Marc Sprunger - Dambourmajoor vo dr Fasnachtsclique "VKB 1884"
   
 

 

Die "Vereinigte Kleinbasler", oder au bekannt als "VKB", sin 1884 grindet woorde und somit die ältischt Fasnachtsclique in Basel. Hänn Iir d Fasnacht erfunde ?

  Marc:

Die Froog griege mer immer wider gstellt und die klaari, dytlig Andwort isch nadierlig: "Jo hänn mer"... Naiiii nadierlig nit. Mer sin die ältischt, no besteehendi Clique in Basel... also erfunde hänn mer d Fasnacht nit, aber mer hänn vyyl richtig gmacht, ass es ys no git.

138 Joor hänn Iir mittlerwyyle uffem Fasnachtsbuggel... das muess me sich emol voorstelle... unglaublig :-).
Wie het me 1885 bi dr "VKB" no Fasnacht gmacht ? Waiss me das no ?
Jä mer hänn e Chronik und au e seer flyssige Chronischt wo das alles seer guet pflägt. Wenn me die Chronik eso duureblettered, denn findet me wiirglig no ganz irrwitzigs Zygs. Schaad gits nimm sovyyl Dokumänt uss sällere Zyt, wo das no zaige.

Sin die Sujets zue sällere Zyt no bissiger gsii als hitte ?
Woorschyns aifach anderscht bissiger als hitte und vellicht wurde die Sujets vo friener, in dr hittige Zyt au nimm als bissig verstande wäärde. Dr Zuegang zue de Meedie het me jo noonig eso ka wie hitte und dorum sin die
Sujets au eenter lokaaler gsii.

     
 

D "VKB" isch bis 2004 e Männer Clique gsii und dernoo sin die eerschte Maitli uffgnoo woorde. Ganz unbroblemaatisch isch das jo nit iiber d Biini gange oder ?

  Marc:

S het nadierlig e riise Uffschrey gää...

Und hitte reedet kai Mensch me drvoo...
Nai... s isch fir uns au dr richtig Schritt gsii...

Wobyy, mer reede do jo vo "Maitli" und das het jo scho e riise Uffschrey gää und nit vo erwaggsene Fraue...
Genau... dr Passus isch gsii "Sobald s eerscht Maitli die Jungi Gaarde duurloffe het und in Stamm kunnt, isch dr Stamm au fir alli andere Fraue offe"... also au fir erwaggseni Fraue. Aber bis es denn sowyt gsii isch, sin mindeschtens no 5 Joor vrgange.

Aber bereut hänn Iirs nie oder ?
Ganz und gaar nit, s isch fir unseri Clique aini vo de wichtigschte und beschte Entschaid gsii.

     
 

Wie gseets mitem Noowuggs uss ? Ischs schwiirig, jungi FasnächtlerInne z finde ?

  Marc:

Jo und Nai... y sag emol soo, im Momänt gits kaini Brobleem. Was mer nadierlig jetz gspiire, sin die letschte 2 Joor ooni Fasnacht. Fir die Glaine, wo nonie Fasnacht gmacht hänn wells scho 2 mol abgsait woorde n-isch, wird denn nadierlig s Tennis- oder Fuessballspiile wider indressanter... dasch nadierlig ganz klaar.

Das verstand y absolut und isch au fir die andere Clique e groosses Theema. Jetz het me ändlig emol e baar jungi FasnächtlerInne und denn findet kai Fasnacht statt. Aber dr Uffwand zem de Junge ebbis biete z kenne, isch scho seer grooss oder ?
Y glaub, as es e Stigg wyt au vo de Junge erwaartet wird.. wobyy mer de Junge, näbbscht drummle und pfyffe, au esoo scho immer e guete Raame botte hänn... tolli Wucheänd, luschtigi Summerpläusch, etc.

     
 

Bi sonere groosse Clique isch dr Zämmehalt bsunders wichtig... was isch denn dä bsunderi "Spirit", wo d "VKB" ussmacht ?

  Marc:

S familiääre... drotz der Greessi vo däre Clique. Mer laufe jo an dr Fasnacht nit alli zämme (alli Gruppierige vo dr "VKB") vom Moorgestraich bis zem Ändstraich, aaber s git die Momänt, wo mer als Gsamtclique laufe und do ha n y mi als glaine Bueb scho immer seer druff gfrait... und mach y jetz au als Dambourmajoor.

Das stoot jo au bi Eych im Käller so gschryybe gäll ?
Jä... im alte Käller - wo iibrigens grad umbaut wird - isch gstande "Doo isch d VKB dehaim" und fir mii isch das immer wie ne zwaits dehaim gsii und das spricht halt ebbe scho fir das "familiääre".

     
 

Marc, Du bisch in dr Funggdioon als Dambourmajoor vom Stamm underwäggs. Was het Di drzue bewooge, das Ämtli z iibernää ? Du hesch jo vorhäär drummlet gäll ?

  Marc:

S git 2 verschiideni Grind... zem aine ha n y mi welle mee im däm Verain engagiere und zem andere ha n y seer vyyl drummlet. In dääre Zyt bi n y no bim "Top Secret Drum Corps" drbyy gsii und duur d Wält tinglet und iirgendwenn het me aifach emol gnueg vom drummle.

Das ka n y absolut vrstoo... und denn hesch gwäggslet... wie lang machsch das jetz scho ?
Jo, y ha n-emol welle d Fasnacht uff e n-anderi Aart erlääbe und bi jetz im 5. Joor als Dambourmajoor underwäggs... allerdings als Dambourmajoor effeggdiiv gloffe, bi n y eerscht s 2. Mol ;-)

     
 

Friener isch dr Dambourmajoor au e weeneli d Galioonsfiguur vo dr Clique gsii... seer beachtet, seer gschetzt und isch aigentlig e seer eerehafte Boschte gsii, miteme ganz groosse Wärt in dr Clique. Isch das hit immer no eso ?

  Marc:

Y glaub, ass me hit weeniger obrigkaitsheerig isch ;-), und dorum hets – im Geegesatz zu friener - woorschynlig au dr Charakter e weeneli verloore… aber numme e Requisit wo zwische Drummler und Pfyffer lauft, bi n y au nit und wott y au nit sii. Y dängg, ass es immer no e n-aagseehene Boschte n-isch… vellicht eenter ussem Aspäggt "Dä macht au ebbis fir dä Verain".

Aber Du organisiersch die Fasnacht fir Eyre Stamm ?
JEIN... mer hänn e Sujetkommission und in dääre Sujetkommission isch - von Amtes wegen - au dr Dambourmajoor. D Route und dr komplett Ablauf vo dr Fasnacht wird vom Dambourmajoor - gmainsaam mitem Zuugscheff - feschtgleggt.

     
 

Gits au emol e Momänt an dr Fasnacht, wo nit vyl iiberleege muesch und aifach emol gniesse kasch ?

  Marc:

Jä die Momänt gits, sin aber eenter zOobe bim gässle... oder wenn y emol e Marsch aasag, wo e weeneli lenger goot und y waiss, ass y e bitz mee Zyt ha... denn findet s gniesse statt und das Erläbnis isch denn seer intensiiv.

     
     
 

Welles sin Dyni 3 goldige Reegle als Dambourmajoor ?

  Marc:

Y ha kaini 3 goldige Reegle, noodääne ych funggdionier... me muess bresänter sii und ka nit aifach in dr Baiz hogge blyybe, numme wells 02:00 am Moorge n-isch und y nimm mag. Solangs no e hampfle git wo wyterlaufe wänn, denn find y gheert dr Dambourmajoor drzue. Y finds au wichtig, ass d Marschusswaal fir d Clique attraggdiiv und abwäggsligsryych isch.

     
 

Dr Moorgestraich isch jo immer e ganz spezielle Momänt... me isch aagspannt und wott meegligscht zem optimaale Zytpunggt "Maaaarsch" schreye... nämmlig genau denn, wenn s Liecht abgoot. Wie machsch das, ass es perfäggt uff e Gloggeschlaag basst ?

  Marc:

Dasch wiirglig e ganz spezielle Momänt und y ka saage, ass y doo innere unglaublig komfortaable Laag bi... denn dr Moorgestraich sag nit ych aa, sondern dr Dambourmajoor vo dr Alte Gaarde... und dasch au scho immer eso gsii bi dr "VKB". Drfiir daarf y denn d Fasnacht abwingge.

Das haisst, Du kasch ihm denn d Schuld gää, falls s "Aasaage" nit uff dr Gloggeschlaag basst ;-)
Genau... und y bi vellig Diefenentspannt ;-)

     
 

Bim Moorgestraich stoot me so doo, waartet bis s Liecht abgoot und denn goots ändlig loos... was goot do in Dir voor ?

  Marc:

Do bassiert eso vyyl in miir, ass y das gaar nit wiirglig in Woort fasse kaa. S isch esoone unglaubligi Fraid und mänggmool fliesse au Drääne under dr Laarve... s isch aifach e unbeschryybligge Momänt.

     
 

Isch dr Majoor e Diva ?

  Marc:

Y wurd saage... Jä.

Aimool im Joor daarf me schliesslig au emol e Diva sii oder ?
Jä und y wird je lenger je mee zer Diva. Voorallem bi dr Goschdym- und Laarvethematik, well me au als wie mee uusefindet, was me aigentlig wott. Doch y glaub scho, ass ych e Huuch vonere Diva bi und das gseet me au am Bummel... wenn dr Dambourmajoor mit Stolz d "Freye" durablauft und syni Clique aafiehrt... De muesch Di emol druff achte, d Dive druggt denn bi alle Majoore duure ;-)

     
 

Was beditet fir Dii d Fasnacht ?

  Marc:

Seer, seer vyyl... vorallem dieffi Frindschafte, groossaartigi Erläbnis mit dääne Frindschafte und nadierlig au als Fasnächtler e staargi Identifikatioon mit Basel.

     
 

Wenn foot bi Dir d Fasnachtsstimmig so richtig aa ?

  Marc:

Y waiss, ass dr "Vogel Gryff" jo nit mit dr Fasnacht z due het, aber vo dr Zyt här isch dr "Vogel Gryff" halt au am Aafang vo alle Voorfasnachtsveraastaltige und denn meergt me au, ass das Fasnachtslääbe langsam in die alte Gmiir (Gemäuer) kunnt. Aber ebbe... s Gfiil, ass d Fasnacht langsam voor dr Diire stoot, isch im Jänner wenns glepft im Glaibasel.

     
 

Het sich d Fasnacht im Geegesatz zue friehner veränderet und wenn jo, in welli Richtig ?

  Marc:

D Fasnacht het sich sicher veränderet, aber nit unbedingt innerhalb vo de Clique, sondern dr ganz Raame wo d Fasnacht stattfindet. Si entwigglet sich langsaam zunere Zueschauerfasnacht, was aber d Basler Fasnacht aigentlig nie gsii isch.

Wie mainsch das ?
Me ka jetz au miteme gschminggte Gsicht am Stroosserand stoo und luschtig sii und do main y nadierlig nit die glaine Gnäggis. D Schwoobe-Fasnacht het langsam Yyzuug ghalte und y has immer seer scheen gfunde, ass unseri Fasnacht ebbe nit eso isch. Zem aine mache mer kai Fasnacht firs Bublikum und zem andere spiilt s Bublikum - wo nit aggdiiv an dr Fasnacht mitmacht - langsam e Rolle, wo nit em Kärn vo dr Basler Fasnacht entspricht.... dasch myni Mainig.

Heschs Gfiil, ass es sich langsam zunere Party-Fasnacht entwigglet ?
Jo genau und das isch unseri Fasnacht nit... und s Kläbbergässli haisst nit umesunscht esoo und y glaub au, ass dr Respäggt geegeniiber de Fasnächtler als wie mee verloore goot.

     
  Was isch in Dir voorgange, wo d Fasnacht im 2020 kurzfrischtig abgsait woorde n-isch ?
  Marc:

Wo d Mäldig koo isch, bi n y grad mitere Grubbe vo Fasnächtler am Ski faare gsii. S het zwoor vorhäär immer Sprich iiber e allfälligi Absaag vo dr Fasnacht gää, aber fir meeglig ghalte hätte mer das nie. Wo denn wiirglig d Absaag koo isch, hänn mer alli an e Witz dänggt... und denn foot me langsaam afo realisiere, was das wiirglig beditet. Eso wiirglig bewusst isch aim das am Sunntig voor dr Fasnacht woorde, wo mer wie immer d Ladäärne yypfyffe hänn und aaschliessend zem zNacht sin. S isch zwoor e luschtige n-Oobe gsii, aber s het aifach ebbis gfählt und bim Moorgestraich - wo kaine gsii isch - ha n y Drääne in de n-Auge kaa well y gmeergt ha, ass mer seer vyl fählt.

     
  Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?
  Marc:

Mitem änglische Modedesigner Jeremy Hackett. Är isch uff die klassisch, änglischi Moode ussgrichtet, aber immer miteme Augezwinkere... abgsee drvoo het är no e n-Aston Martin Sammlig ;-)

     
 

Wenn fir 1 Daag e Frau sii kenntsch, was wurdsch als eerschts mache ?

  Marc:

S glyyche wie jetz au... als allereerschts uffs WC goo ;-)

     
 

Was erhoffsch Du Dir vom 2022 ?

  Marc:

Ass dä Saich (Corona) ändlig umme n-isch und mer wider e Lääbe ooni Yyschrängige gniesse kenne... und nadierlig e Fasnacht ooni aazoogener Handbräms.

     
 

Was hesch vo dääre Corona Zyt mitgnoo ?

  Marc:

Ganz pragmaatischi Sache, zB. ass me nit fir jeedi Sitzig vorOort sii muess, sondern das au gmietlig vo Dehaime uss per Zoom mache kaa..

Het sich d "VKB" amigs au per Zoom droffe ?
Mer hänn letscht Joor unsere Bummel per Zoom duuregfiehrt..

Wie isch denn das gange ?
Mer hänn in dr "Safere" fir alli wo das hänn welle, e Nachtässe organisiert und ussgliiferet. Dernoo hets e virtuells Pub-Quizz gää, wo me het kenne mitroote... elai oder innere Grubbe und dasch wiirglig e seer luschtige und glungene Oobe gsii.

     
  No e baar Schlaagweerter, bitte numme mit aim Satz beantwoorte...
  Basel...

Doo wo n y dehaim bii...

  Ziiri...

Do bi n y nit dehaim, finds aber e lässigi Stadt mit lässige Lyt...

  Nitfasnacht...

E grauehafts Erläbnis, wo hoffentlig bald umme n-isch...

  Fasnachtsvirus...

Zimmlig frieh drmit aagsteggt woorde und git zem Gligg kai Medikamänt drgeege...

  Källerumbau...

Guet wenn dä Umbau ändlig emol feertig isch... s wird langsam Zyt, ass mer wider e Dehaim hänn...

  Fasnacht 2022...

Y hoff ass si stattfindet und wenn si stattfindet, denn hoffentlig ooni Yyschränggige.

Vyyle Dangg fiir Dyni Antwoorte