Dominique Mollet - Zeedelschryber
   
 

 

Dominique, Du bisch Pfyffer binere groosse Faasnachtsclique und hesch näbebyy no e bsunders scheens Hobby... Du bisch nämmlig no "Zeedelschryber". Wie bisch Du denn zem Zeedel schrybe koo ?

  Dominique:

My Babbe isch joorelang als Schnitzelbänggler underwäggs gsii und het au syni aigene Värs gschrybe... s Bänggle wie au d Sprooch wo verwändet wird, het mi immer seer fasziniert. Vyl Schnitzelbänggler sin friener nadierlig bi n ys yy- und ussgange und me het alli kennt... au am Schlussoobe vo de Schnitzelbänggler bi n y scho als glaine Binggis immer drby gsii. Speeter ha n y denn e Ussbildig in Kommunikatioon und Kunscht abgschlosse, wo jo au mit dr Sprooch z due het.

Denn wärsch au gärn als Bänggler underwäggs gsii ?
Leider ka me nit baides mache, also Stroossefaasnacht und als Bänggler underwäggs sii... das liggt zytlig
nit dinne... also ha n y mit Zeedel schryybe aagfange.

Und wie bisch zue dämm scheene Hobby koo ?
Iirgendwenn het mi emol ebber vonere glaine Clique aagfroggt, ob y nit Luscht hät, fir sii dr Zeedel z schryybe... und dasch denn myn allereerscht Zeedel woorde, wo aigentlig no rächt guet uusekoo isch...
eso hets denn aagfange.

     
 

Baseldytsch z schryybe, isch jo nit eso aifach find y... e jeede maint, är haig s Baseldytsch erfunde und numme syni aigeni Schrybaart isch richtig... wie isch das bi Dir ?

  Dominique:

Mer hänn dehaime immer wider driiber diskutiert, ob me jetz e Woort miteme "y" schrybt oder nit. Wenn y unsere Yydraag für s "Rädäbäng" ans Comité schigg, denn wänn si immer alles umschryybe... aber y loss
das nit zue und regglamier au ständig... y find d Schrybwyys vom Comité unmeeglig.

Stichwoort "Wältkultuureerb"...
Ains vo de Hauptargumänt vo dr UNESCO isch gsii, ass bi uns alles im Dialäggt stattfindet und dasch ebbis ganz speziells und schafft e Identität, wo s sunscht niene mee git und y ha das no spannend gfunde. Au ass es e weeneli wie ne Sprooch fir sich isch, find y halt au no faszinierend.

     
 

Aber jetz muess y Di halt doch noonemol frooge, wieso bisch nit als Bänggler underwäggs, wenn s doch scho vo glai uff mitgriegt hesch ?

  Dominique:

Y bi au mitere Clique uffgwaggse... alli Frind vo mym Babbe sin in dr Faasnachtsclique "BMG" drby gsii und my Babbe het deert immer am Schluss gsunge. S isch aigentlig scho immer klaar gsii, ass y iirgendwenn
emol in die Clique gang... drzue kunnt no, ass me mit 9 oder 10 Joor no kaini Bängg schrybe kaa...

Und speeter als Bänggler ?
Speeter isch me in däre Clique gsii und s Cliquelääbe het aim gfalle... do het me gar nyt me anders welle mache. Y bi vo glai uff duur die ganz Clique gange, also vo dr Junge Garde bis in Stamm und y bi no lang Bresidänt vo däre Clique gsii. Bänggle und Clique goot aifach nit zämme... aber wär waiss, wenn y emol nimm pfyffe kaa, wär das vellicht no e n-Optioon.

Und Värs fir Schnitzelbänggler schrybe ?
Zeedel und Schnitzelbangg schrybe sin ganz verschiideni Sache...

Was isch denn dr ganz grooss Underschiid zwische Zeedel und Bängg schrybe ?
S Aint isch nadierlig s Mass... wenn me imene Zeedel ebbis nit in 4 Zyyle saage kaa, denn ka me das au in
6 oder 8 Zyyle schryybe und das goot bimene Bangg nit und dasch sicher emol dr Hauptgrund. Drzue
kunnt no, ass jeede Värs vomene Bangg, e anders Sujet het... dh. me muess also bi jeedem Värs wider bi Null aafoo. Drzue kunnt denn no d Melodie und d Voordraagsaart. Bimene Zeedel muess me aifach eso schryybe, ass en ebber anderscht lääse und verstoo kaa.

Das stimmt... e Bangg ka me lääse und holperet ganz schlimm, aber wenn e Bänggler dr glyych Värs singt, deents wunderbaar ;-)
Genau... e Zeedel isch unabhängig vo dr Performance oder dr Uffiehrig und dasch dr grooss Underschiid.

     
 

Wie lang schrybsch denn scho Zeedel ?

  Dominique:

Dasch e gueti Froog... kai Aanig... uff jeede Fall scho iiber 30 Joor...

Kasch Di no an Dyn allereerscht Zeedel erinnere ?
Myn allereerscht Zeedel ? Jä, do mag y mi no draa erinnere...

Und wenn dä Zeedel vo friener, uss dr hittige Sicht mit Dynere Erfaarig vom Zeedel schryybe verglyyche wurdsch ?
Du, eso schlächt isch dä gaar nit gsii ;-)... handwäärglig het dä funggdioniert, aber s Sujet isch nit seer speggdakuläär gsii und vo dämhär isch no schwiirig gsii... me het aifach mee fabuliert und hitte sin myni Zeedel bissiger und ziilgrichteter als friener.

Kasch Di denn no an jeede Zeedel erinnere, wo n-emol gschrybe hesch ?
S git Joore, wo n y mi iiberhaupt nimm draa erinnere kaa und denn sottigi, wo n y mi mee oder weeniger
dra erinnere kaa... dasch ganz underschiidlig.

Wie vyl Zeedel hesch denn scho gschrybe ?
Y dängg, 60 - 80 Zeedel sin s scho gsii...

     
 

Apropos Sujet... s Zeedel schrybe isch jo nit immer jeedes Joor glyych… mänggmol goots guet vo dr Hand und mänggmol halt ebbe nit. Welles sin denn Dyni Lieblingssujets ?

  Dominique:

S git die Allerwälts-Sujet, wo me nyt demit aafoo kaa und denn schrybt me halt iirgend ebbis drumumme. Aber grundsätzlig gilt: Je beeser s Sujet, desto lieber schryb y ;-). Aber y find au haikli Theeme ganz toll und dasch sowiso faszinierend an dr Faasnacht, ass me eggsdreem wyt goo kaa und ainewäg waiss e
jeede, was goot und was nit.

Wo isch denn d Gränze ?
Aigentlig gits kai Gränze und ainewääg meergt me wo si isch. Me ka Lyt hoochnää, me ka au heftig uff si loosgoo, aber s spiilerische muess ainewäg no doo sii, ass me nit verbitteret ebbis verzellt.

     
 

Hesch au scho n-emol e Schrybblokaade kaa ? Wo aifach nit me goot... und wie goot me mit dämm um ?

  Dominique:

Das gits, aber funggdioniert anderscht... me het eso Wucheänd, wo mer sälber nit loos het, dh. die ganz Familie isch wägg und denn dänggsch "Super jetz ha n y Zyt und ka Zeedel schrybe..." und am Sunntigzoobe hesch denn genau 2 Zyyle mee gschryybe... das gits no relativ hiffig. Aber denn gits au s Geegedail, wo n y miir sälber uff d Combox aalit und druff reed, ass y dr Täggscht nit vergiss. Oder wenn y under dr Duschi stand und mer ebbis in Sinn kunnt, denn muess y das immer uffsaage, ass ys nit vergiss... oder falls mer zNacht ebbis in Sinn kunnt, denn liggt immer e Schrybblogg näbbe mym Bett... y kas zwoor am näggschte Moorge nimm lääse, aber Hauptsach dr Blogg isch doo gsii ;-).

     
 

Wie vyyl Zeedel schrybsch denn glychzytig ?

  Dominique:

Im Momänt sin s 3... aber y schryb si nit glyychzytig, sondern schryb immer ai Zeedel komplett feertig, bevoor y dr näggscht aafang.

Aber 3 sin denn s Limit oder ?
Sin au scho 4 gsii... aber das wird denn wiirglig vyyl. Maischtens kemme denn no anderi Sache drzwische, wo me au no schrybe sott... zem Byspiil sin mer mit mynere Clique scho syt Joore zem Faasnachtsufftaggt in Olte yyglaade und mittlerwyle erwaarte si immer e Reed... wo sich nadierlig ryymt notabeene und denn gits no e huffe anders, wo au immer wider drzuekunnt.

     
 

Wie lang schrybsch denn amene Zeedel ? Gits denn au esoone Aart "Deadline", wo dr Zeedel feertig sii und in d Druggerey muess ?

  Dominique:

Grundsätzlig wirds immer knapp...

Hesch Du d "Deadline" au schonemool verbasst ?
Nai... me waiss es jo... ooder sage mer emol esoo, wenn me no 2 Daag mee Zyt ka hät, denn wär dr Zeedel vellicht no e weeneli besser woorde... woby wenn dr Zeedel feertig gschryybe n-isch, iiberlegg y mer nit me drzue, sunscht studiert me eewig draa umme und dasch nie guet.

Wird dr Zeedel no vo ebberem duureglääse und kritisiert, bevor är in d Druggerey goot ?
Jo vo mynere Frau, aber si närvt sich denn langsam, well si ständig e neyi Fassig zem aaloose griegt. My Mamme het no s alte Baseldytsch glehrt und si liist den amigs dr Zeedel noonemol duure und macht Korreggduure.

     
 

Was fasziniert Di am maischte am Zeedel schrybe ?

  Dominique:

Me isch frey...y schryb seer gärn und vyyl, well y d Sprooch toll find... y formulier gärn und me het e Bublikum. Y finds immer seer schaad, wenn e Sujet numme vo Bilder läbbt... isch zwor au seer wichtig, aber me muess d Lyt innert 20 Sekunde dezue bringe, ass si versteen was me usspiilt und doodrby hilft e Zeedel seer... grad wenns vellicht au e haikels Theema isch.

     
 

Und was närvt Di am maischte bi de andere Zeedelschryber ?

  Dominique:

Wenn dr Zeedel sproochlig und inhaltlig nit guet isch, wenn dr Zeedel z vyyl Silbe het oder wenn me Weerter verwändet, wo am falsche Oort bedoont wärde... und Sache wo glych gschrybe, aber anderscht bedoont wärde.

     
 

Wenn denn dr Zeedel ändlig feertig und im Drugg isch... kunnt denn dr Momänt wo saisch "Ändlig feertig" und uffschnuufe kasch oder spiilt das kai Rolle ?

  Dominique:

S goot jo denn nootloos wyter, y muess jo au myni Voorberaitige fir d Faasnacht mache... Goschdym und
Laarve aabrobiere, dr Faasnachtszyschdig voorberaite, etc.

Und denn kunnt s "yypfyffe" am Sunntig voor dr Faasnacht... wie lauft das deert ab ?
Y schryb jo dr Zeedel fir 3 Cliquene und numme aini vo dääne macht e "yypfyffe" und deert liis y my Zeedel voor...

Wenn Dyn Zeedel voorliisisch, hets denn au scho verhalteni Reaggdioone gää ?
Nai, aigentlig nit... s isch denn eenter pyynlig wenn alli Zeedel voorgläse wärde - also vo dr Junge Garde, vom Stamm und vo de Alte - und denn e Zeedel eggsdreem abfallt und daas no vo aim, wo scho syt Joore dr Zeedel schrybt...

Aber Du schrybsch nie e Zeedel fir alli 3 Gruppierige innere Clique oder ? Also fir die Junge, dr Stamm und
die Alte ?

Fir alli 3 nit, nai...

     
  Was beditet fir Dii d Fasnacht ?
  Dominique:

Wie n y yygangs scho verzellt ha, bi n y von glai uff mit dr Faasnacht uffgwaggse und gheert zue mym Läbe.

     
 

Du wo jo mittlerwyyle au scho lang Faasnacht machsch... het sich d Faasnacht im Geegesatz zu friehner veränderet ? Und wenn jo, in welli Richtig ?

  Dominique:

Jä, si isch braaver woorde... die bleede Diskussioone iiber "political correctness" find y so iibel, wells eso
vyl kaputt macht. S goot jo drumm, ass me alles saage deerf und y finds wichtig, ass e Stadt zämmehebt. Und was y au no schaad find isch, ass es kaini Kinschtler me git...

In wellem Beraich mainsch jetz genau ?
Friener hets no richtigi Kinschtler gää, wo Ladärne gmoolt hänn... hitte het me Graafiker und das find y waansinnig schaad... guet, die maischte Kinschtler schaffe gar nimme mit figuratiive Sache und me ka kai Ladärne moole, wenn me nit zaichne kaa. Aber ebbe.. dä kreatiivi Dail fählt mer seer an dr Faasnacht.

Guet, me draut sich jo au nimme, well me grad sofort wägge jeedem Muggeschiss aaklagt wird und das find y, macht halt d Faasnacht e wyters Stigg kaputt...
Friener het me de Lyt dr Spiegel voor d Naase ghoobe, hitte isch s numme no e Spiegeli... aber au die Sälbschtbeweyraicherig... jeedes Goschdym muess no scheener sii...

     
  Wenn foot bi Dir d Faasnachtsstimmig aa ?
  Dominique:

Isch no schwiirig zem saage, aber y dängg mit dr Sujet-Bresentatioon foots denn aa... und denn kunnt d Paanik, ass an dr Faasnacht wiirglig alles feertig isch ;-).

     
 

Zem schrybe bruchts jo scho au e weenli e Talänt... wo uss Dynere Sicht bisch Du "Taläntfrey" bzw. welles Talänt hättsch gärn no ?

  Dominique:

Komponiere... y ha Muusig seer gärn, aber komponiere, neyi Melodie schrybe und uusefinde, wie die
verschiidene Muusigdail zämmebasse, das find y irrsinnig... aber ka n y laider iiberhaupt nit. Y versuech immer an klassiche Konzärt d Partituure vom Dirigänt mitzlääse, aber ebbe...

Und e Buech schrybe ?
Y ha mer das au scho iiberleggt... y ha au scho 3-4 Idee, bi aber noonig richtig dezuekoo.

     
 

Was macht Di Gligglig ?

  Dominique:

Gin Tonic ;-)))

     
 

Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?

  Dominique:

Mitem Machiavelli... die Aart wie me mit dr Macht umgoot, find y immer wider faszinierend. Dr Machiavelli isch jo e Maischter vo dr Manipulatioon gsii. Y bi jo uurspringlig Kunschthistooriker gsii und denn fasziniere
mi nadierlig au all die Kinschtler wie Picasso, Rossini etc.

     
  Was wirdsch an Fraue nie verstoo kenne ?
  Dominique:

Y glaub, ass si nit zem verstoo doo sin...

     
  Wär wurdsch am liebschte emol ins Dschungelcamp schigge ? (Sott ebber si, wo me kennt)
  Dominique:

Dr Jeremy Corbyn... y find das e unmeeglige Käärli...

   
  No e baar Schlaagweerter, bitte numme mit aim Satz beantwoorte...
  Basel...

Drotz allem my Lieblingsstadt...

Drotz allem ?
In däre Stadt wird momentaan seer vyyl kaputt gmacht... also politisch kaputt diskutiert und iiberreglementiert... me losst d Lyt nimm läbe.

  Ziiri...

Het s beschte "Sächsilüüte"... voor allem wenn Basel Gaschtkantoon isch...

Und dr "Böög" umkeyt...
Jä genau...

  Herbschtmäss...

Find y seer faszinierend und gsee immer vo mym Büro uss die wunderscheene Faarbe... und was y au toll find, isch dr Gschmagg... die Mischig vo brennte Mandle bis zue de Brootwirscht, das schmeggt noo tollem Heerbscht.

Het d Faasnacht au e Gschmagg ?
Nai...

  "BMG"...

Loogischerwyys die tellscht Clique...

  Doo muess y unbedingt no aane in mym Läbe...

Y gang seer gärn an seer vyyl Oort... aber s git jetz nit e bstimmte n-Oort wo n y
unbedingt no aane muess in mym Läbe... y find vyyl toll...

  Klima-Gretel
(Greta Thunberg)...

E guets Sujet, usser ass si s nit mitgriegt...
S git esoone Szene vom Loriot zämme miteme Hund, wo schyns reede kaa. Wo dr Hund ebbis saage sott, kemme numme unverständliggi Deen uuse und ebbe esoo reedet die Greta... und alli finde, ass es waansinnig dieffgrindig isch was si sait, drby het si kai Aanig...

  Donald Trump...

Iin find y fantastisch, denn ooni iin hätte mer kaini guete Sujets und vo dämm här het är e groosse Underhaltigswäärt.

Vyyle Dangg fiir Dyni Antwoorte