Faasnacht 2022  - Sujet: 25 Joor KanniBâle
  7. Meerz - 10. Meerz 2022
   
  Faasnachtsinfos
   
 

Sujet 2022: 25 Jahre KanniBâle
Voor 25 Joor hänn sich 9 Naase zämmedoo und d Guggemuusig "KanniBâle" grindet. Im 1997 hänn si mitenand die allereerscht Faasnacht gmacht und jetz ? Jetz sin 25 Jeerli vergange und das wänn mer zämme mit Eych fyyre. S git uff jeede Fall e neys Stammgoschdym und nadierlig au e Jubiläums-Varieté, wie friener am Sunntig voor dr Faasnacht 2022.

Aigentlig hätte mer an dr Faasnacht 2021 unser 25-jeerigs Jubiläum ussfierlig gfyyrt, aber mer wisse jo alli, was mittlerwyyle bassiert isch. D Faasnacht 2021 isch definitiiv ad acta gleggt und s macht au kai Sinn, ass mer do no iirgend e Woort driiber verliere... also luege mer doch aifach fiire und fyyre halt unser "25+1" Jubiläum am
7. Meerz 2022. Mer kenne Eych jetz scho verspräche, ass es e wiirglig tolli Sach wärde wird und mer sin ys absolut zue 100 Prozänt sicher, ass die Faasnacht am 7. Meerz 2022 au definitiiv stattfinde wird !!
Also loos goots, "the show must go on" :-)

Alles andere wird no ghaim bhalte und soll e tolli Iiiberraschig fir Eych wäärde.

Faasnachtsrouteblaan
Doo s immer wider Missverständnis gää het, wärde mer dr Routeblaan nimm vereffentlige, mer hänn d Zyte sowiso
nie kenne yyhalte. Mer wärde n ys aber ganz bestimmt naime dräffe an dr Faasnacht, zb. am
Faasnachtsmäntig bim Gennerapéro
Staart 16:00 im Waisehuus bim Wettstaiblatz

Faasnachtszyschdig an dr Birsyg Symphonie
Staart 22:00 bi dr Draischyybe in dr Stänzlergass... e "must have" fiir die fyyne Guggemuusig Oore ;-)

Mer fraie n ys uff Eych !

     
  Scho vrbyy.....
     
  Faasnacht 2021 isch laider noonemol abgsait woorde
  Faasnacht 2020 isch abgsait woorde, s git numme no dr Faasnachtskaländer 2020
  Faasnacht 2018 (Inkl. Faasnachtskaländer)
  Faasnacht 2017 (Inkl. Faasnachtskaländer)
  Faasnacht 2016
  Faasnacht 2015
  Faasnacht 2014 (Inkl. Faasnachtskaländer)
  Faasnacht 2013
  Faasnacht 2012
  Faasnacht 2011 (Inkl. Faasnachtskaländer)
  Faasnacht 2010
  Faasnacht 2009
  Faasnacht 2008
     
  Faasnachtsvärs