Värslibrinzler - E Värsli Poet und Virtuoos
   
 

 

2019 ischs Gebuurtsjoor vom "Värslibrinzler" gsi... wie ischs denn doo drzue koo ?

  Värslibrinzler:

Y ha n-e privaate Instagram Account und ha gsee, wie deert d Lyt iiri Follower generiere. Do gits zem Byspiil e Gipfeli-Account und dä isst jeede Dag e Gipfeli, postet das und het im Nu 1000 Follower. Denn gits Lyt, wo imene Fitness Center sog. Personal Coaches sin, ständig e Bild uffelaade und au 1000 Follower hänn. Y ha mer denn iiberleggt, ob y das au schaffe wurd... aifach so als Gäg. Y ha jo scho vorhäär fir unseri Guggemuusig dr Zeedel gschryybe und Värsli brinzlet.

Und denn hesch gfunde, ass Dyni Värs au uff Instagram brinzle wottsch ?
Jä genau... zwische Wienachte und Neyjoor, bi n y mitem Velo ganz frieh am Moorge iibere Minschtblatz gfaare und das Bild vo dr mittlere Brugg, wo immer no im Glanz vo dr Wienachtsbelyychtig gstande n-isch, ha n y unglaublig scheen gfunde. Y ha aaghalte, bi abgstiige, ha aifach emol e 4-Zyyler brinzlet und gfunde, ass es daas noonig uff Instagram git... also ha n y uff Instagram dr "Värslibrinzler" Account ereffnet und myn 4-Zyyler uffeglaade.

Und was isch mit Dyne 1000 Follower ?
Du s het funggdioniert und has erraicht... aigentlig kennt y jetz uffheere, aber has noonig voor ;-)

     
 

Du bisch seer bresänt uff Instagram und Facebook... woby Instagram hautpsächlig fir Foti bekannt isch. Was het Di drzue bewooge, anstell vo Foti, Dyni Värs hochzlaade ?

  Värslibrinzler:

Y ha welle wisse, obs numme mit visuelle Raiz funggdioniert oder ob d Lyt au numme en Täggscht lääse. Aber y muess au fairerwyys saage, ass y im Voorfäld e baar Lyt aagschryybe ha, wo wiirglig seer scheeni Foteli vo Basel ka hänn. Eso ha n y myni Värs miteme wunderscheene Bild vo Basel kombiniere kenne.

Aber dr Värs hesch jo beraits voorhäär scho gschryybe und suechsch Dir denn aifach no s bassend Bild drzue oder ?
S kunt druff aa... mänggmol gang y d Timeline duure und gsee grad e Bild, oder oft ischs esoo, ass y iiber ebbis bstimmts schryybe will und suech mer denn s bassend Foti drzue.

     
 

Du bisch immer seer aggduell mit Dyyne Värs, dh. bassend zem Daagesgscheeh. Wie lang goots amigs, bis esoone Värs brinzlet hesch ?

  Värslibrinzler:

Y bi aigentlig e seer ungeduldige Mensch und wenn y z lang hät zeme Värs z brinzle, denn hät y scho lang wider uffgheert. Normaalerwyys goots ebbe 10 - 15min bis e Värs stoot und den post y dä au grad uff Instagram, sunscht wurd y ständig dra ummekorrigiere. Entweeder fang y afoo schryybe und s lauft, den bi n y schnäll feertig, oder y loss es grad wider blyybe.

     
 

Wohär hoolsch Du Dir d Inspiratioon fir neyi Värs ?

  Värslibrinzler:

Dr Alldaag isch voll vo Inspiratioon. Dr Vordail isch, ass y immer mitem Velo go schaffe gang und oft an verschiidene Blätz vrbyy faar, wo mi scho hiffig zem Schrybe inspiriert hänn. Denn gits nadierlig no die däägligge Noochrichte oder Dräffe mit andere Lyt.

Hesch denn schonemool e Schrybblokaade ka, wo aifach nit me gange n-isch ?
Aigentlig nit... y ha zwoor am Aafang immer s Gfiil kaa, reegelmässig ebbis poste z miesse, aber ha denn au schnäll gmeergt, ass es eso nit funggdioniert... me ka nit erzwinge.

Ebbe, Du fiihlsch Di nit vo Instagram under Drugg gsetzt oder ?
Am Aafang scho, denn Instagram funggdioniert halt esoo... je bresänter me isch, desto mee gseen ain d Lyt... aber y ha denn gmeeergt, ass ych das nit bii und ha denn au drmit uffgheert.

Und wie gseets mit dr Theemefindig uss ?
My Brobleem isch e Theema z finde... aber wenn Du mir e Theema gisch, zB. e luschtigi Geburtsdaagsreed fir e Kolleeg oder e Hochzyt, etc. denn ka n y grad sofort loosschryybe, dasch kai Brobleem... aber y bruch halt e Theema, ass y mitem Schryybe afoo kaa und denn laufts au.

Hets denn scho Uffdrääg in die Richtig gää ?
Jo, y ha schonemool e Verloobigsaadraag fir e Frau gschryybe... also si het iim e n-Aadraag gmacht und ych ha dä schrybe deerfe.

     
 

Värslibrinzler, wieso schrybsch Du "numme" Värs und kaini Schnitzelbängg ?

  Värslibrinzler:

Zem aine bi n y innere Gugge und wurd das nie im Lääbe welle uffgää und zem andere ha n y vyyl Bänggler in mym Umfäld und waiss, wie die Aart vo Fasnacht ablauft... isch sicher toll, aber mii Ding ischs halt nit. Zeme guete Schnitzelbangg gheert halt no vyyl mee als nume s Schrybe, me muess musikaalisch sii... und eerlig gsait, y ka weder guet singe, no spiil y e Instrumänt. Drzue kunnt no e gwissi Biinebresänz und s perfäggte Timing wie me d Pointe bedoont... und y drau mer das nit zue.

Also wirds nie e Schritt zem Bänggle gää...
Sag niemols nie... y ha au scho gsait, ass y nie hyroote wird und bi syt 2 Moonet ghyroote ;-)

     
 

Gseesch Du Dii mit Dyne au zem Dail kritische Värs, als Spiegel vo unserer Gsellschaft ?

  Värslibrinzler:

Y wurd eenter saage, ass ych e mitdailigsfraidige Zytzyyg bi ;-). Y brobier nadierlig immer alles uss 2 Richtige aazluege... also wenn y jetz e Mainig zue ebbisem ha, denn brobier y immer au d Geegesyte z verstoo, denn s isch nit immer alles numme Schwaarz und Wyss. Y bhalt myni Värs offe und gib au emol e Dänggaastooss...
aber als Spiegel vo dr Gsellschaft, gsee n y mi definitiiv nit.

Wie goosch mit Kritik um ? Gits iiberhaupt Kritik an Dyne Värs ?
Bis jetz aigentlig nit, aber y gang aigentlig grundästzig seer guet mit Kritik um. Y kenn seer vyl Bänggler und bi mee als offe wenn mer ebber sait "Dr Värs isch guet, aber Du muesch no daas und daas besser mache...". Uff Instagram ha n y bis jetz aber no kai Kritik glääse.

     
 

Hesch Du duur Dyni Bresänz uff Instagram und Facebook au scho Folgeuffdrääg griegt ?

  Värslibrinzler:

Ändi letscht Joor isch dr Almi (Patrick Allmandinger) uff mi zuekoo und het gmaint, ass är myni Värs so guet finde wurd und ob y nit emol Luscht haig, firs "Läggerli" e Nummere z schrybe. Y ha denn zeerscht abgläänt, well das denn doch e baar Nummere z grooss gsi wär fir mii... aber dr Almi het nit lugg gloo und amänd ha n y denn das doch au emol brobiere welle.

Und hesch e baar Nummere gschryybe...
Y ha denn 3 Nummere firs "Läggerli" deerfe schrybe und isch fir mii nadierlig e ganz groossi Eer gsii, ass är mi aagfroggt het.

S het jo au no e Film mit Playmobil Männli vom Verain "Fasnachtszauber" gää, wo drinn voorkoo bisch
Jo genau... dr Verain "Fasnachtszauber" isch fir mii sowieso e Härzensaagläägehait gsii und ha kai Minute zeegeret zem mitmache bi däm Film und ha au im Kinderbuech gholfe in Värsfoorm z schrybe.

     
     
 

An dr Fasnacht bisch Du mit dr Guggemuusig "Basler Garde Clique" underwäggs. Was isch in Dir voorgange, wo d Fasnacht 2020 kurzfrischtig abgsait woorde n isch ?

  Värslibrinzler:

S isch nadierlig fir alli seer iibel gsii und bezaichne das immer als myni greescht Niiderlaag...

Wie mainsch das ?
Y bi jo seer kreatiiv und brobier immer iirgend e Wääg z finde... e Leesig, ass es vellicht doch no in iirgendere Foorm stattfinde kennt... aber sällmol isch aifach nit, gaar nit meeglig gsii und das z aktzeptiere het mi seer druurig aber au hässig gmacht. Y ha sogar e baar Dräänli miesse vrdrugge, wells aifach kai Usswääg gää het und die Machtloosigkait het aim scho seer weh doo.

     
 

Was beditet fir Dii d Fasnacht ?

  Värslibrinzler:

Seer vyyl... s isch e seer groosse Dail vo mym Hobby. My Frau wurd jetz saage, s isch wie ne 2. Lääbe oder e 2. Familie. Me het mit de Lyt e ganz andere Kontaggt und hets au immer luschtig mitenand. Jeede isch indressant und me het esoone n-Aart Zämmegheerigkaitsgfyyl. Me isch mit jeedem grad per Du und alles isch vyl loggerer. Y legg au grosse Wärt druff, uff d Usspiilig vom Sujet... s wär nit fir mii, wenn y 3 Daag lang im Stammgoschdym ummelaufe miesst. D Fasnacht beditet mir wiirglig enoorm vyyl.

     
 

Wenn foot bi Dir d Fasnachtsstimmig so richtig aa ?

  Värslibrinzler:

Mitem "Värslibrinzler" ischs aigentlig e Duurzuestand woorde und s git vellicht 2 Wuche im Hoochsummer, wo n-y gaar kai Fasnachtsstimmig ha ;-). Normaalerwyys foots Kribble nooem Summer mit de Guggebroobe n-aa oder speetischtens bi dr Larvebroob im Oggdoober, Novämber. Aber ebbe... do ych sowieso bi dr ganze Fasnachtsblaanig drbyy bii, isch das Kribble fascht e Duurzuestand... vo miir uss, kennte mer jetz scho
yystoo ;-)

     
 

Het sich d Fasnacht im Geegesatz zue friehner veränderet und wenn jo, in welli Richtig ?

  Värslibrinzler:

Grundsätzlig scho und dasch au richtig eso... s isch au d Uffgoob vo dr Fasnacht, dä Wandel mitzmache denn schliesslig isch si dr Spiegel vo unserer Gsellschaft.

     
 

Welles sin fir Dii die 3 Grundpfyyler vo dr Fasnacht ?

  Värslibrinzler:

Sicher emol die ganzi Värskultur mitem Bezuug zem Baseldytsche Dialäggt, also Schnitzelbängg, Ladäärnevärs, etc... denn nadierlig s Drummle und Pfyffe wo s numme an dr Basler Fasnacht git... und denn s "Mitenand"...
me ka mit aim e Bier dringge, me isch per Du und het e luschtige n-Oobe zämme. Am näggschte Daag googlisch syn Namme und liesisch, ass das zB. e bekannte Staatsanwalt gsii isch, wo sunscht nie im Läbe mit Dir ain dringge wurd. An dr Fasnacht spiilts kai Rolle wär oder was me n-isch.

     
 

Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?

  Värslibrinzler:

Mitem Basler Mundart Dichter "Blasius". Ihn hätt y seer gärn emol kenneglehrt und mitem plauderet. Y find - und bitte nit falsch verstoo - daas wo n ych mach, am äänligschte isch mit däm, wo n-är gmacht het... är isch au kai Schnitzelbänggler gsii und het Täggscht iiber d Fasnacht oder d Stadt gschrybe... numme aifach ooni Instagram und nadierlig e weeneli besser als ych ;-)

     
 

Was wirdsch an Fraue nie verstoo kenne ?

  Värslibrinzler:

Wie me mit iibergryzte n-Ärm e Pulli abzieh kaa...

Y verregg *laaach*...
Doch das stimmt... mit iibergryzte n-Ärm dr Pulli abzieh wär bi mir mechaanisch scho gaar nit meeglig ;-)

     
 

Mit wäm wottsch nie im Lift stegge blyybe ?

  Värslibrinzler:

Mitem Eric Wäber...

Wär will das scho...

     
  No e baar Schlaagweerter, bitte numme mit aim Satz beantwoorte...
  Basel...

My Haimat...

  Ziiri...

Ka me mache, muess me aber nit unbedingt...

  Nitfasnacht...

Schregglig...

  Fasnachtsvirus...

Steerger wie Corona...

  Gugge oder Schnitzelbangg ?

Gugge mache, Schnitzelbangg loose...

  Wellerman-Song…

Hänn mer coveret und gits uff Youtube...

  Fasnacht 2022...

Wird hoffentlig stattfinde und die greescht Party syt Menschegedängge wärde.

Vyyle Dangg fiir Dyni Antwoorte