Bruno Behret vo dr Waageclique "Gränzwaggis Clique 1945 Basel"
   
 

 

Syt 1945 gits d "Gränzwaggis" scho in Basel und doo drmit gheeret Iir zue dr zwaitältischt Waageclique, wo an dr Basler Fasnacht underwäggs isch… unglaublig. Wie isch denn die Grindig zstand koo ? Dasch jo grad nooem 2. Wältkrieg gsii ?

  Bruno:

Dä 2. Wältkrieg het e groosse n-Yyfluss uff d Grindig kaa… my Babbe isch zue sällere Zyt in Rhyfälde im Militäär gsii und het d Schwizer Gränze bewache miesse… und wie s amigs eso isch, gits im Militäär so Grippli mit glatte Sieche. Wo denn dr Krieg feertig gsii isch, hänn si gfunde "Kumm mer grinde doch e Waggis Clique" und eso sin 1945 d "Gränzwaggis" entstande… 1946 hänn si denn die eerscht Fasnacht zämme gmacht.

     
 

Im 2020 hättet Iir aigentlig Eyer 75-jeerigs Jubiläum fyyre sotte, aber d Grind worum s nit z stand koo isch, kenne mer jo alli mittlerwyyle ganz guet. Was isch in Eych voorgange, wo d Fasnacht eso kuurzfrischtig abgsait woorde n-isch ?

  Bruno:

S isch fir ys – wie fir alli andere Clique n-au - e enoormi Entdischig gsii. An e Absaag het me nie glaubt und underenand sogaar no Wette abgschlosse… aber denn isch s halt doch esoo koo.

     
 

Mer wisse jo mittlerwyyle, ass 2022 au Scheisse isch fir Eych als Waageclique und Iir kennet Eyer Jubiläum wider nit noohoole… fyyret Iir ainewääg no e weeneli, oder waartet Iir bis zem 80. Burzeldaag ?

  Bruno:

S isch esoo, ass sich unsere Noowuggs enoorm ins Ziggs gleggt het und ebbis firs 2022 voorberaitet hänn. Wie mer jo wisse, gits fir uns au daas Joor wider kai Fasnacht und eso hänn mer unseri Fyyr uffs 2023 vrschoobe.

Y bii absolut drvoo iiberziggt, ass es näggscht Joor wider e Fasnacht git…
Hoffe mers...

     
 

Gits no Foteli vo friener ? Isch sicher no e n-anderi Aart vo Fasnacht gsii, wo me anno 1946 gmacht het...

  Bruno:

Sällmol isch me no mit Ross und Waage gfaare und het ganz aifachi Larve mit Strohperigge kaa und drzue het me no e Huet oder Zipfelkappe drait.

In dämm Momänt hets 1946 numme 2 Waggiswääge gää oder ?
Genau… d "Chropf-Clique" vo Riehe isch jo als ältischt Waageclique au no underwäggs gsii.

     
  Wie gseets mitem Noowuggs uss ? Anschyynend gits kaini Brobleem eso wie s ussgseet…
  Bruno:

Nai, absolut nit… aber mer hänns au immer e weeneli gfeerderet und zue unserem Noowuggs gluegt. Friener sin mer emol 12 Lyt uffem Waage gsii und hänn eggsdra no aabaut. Mer hänn halt ganz vyyl Passivmitgliider und doo isch halt immer emol dr aint oder ander drzuegstoosse, well me halt gfunde het, ass mer e glatti Clique sin.

Und wie vyl sin Iir hit ?
Mer sin 8 Waggis uffem Waage… und ooni Aabau ;-)

     
 

Eyre Waage underschaidet sich grundsätzlig vo de andere Waggiswääge… Iir faaret scho syt Joore e Strauwaage gäll ?

  Bruno:

Jäwoll, das hänn mer syt vyyle, vyyle Joore byybhalte und finde, ass e Waggiswaage au ebbis uurigs und nit numme Schickimicki bruucht. Syt Joore beschliesse mer immer aistimmig, e baar Moonet voor dr Fasnacht, ass mer wider miteme Strauwaage faare und somit dääre Sitte treu blyybe.

Ych perseenlig finds ebbis seer scheens und erinneret mi immer e weeneli an friener…
Joo genau, s isch ebbis ruuchs und basst zem Waggiswaage. Friener wo me no Lyt het deerfe uffe Waage uffezieh, hets dr Voordail kaa, ass me sich nit weh gmacht het.

     
 

Y ha glääse, ass d Fasnacht 2022 ebbis ganz bsunders worde wär… nit numme wäggem Jubiläum, sondern well denn au grad e baar Mitgliider iiri letschte Orange gwoorfe hätte… isch das jetz uff näggscht Joor vrschoobe woorde ?

  Bruno:

JEIN… e Dail het jetz langsaam dr Gaischt uffgää, well d Fasnacht jetz scho 2x vrschoobe woorde n-isch, aber das ka sich no lang ändere.

Dh. si blyybe no bis 2023 drbyy ?
Jo...

Und wie lang bisch Du denn scho drbyy ?
Syt 1969, aber wo my Babbe schweer grangg woorde n-isch, ha n y e baar Joor pausiert… bi aber jetz wider voll drbyy.

     
  Wie gseets mitem intrigiere n-uss ? Isch s iiberhaupt no gfroggt und machts no Spass ?
  Bruno:

Lueg s isch esoo… me waiss nadyrlig, ass es bimene Waggiswääge ganz vyyl feyni Sache git und duur daas hänn mer nadyrlig au ganz vyl Kinder am Waage. Aber zem uff d Uursprungsfroog zruggzkoo… friener sin mer nooem zNacht no ab uff d Gass go intrigiere, aber mynere Mainig noo und dasch wiirglig myni perseenlig Mainig, isch s intrigiere duur d Schnitzelbängg vrdrängt woorde.

Wie mainsch das ?
Wenn me in e Baiz zem intrigiere yynegange n-isch, denn hets gly emol ghaise "Pst, pst, pst" well e Schnitzelbangg am singe gsii isch… und genau daas isch laider seer oft bassiert. Y find, ass s intrigiere mit de Joore iirgendwie vrsungge n-isch und mer hänns au mittlerwyyle abgleggt. Mer hänn beschlosse, ass mer nooem zNacht in d Baize geen, unseri Ärm vrschrängge und au d Schnitzelbängg loose.

     
 

Wie erläbsch Du d Fasnacht uss dr Sicht vomene Waggis ?

  Bruno:

Dr Waggis isch jo aigentlig "Dr Wagges ussem Elsass", also dr "Büür mit dr bloie Blüüse und de Holzschüeh", wo gärn Sprich gmacht het. My Groossbabbe isch "vo Müllhüüse kumme" und y bi no dr ainzig bi uns, wo an dr Fasnacht under dr Larve, "Elsässer Ditsch" reedet. S git vyyl Lyt, wo an Waage kemme und frooge "Wo hänn Iir dr Elsässer ?". Aber au daas isch alls wie weeniger gfroggt gsii, aber y has ainewääg immer no byybhalte.

     
 

Waiss me no, wie das anno 1946 gsii isch an dr Fasnacht ? Was het me sällmool uusegää ? Y main, d Zyte sin jo relatiiv haart gsii und Gäld het me au kains kaa…

  Bruno:

Friener isch Spreu no erlaubt gsii und nadyrlig seer vyyl ginschtig als d Räpplii… und die beriemt Saublootere hets jo au no gää, mit dääre het me de Lyt vom Waage oobenaabe uffe Kopf ghaue. Mimoose hets au immer gää, aber die Rose wo me hit het, nit… die sin vyl z diir gsii.

D Saublootere isch jo denn vom Comité vrbotte woorde…
Jo genau, vyl Waggis hänn die Saublootere an e Holzstäggli bunde und das het nadyrlig vyl Verletzige gää. Wo denn dr Spreu au no vrbotte woorde n-isch, het me sich zimmlig yydaile miesse, well mitem Spreu hänn mer nadyrlig rächt ummegsaut. An dr Fasnacht hänn mer 3 Statioone kaa, wo mer immer wider unsere Waage ney mit Spreu glaade hänn ;-)

     
 

Wie vyyl Materiaal wird normalerwyys annere Fasnacht vrbruucht bzw. uusegwoorfe ?

  Bruno: Jeede het pro Nomidaag:
- E groosse Sagg Räppli
- 3 Kischte Mimoose
- 2 Schachtle Orange
- und  Plüschdierli zer Verfiegig…
und nadyrlig no e baar Rose fir d Kätzli, zem e weeneli dr Schmuus z bringe ;-)
     
 

Gits e witzigi Anegdoote, wo n-emol erläbbt hesch ?

  Bruno:

Wo mer duur d Wäbergass gfaare sin, hets jo deert die "lyychte" Maitli gää und deert isch aini miteme Fuggsmantel drbyy gsii. Wo si iire Fuggsmantel uffgmacht het, sin mer abem Waage gstiige und hänn si so fescht mit Räppli und Rose yydeggt, ass me si fascht nimm gsee het. Am Schluss isch si denn zem Comité gange und het sich beschweert, ass mer iire dr Fuggsmantel verrisse haige. Mer sin hit no drvoo iiberziggt, ass mer das nit gsii sin… mer hänn si jo nit emol uffe Waage uffezooge… aber ebbe, mer hänn denn vom Comité ainewäg e
n-Aaschiss griegt und fir daas hänn mer e gueti Versicherig.

     
 

Wie gseets denn mit dr Ziilgenauigkait uss ? Hesch au scho n-emol e Schyybe braicht ?

  Bruno:

Jä nadyrlig… nit numme Schyybe. Aimool hänn mer sogaar d Reklaame vom Fäldpausch kaputt gmacht… aber nadyrlig nit eggsdra. Oobedraa isch e Büro gsi und deert hänn e baar nätti Kätzli ussegluegt… jo denn hänn mer halt e baar Orange uffegschosse ;-)

     
  Was beditet Dir d Fasnacht ?
  Bruno:

Seer vyyl… dorum ha n y au eso lang Fasnacht gmacht. Dr Waggis isch e n-Originaal und muess unbedingt erhalte blyybe… und das sag y au immer zue de Junge. Dr Waggiswaage gheert zem Cortège, wie d Ladäärne zem Moorgestraich.

     
  Mer wisses… daas Joor isch laider nit mit Waggiswääge… was ych perseenlig absolut nit noovollzieh kaa…
  Bruno:

Wäm saisch das… mer diskutiere ständig iiber das Theema und s isch wiirglig nit logisch fir ys, well mes besser hät kenne yydaile, zB. mit andere Route. Me het dr Wienachtsmärt kenne duurefiere, also hät me au ganz sicher e Leesig fir d Fasnacht gfunde… aber was wottsch do mache…

     
  Y ha glääse, ass es bi Eych no e n-alti Gaarde git ?
  Bruno:

Jä das stimmt und do bi n ych jetz drbyy… mer dräffe n-ys mindeschtens 1x im Moonet, sitze zämme, dien feyn ässe und dringge und vrzelle vo frienere Zyte.

     
  Was haltisch vonere Verschiebig vo dr Fasnacht in Summer ?
  Bruno:

Ych perseenlig wär seer drfiir… y vrstand s Argumänt vom Fasnachtscomité, ass me mit dr Fasnacht, dr Winter ussdryybt… aber y find, s git eso vyyl entdischti Fasnächtler und s isch besser e Fasnacht im Summer z mache, als gaar kaini… isch my Mainig.

     
  Wie hesch Du als glaine Bueb d Fasnacht erläbt ?
  Bruno:

Uff de Schultere vo mym Unggle und my Babbe isch uffem Waggiswaage gsi. Nadyrlig ha n y immer Schoggi vo mym Babbe griegt ;-)

     
  Mit wellere beriemte Perseenligkait (ka au scho gstoorbe sii), wurdsch gärn emool e scheene Oobe miteme feyne zNacht verbringe und aifach numme plaudere ?
  Bruno:

Mitem Jerry Lee Lewis, dasch e Boogie Woogie Legände und ych sälber bi absolut fanatisch uff Boogie Woogie.

     
  Was wirdsch an Fraue nie verstoo kenne ?
  Bruno:

Y wurds emol esoo saage… e Frau isch duur iir Wääse und iiri Anatomie, ganz anderscht uffbaut und fir mii perseenlig ischs schwäär, je nodämm… s kunnt druff aa… s git Fraue, wo e n-äänliggi Yystellig hänn, wie miir Männer und anderi sin ganz uff dr Frauelisyte… aber mer kennte jetz do no 2h lang mitenand diskutiere. Alli Achtig vo dääne, wo sich iiber all die vyyle Joore mit iire Fraue guet versteen… so wie n-ych, wo scho iiber 45 Joor mit sym Fraueli zämme n-isch ;-)

Ahjä…äh…öh….ok :-)

     
     
  Wenn platzt Dir emol dr Kraage ?
  Bruno:

Ych reagier seer empfindlig uff Ungerächtigkaite…

     
     
  Und bi was goot Dir s Häärz uff ?
  Bruno:

Bim Säägelfliege… y ha scho als glaine Bueb, Modäll baut und bi speeter au imene Säägelflieger Club gsii.

     
  Was wottsch no unbedingt mache in Dym Lääbe ?
  Bruno:

Y wott gärn emol e n-Expeditioon in d Bärge mache, denn d Natuur begaischteret mi seer.

     
     
  Was erhoffsch Du Dir vom 2022 ?
  Bruno:

Scheeni Fluugstunde ;-)

     
  Was hesch vo däre Corona Zyt mitgnoo ?
  Bruno:

Also, wenn y mi mit myyne Kolleege vrglyych, denn het mi die Gschicht nit wiirlig bedroffe. Y ha Kolleege, wo s moralisch zimmlig umghaue het und sogaar in Depressioone yynekeyt sin. Duur daas, ass y immer no in mym Bruef schaff – y bi sälbstständige Versicherigsbroker – bi n y mit ganz vyyle Lyt zämmekoo und mer hänn das Thema seer oft ussdiskutiert und das het mer seer gholfe. S isch halt e n-anderi Situatioon… myni Eltere hänn dr Krieg erläbbt und miir halt die Pandemie… und do muess me halt aifach brobiere, ass me guet drmit umgoo kaa und y bi bis jetz guet drmit klaar koo.

     
  Welli Fasnacht, isch denn fir Di die scheenscht gsii ?
  Bruno:

Y mach jo syt anno 1969 Fasnacht und do hets ganz scheeni Fasnachte gää. Voor e baar Joor hänn mer s Sujet "Bachelorette" kaa und myni Gspäänli hänn gmaint "S git numme ain, wo die mache kaa und das bisch Du" und denne ha n y die Bachelorette gspiilt und dasch fir mii die scheenscht Fasnacht ever gsii… aifach numme grandioos.

     
  Wenn so uff Dyni iiber 50 Joor Fasnacht zruggluegsch, was het sich fir Dii am maischte veränderet ? Het sich iiberhaupt ebbis veränderet ?
  Bruno:

Jä enoorm… friener sin mee Lyt am Stroosserand gstande, wo aazunde und zem intrigiere brocht hänn. D Fasnacht het e vyyl steergeri Verbindig kaa und y bi dr Mainig, ass es mitem Mix vo de vyyle Ussländer z due het. Si schigge d Kinder an Waage fiire und die steen miteme riisige Sagg doo und schreye "Waggis, Waggis".

Die Draditioon isch halt au nimm eso vrwuurzlet bi de Junge…s goot oft numme no ums Party mache und bi däre Party, het dr aggdiivi Fasnächtler kai Blatz me…
Das stimmt absolut..

     
  No e baar Schlaagweerter, bitte numme mit aim Satz beantwoorte...
  Basel... My Babbe isch zämme mit sym Brueder, iiber 45 Joor lang Bildhauer und Restauratoor in Basel gsii. D Stadt Basel het iine dr Uffdraag gää, sämtliggi Renovatioone am Basler Minschter duurezfiere und dorum het fir mii – duur my Babbe - Basel und s Minschter e ganz groossi Beditig…
  Ziiri... E Dail vo mynere Verwandtschaft woont in Ziiri und duur daas, ha n y die Stadt e weeneli kenneglehrt… und s isch nit esoo, ass d Ziircher und d Basler nit mitenand usskemme… ganz im Geegedail…
  Fasnachtsvirus... Foot bi mir im Dezämber aa, wenn y amigs zoobe duur d Stadt lauf und die vrschiidene Clique iiebe gheer…
  Fasnacht 2022... Miir dräffe n ys mit dr alte Garde und luege n-emol, was eso lauft in dr Stadt… mer sin aber sicher underwäggs…

Vyyle Dangg fiir Dyni Antwoorte