Gian Jonasch - Gschäftsfierer vo dr "Confiserie Jonasch"
   
 

 

Du bisch jetz in dr 5. Generatioon vom Unternämme "Confiserie Jonasch" dätig. Isch das fir Dii vo Aafang aa klar gsii, ass emol in d Fuessstapfe vom Babbe stoo wirdsch oder hets vellicht als glaine Bueb no e n-andere Draumbruef gää ?

  Gian:

Nai, s isch nie klaar gsii…  als Kind het me anderi Visioone und Kindhaitsdräum kaa, siggs Pilot oder Bolizischt. Noo dr obligatoorische Schuel ha n y e Lehr als Konditor-Confiseur aagfange… woby ych aber eerlig saage muess, ass dä Bruef nit eso my Ding gsi isch, vor allem nit die Aarbetszyte und das friehne Uffstoo. Wobyy als Konditor-Confiseur muess me nit so frieh Uffstoo, wie n e Begger, aber s isch ainewäg nit myni Zyt gsii ;-).

Das glaub y… und wie ischs denn wytergange ?
Noo dr Lehr ha n y denn no s KV gmacht und wärend dääne 6 Lehrjoor, isch au langsam s Indrässe fir dä Bruef gwaggse. Y bi denn au an die verschiidene Aaläss und Veraastaltige mitgange… aber all das het syni Zyt bruucht.

Aber d Lehr hesch im Familiebetriib gmacht oder ?
Nai, bi dr Confiserie Bachmann...

     
 

1898 het sich dr Franz Jonasch als Confiseur sälbschtständig gmacht. Isch no bekannt, mit welle Produggt är sällmol aagfange het ?

  Gian:

Mit klassische Dääfeli… är het im St. Johann e Dääfelifabrik kaa. Mit dr Zyt het aber dr Dääfeliverkauf stagniert und me het sich ebbis neys miesse iiberleege. Me het scho in dääre Zyt dr grooss Voordail vomene Määrt erkennt, ass me mee zue de Lyt goo muess und het das denn au eso gmacht.

Und denn isch jo au dr "Mässmogge" entstande…
Genau und zwoor het me mittere abverheyte Dääfelimasse e weeneli ummeexperimentiert und verschiideni Fillige drundergmischt… und denn isch faggtisch e Mischmasch entstande, wo me sogar het kenne ässe… und dasch d Gebuurt vom Mässmogge gsii.

Und s Maagebroot ?
Friener isch s Maagebroot nit esoone Luxusguet gsii, wie hit… wenn s aim nit wool gsii isch, het me s Maagebroot zem beruhige vom Maage gnoo. Mit dr Zyt het me denn versuecht, in s Baggwaare Gschäft yyzstiige u.a. au mit Läbkueche, etc. D Rezeptuure hänn sich vo Joor zue Joor enoorm verbesseret und sin bi de Lyt seer guet aakoo. D Produggdioon isch immer no im St. Johann gsii, aber dr Verkauf het me uff e Määrt ussglaageret und das hänn d Lyt seer gschätzt.

Uss waas bestoot denn s Maagebroot ?
S isch e gwiirzte Läbkuechedaig, wo gwiirflet und in Schoggi dunggt wird.

     
 

Welles Produggt wird denn am maischte kauft ?

  Gian:

S Maagebroot… drnoo kemme brennti Mandle und glyy druffaabe d Begge Schmitz, gfolggt vom Raamdääfeli.

S git jo ganz vyyl Confiseure, wo feyns Maagebroot mache, aber Eyers isch zwiifelloos s Bescht find y. Was macht denn Eyer Maagebroot eso bsunders ?
Y glaub s Ghaimnis isch nit emol s Produggt oder d Rezeptuur, sondern d Frischi… je frischer desto besser zem ässe.

     
 

Gits die alte Familierezäpt vo friener no ? Wärde die no verwändet ?

  Gian:

Jä klaar, die hänn mer no und wärde imene dünne Mäppli uffbewaart :-)

Y nimm aa, ass die hittig Produggdioone uff dääne Rezäpt uffbaue oder ?
Me het sich nadyrlig anhand vo dääne Rezäpt wyterentwigglet, aber jä... si baue druff uff, das stimmt… me sait doch so scheen "Aus Grossmutters altem Rezept" und das find y toll.

     
 

Dr Jonasch isch jo vo kaim Määrt me wägzdängge... bi Wind und Wätter steen Iir doo und verkaufet Eyri tolle Produggt. Gits au emol e Momänt, wo me gnueg het vom Määrtlääbe ?

  Gian:

S git sicher emol so Dääg und wär jo nit normaal, wenns nit eso wär. Wenn bim uffstoo scho waisch, ass es rägnet oder yyskalt isch, denn goot me halt vellicht e Spiirli weeniger gärn uffe Määrt wie sunscht… wobyy, me muess au emol die ander Syte gsee, voor dr Kriise isch alles eso sälbschtverständlig gsii und me isch bi jedem Wätter uff e Määrt. In dr hittig Zyt bisch froh, ass iiberhaupt schaffe kasch oder darfsch und me gseet d Wält ussere ganz andere Perspeggdiive… und dorum fraie mer ys, ass mer iiberhaupt schaffe deerfe, egal obs windet, rägnet oder kalt isch.

S isch jo au toll, wenn me immer wider amene andere Oort (Määrt) schaffe ka oder ?
S isch ebbis tolls, wenn me syn Aarbetsblatz immer wider naime anderscht het. Me het halt dr Uffwand, ass me am Moorge dr Stand uffbaue und zOobe alles wider abruume muess… aber ass me immer wider neyi 4 Wänd um sich het, isch nadyrlig scho ebbis tolls und schetze mer au seer an unserem Bruef.

     
 

Wie vyyl Lyt schaffe denn bi Eych im Betrieb ?

  Gian:

Dasch ganz underschiidlig… grundsätzlig sin mer e Familiebetrieb und brobiere das au als Familie feschtzheebe, dh. my Babbe und ych brobiere meegligscht vyyl sälber z mache… nadyrlig imene gwisse Raame, wo s no meeglig isch. Underem Joor hänn mer e Pool mit 5-7 Lyt, wo mer jeederzyt aalyte ka, wenn Noot am Maa isch. Das änderet sich denn allerdings im Heerbscht, do hänn mer denn e Pool vo 50 Lyt, well das unseri Hauptsaison isch.

     
 

Wie gseets mitem Noowuggs in dr Confiseur-Branche n-uss ?

  Gian:

S isch e wunderbaare Bruef, aber y gsee unsere Bruefsstand als seer kritisch aa… aber dasch au bi de andere Bruefsspaarte eso, wie zem Byspiil bi de Metzger, Begger, etc. Y ha s Gfiil, ass alli Bruefsständ wo mit Handwäärg zdue hänn, langsam am Usstäärbe sin.

     
     
 

D Fasnacht isch jo fir Eych – näbbscht dr Heerbschtmäss – au seer wichtig. Wenn foot me denn eso mit de Voorberaitig und Produggdioon fir d Fasnacht aa ?

  Gian:

Noo dr "Swiss Bau" Mäss im Jänner. Mer sin jo an ganz vyyle regionaale Voorfasnachte drbyy, siggs Rynach, Lieschtel, Laufe, etc. D Voorfraid uff d Fasnacht isch immer seer scheen und mer hänn jo au e tolle Blatz wärend dr Fasnacht, diräggt an dr Freyestrooss bim Dreyzackbrunne. S isch nadyrlig nit unseri Hauptzyt und vrglyychbaar mitem Heerbscht, aber ganz klaar dr greescht Aaloss im eerschte halbe Joor, wo ganz vyyl Lyt zämmekemme.

Wie gseets denn mit de Bresänzzyte n-uss wärend dr Fasnacht ?
Mer feen maischtens zwische 09:00 und 10:00 aa und zieht sich bis Mitternacht oder sogar bis 01:00.

S het halt au zOobe immer no ganz vyyl Lyt in dr Stadt…
Das stimmt, woby fir vyyl Basler sin mer e saisonaals Gschäft und finde, ass mer eenter zer Heerbschtmäss gheere… aber s git immer no e huffe Lyt, wo e glains Dessert nooere feyne Mählsubbe schetze und gniesse wänn ;-). Aber d Stimmig isch grundsätzlig immer toll und me ka au immer emol wider schwätze mit de Lyt, was mer au seer schetze.

     
 

Gits au emol e Momänt, wo d Fasnacht aifach numme gniesse kasch ?

  Gian:

Also y ha sälber 3 Joor lang Fasnacht gmacht….

Bi wäm denn ?
Zeerscht ha n y d Ussbildig bi dr Knabemusik Basel-Stadt gmacht und ha denn Drumpeete bi dr Guggemuusig "Stachelbeeri" gspiilt ;-)

     
 

Und denn isch am Donnschtigmoorge alles vrbyy… wie goots Eych denne ?

  Gian:

Dr Donnschtig isch denn bi n-ys e seer, seer, seer ruhige Daag und s wird aifach numme no aabegfaare. Me muess au eerlig saage, ass me s denn noo 3 Daag Fasnacht au emol gsee het… obwool… wenn y am 01:00 am Moorge haim kumm, denn lueg y immer no d Schnitzelbängg im Färnseh, dasch aifach Draditioon… aifach zem no e weeneli aabezfaare, bevoors ins Bett goot.

     
 

Und denn isch im 2020 die Absaag vo dr Fasnacht koo… e absoluti Katastrophe fir Eych…

  Gian:

Im Momänt vo dr Absaag, sin mer an dr GV vom Schwizerische Määrtfaarerverband gsii und die Mäldig isch wie ne Pauggeschlaag koo. Dr eerscht Gedangge isch gsii "Zem Gligg numme dr Friehlig…" aber hänn nadyrlig nie dänggt, ass mer hit no drinn stegge wurde. Dasch e Situatioon gsii, wo s Lääbe ganz klaar veränderet het und e gravierende Yyschnitt gsii isch.

S het jo mit dr Fasnacht aagfange und isch denn wyters…
Jo… zeerscht bi n y emol schockiert gsii und mer hänn versuecht ys iirgendwie sälber z hälfe… aber denn ischs rigoroos wytergange und ai Aaloss nooem andere isch abgsait woorde. S het mit dr Fasnacht aagfange, drnoo sin d Määrt abgsait woorde usw… e n-absolute Stillstand. In mynere Mailbox sin numme no Absaage gsii und me isch aifach numme no doogsässe und het versuecht, uff iirgendere n-Aart positiv z dängge.

Voor allem isch jo beraits alles scho fir d Fasnacht produziert gsii…
Alles… also mer hänn s groosse Gligg kaa, ass mer e Betriibsussfallversicherig kaa hänn, wo n ys die eerschte 3 Moonet understitzt het.

Hesch Existänzangscht kaa oder hesch Dir gsait "Hey mer schaffe das…" ?
Doch, ganz klaar Existänzangscht… die eerschte Wuche het me no dänggt "Ok isch halt abgsait, aber s goot jo gly wyters" und daschs ebbe nit.

     
 

Du hesch uss dr Not, e Tugend gmacht und am Barfi e Pop-Up Store ereffnet... also quasi e Määrtstand imene Laadelokaal... e unglaublig tolli Idee find y. Isch sicher seer guet aakoo bi de Lyt oder ?

  Gian:

Dr Pop-Up Store isch aigentlig eerscht im Heerbscht 2020 entstande… woby my Babbe am Aafang nit wiirglig begaischteret gsii isch vo dääre Idee. Wo im Juli d Absaag vo dr Heerbschtmäss koo isch, ha n y mer gsait "S muess jetz ebbis bassiere, s ka doch nit sii, ass mer aifach nit mache…". Wo n y mym Babbe gsait ha, ass mer e Laade ereffne sotte, het är nit wiirlig vyyl vo dääre Idee ghalte und gmaint "Denn gang Du e Laade go sueche…". Y bi denn 2 Wuche lang, jeede n-Oobe mitem Velo duur d Stadt gfaare und ha ne Laade gsuecht.

Und denn bisch findig woorde…
Jo… dasch ain vo de letschte Lääde zem aaluege und ussgrächnet am schweerschte gsii zem griege. E Zunftmitgliid het ys denn e Meegligkait verschafft, ass mer mit dr Familie Seiler in Kontaggt hänn kenne koo. Nadyrlig isch me am Aafang e weeneli skeptisch gsii, wo mer unseri Idee voorgleggt hänn, aber Gottseidank het dr Herr Seiler ys e Chance und 3 Moonet Zyt gää. Mer hänn denn aifach emol mit 0 Erfaarige aagfange…

Und dr Babbe ?
Het mitgholfe und het au die tolli Idee mit dämm Määrtstand im Laade kaa… absolut perfäggt. Mer hänn e Wuche lang vo moorge bis zoobe uffbaut und kai Aanig kaa, wie s laufe kennt… goots uff oder no hinte loos ???

Und denn hets aagfange…
Genau… s het aagfange und d Lyt hänn e riise Fraid kaa… drnoo hänn mer gmeergt, ass mer nit gnueg produziert hänn, s het aifach nit glängt fir die grooss Noofroog. S het vo Aafang aa steetig zuegnoo, bis es am Änd zem Hype woorde n-isch und d Lyt feermlig drnoo gschraue hänn. D Lyt sin beraits scho am 09:00 am Moorge voorem Laade Schlange gstande… unglaublig, mer sin aifach sproochloos gsii.

     
 

S isch halt e Bediirfnis fir alli gsii und e tolle Laade no drzue, wo me gärn yynegange n-isch. Blybt das jetz e aimooligi Gschicht oder kennts e feschte Bestanddail wäärde ?

  Gian:

S isch scho immer myni Visioon gsii, ebbis miteme Laade mache z kenne. Zue säller Zyt wo mer dr Laade uffgmacht hänn, het nit stattgfunde… kai FCB Match, kaini Määrt, aifach nit und s isch dr richtig Momänt gsii, wo mer verwitscht hänn… dr richtig Dräffer bim Basler, wo d Heerbschtmäss liebt. Dr Laade isch am 31.12.2021 zuegange. Mer hänn ys das guet iiberleggt und dasch OK eso, mer sin e Gschäft, wo hauptsächlig dusse däätig isch und die Draditioon wänn mer byybhalte.

     
 

Was beditet Dir d Fasnacht ?

  Gian:

Fir mii gits 2 ganz groossi Draditioonsaaläss in dr Stadt, dasch d Heerbschtmäss und d Fasnacht. D Heerbschtmäss, wo mer nadyrlig finanziell seer abhängig drvoo sin und wenn me sälber Kinder het, isch d Fasnacht ebbis vom Greeschte, wo s git. Myni mittleri Dochter (4) het jetz 2 Joor e Lugge und iiberhaupt kai Bindig zue dr Fasnacht kenne uffbaue und miir duet das seer weh, ass si noonig in die Draditioon het yynewaggse kenne. Aber ebbe, d Fasnacht het fir mii e riisige Stellewäärt, vor allem mit Kinder zämme.

     
  Wie hesch Du als glaine Bueb d Fasnacht erläbt ?
  Gian:

Do ha n y tolli Erinnerige an die Zyt… maischtens sin mer am Clarablatz gstande und ych bi als Waggis umegfätzt. Speetischtens noo 2h het d Mamme my Waggislarve heebe miesse, well y si nimm ha welle aalegge ;-). Zue sällere Zyt, hänn mer no kai Stand an dr Fasnacht kaa.

     
  Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?
  Gian:

Mitem Roger Federer. Är isch esoone bekannti Perseenligkait, fiert aber esoone diskreets Lääbe und git praggdisch nit bryys vo sym Privaatlääbe… das fasziniert mi seer.

     
 

Welli 3 Sache wottsch unbedingt no erlääbe in Dym Lääbe ?

  Gian:

Myn Hauptdraum läb y grad… y ha immer seer jung welle Babbe wäärde und das bi n y woorde. Drnoo wott y meegligscht vyyl erlääbe, sobald denn myni Kinder emol ussgflooge sin… also mit 55 go ummeraise, wär scho toll. Denn kunnt nadyrlig d Gsundhait drzue, wo me sich winscht, etc.

     
 

Was hesch uss dääre Pandemie mitgnoo ?

  Gian:

S het wie alles syni positiivi, wie au negatiivi Syte… s negatiive isch gsii, ass mer alli in e riise Loch keyt sin und Zyt bruucht het, bis me wider ney ussgrichtet gsi isch. Denn hets nadyrlig die Erfolgsgschichte gää, wo me s Lääbe lang nimm vrgässe wird… wie zB. unsere Pop-Up Store, oder ass y in dääre Zyt Babbe woorde bi. Aber ebbis ganz wichtigs isch gsii, ass me ganz vyl Zyt Dehaim vrbrocht het.

     
  No e baar Schlaagweerter, bitte numme mit aim Satz beantwoorte...
  Basel...

Haimat, Regioon, fir mii alles…

  Ziiri...

Groossi Konkurränz im Fuessball…

  Nitfasnacht...

Undänggbaar...

  Fasnachtsvirus...

Dä wird aim yygimpft…

  Begge Schmitz…

Bi uns nadyrlig ains vo de draditionellschte Produggt im Sortimänt…

  Do muess y unbedingt no aane in mym Lääbe…

Hawaii...

Vyyle Dangg fiir Dyni Antwoorte