Tobias Moser vom Verain "Fasnachtszauber"
   
 

 

Tobi, syt 2019 gits dr Verain "Fasnachtszauber"... um was goots denn do genau bi dämm Verain ?

  Tobi:

Miir sin e Verain, wo vorallem die glaine bis ganz glaine Gnäggis aaspräche und zem Fasnacht mache motiviere wänn.

Und wie machet Iir das ?
Mit Meedie, Spiiler und Kinderbiecher. Mer brobiere de Kinder d Fasnacht spiilerisch byyzbringe, ooni ass si innere Clique drbyy si mien oder e n-Instrumänt spiile mien.

     
 

Wie sin Iir denn uff die Idee koo ?

  Tobi:

Myni Dochter Elena, het sich mit 6 Joor scho seer fir d Fasnacht indressiert und in e Fasnachtsclique welle. Y ha denn e weeneli noo Fasnachtsbiecher ummegluegt und schnäll gmeergt, ass es aigentlig ganz vyyl Biecher iiber d Fasnacht git, aber nit ums "Drumumme"… und mit unserem Buech "Fasnachtszauber", hänn mer ebbe genau die Themaatik uffgryffe. Mer beschryybe dr Wääg bis zer Fasnacht, also was es mitem iebe uff sich het, was e "Käller" isch, was e Piccolo und e Drummle n-isch, etc... die Lugge hänn mer vrsuecht uffzfille.

     
 

Iir vrkaufet u.a. au Fasnachtsbilderbiecher fir die glaini Gnäggis und sin jo nit die ainzige, wo das mache… s git jo mittlerwyyle vrschiideni Fasnachtsbiecher uffem Märt. Was macht denn Eyer Buech - wo n y iibrigens au ha - eso bsunders ?

  Tobi:

Mer verfolge 1 Konzäpt und zwoor, ass es immer mee häärgit, als es isch. Mer hänn zem Byspiil e Kaartespiil, wo uff dr eerscht Bligg e Dummpeter Spiil isch, aber wenn me s denn in dr Hand hebt, au als Memory funggdioniert. Drzue kunnt, ass me die Fasnachtsfiguure uff e spiilerischi Aart kennelehrt. Unser Puzzle ka me nit numme zämmesetze, sondern au als Figuure uffstelle, etc.

Me ka jo au s Buech "Fasnachtszauber" nit numme lääse, sondern au drmit baschtle…
Ganz genau… s wird beschryybe, wie die Dail vo dr Drummle und em Piccolo haisse und me ka n-e Drummle, Schleegel und e Bandalier ussschnyyde und zämmebaschtle.

     
 

Iir händ sovyyl Sache wo me kaufe kaa... Fasnachtsfiguure, 3D Puzzles, Dummpeter Kaarte, Boschtkarte, verschiideni Fasnachtskinderbiecher, Fasnachtskrälleli, etc. unglaublig. Wär entwigglet denn das alles bi Eych ?

  Tobi:

Seer vyyl kunnt innere eerschte, groobe n-Idee vo miir. Drnoo kippe mer das quasi in e "Kreatiive Dopf" und entwiggle denn gmainsaam zu dritt die Idee wyters.

Wär isch denn doo no drbyy ?
Ych, my Mamme – d Charlotte Moser – und d Stefanie Gloor, wo syt 1 ½ Joor im Fasnachts-Comité drbyy isch.

     
  Wie ka me bi Eych Passivmitgliid wärde ?
  Tobi:

Iiber unseri Homepage https://www.fasnachtszauber.ch/ und koschtet Fr. 30.--. Me griegt denn automatisch unsere Newsletter und e huffe Verginschtigunge uff unseri Produggt, wo mer aabiete. Drzue gits denn no jeedes Joor e glains Gschänggli wo mer vrdaile… au d GV lauft bi uns anderscht ab, als me das gwoont isch.

Wie denn ?
Mer hänn wärend dääre Pandemiezyt gmeergt, ass es bi de Mitgliider vyyl besser aakunnt, wenn me d GV in schriftligger Foorm macht. Drfiir gits denn speeter e tolle Aaloss, wo mer zem Byspiil mit de Mitgliider e Grillfeschtli mache, oder gmainsaam uffem Schiff e Fondue gniesse, etc. Die klassisch GV isch halt amme e weeneli e schweermietigi Sach und mit dääre brieflig Foorm, lauft das aigentlig seer guet.

     
 

Das deent doch guet :-). Kemme mer aber jetz wider zrugg zer Idee… wenn die emol doo und au besproche n-isch, wie goots denn wyter ? Wird dr Prototyp sälber häärgstellt, oder leen Iir dä mache ?

  Tobi:

Also im eerschte Schritt mache mer scho no alles sälber. Zem Byspiil s 3D Puzzle hänn mer zeerscht sälber uss Karton in vrschiidene Greesse baschtlet und uffgstellt, aifach zem luege wie s wiirgt. Wenns denn guet und spruchryff wird, suche mer denn nadyrlig dr Kontaggt zue de entsprächende Firme, wo das au häärstelle kenne.

     
 

Mittlerwyyle gits e ganzi Clique mit draditionelle Goschdym und au e Waggis als 3D Puzzle... wenn gits emol e Guggemuusig ? ;-)

  Tobi:

Mer hänn beraits e Guggemuusig mit alle Instrumänt komplett als 3D Puzzle entwoorfe, aber d Realisierig isch aifach z diir. S isch e Guggemuusig Zuug mit 8 Figure, uss 8 vrschiidene Verain und wenn jetz jeede Verain ca.
Fr. 1000.— sponsere wurd, drnoo kennt me das brobleemloos iniziiere… aber ebbe s isch aifach e Koschtefroog.

Was macht denn s Ganze eso diir ?
S umsetze vo dr Zaichnig ins 3D Formaat (Druggvorlaag), koschtet pro Figuur ebbe Fr. 1000.— und unsere Verain ka das momentaan nit elai stämme… aber mer sin draa und s kunnt ganz sicher emol ebbis mitere Guggemuusig
:-). S wird e Fasnachtskinderbuech "Fasnachtszauber 2" gää, wo s um Waageclique, Chaise und Guggemuusige
goot
.

     
  Schaffet Iir mittlerwyyle vollamtlig in däm Verain, oder isch das eenter e Hobby fir Eych ?
  Tobi:

Nai, nai, dasch immer no e Hobby fir alli… mer sin emol sowyt, ass mer die Produggt re-finanziere kenne, aber s griegt niemer e Loon bi n ys. Sobald dr Vrkauf emol aastiggt, denn ka s scho sii, ass mer ys emol e "Goodie" gänn. S isch vo Aafang aa blaant gsii, ass es nit ums Gäld vrdiene goot, sondern de Lyt – voorallem de Glaine – mit unsere Produggt e Fraid mache z kenne.

     
 

Wie sin Iir bis jetz mit dr Entwigglig vo Eyrem Verain zfriide?

  Tobi:

S 3D Puzzle isch grad voor dr Pandemie uffe Määrt koo und dr Vrkauf isch seer guet gloffe, aber drnoo isch s denn zimmlig schwiirig woorde. Mer kemme zwoor mit alle Produggt immer no uuse, aber s blybt im Momänt no zweenig hängge, zem greesseri Projäggt finanziere z kenne. 3 Wuche voor dr Fasnacht goot dr Vrkauf seer stail uffe, aber drnoo goots denn au gly wider aabe… und unseri Community isch au noonig eso grooss, aber s brucht halt alles syni Zyt… im Groosse und Ganze sind mer aber seer zfriide.

Idee gits also no ;-)
D Schublade isch voll mit Idee ;-)

     
 

S git jo e Film mitem Name "Querschnitt Stuube Fasnacht 2021" https://www.youtube.com/watch?v=9uyScGNPqTs wo mit Playmobiil Männli/Fraue uffgnoo woorde n-isch und e waansinns Erfolg gfyyrt het... wär het die tolli Idee kaa und wie isch d Umsetzig gsii ?

  Tobi:

D Idee isch vo miir gsii und myni Dochter - d Elena - het mer drbyy gholfe. Mer hänn bi uns in dr Kuchi alles sälber baschtlet, fotografiert und gfilmt.

Wenn hänn Ihr denn drmit aagfange ?
Mitem Bau hänn mer e baar Wuche voor dr Fasnacht aagfange und daadsächlig wäärendem richtige Moorgestraich, d Moorgestraich-Szeene fotografiert und abgfilmt. Aber nadyrlig hänn anderi au mitgholfe, dasch klaar… alli wo bi uns Dehaim emol yykeert sin, hänn aaschliessend mitgholfe, d Playmobil-Männli z vrschiebe, aazlyyme, z fotografiere, etc. ;-)

Und s isch alles im Film enthalte, wo s fir e Fasnacht bruucht…
Jä genau… also vom Cortège, iiber s Guggekonzäärt bis zue de Schnitzelbängg… und isch e super Ersatz gsii fiir d Fasnacht, wo laider nit het kenne stattfinde.

     
 

Wo hooled Iir Eyri Inspiratioon fir neyi Projäggt häär ?

  Tobi: Dasch amigs vrschiide… mänggmool mach y dr Yyskaschte n-uff, lueg yyne und pletzlig machts "Klick", drnoo gang y in myni Mansarde und schryb alles uff… y ha scho ganz vyyl Biecher, wo voll mit Idee sin.
     
 

Uff de Soziaale Meedie lauft momentan e groosse Vrglyych vo vrschiidene Faschtewaie. Ihr hänn e huffe Beggereye bsuecht und e Ranglischte gmacht… e tolli Idee find y :-)

  Tobi:

Y lieb halt Faschtewaie und mer sin bi fascht jeedere Beggerey in dr Stadt vrbyygange und hänn Faschtewaie kauft. Dehaim hänn mer si gwooge, vrmässe, dr Aadail Kimmi zellt, fotografiert, gnisslig vrspyyse und e Ranglischte gmacht. Zue jeedere Faschtewaie wo mer uff Instagram und FB bresentiere, gits e Rezäpt, e Värsli vo uns oderem @Värslibrinzler und e glaini Gschicht drzue.

Und wenn gits die Ranglischte ?
Eerscht kuurz voor dr Fasnacht und mit unserem Newsletter… s glyyche gits denn no mit Mählsubbe, Fasnachtskiechli, etc.

     
 

Im Hoof vom Roothuus, steen jo iiberdimensionaal groossi Fasnachtsfiguure miteme QR Code.
Was erwaartet ys doo und um was goots bi däre Kampagne ?

  Tobi:

Daas Joor hänn mer unser neys Buech mit de Basler Fasnachtsfiguure uusebrocht und vo dääne 16 Figuure, hänn mer 8 vrgreesseret und im Hoof vom Roothuus uffgstellt. Wo s drumm gange n-isch, ob jetz d Fasnacht stattfinde soll oder nit, hänn d Regierigsreet jeede Daag an dääne Figuure vrbyy laufe miesse und wäär waiss… vellicht findet d Fasnacht au e weeneli wägge dämm statt ;-)

Also Eych kenne mer vrdangge, ass es wider e Fasnacht git ;-). Dasch e Wanderusstellig gäll ? Wo steen die Figuure jetz ?
In dr Schalterhalle vo dr UBS am Banggeblatz… und no bis zue de Bummelsunntige. Näggscht Joor isch blaant, ass mer die Figuure au im Altershaim uffstelle, ass au die eldere Mensche wo nimm eso mobiil sin, au ebbis drvoo hänn und mitem QR Code die scheene Värsli und Byydrääg gniesse kenne.

     
  Schwängge mer emol e weeneli zer Fasnacht… Du bisch jo au als Aggdiive an dr Fasnacht underwäggs und zwoor als Dambour bi dr Fasnachtsclique "Barbara-Club 1902". Was isch in Dir voorgange, wo im 2020 d Fasnacht kurzfrischtig abgsait woorde n-isch ?
  Tobi:

Mer sin jo no kuurz voor dr Absaag am Drummeli drbyy gsii und hänn e Hammeruffdritt aanegleggt. Wo den die Absaag koo isch, het ma das no iirgendwie vrdaue kenne, well mer immer no am schwelgge vom Uffdritt am Drummeli gsii sin. Schwiiriger ischs denn eerscht e Joor speeter gsii, wo me scho frieh gwisst het, ass es wider kai Fasnacht gää wird… dasch denn scho miehsaamer gsii zem vrdaue.

     
  Jetz findet d Fasnacht jo definitiiv statt… was heschs Gfiil ? Wie kennts wäärde ?
  Tobi:

Y hoff, ass es richtig kreatiiv wird und me au dr Muet het, emol anderi Wääg z goo. Vor allem au d Wäägeler… ass die jetz nit dr Kopf in Sand stegge, sondern ass me brobiert, ebbis tolls uss dr Situatioon uusezhoole.

     
  Was beditet Dir d Fasnacht ?
  Tobi:

Fir mii ischs au e Stigg "Lääbensyystellig"… d Fasnacht beglaidet mi scho s Lääbe lang, y bi scho als glaine Gnäggis mit myne Eldere an dr Fasnacht gsii… y bi mit dämm uffgwaggse. S beditet Fraid, soziaale Ussdusch und Kontaggt, wie au Erfolg… grad mit dämm Verain "Fasnachtszauber", wo sicher au noonemool e anderi Dimensioon aagnoo het… ass me de Lyt au emol ebbis git und nit immer numme nimmt.

Wie mainsch das ?
Als Junge het me doch aifach s Goschdym und d Larve in d Hand druggt griegt... klaar het me e weeneli gholfe bim kaschiere vo dr Larve, me het sich aber kaini groosse Gedangge gmacht, wohär das alles koo isch bzw. wie das gmacht woorde n-isch. Und mitem Buech gseet me emol hinder d Fasnachtskulisse und welle Uffwand do aigentlig bedryybe wird.

     
  Uff welli 3 Grundpfyyler baut fir Di d Fasnacht uff ?
  Tobi:

E ganz wichtige Pfyyler isch fir mi, d Frindschaft und dr gmainsaami Spass, drnoo s muusikaalische und denn nadyrlig no d Draditioon und d Kunscht… sin jetz halt e weeneli mee als 3 Grundpfyyler ;-)

     
  Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?
  Tobi:

Am liebschte miteme Rockstar… oder mitem Endo Anaconda vo "Stille Has", wo laider grad vor kuurzem gstoorbe n-isch… aifach emol zämme e Joint rauche und schnuure wär wiirglig no cool.

     
  Was wirdsch an Fraue nie vrstoo kenne ?
  Tobi:

Vyyl… aber vyyl vrstand y au seer guet… die maischte Fraue mache sich halt vyyl mee Soorge, als miir Männer… miir sin do iirgendwie ruhiger und entspannter.

     
  Was erhoffsch Du Dir vom 2022 ?
  Tobi:

Voorallem Spass, Fraid und e kreatiivi Fasnacht…

     
     
  Was hesch Du vo dääre Corona Zyt mitgnoo ? Ka me iiberhaupt ebbis mitnää ?
  Tobi:

Jä y find scho… me besinnt sich wideremool uff d Familie und schetzt, was me dehaime het oder ebbe nit het, well me s nit pfläggt het. Oder ass es halt au emol fir Erwaggseni, Gränze git und me nit immer mache kaa, was me wott… aber s git au Negatiivs, wie Home Office, das stinggt mer gewaltig.

     
           
  No e baar Schlaagweerter, bitte numme mit aim Satz beantwoorte...
  Basel... Fasnacht und FCB…
  Ziiri... Ha n y au gärn und guete Kontaggt deert aane… ka nit schlächts iiber Ziiri saage…
  Nitfasnacht... Gits hoffentlig nimm…
  Fasnachtsvirus... Fasnachtsfieber isch mer lieber…
  Faschtewaie... My Lieblingsgebägg…
  Fasnacht 2022... Y frai mi riisig und mee gits doo drzue nit zem saage.

Vyyle Dangg fiir Dyni Antwoorte