Patrick "Almi" Allmandinger - Gaschtronoom vo dr Sujet Baiz "Fasnachtsstuube"
   
 

 

Almi, hitte gits emol kaini Frooge iiber Dii als Comedian, Schauspiiler oder Produzänt… sondern iiber Dyni ney Beruefig als Gaschtronoom. Am 5. Novämber 2019 isch die grooss Ereffnig vo Dynere "Fasnachtsstuube" gsii... wie isch Dir gange ?

  Almi:

S isch seer emotionaal gsii... mer hänn alles scho seer lang voorberaitet kaa und wenn s denn ändlig sowyt isch und die Ereffnig stattfindet, denn isch das nadierlig alles mit seer vyl Emotioone verbunde... dasch ganz klaar. S isch e suuberi Sach gsii und mer hänn e tolli Ereffnig mit 300 glaadene Gescht pro Daag kaa...

S ganz Wucheänd ?
Frytig und Samschtig... mer hänn ys au ganz klaar gsait, ass mer zeerscht mit d Faasnächtler fyyre wänn und eerscht denn kemme d VIP-Gescht... nit ass es denn wider haisst "dasch jo wider typisch, zeerscht kemme d Promis und denn die andere..." und dasch ys au glunge. Guggemuusige, Schnitzelbängg und Cliquene sin doo gsii und mer hänn 2 Daag lang d Faasnacht bi n ys kaa...

Also e perfäggte Staart...
S isch e super Sach gsii, Jä...

     
 

D Idee vo dr "Fasnachtsstuube" isch jo gää… s ganz Joor Faasnacht, dh. me ka au s ganz Joor Mählsubbe, Kääs- und Ziibelwaie ässe… machet Iir das alles sälber oder wird das gliiferet ?

  Almi:

D Mählsubbe mach y sälber, d Kääs- und Ziibelewaie kaufe mer bim Wacker yy... dasch denn z schwiirig zem sälber mache... y bi jo kai Begg.

Heernli mit Ghaggts gits jo au gäll ?
D Sauce mach y sogaar sälber...

Oha, e neyi Beruefig als Koch ?
Jo guet, y ha jo friener immer welle Koch wärde, aber well y nit in d Direggdioonskantine vo dr Novartis aanekoo bii - si hänn dr Soon vom Scheffkoch gnoo - bi n y halt Coiffeur woorde... doo druff aabe ha n y mer denn gsait, wenn y scho nit koche due, denn schaff y halt mit scheene Fraue ;-).

     
 

Du fiehrsch jo d "Fasnachtsstuube" nit elai… wär sin denn Dyni Gspänli ?

  Almi:

Myni Gspäänli sin ainersyts dr Rolf Tschan, wo jo au mit miir zämme d Fiirma het... und anderersyts hänn mer no dr Heinz Zimmermann, wo ne erfaarene Gaschtronoom isch. Dr Heinz het jo iiber 40 Joor lang diväärsi Restaurants gfiert und het au s Wiirtepatänt... und denn hänn mer no d Simon Manser, wo au e n-erfaareni Gaschtronoomin isch und joorelang dr "Rollerhof" gfiert het.

     
 

Wie isch denn die Idee entstande ? Y main, dasch jo komplett ebbis Neys wo Du jetz do machsch...

  Almi:

Du, s het scho seer lang in miir broodlet und ha so ebbis aigentlig scho lang emol welle mache... y ha immer gfunde, ass mer aigentlig nyt faasnächtliggs doo in Basel hänn und dasch so schaad. Wenn zem Byspiil uff Veneedig goot, denn findet me an jeedem Egge iirgend e Lädeli mit Lärvli und Goschdym, oder vyli Baizli, etc.
und in Basel findsch nyt deraartigs. Y ha jo emol im Imbergässli gwoont und deert sin d Fierige im Minutetaggt verbyy koo... und wenn d Tourischte ebbis hänn welle go aaluege, wo mit dr Faasnacht zdue het, denn hätte si in e Cliquekäller miesse goo...

Wenn denn emol e Cliquekäller under dr Wuche offe n-isch...
Jo... e Källerscheff z finde wo dr Käller under dr Wuche uffmacht, dasch jo fascht unmeeglig... das waiss me jo.
Y ha mer immer dänggt, s bruucht doch e Baiz, wo de Tourischte unsere Bruuchduum in iirgendere Foorm wytergit und esoo isch das aigentlig entstande.

E tolli Idee, wo jo nit gratis isch...
S git nadierlig no ebber im Hintergrund wo n ys no e weeneli finanziell understitzt... sunscht kennte mer das alles gaar nit mache. Miir isch au seer wichtig, ass d Lyt nit s Gfiil hänn, ych haig das alles finanziert...

Wieso mainsch ?
Y wott nit, ass d Lyt dängge "jetz macht är s Läggerli und finanziert demit sy Baiz", denn eso ischs nit... mer
hänn wiirglig e guete Investoor gfunde, wo n ys understitzt und an dr Idee genau glyych vyyl Fraid het, wie miir.

     
 

Denn ischs also au eso blaant, ass die ganze Stadtfierige bi Eych verbyykemme ?

  Almi:

Richtig... mer schaffe mit Basel Tourismus zämme und s isch wiirglig au eso blaant, ass me de Tourischte unseri Faasnacht e weeneli neecher bringe kenne...

Und fir daas, gits jo au ebbis ganz speziells bi Eych, gäll ?
Genau... mer kenne e Moorgestraich inszeniere, dh. mer leen alli Rollos aabe und verdunggle die ganz Baiz. Fir daas hänn mer vomene Elegdrigger eggsdra e "Moorgestraichschalter" yybaue loo, wo fir iin aber nit ganz eso aifach gsii isch...

E "Moorgestraichschalter" ??? Y lach mi hii :-)
Jo, dä Schalter ka me drille und alles wird dunggel... au in dr Kuchi. Glaini Lädärnli schalte sich yy, wo do iiberall verdailt sin... denn leen mer d Moorgestraich-Melodie laufe und alli Gescht griege e glains Stigg Ziibele- und Kääswaie, wie au e Mählsubbe zem brobiere.

Soo guet...

     
 

Also y muess eerlig saage... wo n y das glääse ha, ha n y dänggt, ass Iir doo wiirglig dr Basler-Närv droffe hänn und y bi mer sicher, ass das e Kniller wird. Voor dr Baiz gits Schaufänschter, wo mit ganz vyl Liebi yygrichtet woorde sin… hänn Iir das alles sälber gmacht ?

  Almi:

My Gspäänli, dr Rolf Tschan, schafft jo bi dr Firma "Création Baumann AG", wo fir die ganz groosse Hotels in
New York, Dubai, Tokio, etc. die diire Voorhäng liiferet und mit de greeschte Architekte in dr ganze Wält zämmeschafft. Dr Rolf het - wie n ych iibrigens au - e Affiche oder e Flair zem yyrichte... und eso hänn mer die Schaufänschter yygrichtet... sin quasi unseri aigene Designer gsii.

Also y find die Schaufänschter wiirglig super, muess me unbedingt emol aaluege... mit vyl Liebi zem Detail...


E Mooleratelier...

E Fasnachtsstuube...
     
 

S git jo au e "Museumsgässli"… was ka me sich do drunder voorstelle und wohär sin die scheene, alte Utensilie ?

  Almi:

Rolf Tschan het die scheene Geegeständ mitbrocht und sin alles Ooriginaal. Är isch e begnaadete Fasnachtssammler und het die vyle, alte Geegeständ bi sich dehaime im Käller glaageret kaa. Mer sin nadierlig froh, ass mer die wiirglig vyle und wunderbaare Sache dr Effentligkait zaige kenne. Sogaar dr Felix Rudolf von Rohr, wie au d Pia Interbitzin hänn gstuunt, was mer doo fir alti Laarve hänn. Nit emol s Faasnachtsmuseum isch im Bsitz vo sottige alte Laarve... aber jetz foots scho aa mit Synergie zwische uns und em Fasnachtsmuseum und dasch nadierlig toll.

Also s "Muesumsgässli" befindet sich uffem Wäg vo dr Baiz, hintere zem Schnitzelbangg-Egge...

     
 

Apropos... bi Eych in dr "Fasnachtsstuube" gits jo e Dambour-, Pfyffer-, Schnitzelbangg- und e Gugge-Egge… daarf me als Guggemuusiger au emol ebbis im Pfyffer-Egge dringge, oder wird me denn grad gstainigt ?

  Almi:

Nai, nai, kai Angscht... de wirdsch nit gstainigt. Dasch jo au s Scheene, d Lyt meerge amigs gaar nit, ass si pletzlig im Damboure- oder Pfyffer-Egge sitze... oder e Wäggeler hoggt im Schnitzelbangg-Egge und genau eso soll jo au d Fasnacht underenand sii. Das "Geegenand" bruuchts gar nit... mer sin doch alles Faasnächtler und jeede soll zue jeedem hogge kenne.

S git sogaar no e Chaise...

Mer waiss jo, in Basel daarf me joo niemer vergässe und dorum hänn mer au e Chaise vorusse voor dr Baiz.

     
 

Du sälber bisch jo mitem "Läggerli" seer engagiert... wenn ka me Di denn am beschte in dr Baiz aadräffe und welli Funggdioon hesch Du doo ?

  Almi:

Aigentlig bi n y jo s Usshängeschild und zaig mi dorum voorne in dr Baiz, aber s glingt mer nadierlig nit immer und denn muess y au in dr Kuchi wiirble... s gheert jo alles drzue und me ka nit numme voorne an dr Front blyybe.
Mer mien jo au luege, ass mer d Personaalkoschte dieff halte kenne... mer hänn jo nit unändlig vyl Personaal.

     
 

Wie gseets denn wärend dr Faasnacht uss ? Y dängg, Iir hänn duurgehend offe oder ? Au nooem Moorgestraich ?

  Almi:

Mer hänn 3 Daag volle Pulle...

Also duurgehend offe ?
Also mer wärde sicher e baar Stund zue mache und alles wider butze... aber s wird zem greeschte Dail offe sii.

Y bi seer gspanne... s liggt e glai weeneli absyts vo dr Fasnachtsroute, aber y glaub, wenn d Lyt begaischteret sin, denn kemme si ainewäg verbyy und y wird ganz sicher au e baar mol yyneluege, wells ebbis tolls isch...
Scheen :-) me muess es aifach uffem Radaar haa... vo dr Harmonie ischs jo numme 2min zem laufe. Au als Gugge oder Clique isch mer emol froh, wenn me ussschääre und aifach emol aabefaare kaa... gmietlig ain dringge und denn wider zrugg in Rummel yyne... und do sin mer nadierlig dr ideaal Oort fir daas. Abgsee devoo brätscht das unglaublig, wenn e Gugge oder e Clique duur d Spaalevoorstadt lauft.

     
 

Wie gseets denn kulinaarisch uss ? D Spiiskaarte isch schyns zimmlig witzig gmacht, griegt me als grollte Zeedel... wird die aim voorgsunge ?

  Almi:

Jä das wär no e Meegligkait... aber stimmt, unseri Geträngge- und Spyyskaarte gits in Foorm vomene Zeedel und wenn me au d Bierdeggel aaluegt, denn sin die in Foorm vomene Räppli... s isch also alles iiberleggt.

     
  Was beditet fir Dii sälber d Fasnacht ?
  Almi:

Dasch fir mii s Lääbe... y kennt nimm sii ooni Faasnacht.

Du bisch aber wider aggdiiv underwäggs an dr Faasnacht oder ?
Y bi wider aggdiiv als Schnitzelbänggler underwäggs und frai mi scho seer druff, wenn y in mynere aigene Baiz als Schnitzelbänggler singe daarf.

Dasch sicher no speziell...
Das wird sicher ganz speziell wärde...

     
 

Wenn foot bi Dir d Faasnachtsstimmig aa ?

  Almi:

Bi miir goots halt beraits nooem "Läggerli" scho wider loos... y bi wiirglig 365 Daag in dr "Fasnachtsstuube".

Hesch denn nooem "Läggerli" iiberhaupt no Luscht uff d Faasnacht ? Oder gits e Momänt, wo aifach gnueg hesch und emol e Pause bruuchsch ?
Nai gaar nit... woby doch... aber nit vo dr Faasnacht, vo däre bruuch y kai Pause, aber vom "Läggerli". Y mach jo alles bim "Läggerli", y bi Produzänt, hool d Wäärbig yyne, etc. und noo dr letschte Voorstellig kunnt jo gly d Faasnacht... und noo dr Faasnacht gang y scho wider uff d Sponsoore vom "Läggerli" zue, well denn alles no
"waarm" isch, dh. d Sponsoore wisse no, wie s gsii isch. Aber denn bi n y wiirglig froo, wenn y noo dr Faasnacht emol fir 3 Wuche nyt mache muess... aber y muess mi drzue zwinge... aber ebbe, d Faasnacht isch bi miir ständig bresänt.

     
  Wie hesch Du als glaine Bueb d Faasnacht erläbt ?
  Almi:

Als Dambour... y ha als 6-jeerige bi dr "Spezi Clique" drummle glehrt...

Und Dyni Eldere sin au Faasnächtler gsii ?
Nai... my Babbe isch Italiäner gsii und het kai Faasnacht gmacht... aber my Mamme het bi de "Biirewaiche" pfyffe.
Y bi aigentlig bi myne Groosseltere grooss worde und my Groossbabbe isch Beglaiter bi de "Spezi Clique" gsii... si hänn mi immer seer understitzt mit dr Faasnacht.

     
  Het sich d Faasnacht im Geegesatz zu friehner veränderet ? Und wenn jo, in welli Richtig ?
  Almi:

Jä scho...

Inwiefärn ?
Y find, ass d Faasnacht nimm so spontaan isch... vyyl isch oft bis ins letschte Detail duureoorganisiert. Friener hänn mer amigs no Schyssdrägg abgloo, zB. innere Baiz dr Gips aagriert und Gipskepf druss gmacht... und dernoo alles andere au no yygipst... und hitte isch bis am Mittwuch alles perfäggt duureblaant...

S erlaubt aigentlig iiberhaupt kai Improvisatioon mee...
Jo genau und das find y zem Dail e weeneli schaad... d Faasnacht sott doch au e weeneli improvisiert sii.

     
 

Wie schwiirig ischs fir Dii, an dr Faasnacht dr "Almi" z sii ? Kasch au emol ganz normaal amene Disch hogge, oder hänn alli s Gfiil, ass jetz ständig dr Max mache muesch ?

  Almi:

Jo dasch oft esoo, aber dasch mir nadierlig au bewusst und ha jo schliesslig au das Image uffbaut. Me ka nadierlig uff dr ainte Syte nit saage "Y will nit, ass mi d Lyt nit kenne" und uff dr andere Syte wottsch e Figur uffbaue... das goot nadierlig nit und das ka weder e Emil, no e Marco Rima. Abgsee devoo muess me mit dämm umgoo kenne...

Aber d Erwaartigshaltig vo de Lyt isch doo, ass immer dr Luschtig spiile muesch oder ?
Jo sicher, aber y ka mi do scho rächt guet devoo abgränze. Grad letschtens isch ebber koo wo gsait het "Hey
Almi, verzell emol e Witz oder mach emol dr Läppli..." y ha denn numme gsait "Dr Alfred Rasser het immer gsait, nit emol e Kueh kalberet uff Kommando..." und denn isch Rueh gsii.

     
 

Gits bi Dir au emol e Momänt, wo aifach ame Egge stoosch und dänggsch "Wow s isch Faasnacht" ?

  Almi:

Jä nadierlig, das ha n y sogaar seer oft...

Du bisch jo au als Bänggler underwäggs und immer im Stress... wägge dämm main-y...
Nai, wägge dämm bi n y jo e "Wilde" Bänggler und dasch jo grad s tolle draa, ass me nit stresse muess. Wenn y s Gfiil haa, do ischs jetz luschtig, denn suff y aine und blyb doo. Y stand aber au ganz vyyl mool imene Egge und zieh d Faasnacht richtig yyne.

     
  Was macht Di Gligglig ?
  Almi:

S macht mi gligglig wenn y gsee, ass d Lyt Fraid hänn und lache kenne, ab dämm wo n y mach... wenn me uff dr Biini stoot und d Lyt applaudiere und klatsche, oder wäggere Pointe lache, denn macht mi das gligglig.

     
  Platzt em Almi au emol dr Kraage ? Und wenn joo, bi waas ?
  Almi:

Wenn ebber s Gfiil het, är miess immer wider stichle... oder 100x saage "Du hesch wider nit..." oder " Worum machsch das wider nit..." denn sag y "y waiss es jetz, hesch mers 1x gsait und muess es nit immer ständig gheere"... und wenns denn immer noonig uffheert, denn blatzt mer schonemol dr Kraage. Oder wenn me mi hintergoot, was laider scho bassiert isch, denn platzt mer eggsdreem dr Kraage... aber die Lyt ha n y jetz uss mym Läbe entfäärnt und mit dääne wott y au niemee ebbis z due haa.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Almi:

Ganz klaar, dr Alfred Rasser...

     
  Wo uss Dynere Sicht, bisch Du "Taläntfrey" bzw. welles Talänt hättsch gärn no ?
  Almi:

Vellicht e weeneli mee mit Buechhaltig oder so. Im Momänt bi n y au nit grad dr oordentligscht, obwool ych e Jungfrau bi... bi mir dehaime herrscht grad e bitz Chaos... aber y bi nadierlig seer froh, ass y e Partnerin haa, wo seer oordentlig isch.

Jungfrau im Stärnzaiche ?
Jä im Stärnzaiche ;-)

     
  Was wirdsch an Fraue nie verstoo kenne ?
  Almi:

Ass si immer s Gfiil hänn, si wisste scho, was Du dänggsch...

     
  Wär wurdsch am liebschte emol ins Dschungelcamp schigge ? (Sott ebber si, wo me kennt)
  Almi:

Dr Donald Trump...

     
  No e baar Schlaagweerter, bitte numme mit aim Satz beantwoorte...
  Faasnachtskiechli oder Läggerli ?

Nadierlig s "Läggerli"...

  Basel...

Myni Beruefig und my Haimat...

  Ziiri...

Syt 6 Joor an mynere Syte und in mym Härz...

Isch sicher au nit immer grad aifach als Basler ;-)
Stimmt ;-)

  Herbschtmäss...

Kindhaitserinnerige...

  Doo muess y unbedingt no aane in mym Läbe...

Nit naime aane in d Feerie, sondern imene Musical mitmache z deerfe...

  Klima-Gretel
(Greta Thunberg)...

Kai Kommendaar...

  Donald Trump...

Mit Greta zämmebinde... kai Kommendaar...

Vyyle Dangg fiir Dyni Antwoorte