Céline Helfenberger - Majoorin vo dr Guggemuusig "Fährischiffli"
   
 

 

1979 isch d Guggemuusig "Fährischiffli" grindet woorde, e stolzi Zaal find y. Wie vyyl vo dääne 43 Joor bisch Du scho drbyy ?

  Céline:

Jetz sin s genau 10 Joor...

Gits Grindigsmitgliider, wo no aggdiiv drbyy sin ?
Nai, Grindigsmitgliider gits laider kaini me bi n-ys.

     
 

Was schetzisch Du am maischte an de "Fährischiffli" ?

  Céline:

As mer offe mitenand reede und au Diskussioone zueloo kenne. Nadierlig au dr Zämmehalt und das sich geegesytige motiviere, au wenns aim emol nit eso guet lauft. Me het immer e n-offes Oor und isch firenand doo.

Isch jo au bsunders wichtig in dääre Corona Zyt...
Genau...

     
 

Was isch in Dir voorgange, wo me d Fasnacht 2020 relatiiv kuurzfrischtig abgsait het ?

  Céline:

Y ka mi no genau draa erinnere... mer in alli im Büro voorem Radio gsässe und hänn em Bundesroot zuegloost. Wo denn die Absaag koo isch, sin mer nadierlig alli seer entdischt gsii. Y muess allerdings au saage, ass ych s im Voorfäld beraits gaant ha, ass so ebbis koo wurd. Nadierlig ha n ys schaad gfunde, aber ha au Verständnis fir
die Entschaidig kaa.

     
 

Du hesch jo ganz lang im Keenigsregischter gspiilt, also bi de Posuune ;-)
Was um Gottswille het Di denn drzue bewooge, zuekinftig als Majoorin Fasnacht z mache ?

  Céline:

Also dasch denn scho no e Momänt gange, bis es sowyt gsii isch. Y ha zeerscht Posuune gspiilt, dernoo Paugge und denn wider Posuune. Denn bi n y 1 Joor als Stv. vo unserem Majoor underwäggs gsi und ha denn wider aagfange Bässli spiile... jo und jetz bi n y definitiiv Majoorin.

OK, wieso aifach wenns kompliziert goot ;-). Aber wieso hesch amänd vom Spiil - wo me esoone loggeri Fasnacht gniesse kaa - in dä aasträngendi Job vo dr Majoorin gwäggslet ?
Als Stv. lauft me immer no im Spiil und ka si Instrumänt spiile, daas het mer seer vyyl Spass gmacht. Wo n-ys denn dr Majoor mitdailt het, ass är uffheert, hets ghaisse "Du als Stv. bisch jetz d Majoorin". Y ha mer denn das lang iiberleggt, bis y das Ämtli aagnoo ha... s isch jo mitere groosse Verantwoortig verbunde.

     
 

Was macht für Dii d Faszinatioon vo dr "Majoorin" uss und wieso duesch Du Diir das aa ?

  Céline:

Y due miir das aa, well me esoone Flamingo-Huffe wie das d "Fährischiffli" sin, aafiere kaa. Drzue kunnt, ass me saage ka, was gspiilt wird und eso bresentiere kaa, was me immene Joor musikaalisch glaischtet het. Als Majoorin ka me ganz vyyl mitnää, zB. Verantwoortig iibernää, Spass am aazaige vo de Stiggli und dr Verain z bresentiere. au dr Verain bresentiere. S isch halt scho lässig wenn me ganz voorne lauft und vo hinte esoone musikaalischi Wand fiire kunnt... dasch aifach e meeeega Gfiil.

     
 

Was goot in Dir voor, wenn am Fasnachtsmäntig s eerscht Mool in dr Formatioon stoosch und zem Abmaarsch
pfyffsch ?

  Céline:

Y dängg "Hoffentlig rutsch y nit uss und key um..."

Wieso sollsch Du ussrutsche ?
Well s Drammglais grad voor mir isch... aber das liggt an de Emotioone ;-)

     
 

Welles sin Dyni 3 goldige Reegle als Majoorin ?

  Céline:

1) As si miir zueloose, wenn y ebbis sag
2) S richtige aazaige vom Yysatz und de Stiggli
3) Weenig Alkohool dringge

     
     
 

Wie erläbsch Du d Fasnacht als Majoorin ?

  Céline:

Y bi nit eso entspannt wie myni Gspänli im Spiil, well die jo aifach hindedryy laufe kenne. Y ha aber s groosse Gligg kaa, ass dr "alt" Majoor no drbyy gsii isch und mi immer seer understitzt und motiviert het... au wenns emol nit so guet gloffe n-isch.

Sprichsch Du Dii vorhäär iiber d Marsch-Route ab ?
Jo mer hänn scho e weeneli e Blaanig und wenns halt nit klappt, denn laufe mer no e Rundi. Me muess halt au e weeneli improvisiere kenne.

     
 

Gits au emol e Momänt, wo Du d Fasnacht eso richtig gniesse kasch, ooni immer an alles dängge z miesse ?

  Céline:

Jo wärendem Cortège... do het me sy fixes Brogramm und muess nit grooss noodängge, sondern ka numme laufe und im richtige Momänt s Stiggli aapfyffe... do isch me seer entspannt. Aber zOobe muess me konzentriert sii, well jeede kunnt und frogt wenn s loos goot, wie lang d Pause sin, ob me no kurz voorhäär uffs WC ka, me het kalt oder frogt, ob me mit oder ooni Laarve spiile, etc. etc.

     
 

Was beditet fir Dii d Fasnacht ?

  Céline:

Mittlerwyyle beditet fir mii d Fasnacht, 3 Daag abschalte und gniesse, Spass z ha und bresentiere z deerfe, was me e Joor lang giebt het

     
 

Wenn foot bi Dir d Fasnachtsstimmig so richtig aa ?

  Céline:

Bi dr Blaggedde-Vernissage... denn waiss y, ass es nimm lang goot bis zer Fasnacht. Wobyy, so richtig, richtig, richtig loos goots denn eerscht 3 Daag vor dr Fasnacht.

Wieso 3 Daag vorhäär ?
Well am Frytig und Samschtig unseri Uffdritt an de Waage-Vernissage sin und denn frai mi eso richtig, bis es ändlig loosgoot... und y bi denn esoo ebbis vo baraat.

     
 

Isch d Majoorin e Diva ?

  Céline:

Y glaub, as y seer unagnääm sii ka, aber das muess me amigs au. Me ka nit immer alles logger und laarifaarimässig nää und dasch denn au dr unagnäämi Dail vom Majoor sii. Y bi iiberhaupt nit dr Typ wo sträng isch, aber mänggmool ischs aifach nootwändig und me muess es duurezieh... und dorum glaub y scho, ass y mänggmol e weeneli e Diva bi.

     
  Wie leen sich Dyni Gspäänli fiere ?
  Céline:

Dasch amigs daagesabhängig. S git Broobe, wo si aasträngend und miesam sin und denn muess me sich halt e weeneli aabasse und anderi Stiggli spiile, als me aigentlig het welle. Me muess aabassigsfähig sii.

     
 

Wenn oder bi waas goot Dir s Härz uff ?

  Céline:

Wenn y myyni Lyydeschaft ussiebe ka...

Und was isch denn Dyni Lyydeschaft ?
Basketball spiile...

     
 

Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?

  Céline:

Mit dr Pink... well si tolli Lieder schrybt und au in dr Effentligkait, kritischi Theeme aaspricht.

     
 

Was wirdsch an Männer nie verstoo kenne ?

  Céline:

As si amigs nit eso wyt dängge, wie n ych dängg...

     
 

Wenn 1 Daag e Maa si kenntsch, was wurdsch als eerschts mache ?

  Céline:

Im Stoo an e Baum saiche...

     
 

Wär wurdsch am liebschte ins Dschungelcamp schigge ? Sott e Perseenligkait sii...

  Céline:

Dr Baschi Dürr...

     
 

Was erhoffsch Du Dir vom 2022 ?

  Céline:

As Corona nit immer s eerscht Thema isch...

     
 

Was hesch Du vo dääre Pandemie mitgnoo ?

  Céline:

Y bi friener immer e Duracell Häsli gsii... immer voll duureblaant und ussbuecht. Aber die Corona Zyt het mi wiirglig entschleunigt und het mer unglaublig guet doo... aber jetz isch wider guet und s "Alte" daarf wider zruggkoo ;-)

     
 

Wenn blatzt Dir dr Kraage ?

  Céline:

Wenn y scho x-mol ebbis gsait haa und me s immer no ignoriert

     
  No e baar Schlaagweerter, bitte numme mit aim Satz beantwoorte...
  Basel...

Dehaim sii...

  Ziiri...

Verbind y mit Backstreet Boys, well y aimol amene BSB Konzärt in Ziiri gsii bi…

  Nitfasnacht...

S git kai Nitfasnacht… s wird e Fasnacht gää…

  Männerschnuppe…

Sin ganz aarmi Lyt und y bi für si doo…

  Fasnachtsvirus...

Isch vo mym Babbe yypflanzt woorde…

  Gmischti Gugge...

Turbulänti Sach und hormonell gstiirt…

Vyyle Dangg fiir Dyni Antwoorte