Heinz Margot - Schauspiiler, Sprächer, Teggschter, Moderatoor, Regisseur, etc.
   
 

 

Du bisch jo scho Moderatoor und Redaggter bi Radio Basilisk gsi, den Moderatoor, Redaggter und Hörspiilregisseur bi Radio SRF, denn TV Moderatoor, Redaggter und Produzänt bim Schwizer Färnseh, Schauspiiler, Kabarettischt, Sprächer, Teggschter, Gastronoom und Eventorganisatoor… me muess sich das alles emol uff dr Zunge vergoo loo, e Dausigsassa par Excellence. Gits denn iiberhaupt no e Beraich, wo Di fasziniere wurd ?

  Heinz:

Hejo, do gibts no ganz vyyl, aber s Talänt fäält mer zem Ooperesänger oder Foormel 1 Rennfaarer...
Aber zem realistisch z blyybe, wurd y gärn vermeert - näbscht em Schauspiil uff dr Biini - Film mache, au wenn’s fir e Hollywood-Karriere woorschynlig nimm längt...

Als Regisseur mainsch ?
Nai als Schauspiiler voor dr Kamera... y ha jo emol d Schauspiilschuel gmacht... vo deert kumm y uurspringlig
und denn bi n y zuefellig bim Radio glande. Y ha aber s Theater spiile nie uffgää, sondern näbscht mynere Meedie-Aarbet, immer in 1 - 2 Produggdioone im Joor gspiilt.

     
 

Was het Dir denn bi all dääne vyyle Aggdivitäte am beschte gfalle ?

  Heinz:

D Abwäggslig... dorum mach y woorschyns au so vyyl verschiideni Sache, wells mer schnäll langwyylig wird. Denn schimpf y gärn am ainte Oort iiber dr ander und umgekehrt... und denn goots mer guet.
Aber s git aifach z vyl Sache, wo mi indressiere und spannend find. Y ha das au nie blaant oder soo, s isch
aifach uff mi zuekoo und als Buuchmensch ha n y mer immer gsait "kumm das brobiere mer doch aifach".

Schauspiil isch aber scho daas, wo Du jetz gärn wyter mache wottsch oder ? Voorem Micro sitze oder e
Sändig moderiere, kunnt nimm in Froog ?

Also Theater und Schauspiilerey isch daas, wo woorschyynlig in de letschte 30 Joor die konstantischti Sach
gsii isch und was s moderiere betrifft, ha n y voor 2 Joor - noo 25 Joor - myni letscht Färnseh-Sändig
gmacht... aber me waiss jo nie.

Wie isch das fir Di gsii, wo die letscht Sändig feertig moderiert hesch ?
Logger, fraidig und scheen...

Ooni Wehmuet ? Gar nit ?
Nai, Nai gaar nit... wenn y ebbis mach, denn isch das seer bewusst... denn isch dr Entschaid scho voorhäär guet gryfft.

     
 

Aagfange hesch jo im Beraich "Meedie"... kasch Di no draa erinnere, wo s allereescht Mol voorem Mic gsässe und live On-Air gsii bisch ? Wie isch Dir do drby gange ?

  Heinz:

Die Sändig gits sogaar no uff Kassettli und het "Nachtvogel" ghaisse... bi Radio Basilisk hänn das alli am Aafang gmacht. Y waiss numme no, ass y relatiiv guet Hoochditsch greedet ha - dasch vo dr Schaupspiilschuel här
koo - und das het me nadierlig bim läse vo de Noochrichte seer staarg gmeergt.

Wieso ?
Y ha d Noochrichte wie ne Maschiinegweer glääse, imene Affezaan... do het me kai Chance kaa zem ebbis mitzgriege, was in dr Wält bassiert isch, das waiss y no ganz guet.
S het mer vo Aafang aa Spass gmacht und ha denn au grad e seer intensiivs Wucheänd mit e huffe Sändige
kaa.

Bisch nervees gsii ?
Jä nadierlig nervees... Lampefieber, egaal ob jetz Radio oder Theater... gheert drzue und y ha das gärn.

Eerlig jetz ?
Y glaub, me muess es au uff e n-Aart gärn ha...

Ych hasses immer no... jeedes Mol voorem Uffdritt, schloot mers Härz bis zem Hals und mänggmol eso staarg, ass y kumm e Doon uusegrieg... aber wenn s denn emol loos goot, denn laufts... aber y hass Lampefieber.
Waisch, my Gfiil isch woorschyns genau s glyyche wie bi Diir... numme ischs bi mir positiiv kopplet. Y find zem Byspiil Bungee Jumping lässig und wenn y deert oobe stand, denn ischs bi mir nit esoo, ass y "Judihui" sag, sondern s rumoort bi miir au... aber s isch bi mir iirgendwie positiiv verknipft. S isch nit esoo, ass y jeedes Mol cool und logger vooreme Uffdritt bi, aber s isch ebbis tolls und y ha immer Mitlaid mit alle, wo under Lampefieber lyyde.

Bungee springe ? Y wurd stärbe...
My eerschte Gump isch vor 24 Joor vo dr Staumuure im Verzasca Taal gsii und jetz voor e baar Wuche, bi n y als alte Duubel noonemool gsprunge.

     
  Was macht fir Dii d Faszinatioon vo "Meedie" n-uss ?
  Heinz:

Meedie ? Gar nit... y ha s Färnsee als Medium nie wiirglig spannend gfunde. S Färnsee isch toll fir Live-Sport
und neyerdings fir Seerie, aber alles andere bruchsch hit no weeniger als doomols, wo n y no intensiiv Färnsee gmacht ha. D Informatioone hoolt me sich hitte uffeme andere Wäg... aber d Aarbet bim Färnsee isch seer spannend gsii. S Zämmeschaffe mit de Kameralyt, em Regisseur, etc... aifach d Teamaarbet, das ha n y immer seer toll gfunde... aber s Medium ansich isch jetz nit eso verruggt, do find y s Radio vyl lässiger... mitem Radio ka me bi de Lyt wunderbaari Bilder entstoo loo.

Und vom Schauspiil ? Theater ?
Ganz vyyl und isch schwiirig in Woort z fasse... dasch wie ne Virus und au e weeneli Masochismus... y main,
ass me sytelangi Täggscht usswändig lehrt und denn vor d Lyt stoot ;-). S isch spannend in verschiideni
Figuure z schlipfe und me duur daas ebis iiber sich sälber lehrt... dh. y grieg ebbis vo däne Figuure und gib de Figuure au ebbis... dasch esoone Wäggselspiil, wo no rächt spannend isch.

     
 

Du fyyrsch jo im Meerz 2020 im Hotel Deyfelhoof, mitem Stigg "Der Souffleur", e Première und glychzytig au e Schwizer Eerschtuffiehrig… um was goots do genau in däm Stigg ?

  Heinz:

Dr Titel isch glychzytig dr Inhalt vo däm Aipersoonestigg. S goot um e Souffleur, wo 1 Stund bevoor d Voorstellig aafoot, uss sym Lääbe verzellt. Är isch dr Iiberziigig, ass är als Souffleur dr wichtigscht Maa am
Theater isch und alli andere mee oder weeniger Vollpfeschte sin. So griegt denn au e jeede vo däne sy Fett ab
- usser s'Gretchen ussem Goethe sym "Faust"... in das verliebt är sich nämmlig in jeedere Voorstellig uffs Neye.

Ischs e Komeedie ?
Jä, s isch e seer witzigi Sach mit bitter-beesem Humoor. Aber s steggt au d Trageedie vomene ainsaame und unverstandene Maa dehinter, wo mit sym Schicksaal und dr Wält haaderet. Jeedi gueti Komeedie het e ärnschthafte und dieffe Unterbau, sunscht ischs belangloose Klamauk...

Hesch Du die Komeedie gschryybe ?
Nai, das Stigg isch vom ditsche Autor Stephan Eckel und het im Juli d Eerschtuffierig in Münche kaa. Y ha jetz
d Rächt fir d Schwiz griegt und frai mi seer druff. S isch e Kischte mit 47 A4 Syte voll mit Täggscht, wo no in das glaine Kepfli yyne mien. Dr Noodail isch, ass mer niemerts ka e Stichwort gää und dr Voordail, ass me elai uff dr Biini stoot und niemer uff e Stichwoort waartet... aigentlig kennt y de Lyt verzelle was y wott, si miens
aifach glaube.

     
 

Y find das immer seer waansinnig, wenn me fir e Stigg dä ganz Täggscht usswändig lehre muess und bewundere alli Schauspiiler, wo das eso perfäggt kenne. In mynere Kindergaartezyt, ha n y emol bim Wienachtsgrippespiil dr Joseph spiile deerfe... also quasi e Hauptrolle. Wo n y denn draa koo bi, ha n y dr ganz Täggscht vergässe kaa... im näggschte Joor bi n y denn e Schoofhirt gsii, wo nyt me saage het miesse :-))

  Heinz:

...ein schweigender Hirte... dr Esel wär au no e Variante gsii...

Jo guet dr Esel bi n y sällmol als Joseph scho gsii.
Aber ebbe... wie lehrt me 47 A4 Syte usswändig ? Gits do e Trick ?

Y wais es au noonig... aber y ha s groosse Gligg, ass y relativ guet e Täggscht usswändig lehre kaa... also bis jetz ämel. S isch e Dail vo dr Aarbet und s git numme ains... lehre, lehre, lehre, läse, zuedegge, läse und wider zuedegge und iirgendwie dr Täggscht in d Biire griege.

Wie vyyl Voorstellige sin den blaant ?
Bis jetz sins 13 Voorstellige - 3 in Basel im Deyfelhoof, wo am 18.3.2020 au d Première n-isch, und die andere im Rahme vonere Schwizer Tournee... denn luege mer emol, ob nomee drzuekemme.

     
 

Du bisch jo seer hiffig uff dr Biini... gits denn au emol e Täggschthänger ? Und wenn jo, wie goot me mit däre Situatioon um ?

  Heinz:

Hejo nadierlig... aber numme bi de andere.
Aber ganz eerlig, y ka mi nit draa erinnere, ass y jeemols e richtige Täggschthänger kaa ha... und wenn, denn hilft me sich geegesytig.

...und nimmts mit Humoor...
Kunnt nadierlig uffs Stigg druff aa... zem Byspiil binere Stärbeszeene isch Humoor vellicht nit grad dr richtig
Usswääg.

     
  Du hesch jo e seer markanti Stimm... e Sääge oder mänggmool au e Fluech ?
  Heinz:

Y dängg, s isch numme e Sääge...

E "Fluech" isch nadierlig iiberspitzt gsait... aber wenn Di zB. bim Begg e älteri Frau gheert, mitem Finger uff Di zaigt und maint "Y kenn Sii... Si sin doch... Si sin doch dr Kurt Aeschbacher" und das bassiert bestimmt e baar
Mol oder nit ?

A) Wärs schlimmer, si wurd "Herr Schawinski" saage und B) gweent me sich draa. Waisch friener wo n y no im Färnsee gsii bi, het me gsait "lueg deert ääne lauft doch dr Ander vom Färnsee" und hitte ischs meh d Stimm,
wo me erkennt und nimm in eerschter Linie s Issere. Also isch esoone Stimm scho e Sääge, well si au e Wiidererkennigswärt het. Und dangg däre Stimm, ha n y nadierlig au vyyl kenne mache in mym Lääbe.
Synersyts wo n y mi bim Radio beworbe ha, ha n y gschrybe "Y bi e junge Schauspiiler, y ha vyl Zyt und wenig Gäld und die andere saage, y haig e aagnäämi Stimm".

Apropos Radio... dr Aafang vom Radio Basilisk isch jo e Pionieraarbet miteme verschwoorene Team gsii...
wie isch das hitte ? Drifft sich die alti Crew vo friener amigs no ?

Nai nimme... s Radio het sich - wie alles andere au - seer veränderet. 1983 wo s loosgange n-isch und ych do
au drbyy gsii bi, dasch nadierlig scho seer speziell gsii... und d Stadt het jo au uff das Radio gwaartet.
Wenn me s Radio yygschalte het, denn het me uffgrund vom Musigstiil genau gwisst, wär grad d Sändig moderiert het... s het jo kaini Muusigredaggdoore gä zue sällere Zyt, do het me alles no sälber zämmegstellt.

     
  So, jetz schwängge mer emol e weeneli zer Faasnacht iibere... wurdsch gärn wideremool e Faasnachtssändig
moderiere ?
  Heinz:

Nai, y ha das 15 Joor lang gmacht und das längt... s isch toll gsi. Mer sin scho an de scheenschte Oort in
Basel gsii... Minschter, Mässeduurm, Roothuus, etc. und eso grooss isch die Stadt denn au nit... s goot immer au um d Perspeggdiives, vo wo luegsch ebbis aa und vo wo machsch e Moderatioon... s isch guet gsii esoo und längt jetz wiirglig.

     
 

Was beditet Dir d Faasnacht ?

  Heinz:

Kindhait und Jugend... friener isch d Faasnacht my Ain und Alles gsii, y ha s ganz Joor fir d Faasnacht gläbt... mee als fir d Wienacht. Y ha denn aber Mitti 20 miesse uffheere, wäggem Job wo n y ka ha. Hitte isch d Faasnacht wyt ewägg und es sin voor allem ebbe no Kindhaitserinnerige... nadierlig ha n y immer no e waarms Gfiil, wenns denn loosgoot, aber s Faasnachtsfieber ha n y nimme.

     
 

Kunnt denn d Faasnachtsstimmig eerscht, wenn si wiirglig aafoot ?

  Heinz:

Si kunnt am Sunntig bim Ladärne yypfyffe. Wo n y denn mit Fasnacht mache uffgheert ha, ha n y gmaint,
ass y iirgendwenn denn scho wider aafang mit drummle... aber y ka mer momentaan nit voorstelle, als
halbwägs eldere Herr mit somene Kessel ummezlaufe.

Wobyy Du jo nit dr ainzig wärsch...
Nai nadierlig nit... aber die sin vellicht alli fitter... y waiss es nit... und schyns sigge d Drummle in de letschte
30 Joor lychter woorde. Aber ebbe, jetz wo n y nyt me mach, isch d Faasnacht sehr wyt wäg fir mii.

Goosch denn no an d Faasnacht ?
Jä scho, letscht Faasnacht bi n y am Mäntigzoobe go Bängg loose und am Zyschdig sunscht e weeneli underwäggs gsi. Aber als Zivilischt sait mers aigentlig nit vyyl. Dorum ha n y voor Joore au e Fraid kaa, wo me
mir dr Job bim Färnsee aabotte het. Eso isch s legitiim gsii, ass y an d Faasnacht gange bii, denn ha n y e Uffgoob kaa. Y bi zwoor nit goschdymiert, aber doch e glaine Dail vo dr Faasnacht gsii.

     
  Wie schwiirig ischs dr Heinz Margot an dr Faasnacht z sii ?
  Heinz:

S isch glych schweer, wie die andere 362 Daag... also fir mii zumindescht...

     
  Wie hesch Du als glaine Bueb d Faasnacht erläbt ?
  Heinz:

My Babbe het drummlet, my Mamme pfyffe und Ladäärne gmoolt... und my Ur-Groossbabbe het d "Olymper" mitgrindet und zem Byspiil "d' Mätzli" komponiert. Y kumm also ussere Faasnachtsfamilie... bi uns isch iirgendwie s ganz Joor Faasnacht gsii, ooni ass me (wie hitte laider) an jeedere Hundsverlochete het miesse drummle und pfyffe.

     
  Het sich d Faasnacht im Geegesatz zu friehner veränderet ? Und wenn jo, in welli Richtig ?
  Heinz:

Säbstverständlig... und zwor in ganz vyli Richtige, was au guet und wichtig isch... d Faasnacht soll sich verändere. Glyychzytig find y, ass gwissi Wärt nit verloore goo sotte und bi do au duurchuss e Draditionalischt. Aber d Veränderig liggt in dr Natur vo dr Sach, dasch klaar und au guet eso.

     
  Was macht Di Gligglig ?
  Heinz:

Aigentlig jeede Daag wider ebbis anders... fir mii isch Gligg e groosses Wort fir Momäntuffnaame...

Ka au ebbis ganz glains sii...
Sin maischtens ganz glaini Sache, jä....

     
  Wo bisch Du uss Dynere Sicht "Taläntfrey" bzw. welles Talänt hättsch gärn no ?
  Heinz:

Ganz vyyli...y ha zem Byspiil nie glehrt, e Instrumänt z spiile... usser drummle. Y wurd zem Byspiil gärn Klavier spiile kenne.

     
  E Gschmagg isch jo immer mitere Erinnerig verbunde… gits e Gschmagg, wo Di sofort an Dyni Kindhait zrugg erinneret ?
  Heinz:

Jä... und zwor no relativ hifig... dr Gschmagg, wenn im Summer dr Rääge uff haisse Teer fallt. Y kas nit genau beschrybe... wenn dr Boode haiss isch und s denn afoot räägne, denn isch das esoone aigene Gschmagg, wo
mi an myni Kindhait erinneret.

     
  Welles isch Dy absoluts Highlight gsii im 2019 ?
  Heinz:

Näbscht em Interview mit Dir ?

*lach*...äh...jo...
Wird schwiirig ;-)
Aber y glaub, ass y Dir das in kaim Joor beantwoorte kennt, well y kai Highlight-Mensch bi. Highlights sin d Summe vo Gliggsmomänt und y ha das nie... s bassiert z vyl scheens und y mach do kai Hitparaade druss.

     
  Mit wellere beriehmte Perseenligkait wurdsch gärn emol e scheene Oobe verbringe und aifach numme plaudere (ka au scho gstoorbe sii) ?
  Heinz:

Brigitte Bardot... in junge Joore.

     
  Was wirdsch an Fraue nie verstoo kenne ?
  Heinz:

Do gits nadierlig enoorm vyyl. Dr Loriot hets scho gsait, ass Männer und Fraue nit zämmebasse und do het
är sicher rächt kaa... s git ganz vyl, wo n y an Fraue nit verstand... aber was y wiiiiiirglig nit verstand isch,
wie 2 Fraue am 18:00 ca. fir ca. 45min mitenand delifoniere kenne, im Wisse, ass si sich am 20:00 gseen...

Y lach mi hii, das stimmt wiirglig und si wisse denn immer no was schwätze am 20:00 :-))))))))
Hejoo, sälbstverständlig...

     
  Wenn blatzt em Heinz Margot emol dr Kraage ? Gits das iiberhaupt ?
  Heinz:

Je schwiiriger d Situatioon isch, desto cooler bi n y... aber Glainigkaite kenne mi uff d Palme bringe... aber y muess saage, ass y scho vyl vyl entspannter bi, as au scho.

     
  No e baar Schlaagweerter, bitte numme mit aim Satz beantwoorte...
  Buech oder Heerbuech ?

Buech... y find Heerbiecher grauehaft... e schreggligi Erfindig.

Aber Du hesch doch au scho Heerbiecher uffgnoo oder ?
Y ha scho Heerbiecher uffgnoo, jä... aber Heerbiecher loose miesse... bitte nit.

  Basel...

Aigentlig Haimat... aber hit stinggts mer je lenger, je mee...

Worum ?
Hit zaigt me enand dr Stinggefinger (und nit emol numme d Velofaarer), s wird ghupt, d Lyt zien immer e Lätsch und ellbeegele. Intolleranz, Missgunscht und Egoismus sin nimm d Ussnaam, sondern d Reegel. Y finds grauehaft... anstatt ass me e weeneli frindligger
zunand isch. Wenn de ebberem d Diire uffhebsch und aifach heeflig sii wottsch, denn wirdsch aagluegt, als siggsch nit ganz bache oder als aine, wo woorschyns s Portemonnaie mugge wett...

Aber mainsch nit, ass es vellicht e generells Brobleem isch ?
S isch sicher e generells Brobleem... aber do fallts mer halt bsunders uff, well y die Stadt eso gärn haa, oder kaa haa. Basel isch hitte "Ein Schatten seiner selbst" und d Läbensqualität het mynere Mainig noo in de letschte 10-20 Joor enoorm abgnoo. Dasch sicher nit unwäsentlig au dr zwyyfelhafti Verdienscht vonere Regierig, wo sich sälber
also esoooo groossaartig empfindet.

  Ziiri...

E wunderscheeni Stadt, aber fir mii nit eerschti Wahl.

  Herbschtmäss...

Het nadierlig fir mii hitte e n-anderi Beditig, aber isch immer no wunderscheen... au do spiilt dr Gschmagg e grossi Rolle.

  Flixter...

Die liebevollschti, luschtigschti und scheenschti franzeesischi Bulldogge vo dr Wält...(Aameergig: isch syn glaine Hund)

  "Schaabernagg & Lumpepagg“…

Findet alli 2 Joor statt, s näggscht Mool wider im 2021.

Laufts under Voorfaasnachtsveraastaltig ?
Jein... s wird nit drummlet und nit pfyffe, aber sin nadierlig typischi, faasnächtliggi Basler Theeme drby... jojo, s isch im wytischte Sinn e Voorfaasnachtsveraastaltig.
Wobyy, aigentlig isch eenter e Wienachtsnoochveraastaltig mit voorfääsnächtliggem
Inhalt.

  Klima-Gretel
(Greta Thunberg)

Die lieb y... mänggmool duurt si mi e weeneli, well y s Gfiil ha, ass si au instrumentalisiert wird, aber si het sicher ebbis bewiirgt.

  Donald Trump...

Y ha jo lang d Hoffnig kaa, ass är besser isch als daas, wo me am Aafang befiirchtet het... aber y glaub, die Hoffnig isch nit berächtigt gsii.

Vyyle Dangg fiir Dyni Antwoorte