Cornelia Leuenberger und Marzel Schär vom Larveatelier "Domino"
   
 

 

Syt 1985, also genau 37 Joor, gits Eyer Larveatelier scho… wie isch denn die Idee zem "Larve mache" entstande ?

 

Conny:

 

 

Drzue koo bi n y uffgrund vo dr Masggebildnerey bim Theater. S het grad kai Praktikumstell gää und iirgendwie ha n y die 2 Joor iiberbrugge miesse. Y bi denn bim Larveatelier vom Rolf Schneuli vrbyygange und hanen gfroggt, ob y emol fir e Saison lang mitschaffe kennt, zem das Handwäärg z lehre... y ha gfunde, ass Larve mache jo au ebbis mit Masgge z due het. Noo dääre Saison het sich dr Rolf syn groosse Wunsch erfillt, isch noo Neyseeland ussgwanderet und het synere Kundschaft vrzellt, ass är e Noofolgerin haig... allerdings het är vrgässe, mir das mitzdaile. Doodruffaabe ha n y seer schnäll und unerwaartet das Atelier miesse ruume und amänd isch alles im Woonzimmer vo myne Eltere gstande... eso bi n y pletzlig miteme Larveatelier doogstande.

Aber Du bisch jo Masggebildnerin gsi und hesch am "lääbige" Objäggt gschafft und jetz machsch Larve... dasch doch ebbis ganz anders oder nit ?
Nadyrlig ischs ebbis ganz anders... d Massgebildnerey macht Veränderige am lääbige Kopf (Schmingge, Perigge, etc.) und sällmol het me no kaini Visagiste oder Studios kennt und fir mii isch immer klaar gsii, ass d Masgge wyt iiber d Hutt ussgoot. Dorum hets mi au seer indressiert wie me d Larve macht, ass y speeter das Wisse au fir myn Bruef nutze kaa.

Und hesch e Joor lang im Larveaterlier mitgschafft und die Technik glehrt...
E Joor isch nätt... aigentlig sins 6 Moonet gsii, also e Saison ;-). Y bi in die Wält yydaucht und ha ganz tolli Mitarbaiter kaa. Dr Rolf het mer immer wider Tricks zaigt, bis e Larve fertig gsii isch. Wärend dääne 6 Moonet isch in mym Hirn e Kamera gloffe, wo alles punggduell uffgnoo het. Mit dr Idee, ass y lehr e Larve z mache... und nit mitem Wisse, ass är mir das alles emol an d Bagge hängt.

     
 

Und denn hesch das Atelier kaa und Dyni eerscht Laarve isch feertig gsi... wie isch die uusekoo ?

  Conny:

Die isch ganz speziell uusekoo... s isch s eerschtmol gsii, wo me e Film - wo me im Hirn ka het - aifach aabespuelt. S eerscht Modäll isch e Pinguin fir d Guggemuusig "Dalbanese" gsii und si isch aifach perfäggt "gsässe".

     
 

Was macht fir Eych d Faszinatioon vom "Larve mache" n-uss ?

  Marzel:

Fir mii ischs d Larve. Y bi ooni Fasnacht uffgwaggse, aber d Larve hänn mi scho immer fasziniert und d Meegligkait emol e Larve z mache, isch mer nadyrlig scho seer glääge koo.

Also s Erschaffe vomene 2. Gsicht uffgrund vo e paar Zaichnige ?
Mer hänn vo Kunde scho absolut geniali Zaichnige als Voorlaag griegt... aber au scho e Grais mit 2 Pinggtli im Gsicht und dr Kund het gmaint "Du waisch jo was y main" ;-)

  Conny:

Also friener isch vom Uffdraagsgääber wäsentlig mee Engagement koo, hit kunnt me miteme Bild vonere Filmfiguur und sait "Das wänn mer"... und denn muess es genau eso sii und denn het me nadierlig Bryysspring, wells e greessere Uffwand isch.

 

In dääne 37 Joor hänn Iir bestimmt scho mängge Sturm erläbt, aber was do in de letschte 2 Joor abgange n-isch, het Eych bestimmt au zimmlig hart droffe. Was isch in Eych voorgange, wo d Fasnacht im 2020 eso kuurzfrischtig abgsait woorde n-isch ?

  Conny:

Y has nit glaubt... und wenn y ehrlig bi, ka n ys bis hit noonig glaube. S isch seer schwiirig gsii, well mer an sällem Frytig aigentlig beraits scho in soomene Abschlussflow gsii sin... s isch aigentlig alles zem abhoole baraat gsii und unsere Adrenalinspiegel isch scho vom Status "Sehr hoch" zem Status "Schwelge" iiberegange, wo denn die Mäldig vo dr Absaag koo isch. Mer sin im Ruum gstande, hänn Drääne im Gsicht kaa und sin hässig gsii. Mer hänn denn ainewäg unsere draditionelle Apéro gmacht, aber d Stimmig isch nadyrlig wie anere Beärdigung gsii.

     
 

Aber die bstellte Larve sin ainewääg abghoolt woorde oder ?

  Conny:

Jä klaar, dasch nie e Theema gsii... eenter as me nit gwisst het, wenn abhoole... aber amänd het me s abghoolt und au alles zaalt.

  Marzel:

Miir hänn welle abschliesse und fir uns isch definitiiv abgschlossen, wenn alles dusse n-isch... und dorum hänn mer au druff beharrt, ass alles abghoolt wird.

     
 

Hänn Iir d Solidarität vo de Fasnächtler gspiirt ?

  Conny:

Unmittelbaar noo dr Larveussgoob, sin d Lyt zeerscht emol mit dr aigene Druur beschäftigt gsi. Mer sin im freye Fall gsii und aifach numme mied... fir uns ischs aigentlig eso wie immer gsii, usser ass kai Fasnacht stattgfunde het. Langsam ischs ys bewusst woorde, was das fir Konsequänze kennt haa... und im Juni / Juli hänn mer denn realisiert, ass mer als Gwärb zwoor ärnscht gnoo wäärde, aber als Understitzigsbetriib niene uffdaucht sin... mer sin quasi zwische Stiehl und Bängg grutscht. D Larvemacher hänn sich denn zämmedoo und besproche, wie me Uffmeergsamkait griege kennt und eso isch die Solidaritätsblaggedde entstande.

     
 

Apropos Solidarität… d "Solidaritätsblaggedde" isch jo e groosse Erfolg gsii, au fir Eych ?

  Conny:

D Solidaritätsblaggedde het ys allne gholfe, well das Theema wärend 3 Moonet immer in dr Präss gsi isch und me driiber greedet het.

  Marzel:

Y finds au... obwools au vyl Fruscht gää het. Mit unserem Aaliige, sin mer bi vyyle Ämter abblitzt... au was Wältkultuureerb betrifft, mer gheere als Larvemacher nit drzue und Kunscht ischs anschyynend au nit. Am Änd hets ghaisse, mer sigge "Laienkunst"... aber Sorry dasch nit unser Hobby, sondern unsere Bruef und mer lääbe drvoo.

   

 

     
 

Wie goots Eych jetz ? Laufts langsam wider aa ?

  Conny:

Dr Schnitt vo allne Ateliers liggt bi 25%. Mer hänn bi dr Regierig wider e n-Aadraag gstellt, ass mer ys wider dräffe und bespräche, wies wyters goot... das längt ämel nit bis zem näggschte Heerbscht. Wenn kai Understitzig kunnt, wirds nomee Betriib lipfe.

  Marzel:

Miir isch aifach e klaari Stelligsnaam vo dr Regierig wichtig... und die isch bis hit nit koo. Das "in dr Luft hängge" macht mi seer nervees und ha n y nit gärn.

 

Kemme mer aber jetz wider zrugg zer Larve… in wie vyyl Schritt entstoot e kaschierti Larve ?

  Conny:

Zeerscht modelliert me e "Positiiv" uss Doon und macht us Gips e "Negatiiv". Jetz muess me s Babyyr rysse und in Klaischter yylegge... denn wird mit ganz vyyl Ussduur und Diszipliin "yygfetzelet" und kaschiert. Drnoo goots in d "Droggnigshalle" und wenn si drogge n-isch, wird si uss dr Form uusegnusperet und me het jetz e feertigi Rohfoorm. Denn wird si gschliffe und kopfdauglig gschnitte, "bändelet" und inne mit Schellack laggiert. Jetz kemme d Lyt zem aabasse vo dr Larve, denn wärde d Lecher mitem Dremel vrschliffe, d Augelecher wärde wider verlyymt und noonemol gschliffe. Bevoor d Perigge druffkunnt, wird d Larve zeerscht no grundiert und gmoolt... und denn isch si emol feertig.

     
 

Iir sin "Laarvemacher" vo dr alte Schuel, wo no Draditioon und Handwärg grooss gschrybe wird. Iir stellet Eyri Laarve usschliesslig uss Babyyr här… wär Kunststoff e n-Alternatiive fir Eych ?

  Marzel:

Mer hän emol fir e Clique iiri dieffzoogeni Larve bemoolt und dasch s eerscht Mol gsii fir ys, wo mer mit dämm Materiaal in Kontaggt koo sin. Y find s het syn Raiz und moolt sich ganz anderscht...

  Conny:

S isch e richtige Boom woorde und s het mi schockiert, wie schnäll die groosse Clique pletzlig uff dä Zuug vo dr dieffzoogene Larve uffgsprunge sin... aber miir hänn do nit mitgmacht. E baar Joor speeter, isch denn dr Peracryl koo und isch sällmol vom "Larve-Dildi" ganz grooss propagiert woorde.

  Marzel:

Und denn isch e Gugge koo, wo iiri Larve uss Peracryl hänn welle... und mer hänn en Vrsuech gmacht. 50% vo de Mitgliider griege e kaschierti Larve und 50% e Kunschtstofflarve. Fir uns ischs indressant gsii zem uusefinde, wie sich dä Kunschtstoff vraarbaite losst und mer hänn unseri Erfaarige drmit gmacht. S het syni Voordail, aber amänd sin mer doch bim Babyyr blyybe.

     
 

Theema "Schellack"...

  Marzel:

Ou y lieb Schellack... y lieb dr Gschmagg und y lieb d Faarb vom Schellack.

  Conny:

Ych au... dasch au dr Grund, wieso ass mer kaini Kunschtstofflarve mache ;-)

   

 

 

Wenn Iir an dr Faasnacht Eyri Larve gseen... erfillt aim das mit Stolz oder luegt me das relativ niechtern aa ?

  Conny:

S isch immer e weeneli pyynlig berierend...

Achtet me sich am Cortège au e weeneli druff, was d Konkurränz eso gmacht het ?
Jä klaar... aber nit zem konkurriere, sondern jeede het sy Handschrift und nadyrlig luegt me, was die andere so gmacht hänn... me kennt jo au dr Stil vo dr Konkurränz.

Denn gseet me au e weeneli, woaane dr Trend goot oder ?
Eenter dr Trend, was so alles vo aim kopiert woorde n-isch ;-)

     
 

Kunnt bi Eych - drotz Eyrer Aarbet s ganz Joor duure - ainewäg e weeneli Faasnachtsstimmig uff ?

  Conny:

D Fasnachtsstimmig het sich im Lauf vo däne Joore vrschoobe... y ha in de letschte 10 Joor kai Fasnachtsstimmig me kaa, sondern numme no Stress. Dr Spagaat zwische Familie und im Aterlier schaffe, isch nadyrlig scho seer grooss, aber das het sicher au mitem Alter z due. Me het au s Zytfänschter nimm, wo me zem Byspiil au emol am aigene Fasnachtstheema schaffe ka.

     
 

Und was machet Iir in dr faasnachtsloose Zyt ?

  Marzel:

E Zytlang hänn mer spezielli Objäggt fir d Wärbebranche baut, aber s Uffdraagsvoluume isch staarg zrugggange. Mer hänn au aigeni Projäggt, wo mer baue... zem Byspiil e Jurte.

  Conny:

S Zytfänschter vom Ändi vo dr Fasnacht bis zem Ändi vo dr Summerfeerie, isch doch rächt grooss. Bis Ooschtere ruumt me uff, machts Büro, etc. und drnoo hänggt me no e weeneli ab. Ab Ooschtere nimmt me denn wider Kontaggt mit de Lieferante n-uff und beraitet sich aigentlig scho wider uff die ney Saison vor.

     
 

Was beditet Eych d Fasnacht ?

  Conny:

Y bi innere Fasnachtsfamilie uffgwaggse und d Fasnacht beditet mer vyyl. My Wunsch wär, ass d Fasnacht wider zrugg zem Kärn findet und nit zunere Party- oder Absturzfasnacht wird... ass das Niveau vo dääre Konsuumblindhait wider zem Spiil zruggfindet.

  Marzel:

Fasnacht beditet fir mi, au fräch sii z deerfe und dr Gsellschaft dr Spiegel voor d Naase z heebe. D Fasnacht isch d Chance, anhand vomene Sujet, dr Obrigkait myni Zuestimmig oder Abnaigig z zaige... und wenn die Narrefreyhait vrloore goot, denn kenne mer d Fasnacht blyybe loo.

     
 

Mit wellere beriemte Perseenligkait (ka au scho gstoorbe sii), wuurdet Iir gärn emool e scheene Oobe miteme feyne zNacht vrbringe und aifach numme plaudere ?

  Conny :

Mitem -minu wär no witzig...

  Marzel:

Mitem Miyamoto Musashi, dasch e beriemte Samurai und japanische Schwärtkämpfer gsii... oder mitem Bluessänger, Songwriter und Gitarrischt John Lee Hooker...

     
 

Was wärdet Iir an Männer / Fraue nie vrstoo kenne ?

  Conny:

S lineaare Dängge vo de Männer und ass si zvyyl schnuure...

  Marzel:

As Fraue immer ebbis anders maine, ass si saage... saage si "Jo", maine si "Nai", saage si "Linggs", maine si
"Rächts", etc.

     
 

Mit wäm wänn Iir nie im Lift stegge blyybe ?

  Conny:

Mitem André Auderset.

  Marzel:

Y wott gärn mitem André Auderset im Lift stegge blybe und uusefinde, wieso myni Frau nit mit ihm im Lift stegge blyybe wott ;-)

     
 

Was erhoffet Iir Eych vom 2022 ?

  Conny:

As die vyyle tolle Sache, wo jetz meeglig woorde sin, au Fuess fasse und Wurzle schleen... und mer ys im 2022 wider deerfe mit unsere aigene Perspeggdiive ussenandersetze deerfe.

  Marzel:

In Bezuug uff d Fasnacht hoff y, ass d Fasnacht stattfinde wird... und in Bezuug uff s Allgemaine hoff y, ass das Theater jetz ändlige emol vrbyy goot.

     
 

Was hänn Iir vo dääre Corona Zyt mitgnoo ?

  Conny:

Anderi Meegligkaite und Perspeggdiive, wo sich ereffnet hänn.

  Marzel:

Y ha e neyi Ussbildig zem Komplementär Therapeut aagfange, wo aber jetz no 2 Joor lang goot.

     
 

No e baar Schlaagweerter, bitte numme mit aim Satz beantwoorte...

  Basel...

Conny: Tickt anderscht...
Marzel: Offener...

  Ziiri...

Conny: Me kas mache...
Marzel: Gar nit eso schlimm...

  Heerbschtmäss...

Conny: Isch gloffe...
Marzel: Mässmogge...

  Kunschtstofflarve...

Conny: Isch gloffe...
Marzel: Nit neetig...

  Fasnachtsvirus...

Conny: Daarf sich pandemiemässig vrbraite...
Marzel: Isch OK und find y guet...

  Fasnacht 2022...

Conny: E Chance...
Marzel: Y hoff, ass si stattfinde wird...

Vyyle Dangg fiir Dyni Antwoorte