Hoosesaggmuseum

	Dagmar Vergeat vom "Hoosesaggmuseum"

S "Hoosesaggmuseum" befindet sich im Imbergässli 31 und isch s glainscht Museum in dr Stadt... vellicht sogar uff dr Wält ;-) Was muess me sich do drunder voorstelle oder anderscht gfroggt, was isch s "Hoosesaggmuseum" ?

Dagmar:

S "Hoosesaggmuseum" isch aigentlig e Vitrine bzw. e Kischte, wo 70x70cm grooss isch und sich quasi in dr Yygangsdiire befindet... also e Fänschterlaade. Uurspringlig ischs no kai Museum gsii.

Wie ischs denn zeme Museum woorde ?
Voor unserem Huus sin immer ganz vyl Lyt stoo blybe, well friener do die eerscht Basler Hebamme gwoont
het. D Lyt hänn denn nadierlig yyne gluegt und d Naase an unserer Schyybe platt druggt, was ys mit dr Zyt seer gsteert het. Y ha denn zue mym Maa gsait, ass är ebbis baue soll, wo me dinne Sache usstelle und verkaufe kaa... y bi zue sällere Zyt grad im Baschtelmodus gsii. My Maa het denn esoone Kischte baut, wo mer an d Diire ghänggt hänn und esoo unsere Fänschterlaade woorde n isch. In däre Kischte ha n y denn brobiert Sache z verkaufe wie Schlittschueh, sälbergmachte Schmugg, Faasnachtslaarve, etc.

Also aifach numme daas verkauft, wo me in däre Kischte duurs Fänscht gsee het...
Genau...

Aber yynekoo het me nit deerfe oder ?
Nai... aber gloffe ischs nit wiirglig, y ha zwoor d Schlittschueh und d Laarve verkauft, aber dernoo isch nyt
me gange... d Lyt hänn sich aifach nit traut zem lytte. Mer hänn ys denn iiberleggt, was mer mit dääre
tolle Kischt no mache kennte. Y ha e Schnapsgleesli-Sammlig kaa und zue mym Maa gsait "Du, mer mache
jetz die Schnapsgleesli-Sammlig deert yyne, ass d Lyt weenigschtens ebbis z luege hänn". Mer hänn denn
das gmacht und s isch e riise Erfolg woorde... d Lyt hänn sich unglaublig driiber gfrait.

Und denne ? Wie ischs wyter gange ?
Mer hänn ys denn gsait, wenn das scho so luschtig fir d Lyt isch, denn stelle mer doch grad au no unseri Gloggesammlig uss.

Die Gloggesammlig isch denn aber numme zem aaluege gsii oder ?
Jo genau... s isch denn nit lang gange bis es an dr Diire glitte und aine gfroggt het "Du, y sammle dieses und jeenes, daarf y das emol bi dir ussstelle ?"... und esoo hets denn aagfange. Mer hänn e Museum druss
gmacht und däm Ganze e Namme gää... ebbe "Hoosesagmuseum".

Wie lang gits das "Hoosesaggmuseum" scho ?

Dagmar:

Y wurd saage, syt ebbe 25 Joor...

Jetz ischs jo esoo, ass me bi Dir Sammlige usstelle darf...
Also me muess jetz scho underschaide... du sitzisch jetz doo in mym Schaulaager... und s "Hoosesaggmuseum" isch wiirglig numme die Kischte deert voorne an dr Diire, wo me au vo usse yyseet und dorum ischs au s ainzig Museum ooni Effnigszyte ;-)

Schaulager

Schaulager

Guet... Museum ooni Effnigszyte, me ka also rund um d Uhr syni Naase bi Eych an dr Diire platt drugge...
Ma ka immer verbyy koo... aifach ab Mitternacht hets nimm eso vyl Liecht und gseet nyt me... aber denn lychte sie halt mit de Handys in d Vitriine.

Und s Schaulager isch aber Dyni Privaatsammlig oder ?
Jä...

Welles isch denn grad die aggduellscht Sammlig im "Hoosesaggmuseum" ?

Dagmar:

Im Momänt sins Schildkretli... und voor de Schildkretli, hänn mer vom Schwizerische Wirtschaftsarchiiv e Sammlig bi uns kaa. Iiri Aagstellte sammle schreggligi Souvenirs vo dr ganze Wält... dh, immer wenn aine vo däne in d Feerie goot, bringt är vo deert e hässligs Souvenir mit :-) Aber y ha gleehrt, ass dr Begriff "Hässligkait" seeeer grooss und deenbaar isch :-)

Was bruchts denn, ass me bi Dir in dr Vitriine usstelle kaa ?

Dagmar:

Es muess e Sammlig sii... s mien mindeschten 50 Stigg sii, ass es au wiirgt und me ebbis druss mache kaa und die Stigg deerfe nit greesser als e Hand sii.

Du und Dyn Maa daile sich d Aarbet...
Genau... y bsoorg d Sammlige und my Maa macht d Fänschter...

Wie jetz, wo me uff e Schalter drugge ka und sich ebbis bewegt...
Jä... är het immer die luschtige Idee und macht mit däne Objäggt ebbis lässigs.

25 Joor lang gits das "Hoosesaggmuseum"... 25 Joor lang drugge d Lyt iiri Naase platt an der Diire... närvt das nit mit dr Zyt ?

Dagmar:

Nai, Nai... im Summer sin mer eh nit vyl doo und s Zimmer wo s Schaulaager isch, wird nit vyl gnutzt.

Aber Fiehrige machsch nit...
"Fiehrige" isch falsch, y mach Apéro's und me ka das Zimmer mitem Schaulaager fir 12-14 Persoone miete.
Drzue gits denn e Glas Wyy und ebbis z knabbere... das mach y no vyl und d Noofroog isch rächt grooss.

Was sin das fir Lyt, wo das Zimmer miete ?
Hauptsächlig Voorständ, wo do iiri Sitzige duurefiere... oder au Faasnachtsveraine, wo do iiri Faasnachts- oder Sujetsitzig mache... luschtigerwyys inspiriiert das Zimmer seer.

Absolut... s isch au seer haimelig und me fiilt sich wool doo...

Wo findisch Du denn amigs Dyni Sache firs Schaulaager ? Uffem Floomärt ?
Jo, aber mer hänn jetz e weeneli brämst, s het jo fascht kai Blatz me doo inne ;-)... aber grundsätzlig
bestoot bi mir e Sammlig immer mindeschtens uss 3 Sache und wenn me emol 3 Sache het, denn muess es wyter goo.

Welles isch denn die skurriilschti Sammlig im "Hoosesaggmuseum" gsii ?

Dagmar:

Maischtens während dr Kunschtmäss "Art Basel", gits bi uns e speziells "Art-Fänschter" im
"Hoosesaggmuseum" und doo deerfe Kinschtler ebbis ussstelle. Mer hänn denn emol e Kinschtler kaa, wo Hiener gmacht het, aber nit normaali, sondern Sex-Hiener in Strapse, etc. My Maa het denn in däm Fänschter e Stedtli miteme Puff baut und die sexy Hiener in Strapse uffgstellt... dasch aifach dr Kniller gsii :-)
Oder e WC-Hiisli Sammlig hänn mer au scho kaa...

...aha...
Das sin eso Modäll vo Husierer gsii... friener sin die Husierer vo Hof zue Hof zooge und hänn allerlei Sache verkauft, u.a. au WCs. Do me aber nit alli WCs het kenne mitschleppe, het me de Lyt ebbe so WC-Modäll zaigt.

Gits e Sammlig, wo unbedingt emol haa wottsch ?

Dagmar:

S isch seer schwiirig ebbis z bringe, wo mer noonig kaa hänn...

In weller Frequänz wird denn d Sammlig gwäggslet ?
Mer stelle ca. 6x pro Joor e Sammlig uss. D Frosch-Sammlig blybt jetz no bis 1. Dezämber und dernoo kunnt
d Wienachtsusstellig... die blybt bis zem 6. Jänner und dernoo kunnt e Schneekugele-Sammlig, denn
d Faasnachtsusstellig und denn kunnt ebbis ganz luschtigs.

Was denn ?
Dä sammlet alti Zuugsbyljee und zwoor voor 1980 und das wird seer luschtig.

Apropos Faasnachtsusstellig... isch die Usstellig jeedes Joor Sujetbezooge ?

Dagmar:

Nai, y ha s jetz syt Joore eso gloo, well y aifach esoone groosse Erfolg ha mit mym Faasnachtsfänschter.

Also kemmet do aane und lueget das Faasnachtsfänschter vom "Hoosesaggmuseum" aa, s muess
grandioos sii !!!

Machsch Du sälber au Faasnacht ?
Ja, y mach Faasnacht bi de "Wätterhäxe"... mer sin e glaini Grubbe vo Fraue, wo immer weeniger wärde... friener sin mer emol 6 Fraue gsii, hitte numme no 3. Mer pfyffe nit, mer drummle nit, mer spiile numme e
Sujet uss und laufe dr Cortège.

Was beditet Dir d Faasnacht ?

Dagmar:

Seer vyyl... y bi mit dr Faasnacht grooss woorde... d Faasnacht isch groossaartig und y lieb d Faasnacht.

Wie lang machsch denn scho Faasnacht ?
Syt 55 Joor...

Het sich d Faasnacht im Geegesatz zue friener veränderet ?

Dagmar:

Jo nadierlig veränderet sich d Faasnacht. Friener ha n y do inne und im 1. Stogg die sog. "Häxekuchi" kaa... s git iibrigens vom Telebasel e Byydraag do driiber und -minu isch au scho doo gsii. Y ha do inne 26 Joor lang Faasnacht gmacht und y sag Dir, do inne isch amigs d Boscht abgange... aber s isch denn mit dr Zyt seer miehsam woorde..

In wie färn ?
Alkohool... s isch amigs zimmlig ussgaartet und dorum ha n y denn au mit dr "Häxekuchi" uffgheert.
Waisch, an dr Faasnacht isch scho immer gsoffe woorde, aber was ych feststell... dr Faasnächtler sufft au, aber är heert iirgendwenn emol uff... är will jo am näggschte Daag wider Faasnacht mache... aber die Junge wo do umme sin, suffe aifach als Underhaltig und mache kai Faasnacht.

Wie hesch Du als glains Maitli d Faasnacht erläbbt ?

Dagmar:

My Babbe isch e Wäägeler gsii und mir Kinder sin immer drby gsii... au scho bim Waagebau uffem Rosshoof.

Also scho seer frieh mitem Virus infiziert woorde...
Hejoo :-)

Was macht Di Gligglig ?

	Dagmar:	Mi macht alles gligglig...

Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?

	Dagmar:	Mitem Udo Lindenberg oder Herbert Grönemeyer

2 Sache wo no unbedingt in Dym Lääbe mache wottsch...

	Dagmar:	1.) E Rais noo Afrika... 2.) E halbs Joor miteme Stärnekoch zämmeschaffe...

No e baar Schlaagweerter, bitte numme mit aim Satz beantwoorte...

	Kino oder Theater ?	Baides... numme kaini Opere... die ha n y nit gärn ;-)
	Basel...	Basel isch fir mii dää Oort... y find Basel e super Stadt, y woon firs Lääbe gärn in dr Innerstadt, y wott nie wäg vo doo und bi gfange in däne Muure :-)
	Ziiri...	Y find Ziiri toll, het tolli Musee und e seer scheene See...
	Herbschtmäss...	Isch fir mii nimm esooooo relevant, aber iss seer gärn ebbis an dr Herbschtmäss. Y ha feschtgstellt, ass mir die eggsdreeme Baane und die grell Beliichtig nimm gfallt, find das grässlig.
	Hoosesaggmuseum...	S "Hoosesaggmuseum" isch e luschtige Oort, isch mit Spass verbunde und het groossi Erwaartigshaltig vo de Lyt.
	Klima Gretel (Thunberg)...	Me kaa driiber dängge was me wott und ka das au aabemache oder in Himmel lipfe... aber grundsätzlig het si ebbis aagrisse... ob das jetz guet oder schlächt isch, isch jetz gar nimm relevant... sondern s isch wichtig, ass ebbis aagrollt woorde n isch.

Vyyle Dangg fiir Dyni Antwoorte