Viviane Bisang, Gschäftslaitig vom "Tee Huus Basel"
   
 

 

Wenn me bi Eych in Laade yynekunnt, denn gits zeerscht emol e gschmaggligs Fiirwäärg fir d Naase…
aigentlig e wunderbaare Aarbetsoort... nimmsch Du die feyne Dift iiberhaupt no woor ?

  Viviane:

Y schmeggs gaar nimm... also wenn y am Moorge in Laade yynekumm, denn scho... aber y schmeggs nimm glyych wie d Kundschaft, well me halt au dr ganz Daag vo dääne Dift umgää isch.

     
 

Wie lang bisch Du denn scho in däre Tee-Branche dätig und wie bisch Du drzue koo ?

  Viviane:

Duur d Liebi... und eerscht no an dr Faasnacht ;-)

Aha, e Faasnachtsliebi... verzell ;-)
Joo, y bi sällmol bi de "Antygge" gsii und ha nooeme Joor gmeergt, ass es fir mii nit eso richtig stimmt und ha denn doo druff aabe d Clique gwäggslet und bi in die Alti Gaarde vo de "Rhyschnooge" gange.
Y bi also deert gsi und denn isch d Zyt koo, wo mer Maarschiebige gmacht hänn und deert sin denn au d Voordrääbler drby gsii..

Soso e Voordrääbler...
Jo genau ;-) uff jeedefall hänn mer denn an dr Faasnacht gmeergt, ass mer ys seer simpaatisch sin und eso isch das entstande... ha aber zue sällere Zyt no uffem Büro innere Telekommunikatioonsfirma gschafft.

...und denn hesch dr Sprung ins Tee-Gschäft gwogt...
Är het mi denn gfroggt, ob y Luscht haig, s Gschäft am Spalebärg z laite... und esoo bi n y denn voor 7 1/2 Joor deert yygstiige.

Aber vom Produggt "Tee" sälber hesch noonig eso vyyl gwisst oder ?
Y ha scho e weeneli ebbis iiber Tee gwisst, aber nadierlig noonig esoo vyyl wie hitte... aber s isch e ganz tolli Herusfoorderig gsii und ha mi däre au gstellt. Y ka hinderem Produggt stoo und macht mer au ganz vyl Fraid neyi Sache deerfe z lehre... aber s het nadierlig scho e Momänt bruucht, bis y sowyt gsii bi.

     
  Die Tee-Wält isch jo riisig und seer faszinierend... me dunggt so gedanggeloos syn Teebeutel ins Wasser, waartet bis dä feertig zooge het und guet isch... aber do steggt jo enoorm vyyl Indressants und Wissenswäärts dehinter. Was fasziniert Di denn am maischte an dämm Bruef ?
  Viviane:

Daas wo mi aigentlig am maischte fasziniert isch, was me alles uss ainere Pflanze mache kaa... me het ai Teepflanze und jee noo dämm was me druss macht bzw. si veraarbaitet, entstoot e ganz anders Ändproduggt... also beläbend, nit beläbend, etc. und das ka me mit kaim andere Produggt mache, au nit mit Kaffi. S git zwoor scho verschiideni Kaffiboone und Reeschtaarte, aber bim Tee ischs e n-abgschlossene Prozäss.

Wie mainsch das ?
Bim Kaffi bringt jeede Buur syni Kaffiboone zem groosse Maakler ins Taal aabe, wo die Boone abnimmt und irgendwoo naime reeschte losst... dämentsprächend wärde die Buure au mitem Bryys druggt. Bim Tee isch das anderscht... in jedem Teegaarte gits e aigeni Teefabrik, au wenn die numme ganz glai isch und die Teebuure wärde dorum lang nit eso ussgnoo, wie d Kaffibuure. Si schliesse iire Prozäss ab und griege entsprächend iir Gäld drfiir... und das hänn mer au scho deerfe go aaluege und fasziniert mi seer.

Dämfall gosch die Teeplantage go aaluege ?
Nai nit oft, mer sin mol in Sri Lanka gsii und hän die ganze Teeplantage aagluegt, aber mer hänn unseri
Tee-Maakler in Hamburg, wo n ys entsprächend "bemuschteret" und miir ys duuredeguschtiere.

     
  Wie lauft denn bi Eych esoone Tee-Deguschtatioon ab ?
  Viviane:

Das sin so ganz spezielli Deguschtatioons-Schääleli wo mit Tee gfillt sin und miir denn miteme Suppeleffel, die verschiidene Produggt deguschtiere... also aigentlig "schliirfe"... aber y ka das hitte immer noonig so richtig
und verschlugg mi amigs no ;-). Y find halt Tee "schliirfe" e absoluts "NoGo", aber bim deguschtiere muess me halt "schliirfe", ass dr Tee dr Gaume kitzelet und esoo syni Gschmaggsnoote entfaltet.

Wenn me jetz zem Byspiil 10 Darjeeling Tee "schliirfe" muess... y main, fir mii als Laie - und bitte entschuldige my Unwisse - isch Darjeeling halt Darjeeling... oder gits do wiirglig esoo vyyl Underschiid ? Johooo... y waiss ass jetz d Läser iiri Auge verdrille ;-)
Also, bim Darjeeling gits e Friehligs- (First Flush) und e Summerärnte (Second Flush). D Friehligsärnte isch ganz häll und gseet uss wie Spaarsewasser, wärend d Summerärnte scho eenter ussgseet wie Schwaarztee...
und denn gits nadierlig no verschiideni Qualitääte, etc. und well die Pallette eso riisig isch, gits au e huffe Underschiid.

OK, alles klaar... y has jetz verstande :-)

     
 

Tee dringge wird jo au seer oft eso richtig zelebriert... wie isch das bi uns in dr Schwiz ? Gits no Oort wie in Japan,
wo no s Tee dringge zelebriert wird ?

  Viviane:

Sovyl y waiss, ka me sich in Ziiri fir so japaanischi Teezeremonie aamälde, oder ame 3-stindige Workshop
dailnää, wo aim alles genau erklärt wird.

Wie dringgsch Du Dyn Tee ?
Y bi nit esoone Schwaarzteedringger... usser First Flush Darjeeling, dä dringg y gärn zwischeduure, aber verdraag die Gärbstoff nit so guet. Mer dringge am Moorge immer Grientee und zwoor usseme glaine
japaanische Kännli, wo dr Tee meemols uffgosse wird. Im Gschäft dringg y momentaan Kritertee, well y dr Hueschte kaa haa. Am maischte dringg y aber seer vyyl Grientee oder Matcha Tee, aber nit uffe niechtere Maage...

Wieso ? Was bassiert denn ?
S ka aim devoo schlächt wärde... Matcha Tee isch e pulverisierte, japaanische Grientee. Me nimmt s
Teeblatt und entfärnt d Rispe vom Blatt, maalts innere Staimiili und griegt e griens Pulver. Das Pulver leggt
me in e Schaale, iibergiessts mit haissem Wasser (nit kochend), nimmt e Bambusbääse und "bääselet" alles bis
es schuumig wird... und denn wirds drungge... isch au esoone japaanischi Zeremonie.

     
 

S git jo ganz ganz diire Tee, wie zem Byspiil dr originaal "Silver Needle" e gääle Tee... aber was macht denn dä Tee eso diir ?

  Viviane:

S git ganz weenig. Am Moorge bi Tau, ruedere si miteme glaine Schiffli uff e Insle, wo s numme e baar Ur-Teestriicher git und denn wärde die Teeblettli pfliggt und in goldigi Gfääss gleggt... alles numme an aim Moorge. S isch wiirglig e wunderbaare Tee und wenn me dä Tee uffgiesst, kemme die Blettli wie Noodle an Ooberflechi. S isch e feyne Tee, aber me zaalt halt s ganz "drumumme" au mit.

Was muess y mir do bryyslig ebbe voorstelle ?
25g koschte ca. 50 Frangge. In Japan gits Wältmaischterschafte under de Gyokuro Produzänte... Gyokuro
isch e sogennante Schattetee und isch seer diir. Mer hänn jetz Gyokuro Tohai Tee kenne kaufe und zwor vo däm Maischter, wo die Gyokuro Wältmaischerschafte 3x hinterenand gwunne het.

D Noofroog noo so diire Teesoorte isch doo oder ?
Jä klaar, absolut...

     
  Mer sitze jetz do grad im "3-Keenig" und Du dringgsch e "wysse Tee"... me liest jo in letschter Zyt seer vyl iiber dä wyssi Tee... um was goots do genau ? Isch das e Grientee ?
  Viviane:

Nai isch kai Grientee... bim wysse Tee wärde d Teebletter an dr Sunne droggnet und denn veraarbaitet...
het also so guet wie kai Koffein. Bim Grientee zem Byspiil, wärde in Japan die maischte Teepflanze mit Wasserdampf "beschwaaderet" und dernoo droggnet. Das git em Tee dr Gschmagg vo Heu und Grass.
D Chineese dien d Bletter vom Grientee voorwiegend reeschte, denn no walze, rellele etc... und das git denn wider e n-andere Gschmagg.

Isch momentaan e weeenli e Boom mit däm wysse Tee ?
D Kundschaft het dä Tee seer gärn, well dä nit eso beläbend isch... dasch immer e weeneli esoone Sach, dr Grientee ka me am Nomidaag und zOobe nimm dringge, wobys au doo Ussnaame git

     
  Welles isch denn grad Eyre Tee-Renner ?
  Viviane:

Jetz grad ischs nadierlig unsere "Christmas Tea", dasch e Mischig uss Darjeeling Schwaarztee, Grientee, Zimt, Kornblueme-Bliete, wyssi Zuggerbelleli und Zuggerstärnli. Dä Tee isch wiirglig sehr beliebt und gits numme in däre kurze Wienachtszyt bi uns.

Apropos Mischig... Iir hänn jo e aigeni Tee-Manufaggduur wo Eyre Tee gmischt wird. Wie lang goot das, bis e Tee vo dr Idee här bis zer Mischig, etc. am Änd im Regaal stoot ?
Das kunnt immer e weeneli druff aa... wenns brennt, denn ka dr Tee innere Wuche härgstellt wärde und sunscht bruchts halt syni Zyt.

Wo isch denn die Tee-Manufaggduur ?
In Minchestai

     
  So, jetz schwängge mer emol e weeneli zer Faasnacht iibere... Iir hänn jo au "Fasnachtstee" und "Räpplitee"... was
isch denn eso speziell an däne ?
  Viviane:

Bim "Räpplitee" isch d Basis e Rooibos Tee. Rooibos isch e Struuch uss Siidafrika, isch vo Natur uss siesslig, het kai Koffein und het eso rooti Needeli. Drzue kemme no Orangeschaale und s bsundere an däm Tee isch, ass es faarbigi Zuggerräppli dinne het :-)

Und dr "Fasnachtstee" ?
Bim "Fasnachtstee" isch d Basis e Grientee und het ganz vyyl faarbigi Kornblueme dinne. S Aroma isch seer
fruchtig und isch au firs Aug seer scheen zem aaluege... well dä Tee so faarbig isch, wie d Faasnacht au.

     
 

Du bisch jo friener emol inere Guggemuusig gsii...

  Viviane:

Vor vyle, vyle Joore... y kenn also baidi Syte ;-).

Du pfyffsch jo jetz innere Clique... e Ruggkeer in e Gugge kunnt nimm in Froog ?
Nai... Guggemuusig isch fir mii e Zwischestatioon gsii und wott die Zyt nit misse, aber jetz pfyff y wider.

In wellere Clique pfyffsch denn ?
Immer no bi de "Rhyserva alti Garde" vo de "Rhyschnoogge".

     
 

Was beditet Dir d Faasnacht ?

  Viviane:

Fir mii het d Faasnacht nimm dr glych Stellewärt wie au scho... y sag emol, y bi nimm so aagfrässe. Y gniess zwoor d Faasnacht, meerg aber au, ass y e weeneli Faasnachtsmied woorde bi.

     
  Het sich d Faasnacht im Geegesatz zue friener veränderet ?
  Viviane:

Jä seer... y ha seer Mieh demit, wenn ych mir als Frau ständig iiberlegge muess, wo n y an dr Faasnacht duurelauf muess, ass y sicher Haim kumm... die Iiberleegig muess y mir scho underem Joor mache, aber an dr Faasnacht die Angscht au no im Gnigg z haa, isch seer miehsaam find y und git mer au kai guets Gfiil.

D Angscht voorem elai haimgoo isch sicher s ainte... hesch Du au s Gfiil, ass d Hemmschwelle vo de Lyt generell gfalle n-isch ?
Jä scho... d Hemmschwelle isch mittlerwyle seer wyt unde...

     
  Wenn foot bi Dir d Faasnachtsstimmig aa ? Gits e spezielle Zytpunggt ?
  Viviane:

Nai ebbe nimm... isch aigentlig traagisch... mer geen sogar no voor dr näggschte Faasnacht, 2 Wuche in d Feerie. Bi uns isch immer baides e Thema gsii, also Faasnacht mache und au Ski faare... aber sobald d Schnyydere verbyy kunnt und mer d Goschdym aabrobiere, oder mer im Käller an dr Laarve baschtle, denn gspiir ys e weeneli... aber lang nimm esoo wie friener.

     
  Was macht Di Gligglig ?
  Viviane:

Wenns mym Maa und myne Kinder guet goot, denn goots mir au guet und das macht mi gligglig.

     
  Wo bisch Du uss Dynere Sicht "Taläntfrey" bzw. welles Talänt hättsch gärn no ?
  Viviane:

Zaichne... das ka n y aifach nit :-)

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait zrugg erinneret ?
  Viviane:

Im Kiehlschrangg vo mym Groossmami, hets immer e Nature-Joghurt mit Grenadine-Sirup und eme blaue Plastikleffeli stoo kaa und das hets denn zem Dessert gää... und drzue e Gutzi bagge uss Zwiibagg mit Kondänsmilch oobe druff und dä Gschmagg isch mer immer in Erinnerig blyybe.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Viviane:

Mitem Roger Federer

     
  Was wirdsch an Männer nie verstoo kenne ? Und iiberlegg Dir guuuueeeet was jetz andwoorte duesch ;-)
  Viviane:

(lacht schallend)... d Glassehait wo si in gwisse Situatioone hänn, wo kai Glassehait gfroggt isch.

     
  Wie lang bruchsch Du amigs am moorge, bis waisch was aalegge sollsch ?
  Viviane:

Also y bruuch... 10 Minute...

Quatsch... s git kai Frau, wo numme 10 Minute bruucht...
Doooooch... aber numme under dr Wuche... wenn mer an e Aaloss geen, dann nadierlig lenger ;-)

     
  Wär wurdsch gärn emol ins Dschungelcamp schigge ?
  Viviane:

Dr Hans-Peter Wessels

     
  Wenn platzt Dir dr Kraage ?
  Viviane:

Wenn me versuecht, Sache z vertusche... do wird y stärnsverruggt.

     
  No e baar Schlaagweerter, bitte numme mit aim Satz beantwoorte...
  Tee oder Kaffi ?

Tee... aber wenn Kaffi, denn Espresso.

  Basel... Haimat... Häärzbluet...
  Ziiri... Shoppe...
  Herbschtmäss... Mässmogge... Calypso...
  Tee-Huus... Draditioon, Häärzbluet, Verantwoortig... my Lääbe.
  Klima Gretel (Thunberg)...

Au iire git me e Platfoorm...

  Donald Trump...

Solang dä am Rueder isch, gang y nimm uff Amerika.

Vyyle Dangg fiir Dyni Antwoorte