Und wie isch Dyni allereerscht Faasnacht als Majoor gsi ?

Y bi seeeeeer nervees gsii... an sällere Faasnacht hänn mer au grad unser Jubiläum gfyyrt und hann uss dämm Grund am Faasnachtszyschdig uff baide Biine deerfe spiile... also Märtblatz und Barfi. Y bi wiirglig grad richtig ins kalte Wasser gwoorfe woorde. Die ganz Faasnacht isch eenter "verspannt" als entspannt gsii... aber ainewääg toll.

Und wenns mit hitte verglyychsch ?
Y find, ass y mi seer veränderet ha und vyyl loggerer woorde bi.

Und d Närvositäät ?
Närvees isch me immer voor dr Faasnacht... klappt alles ? Blybts voor allem unfallfrey ? Y ha scho 2 beesi Unfäll in dääre Gugge miterläbbt und das het mer glängt und bruch y nimme.

Wie ischs Echo vo de Mitgliider gsii noo dr eerscht Faasnacht als Majoor ?
Sie hänn mer fir die ganze 3 Daag e "L" uff e Rugge gläbbt. Y ha aber noo dr Faasnacht seer gueti Inputs griegt, ass y aigentlig s "L" scho lang hät kenne abzieh.

Und hitte mit Dynere n-Erfaarig, bringt Di so schnäll nyt me uss dr Fassig oder ?
Nai... soo schnäll bringt mi nyt me uss dr Fassig, das stimmt... y bi halt immer seer eergyzig, ass alles stimmt und fir alli basst. Mer kenne immer e Schwängg mache oder e Päuseli mee yybaue, aber s muess aifach basse.

Y dängg halt, ass s improvisiere am Aafang seer schweer isch... wenn emol e Gugge grad uff Dynere Route e Blatzkonzärt git, oder e Druggedde n-isch... denn muess improvisiert und e neyi Variante gfunde wärde und dasch nadierlig am Aafang seer schwiirig...
Dasch am Aafang seer schwiirig, well me s noonig so richtig kennt... mer hänn jo au ganz vyyl langjeerigi Aggdiivmitgliider bi n-ys und die sin au scho zue mir koo und hänn mer gueti Tipps gää... und das ha n y seer gschetzt, au hit no... aber me kas nadierlig nit immer allne rächt mache.

Wie erläbsch Du als Majoor d Faasnacht ?

Im Voordraab wird aim gsait, was me daarf oder z due het... sunscht het me kaini groosse Verpflichtige...

Und als Majoor ?
Als Majoor het me wiirglig 3 Daag lang ebbis z saage... und y muess wiirglig saage, ass si au uff mi loose. S isch au nit eso logger wie im Voordraab, sondern mitere groosse Verantwoortig verbunde. Noo dr Faasnacht hänn mer unseri "Lämpesitzig" wo me saage daarf, was aim basst ooder au nit basst het und do kemme au emol Sache, wo nit eso guet gloffe sin und das brobier y mer denn z meerge.

Hesch Du emol e witzigi Situatioon als Majoor erläbt ?

Mer hänn emol bim Hotel 3-Keenig e Pause gmacht und myni Hälfer hänn mer grad die grooss Laarve abgzooge... dernäbe sin e baar glaini Kinder gstande, wo mi mit groosse Auge aagluegt hänn... und doo het dr aint Gnäggis zue synere Mamme gsait "Du Mami, dä Maa het jo gaar nit esoone groosse Kopf...". Dä Glai het wiirlig gmaint, my Kopf sigg genauso grooss wie d Laarve ;-).

*lach*... so guet...
Y hanen denn uffe Aarm gnoo und zuenem gsait "Nai loos, y bi aigentlig ganz e normaale...", dasch e spontaan, luschtigi Situatioon gsii.

Vorhäär im Voordraab, bisch mitere glaine Laarve underwäggs gsii und jetz als Majoor bruuchsch zimmlig vyyl Zyt, bis ändlig emol vo Dynere groosse Laarve befreyt woorde bisch... steert Di das nit ? Guet, hesch drfiir scheeni Fraue wo Di aa- und abzien... also Laarvemässig ;-)

Ab dämm Joor isch sogaar no unser Schnyyderin mit drbyy, wo mi aa- und abzieht... si lauft jetz im Voordraab mit. My eerscht Majoorelaarve isch no fiir e Frau aabasst gsii und ooni Panzer, dasch zimmlig miesaam gsii... hitte ha n y e Panzer, wo mer zuesätzlig no scheen waarm git ;-)

Dr Majoorekopf het jo no e rächts Gwicht...
Jä, dä isch zimmlig schweer, aber isch OK. Myni Pause sin aifach immer kiirzer als die vo de andere... bis ych my Kopf looswoorde bi, sin alli scho bim 2. Zwätschgelutz... und bis y denn dä wider aahaa, kenne si no aine nää.

Was fasziniert Di am "Majoor" ?

Esoone tolls Spiil hinder miir z haa... y drill mi seer oft am Cortége um, lueg ins Spiil und das fasziniert mi immer seer. S fasziniert mi aber au, wenn d Lyt am Stroossrand myni grooss Laarve aaluege und stuune... und s fasziniert mi nadierlig au, 3 Daag lang dr Cheff deerfe z sii.

Loose si uff Di ?
Jä seer... guet bi dr Pinggtligkait kennt me no e weeneli ebbis ändere...

Welles sin Dyyni perseenlige 3 goldige Reegle als Majoor ?

1. Y ha gärn Pinggtligkait...
2. Y ha gärn, wenn me miir zueloost wenn y am schwätze bii, myni Stimm lyydet sunscht... au under dr Laarve...
3. My Motto "Mer blybe spiil- und laufbaar bis zem Abdrätte"...

Du spiilsch jo sälber kai Instrumänt... wie isch s denn mitem Mass ? Hesch Du Dy Gspiir im Griff, ob si no spiile kenne oder nit ?

Jo guet, y ha au scho Lieder aagsait, wo mi denn s Drumpeeteregischter bees aagluegt het... s perfäggte Gfiil z haa, isch zimmlig schwiirig und schigg y miteme Handzaiche gaaaanz vyyl Härzli... y lueg my Spiil aa, y frogg oft nooche und gib vyl Handzaiche... aber mittlerwyyle spräche mer ys voorgängig e weeneli ab.

Gits au e Vize-Majoor bi Eych ?
Jä, dasch d Steffi Schmid...

Ahjä ?
Jo, si het au scho bimene Uffdritt miesse voorne stoo, well y in de Feerie gsii bi.

Aber an dr Faasnacht het no niemer miesse yyspringe oder ?
Nai... und am Bummel wott niemmer...

S isch Faasnachtsmäntig, alli steen baraat und waarte uff e Pfyff zem Faasnachtsstaart... was goot do in Dir voor ?

Bevoor s iiberhaupt emol loosgoot, stand y mindeschtens scho 5 Minute lang aagschiirt doo und ha denn nadierlig Zyt zem noodängge in mynere groosse Laarve... y bi uffgreggt... frai mi uff dr eerscht Pfyff... Gänsehutt... und denn goots ändlig loos und frai mi uff 3 tolli Daag...

S git bi Eych au e speziells Rituaal gäll ?
Am Faasnachtsmäntig voorem Cortége dräffe mer ys alli und denn iibergit mer dr Bresidänt symboolisch d Faasnacht. Drzue gits denn au immer em Sujet entsprächend e spezielli, goldigi Blaggedde.

Isch das numme zwische Eych baide oder voor versammleter "Mann- und Frauschaft" ?
Das findet mit alle Aggdiive statt...

Und wenn gseen si s eerscht Mol Dy Goschdyym ?
Mer dräffe n ys bim Depot und wenn alli doo sin, gang y denn yyne, zieh my um und kumm denn im neye Goschdym wider uuse und denn gseen si s alli zem eerschte Mol.

Und emol e Instrumänt spiile, wurd Di nit raize ?

Y bi grad drbyy, Posuune spiile z lehre...

Hoppla... grad s Keenigsregischter ?
(lacht)... Du, y bi jetz im 6. Joor als Majoor underwäggs und iirgendwenn wird s emol e Wäggsel gää... und wenn y denn noonig baraat bi mit dr Faasnacht uffzheere, ka n y in d Raie stoo.

3 Daag Ussnaamezuestand... also im positiive Sinn... 3 Daag komplett vom Gschäftslääbe und sunschtigem abschalte... und isch nimm uss mym Läbe wäggzdängge.

Wenn foot bi Dir d Faasnachtsstimmig aa ?

S eerscht Gribble kunnt im Novämber mit de eerschte Uffdritt... wird aber denn glyy duur d Wienachtsstimmig abgleest... und denn kunnts wider Mitti Jänner so um d Zyt vom Vogel Gryff Zyt, wenn die ganze Voorfaasnachtsveraastaltige aafeen und d Laarvebroobe aasteen.

Wenn jetz Dyni 9 Joor verglyychsch, het sich d Faasnacht generell veränderet ? Und wenn jo, in welli Richtig ?

Was mii seer steert an dr Faasnacht isch, ass Sache zrugg- oder aifach aagwoorfe wärde...

Das ha n y scho vo Waggis gheert, aber binere Gugge ?
Doch, doch... y ha au scho Sache an "Kopf" griegt... und was mi au no steert isch, ass s Verständnis fir d Faasnacht verloore goot... alles isch e Waggis, egal obs e n-alti Dante, Harlekin, etc. isch... ständig schreye si "Waggis, Waggis..." und das sin Sache, wo mi seer steere. Aber s schlimmschte ischs zruggwärfe und voorne duure renne.

Also Sache zruggwärfe isch e absoluts "NoGo"... und das stimmt, ass d Wärt vo dr Faasnacht nimm an d Kinder wytergää wäärde, was y au seer schaad find. Y find au, ass d Aggressivität seer zuegnoo het an dr Faasnacht...
Dasch eso...und dr Alkohoolkonsum au... wenn me as Majoor mit dämm groosse Kopf underwäggs isch, denn het me e seer yygschrängti Sicht und wenn aim ebber no e Hepperli stelle wott, isch das seer miesam... aber Achtig, y ha e super Truppe hinder miir wo uffbasst :-)

Das ka n y gar nit glaube und numme no dr Kopf schittle...

Eerligkait und tolli Frinde z haa, macht mi gligglig... näbscht dr Gsundhait nadierlig.

Aigentlig ha n y 3 Highlights kaa... im Jänner bi n y in unseri tolli Woonig yyzooge, denn Mitti Joor dr Kauf vo mym Draumauto und im Auguscht myni Feerie in Abu Dhabi.

Mit dr Cameron Diaz...

Wieso si sich eso staarg schmingge mien... und worum si iiri Libbe uffspritze leen.

Indressant... het bis jetz no niemer gsait ;-)
Doch dasch esoo... y ka nit verstoo, wieso me sich eso aamoole muess, wenn me au ooni Schminggi guet ussgseet und e scheeni Hutt het... y ha iiberhaupt s Gfiil, ass es immer eggsdreemer wird... s isch bald s ganz Joor Faasnacht... ahjo, s git no ebbis wo n y nit verstoo kaa... wie me Prossecco gärn ha ka *lach*.

D Greta Thunberg...

Was mii jeedes Mol an myni Kindhait erinnert und dasch vellig egaal wo n y bii... isch dr Gschmagg vo Tomatesoosse.

Tomatesoosse ???
Genau... y bi jo italiänisch uffgwaggse und my Babbe het jeede 2. Daag e Pastadäller bruucht. Immer wenn y haim koo bi, hets noo däre Tomatesoosse gschmeggt... und dorum erinneret mi Tomatesoosse au hitte no zrugg in dr 8. Stock vo dr Kirchmattstrooss 3 in Muttenz... deert ha n y nämmlig zue sällere Zyt gwoont.

Loss mi emol iiberlegge...hmmm...hmmm... Gmischt :-)))

E Männergugge wär nie e n-Option ?
Y waiss gaar nit, ob y jeemools in e anderi Gugge goo wurd noo de "Schlyffer"...

Faasnachtsstadt, Fuessballhoochbuurg und "an mym Rhy"...

Ka me vergässe...

Kindhaitserinnerige und immer wider scheen... und au immer diirer...

Schreye noo Uffmeergsamkait...

Austraalie...

Die isch scho im Dschungelcamp...

Dä ka d Greta grad ins Dschungelcamp mitnää.