Ladärnedrääger Nico

	Nico Figini - Ladärnedrääger vo dr Fasnachtsclique "Verschnuuffer"

Nico, Du hesch jo e ganz bsundere Job an dr Basler Fasnacht, e Job wo mit ganz vyyl Schwaiss, Schmäärze und Gwicht verbunde n-isch. Syt 20 Joor bisch Du Ladäärnedrääger oder "Lampeschlaifer" wie me im Volggsmund eso scheen sait... Du empfindisch aber s Wort "Lampeschlepper" nit als Belaidigung oder ?

Nico:

Nai gaar nit und s stimmt jo au... am Aafang vo dr Fasnacht drait me d Lampe und am Änd schleppt me si ;-)

Du draisch also d Fasnacht so quasi uff Dyne Schultere... wie bisch Du doo drzue koo und voor allem, wieso duesch Du Dir das aa ?
Y kumm ussere Halbfasnachts-Familie und ha in dr Junge Gaarde vo de "Verschnuuffer", de "Verschnuuffer Gnepf", drummlet. My Drummel-Talänt isch am Aafang no doo gsii, aber mit dr Zyt isch nadierlig au s Thema "iebe" drzue koo. Y ha aifach kai Luscht ka, im Summer myni Zyt im Cliquekäller zem iebe z vrwände und iirgendwenn isch denn dr Momänt koo, wo s "Talänt" aifach nimm glängt het. Y ha mer iiberleggt, was y sunscht no mache kennt und ha denn drmit aagfange, d Ladäärne vo dr Junge Garde an dr Fasnacht z draage...nit z letscht au, wells drfiir Gäld gää het und wenn me scho Fasnacht mache kaa und eerscht no Gäld drfiir griegt... wieso nit ? ;-) ;-)

Und wenn hesch d Ladärne im Stamm drait ?
Mit Aafangs 20 bi n y nooere Pause wider drzue koo und ha esoo näbem Studium no e bitz Gäld fir die baar Daag Ladärne draage griegt. Am Aafang ischs no wäggem Gäld gsii, aber dasch mittlerwyyle iiberhaupt nimm dr Fall.

Aber ainewäg die Froog... wieso duesch Du Diir das aa ?
Y ka n-esoo e Dail vo dr Fasnacht sii, ooni im Summer iebe z miesse... ganz aifach.

Was fasziniert Di denn am "Lampe" draage ?

Nico:

Vor 5-10 Joor hänn mer emol e Lampe ka, wo eso hässlig gsii isch, ass y mi wiirglig gschämt ha die z draage.
Syt dämm schryyb y immer s Woort "schön" in my Vrdraag yyne, also "Ich verpflichte mich, die (schöne) Laterne zu tragen" und dr Ladäärnescheff wo scho syt 40 Joor drbyy isch, het immer e Lache im Gsicht wenn är das liist.

Und was macht d Faszinatioon uss ?
E Ladärne isch ebbis eggsdreem scheens und am Moorgestraich die scheeni Kunscht uff de Schultere draage z deerfe, isch halt scho ebbis wunderbaars.

Esoone Lampe isch jo nit grad e Fliegegwicht... wie schweer isch die Ladärne ?

	Nico:	Y glaub, me kas gar nit in KG ussdrugge... wenn d Fasnacht z Änd goot, reede mer vo Tonne ;-). Kunnt halt au immer e weeneli druff aa, obs rägnet oder kalt isch und wie voll d Gasfläsche sin... aber grundsätzlig ka me saage, ass jeede ebbe 20Kg uff syne Schultere drait.

Wie vyyl Drääger sin iir denn und y dängg, ass das immer s glyche yygspiilte Team isch oder ?

Nico:

Mer sin 5 Drääger pro Fasnacht und in de letschte Joore het sich aigentlig d Zämmesetzig nit gänderet.

Isch dr 5. Maa e Nootfalldrääger ?
Nai, mer wäggsle n ys geegesytig ständig ab, esoo ass me au emol e Pause het. Fir Ussestehendi gseets amigs nooeme gressere Krampf uss, ass es amänd wiirglig isch... doo mer e guet yygspiilts Team sin, goot das seer guet.

... und im Glyychschritt laufe...
Jo genau, dasch aigentlig s wichtigscht. S schlimmschte n-isch, wenn me amene Hang stoot... oder generell stoo blybt, denn druggt s ganze Gwicht vo dr Ladäärne uff d Schultere.

Drotz Schulterbolschter ?
Jä... unseri Schulterbolschter sin in dr Heechi verstellbaar und unseri Schultere wärde jeedes Joor ussgmässe.
Eso gits e Referänzpunggt und die andere Bolschter stellt me denn druff yy. Wenn me das nit macht, denn stimmts in dr Heechi nimme und iirgendebberem druggts denn ständig uff d Schultere... das gseet me amigs guet bi de andere Cliquene.

Du hesch mer voorhäär gsait, ass Eyri Gilde langsam ussstiirbt… isch das numme e Gfiil vo Dir oder isch das wiirglig
eso ?

	Nico:	Y sags emol esoo, d Gilde vo Drääger wo das Joor fir Joor mache, wird usstärbe. Aidaagesfliege wie StudäntInne wo das gärn emol mache wänn, findet me immer wider… aber si laufe nit im Schritt, luege au nit uff daas und denn wird’s seer miehsaam. D Lampe isch schweer, me lauft bi Wind und Wätter und dorum heere die maischte nooere Fasnacht wider uff.

Dr Wind isch jo e groosses Brobleem... isch Eych scho n-emol e Ladärne umgflooge ?

	Nico:	Nai, aber fascht… do hets pro Syte jeewyyls 2 Voordääbler bruucht, wo wägge de Windböe abgsicheret hänn.

Wie gseet denn Dyni Voorberaitig uff die "3 scheenschte Daag" uss ?

	Nico:	3 Moonet vor dr Fasnacht gang y intensiv im Fitnessstudio go trainiere und 2 Wuche vorhär isst me numme no Pouletbrischtli und Ryss... NAIIII sicher nit ;-). Me ka sich nit wiirglig druff voorberaite, well s Gwicht vo dr Ladärne halt scho ungwoont isch fir dr Keerper.

Wie goots Dir am Donnschtigmoorge ? Wehmuet ?

	Nico:	Jä scho... wenn me d Ladärne uff iirem letschte Umgang bis zem "Bäumli" drait, si denn verabschiidet und denn dunggel wird... jä, dasch denn scho mit seer vyl Wehmuet vrbunde.

Ab Sunntig bisch jo im Duuryysatz. Gits au emol e Momänt, wo d Fasnacht e weeneli gniesse kasch ?

	Nico:	Jä definitiiv... zem Byspiil dr Moorgestraich bi scheenem Wätter, do hogg y oft in dr Pause uffem Holm und lueg mer das Liechtermeer vo de verschiidene Ladärne aa, wo sich hii und häär beweege.

Wie erläbsch Du d Fasnacht uss dr Sicht vom Ladärnedrääger ?

	Nico:	Mit yygschränggter Sicht ;-). Y lauf hinde rächts und ha immer e Ladärnewand voor miir, do gseet me nit wiirglig vyyl vom Gschee.

Welles sin Dyyni 3 goldige Reegle ?

	Nico:	1) D Ladärne isch e zentraals Elemänt, also muess me pinggtlig und ussgschloofe sii... 2) Numme moderaat Alkohool dringge... 3) D Fasnacht gniesse...

Was beditet fir Dii d Fasnacht ?

	Nico:	Seer vyyl... y find au, ass unseri Fasnacht zu Rächt zem Wältkultuureerb gheert. Si isch fir mii e wunderbaari Symbioose zwische draditionelle Elemänt und Innovatioon. D Vyylfalt vo dr Fasnacht und wie die Sujets ussgspiilt wärde, fasziniert mi eggsdreem. D Fasnacht isch wie n-e Mandala, si foot aa, isch denn volländet und wird nooem Ändstraich zämmegwischt... und näggscht Joor gits wider ebbis Neys.

Wenn foot bi Dir d Fasnachtsstimmig so richtig aa ?

	Nico:	D Fasnachtsstimmig kunnt langsam, wenn mer am Frytigoobe unsere Voorfasnachtshogg im Cliquekäller hänn, dr Zeedel gläse wird und mer die letschte Details bespräche… und ganz richtig aafoo duets, wenn mer bim Rest. "Goldige Stärne" looslaufe und d Ladärne yypfyffe.

Het sich d Fasnacht im Geegesatz zue friehner veränderet und wenn jo, in welli Richtig ?

Nico:

Y hoffs, ass sich d Fasnacht veränderet… y find, si muess sich au verändere. Was mer halt ufffallt isch, ass vyyl Kinder nimm die klassische Goschdyym vo friener aahänn, wie zem Byspiil e Blätzlibajass, sondern eso kaufti Billiggoschdyym…

Wie ne Superman oder Ninja Turtles…
Jo genau… s isch jo nit negatiiv gmaint, aber y finds halt scho wichtig, ass me de Kinder unseri Fasnachtskultuur vermittlet.

Mit wellere beriemte Perseenligkait (ka au scho gstoorbe sii) wurdsch gärn emol e scheene Oobe miteme feyne zNacht verbringe und aifach numme plaudere ?

	Nico:	Barack Obama...

Was wirdsch an Fraue nie verstoo kenne ?

	Nico:	Do gits jetz nit spezifiischs… s git au e huffe Sache, wo n y an Männer nit verstand ;-)

Wenn fir 1 Daag e Frau sii kenntsch, was wurdsch als eerschts mache ?

	Nico:	S wurd mi wunder nää, ob e Gebuurt wiirglig eso schlimm isch ;-)

Wär wurdsch am liebschte emol ins Dschungelcamp schigge ? Sott e Perseenligkait sii...

	Nico:	Alain Berset...

Was erhoffsch Du Dir vom 2022 ?

	Nico:	As das Ganze emol e n-Änd het und wider e Fasnacht stattfinde kaa.

Was hesch vo dääre Corona Zyt mitgnoo ?

	Nico:	As en digitaale Wandel relatiiv schnäll meeglig isch und me sich au wider uff anderi Wäärte bsinne sott.

No e baar Schlaagweerter, bitte numme mit aim Satz beantwoorte...

	Basel...	Isch dr roote Faade duur mi ganzes Lääbe... also vo dr "Wiege" bis zem hittige Daag...
	Ziiri...	Isch au e Stadt in dr Schwiz... und benyyd si um iire See...
	Heerbschtmäss...	E huffe Kindhaitserinnerige... schmeggt guet in dr Stadt... s lyychtet alles mit faarbige Lämpli und gang immer no gärn uff alli Baane, am liebschte uff d "Enterprise"...
	Nitfasnacht...	Hänn mer 2x kaa und längt jetzt definitiiv...
	S letscht Moll…	Wirds am Donnschtigmoorge haisse "Achtung ab..." und denn isch myni Ära als Ladäärnedrääger abgschlosse... Hesch e weeneli Angscht voor däm Momänt ? Angscht nit, s isch e scheeni Zyt gsii... sicher au e bitz Wehmuet, aber y frai mi au, wider emool am Sunntigzoobe an "Chienbäse" in Lieschtel z goo und als Passive Fasnacht mache z deerfe (vellicht schaff y das aber au nit ;-))...
	Fasnachtsvirus...	Im Geegesatz zue Corona, isch das ebbis positiivs wenn me drmit aagsteggt wird, draits e Lääbe lang in sich und s git kai Impfig drgeege...
	Ladäärne gmoolt oder druggt ?	Definitiiv gmoolt... dasch fir mii ganz klaar. Die Lyychtkraft und Lebändigkait ka aim numme e gmoolti Lampe gää...
	Fasnacht 2022...	Y hoff ass die Fasnacht imene wiirdige Raame stattfinde kaa, eso wie mer das bis dato kennt hänn…

Vyyle Dangg fiir Dyni Antwoorte