso lang wenn nit no lenger ;-)

     
  3 Sache wo no unbedingt in Dym Lääbe mache wottsch...
  Leu:

1.) Miteme Camper 2-3 Moonet duur Skandinavie oder Europa faare...
2.) Aimol wie imene Bud Spencer Film, anere Baizeschleegerey mitmache... nadierlig numme gstellt ;-)
3.) D Natuur vo Kanada erlääbe.

     
  Wär wurdsch gärn emol ins Dschungelcamp schigge ?
  Leu:

Dr Hans-Peter Wessels

     
  Kasch Du Di guet vo Sache drenne oder bisch eenter e Messi ?
  Leu:

Y ha mi lang nit vo Sache drenne kenne, aber mittlerwyle ha n y das glehrt.

Sicher vo Dynere Frau oder ? ;-)
E Stigg wyt joo... y bi friener e Jäger und Sammler gsii und ha mi lang nit vo Sache drenne kenne... zB. myni alte Schuelsache, myni Milchzeen oder vyl Sache uss mynere Kindhait, aber mittlerwyle goot das ganz guet. Me het e gwissi Befriidigung wenn Oornig isch... au wenn s e gwissi Oornig in dr Unoornig isch ;-)

E scheene Satz...

     
  No e baar Schlaagweerter, bitte numme mit aim Satz beantwoorte...
  Kino oder Theater ?

Im Momänt Kino...

  Basel... E groossi Verbundehait, scheeni Draditioone und e Stadt, wo n ys immer wird schweer ha, iire dr Rugge kenne z draie...
  Ziiri... Isch fir 3 1/2 Joor myn Aarbetsoort gsii und gsee die vermaintlig Faindschaft zwische Basel und Ziiri eenter logger und unbeschweert...
  Herbschtmäss... Kindhait, "Mässmogge", brennti Mandle, Maagebroot... friener Baane, hitte kulinaarisch...
  Vogel Gryff... Das Jooreshighlight fir mii...
  Klima Gretel (Thunberg)...

E groosse Hype um e inschdrumentalisierts Kind, wo leider fir e Sach missbruucht wird, wo anderi nit dr Muet hänn, die Botschaft iiberezbringe...

  Donald Trump...

E schwiirigi Figuur, wo seer schweer yyzschetze n isch, wie n är wiirglig tickt. Het bi mir e groosses Entsetze bzw. Erstuune ussgleest, ass esoone Persoon iiberhaupt gwählt wärde ka, aber mit Gäld ka me halt vyl erraiche...

Vyyle Dangg fiir Dyni Antwoorte